ʼE KO te ʼapositolo ko Petelo ʼaē ʼe tuʼu pea ʼe ko tona ʼu kaumeʼa ʼaē ʼe tutuʼu ʼi ʼona tuʼa. Kae he koʼe ʼe tuʼutuli te tagata ia muʼa ʼo Petelo? ʼE tonu koa ke ina fai te faʼahi ʼaia? ʼE koutou ʼiloʼi koa pe ko ai te tagata ʼaia?

Ko te tagata ʼaia ʼe ko Kolonelio. Neʼe ko te ofisie Loma. Neʼe mole feʼiloʼiʼaki ia Kolonelio pea mo Petelo, kae neʼe fakatotonu age kia ia ke ina fakaafe ia Petelo ki tona ʼapi. Tou vakaʼi pe neʼe hoko feafeaʼi te faʼahi ʼaia.

Ko te ʼu ʼuluaki tisipulo ʼa Sesu neʼe ko te kau Sutea, kae ko Kolonelio neʼe mole ko he Sutea. Kae neʼe ʼofa ia ki te ʼAtua, mo faikole kia te ia, pea neʼe lahi te ʼu meʼa lelei ʼaē neʼe ina fai maʼa te hahaʼi. Pea ʼi te tahi hili hoʼatā neʼe hā age te ʼaselo kia ia pea ina ʼui age: ‘Kua leleiʼia koe e te ʼAtua, pea ʼe ina fakahoko anai tau ʼu faikole. Fekauʼi he ʼu tagata ke ʼolo ʼo kumi mai te tagata ʼaē ʼe higoa ko Petelo. ʼE nofo ʼi Sope, ʼi te ʼapi ʼo Simone, ʼe nofo ʼi te matatai.’

ʼI te moʼi temi pe ʼaia neʼe fekauʼi ai e Kolonelio te ʼu tagata ke nātou ʼolo ʼo kumi mai ia Petelo. ʼI te ʼapogipogi ake, ʼi te fakaōvi atu ʼa te ʼu tagata ki Sope, neʼe nofo ia Petelo ʼi te ʼato ʼo fakaheketālaʼa ʼo te ʼapi ʼo Simone. Pea neʼe fakasio e te ʼAtua kia Petelo te kie laulahi ʼe fakahifo ifo mai te lagi. ʼI te kie ʼaia neʼe ʼi ai te ʼu faʼahiga manu kehekehe. ʼO mulimuli ki te lao ʼa te ʼAtua, neʼe mole tonu ke kai te ʼu manu ʼaia koteʼuhi neʼe ko te ʼu manu heʼemaʼa, pea neʼe ʼui fēnei e te leʼo: ‘Tuʼu ake, Petelo. Matehi he manu pea ke kai.’

Neʼe tali age e Petelo: ‘Kailoa! ʼE mole heʼeki ʼau kai he manu heʼemaʼa.’ Kae neʼe ʼui age e te leʼo kia Petelo: ‘Tuku tau ʼui ʼaē ʼe heʼemaʼa te ʼu meʼa ʼaē neʼe tala e te ʼAtua ʼe maʼa.’ Neʼe hoko tuʼa tolu te meʼa ʼaia. ʼI te lolotoga hoha ʼa Petelo ʼo ʼuhiga mo te meʼa ʼaē neʼe hoko, neʼe tau age te ʼu tagata ʼaē neʼe fekauʼi age e Kolonelio ke nātou ʼolo ʼo fakalavelave peʼe ʼifea ia Petelo.

Pea neʼe hifo ifo ia Petelo pea ina ʼui fēnei: ‘Ko ʼau te tagata ʼaē ʼe koutou kumi. He koʼe ʼe koutou ʼōmai ki henī?’ ʼI te fakamahino age e te ʼu tagata neʼe fakatotonu e te ʼaselo ke fakaafe e Kolonelio ia Petelo ki tona ʼapi, neʼe lotolelei ia Petelo ke nātou ʼolo fakatahi. ʼI te ʼaho ake neʼe ʼalu ia Petelo pea mo tona ʼu kaumeʼa ʼo ʼaʼahi ia Kolonelio ʼi Sesalea.

Neʼe fakatahitahiʼi e Kolonelio tona ʼu kāiga pea mo tona ʼu kaumeʼa. ʼI te tau age ʼa Petelo, neʼe faka felāveʼi age ia Kolonelio kia ia. Neʼe tuʼutuli ia pea mo fakatō ifo ki te ʼu vaʼe ʼo Petelo, ohage ko te meʼa ʼaē ʼe koutou sio kiai ʼi te paki. Kae neʼe ʼui age e Petelo: ‘Tuʼu ake; he ko ʼau ko te tagata pe.’ ʼIo, ʼe fakahā mai e te Tohi-Tapu ʼe mole tonu ke tuʼutuli he tahi ʼo atolasio ki he tagata. ʼE tonu ke tou atolasio kia Sehova tokotahi pe.

Pea neʼe fai faka mafola ai ia Petelo kia nātou ʼaē neʼe fakatahitahi ai, ʼo ina ʼui fēnei: ‘Kua mahino kia ʼau, ko te ʼAtua ʼe ina tali te hahaʼi fuli pe ʼaē ʼe fia kaugana kia te ia.’ Pea ʼi te lolotoga ʼo tana palalau, neʼe tuku ifo e te ʼAtua tona laumālie maʼoniʼoni, pea neʼe kamata palalau ai te hahaʼi ʼi te ʼu lea kehekehe. Neʼe punamaʼuli te ʼu tisipulo Sutea ʼaē neʼe ʼōmai mo Petelo, heʼe ʼi tanatou manatu ʼe ʼofa pe te ʼAtua ki te kau Sutea. Koia neʼe akoʼi age e te meʼa ʼaia neʼe hoko kia nātou, ʼe mole faka maʼuhigaʼi age e te ʼAtua he ʼu hahaʼi ʼi he tahi age ʼu hahaʼi. ʼE mole lelei koa la ke tou manatuʼi fuli te meʼa ʼaia?

KO TE tūpulaga ʼaē ʼe koutou sio ki ai ʼi henī mo te ʼapositolo ko Paulo ʼe ko Timoteo. Neʼe nofo ia Timoteo mo tona famili ʼi Lusitala. Ko tana faʼe ʼe higoa ko Eunise pea ko tana kui fafine ko Loisa.

Ko te tuʼa tolu leva ʼaē ʼo te ʼaʼahi e Paulo ia Lusitala. Kua hili kiai te taʼu katoa, neʼe ʼolo ia Paulo pea mo Palenapasi ʼo fai faka mafola ai. Pea ʼi te temi nei kua toe liliu kiai ia Paulo pea mo tona kaumeʼa ko Silasi.

ʼE koutou ʼiloʼi pe koteā te meʼa ʼaē neʼe ʼui e Paulo kia Timoteo? Neʼe ina fehuʼi age ki ai: ‘ ʼE ke fia haʼu mo ʼau pea mo Silasi? ʼE feala ke ke haʼu ʼo tokoni kia māua ʼi tamā fai faka mafola ki te hahaʼi ʼaē ʼe nonofo ʼi te ʼu potu mamaʼo.’

Neʼe tali fēnei e Timoteo: ‘Ei, ʼe ʼau fia ʼalu mo koulua.’ Mole fualoa pea mavae ia Timoteo ʼi tona famili ʼo ʼalu mo Paulo pea mo Silasi. Kae ʼi muʼa ʼo hatatou vakaʼi pe neʼe feafeaʼi tanatou folau, tou vakaʼi muʼa te meʼa neʼe hoko kia Paulo. Kua hili kiai taʼu e 17 talu mai te ʼaho ʼaē neʼe hā ai ia Sesu kia ia ʼi te ala ʼo Tamaso.

Tou manatuʼi, neʼe ʼalu ia Paulo ki Tamaso ʼo fakatagaʼi te ʼu tisipulo ʼa Sesu, kae ʼi te temi nei kua liliu ia ko he tisipulo! Ki muli age neʼe fakatuʼutuʼu e ʼihi ʼi tona ʼu fili ke nātou matehi ia Paulo he neʼe mole nātou leleiʼia tana ʼu akonaki ʼo ʼuhiga mo Sesu. Kae neʼe tokoni ia te ʼu tisipulo kia Paulo ʼo nātou fakahola ia ia. Neʼe nātou ʼai ia ia ki te kato pea nātou fakahifo ia ia ʼi te tuʼa kaupā ʼo te kolo.

Ki muli age neʼe ʼalu ia Paulo ki Atiokia ʼo fai faka mafola ai. Neʼe ko te kolo ʼaia ʼaē neʼe ʼuluaki fakahigoaʼi ai te ʼu tisipulo ʼa Sesu ko te kau Kilisitiano. Pea neʼe fekauʼi ia Paulo pea mo Palanapasi ke nā mavae ʼi Atiokia kae nā ʼolo ʼo fai faka mafola ʼi te ʼu fenua mamaʼo. ʼI te ʼu kolo ʼaē neʼe nā ʼaʼahi, neʼe kau ai te kolo ʼo Lusitala ʼaē neʼe nofo ai ia Timoteo.

ʼI te temi nei, hili kiai te taʼu katoa, neʼe toe liliu ia Paulo ki Lusitala ʼi tana lua folau faka misionea. ʼI te ʼolo ʼa Timoteo mo Paulo pea mo Silasi, ʼe koutou ʼiloʼi pe neʼe nātou ʼolo kifea? Tou vakaʼi te mape ke tou ʼiloʼi ai te ʼu potu ʼaē neʼe nātou ʼolo kiai.

ʼUluaki, neʼe nātou ʼolo ki Ikoniome, te kolo ʼaē ʼe ōvi mai ki Lusitala, pea nātou ʼolo leva ki te lua kolo ʼaē ʼe toe higoa ko Atiokia. ʼOsi ʼaia pea nātou ʼolo ki Toloasi, ki Filipe, ki Tesalonika pea mo Pelea. ʼE koutou sio ki Atena ʼi te mape? Neʼe fai faka mafola ai ia Paulo. ʼOsi ʼaia, pea nātou ʼolo ʼo fai faka mafola ʼi Kolonito ʼi te taʼu katoa vaelua. Neʼe mole nātou nonofo fualoa ʼi Efesi. Pea neʼe nātou liliu ki Sesalea ʼi te vaka, pea nātou ʼolo ki Atiokia, pea nofo ai leva ia Paulo.

Koia neʼe fagona ia Timoteo ʼi te ʼu lauʼi teau kilometa ʼo tokoni kia Paulo ʼi te faka mafola ʼo te “logo lelei,” pea moʼo kamata fakatuʼu te ʼu kokelekasio faka Kilisitiano. Mokā koutou lalahi anai, ʼe koutou liliu anai koa ko he kaugana agatonu ʼa te ʼAtua ohage ko Timoteo?