KOTEĀ koa te meʼa ʼaē neʼe hoko? Neʼe lavea kovi koa te tama ʼaē ʼe tuku ʼi lalo? ʼI te ʼu tagata ʼaē ʼe fehūfi mai ki tuʼa, ʼe kau ai ia Paulo, pea ʼe koutou sio koa kia Timoteo? Neʼe tō koa te tama mai te matapā fakamālama?

Ei, neʼe hoko te meʼa ʼaia, kae lolotoga faiakonaki ia Paulo ki te ʼu tisipulo ʼi Toloasi. Neʼe ina ʼiloʼi ʼe mole toe fesioʼaki anai mo nātou ʼi he temi loaloaga, koteʼuhi neʼe tonu ke ʼalu ʼi te vaka ʼi te ʼaho ake. Koia neʼe faiakonaki ai ʼo aʼu ki te māʼupō.

Kae ko te tama ʼaia ʼaē ʼe higoa ko Eutise, neʼe heka ʼi te matapā fakamālama, pea neʼe māʼumoea. Neʼe tō ifo ia ki lalo mai te matapā fakamālama, ʼi te laufata tolu! Ko te tupuʼaga la ʼaia ʼo takotou sio ʼaē ʼe mata tuʼania te hahaʼi. ʼI te lagaʼi ake e te ʼu tagata te tama, kua ʼosi mate ia!

ʼI te sio ʼa Paulo ʼaē kua mate te tama, neʼe takoto ia ki ai, pea fāʼufua ki ai. Pea ina ʼui fēnei: ‘Tuku takotou tuʼania. ʼE lelei pe ia!’ ʼE moʼoni neʼe hoko te milakulo! Neʼe toe fakamaʼuli ake ia! Neʼe fiafia ai te hahaʼi.

Neʼe nātou toe hake ki ʼoluga pea nātou kakai. Neʼe hoko atu te faiakonaki ʼa Paulo ʼo aʼu ki te māfoatā. Kae ʼe lelei he neʼe mole toe tulemoe ia Eutise! ʼOsi ʼaia pea heka ia Paulo, mo Timoteo pea mo nātou ʼaē neʼe feʼoloʼaki mo nāua ki te vaka. ʼE koutou ʼiloʼi pe neʼe nātou ʼolo kifea?

Ko te hoki ʼosi pe ʼaenī ʼo te tolu folau faka misionea ʼa Paulo, pea kua toe liliu ki tona ʼapi. ʼI tana folau ʼaia neʼe nofo ia Paulo ia taʼu e tolu ʼi te kolo ʼo Efesi. Koia ko te folau ʼaia neʼe loaloaga age ʼi te lua folau.

ʼI tana ʼosi mavae ʼi Toloasi, neʼe tau te vaka ki Mile. Mai tona ʼaluʼaga ʼaē neʼe mole tuʼu mamaʼo ia Efesi, koia neʼe fekau ai e Paulo te ʼu tagata ʼāfea ʼo te kokelekasio ʼo Efesi ke nātou ʼōmai ki Mile, ke feala ai hana palalau fakaʼosi kia nātou. Pea ʼi te mavae ʼa te vaka, neʼe nātou lotomamahi ʼaupito ʼi tanatou tauʼinē ʼaē mo Paulo!

Pea neʼe tau te vaka ki Sesalea. Lolotoga te nofo ʼa Paulo ʼi te ʼapi ʼo te tisipulo ko Filipo, neʼe fai e te polofeta ko Akapo te fakatokaga kia Paulo. Neʼe ina ʼui age kia Paulo ʼe pilisoniʼi anai ia ia mokā tau atu ki Selusalemi. Pea neʼe hoko te meʼa ʼaia. Pea ʼi tona ʼosi pilisoniʼi ia taʼu e lua ʼi Sesalea, neʼe ʼave ia Paulo ki Loma ke fakamāuʼi e te tuʼi ʼo Loma ko Sesale. Tou vakaʼi te meʼa ʼaē neʼe hoko ʼi tana folau ʼaē ki Loma.

ʼE KOUTOU sio ki te vaka ʼaē kua maumau! ʼE koutou sio koa ki te hahaʼi ʼaē kua fakatō ki te tai? Kua aʼu ʼihi ki te mataʼone. ʼE kau ai ia Paulo. Tou vakaʼi pe koteā te meʼa ʼaē neʼe hoko kia ia.

Tou manatuʼi, neʼe pilisoniʼi ia Paulo ʼi Sesalea lolotoga taʼu e lua. Pea neʼe ʼalu ia mo ʼihi tagata pilisoni ʼi te vaka ki Loma. ʼI tanatou fakalaka ʼi te motu ko Kelete, neʼe tō te afā lahi. Neʼe mālohi te ʼu tuʼani matagi, ʼo faigataʼa ai te foe ʼo te vaka. Pea neʼe mole kei hā te laʼā ʼi te lolotoga ʼo te ʼaho peʼe ko te ʼu fetuʼu ʼi te pōʼuli. Pea hili kiai ni ʼu ʼaho, neʼe mole kei falala te kauvaka ʼe nātou hāo anai.

Pea neʼe tuʼu ia Paulo ʼo ina ʼui fēnei: ‘ ʼE mole mate anai he tahi ia koutou; ʼe ko te vaka pe ʼaē ka maumau. He neʼe hā mai te ʼaselo ʼa te ʼAtua kia ʼau ʼanapō pea ina ʼui fēnei, “ ʼAua naʼa ke mataku, Paulo! Heʼe tonu ke ke ʼalu kia Sesale, te tuʼi ʼo Loma. Pea ʼe hāofaki anai e te ʼAtua ia nātou fuli ʼaē ʼe folau mo koe.” ’

ʼI te māʼupō ʼo te 14 ʼaho talu mai te kamata ʼo te afā, neʼe fakatokagaʼi e te kauvaka ʼe mole kei loloto te tai! ʼI tanatou matataku ʼaē naʼa mahaʼia ʼi he lauhakau ʼi te fakapōʼuli, neʼe nātou tuku te ʼu foʼi tau ʼo te vaka ki te tai. ʼI te ʼaho ake neʼe nātou sio ki te pokoga pea nātou faiga ke nātou tau ki te mataʼone.

Kae ʼi tanatou fakaōvi atu ki te mataʼone neʼe lave te vaka ʼi te fuga ʼafua pea neʼe mahaʼia ai. Pea neʼe tuki te vaka e te peau, pea neʼe kamata maumau ai. Neʼe ʼui fēnei e te ofisie ʼo te vaka: ‘Ko koutou fuli ʼaē ʼe poto kāuga ke koutou fakatō ki te tai. Ko koutou ʼaē ʼe mole poto kāuga koutou tapiki ki te ʼu koga papa ʼo te vaka.’ Pea neʼe nātou fai ia te faʼahi ʼaia. Neʼe hāo ai te toko 276 hahaʼi ʼaē neʼe ʼi te vaka, ohage pe ko te fakapapau age ʼaē ʼa te ʼaselo.

Ko te motu ʼaia ʼe higoa ko Maleta. Neʼe agalelei ʼaupito tona hahaʼi, pea neʼe nātou gaohi fakaleleiʼi ia nātou fuli ʼaē neʼe ʼi te vaka. ʼI te lāulelei ʼo te temi, neʼe heka ia Paulo ki te tahi vaka pea ʼalu ai ki Loma.