KUA hili ʼaho e lua, pea ʼe tou nonofo nei ʼi te Felianima pōʼuli. Ko Sesu pea mo tana ʼu ʼapositolo e toko 12 neʼe nātou fakatahi ʼi te kogafale fata ki te kaitahi ʼo te Pāsikate. Ko te tagata ʼaē ʼe koutou sio ki ai ʼe hū ki tuʼa, ʼe ko Sutasi Isikaliote. ʼE ʼalu ia ʼo tala ki te ʼu pelepitelo peʼe lava feafeaʼi hanatou puke ia Sesu.

ʼI te ʼanāfi, neʼe ʼalu ia Sutasi kia nātou pea ina fehuʼi age: ‘Koteā te meʼa ʼaē ka koutou foaki mai kia ʼau mo kapau ʼe ʼau tokoni atu kia koutou ke koutou puke ia Sesu?’ Neʼe nātou ʼui age: ‘ ʼE mātou foaki atu anai te ʼu foʼi piesi siliva e tolugofulu.’ Koia ʼi te temi nei, ʼe ʼalu ia Sutasi ki te ʼu tagata ʼaia, ke ina taki ia nātou kia Sesu. ʼE mole kovi koa la te meʼa ʼaē ka ina fai?

Kua ʼosi te kaitahi ʼo te Pāsikate. Kae neʼe kamata e Sesu te tahi kaitahi makehe. Neʼe ina foaki age te pane ki tana kau ʼapositolo pea ina ʼui fēnei: ‘Koutou kai te pane ʼaenī, koteʼuhi ʼe ina fakatātā toku sino ʼaē ka foaki anai maʼa koutou.’ Pea neʼe ina fakatoʼo age te ipu vino pea ina ʼui fēnei: ‘Koutou ʼinu te vino ʼaenī, koteʼuhi ʼe ina fakatātā toku taʼataʼa, ʼaē ka liligi anai maʼa koutou.’ ʼE fakahigoa e te Tohi-Tapu te kaitahi ʼaia ‘ko te kaitahi ʼa te ʼAliki.’

Neʼe kai e te kau Iselaelite te Pāsikate, ke nātou manatuʼi ai ko te ʼaselo ʼa te ʼAtua ‘neʼe fakalaka’ ʼi tonatou ʼu ʼapi ʼi Esipito, pea neʼe ina matehi te ʼu ʼuluaki tupu ʼi te ʼu ʼapi ʼo te kau Esipito. Kae ʼi te temi nei ʼe loto ia Sesu ke manatuʼi ia ia e tana ʼu tisipulo, pea neʼe ina foaki tona maʼuli maʼa nātou. Pea ko te tupuʼaga la ʼaia ʼo tana fakatotonu age kia nātou ke nātou fai te kaitahi makehe ʼaia ʼi te taʼu fuli.

ʼI te ʼosi ʼo te kaitahi ʼa te ʼAliki, neʼe ʼui age e Sesu ki tana kau ʼapositolo ke nātou lototoʼa pea ke nātou mālolohi ʼi te tui. Moʼo fakaʼosi, neʼe nātou hiva te ʼu katiko ki te ʼAtua pea nātou ʼolo ai. ʼI te temi ʼaia, neʼe kua lagi fakalaka te hola ʼi te māʼupō. Tou vakaʼi pe neʼe nātou ʼolo kifea.

ʼI TANATOU mavae mai te kogafale fata, neʼe ʼalu ia Sesu pea mo tana kau ʼapositolo ki te ʼōloto ʼo Setesemane. Neʼe kua tuʼa lahi tanatou ʼolo ki ai ʼi muʼa atu. Neʼe ʼui age e Sesu kia nātou ke nātou nonofo ʼalaʼala pea ke nātou faikole. Pea neʼe ʼalu ia ki he faʼahi ʼe mole faʼa mamaʼo, pea ina fakahaga tona fofoga ki lalo pea faikole.

Pea neʼe toe liliu ia Sesu ki tana kau ʼapositolo. ʼI takotou manatu, koteā te meʼa ʼaē neʼe nātou fai? Neʼe kua nātou momoe! Neʼe ʼui age tuʼa tolu e Sesu kia nātou ʼe tonu ke nātou nonofo ʼalaʼala, kae ʼi te ʼu lakaga fuli ʼaē neʼe liliu mai ai, neʼe ina maʼu atu ia nātou ʼe nātou momoe. ʼI tana haʼu fakamuli leva, neʼe ʼui fēnei age e Sesu: ‘ ʼE lava feafeaʼi takotou momoe ʼi te taʼi lakaga ʼaenī? He kua ōvi mai te hola ʼaē ʼe tonu ai ke tuku ai ʼau ki te ʼu nima ʼo toku ʼu fili.’

ʼI te moʼi temi pe ʼaia neʼe nātou logo ai ki te logoaʼa ʼa te hahaʼi. Ko te ʼu tagata ʼe ʼōmai mo te ʼu heletā pea mo tanatou ʼu ʼakau! Pea ʼe nātou ʼōmai mo te ʼu afi moʼo inaina ʼo tonatou ala. ʼI tanatou fakaōvi mai, neʼe haʼu fakahagatonu te tahi ia nātou kia Sesu. Neʼe fekita ki ai, ohage ko te meʼa ʼaē ʼe koutou sio kiai ʼi henī. Ko te tagata ʼaia ʼe ko Sutasi Isikaliote! He koʼe neʼe fekita kia Sesu?

Neʼe fehuʼi age e Sesu: ‘Sutasi, ʼe ke lavakiʼi ʼau ʼaki he fekita?’ ʼIo ko te fekita ʼaia neʼe ko he fakaʼiloga. Neʼe ko he fakaʼiloga ʼaia ke ʼiloʼi e te ʼu tagata ʼaia ʼe ko Sesu, te tagata ʼaē ʼe nātou loto ki ai. Pea neʼe ʼōmai ai te ʼu fili ʼo Sesu ʼo puke ia ia. Kae neʼe mole loto e Petelo ke nātou puke ia Sesu ka mole nātou tau. Neʼe ina tohoʼi te heletā ʼaē neʼe ina ʼave, pea ina tāʼi ai te tagata ʼaē neʼe ōvi age kia ia. Neʼe mole tau te heletā ki te ʼulu ʼo te tagata, kae neʼe ina tuʼusi tona taliga mataʼu. Kae neʼe fāfā ia Sesu ki te taliga ʼo te tagata pea neʼe lelei ai tona taliga.

Neʼe ʼui age e Sesu kia Petelo: ‘Toe ʼai tau heletā ki tona ʼaiʼaga. ʼE mole ke ʼiloʼi koa la ʼe feala haku kole ki taku Tāmai ke ina tuku mai he ʼu lauʼi afe ʼaselo ke nātou hāofaki ʼau?’ ʼIo, neʼe feala ke ina fai te faʼahi ʼaia! Kae neʼe mole kole e Sesu ki te ʼAtua ke ina fekauʼi mai he ʼu ʼaselo, he neʼe ina ʼiloʼi kua hoko mai te temi ʼaē neʼe tonu ke puke ai ia ia e tona ʼu fili. Pea neʼe ina tuku ai ke nātou puke ia ia. Tou vakaʼi pe koteā te meʼa ʼaē ka hoko kia Sesu ʼi te temi nei.