Ko Te Fakaʼosi ʼo Te Agakovi Fuli

KOTEĀ te meʼa ʼe koutou sio kiai ʼi henī? Ko te kautau ʼe heheka ʼi te ʼu hōsi hina. Kae ʼe koutou fakatokagaʼi koa peʼe nātou ʼōmai maifea? ʼE ʼōmai te ʼu hōsi ʼaia mai te lagi ʼi te ʼu ʼao! ʼE ʼi ai moʼoni koa he ʼu hōsi ʼi te lagi?

Kailoa, ʼe mole ko he ʼu hōsi moʼoni. ʼE tou ʼiloʼi te faʼahi ʼaia koteʼuhi ʼe mole feala ke lele te ʼu hōsi ʼi te ʼu ʼao. Kae ʼe talanoa te Tohi-Tapu ki te ʼu hōsi ʼi te lagi. ʼE koutou ʼiloʼi koa pe koteā tona tupuʼaga?

Koteʼuhi ʼi te temi muʼa neʼe fakaʼaogaʼi te ʼu hōsi ki te tau. Koia ko te talanoa ʼa te Tohi-Tapu ki te ʼu hahaʼi ʼaē ʼe heheka ʼi te ʼu hōsi ʼe hihifo mai te lagi, ʼe ina fakahā ai ko te ʼAtua ʼe ina tauʼi anai te hahaʼi ʼo te kele. ʼE koutou ʼiloʼi pe koteā te higoa ʼo te potu ʼaē ka fai ai te tau ʼaia? Ko Halamaketone. Ko te tau ʼaia ʼe ina fakaʼauha anai te agakovi fuli ʼi te kele.

Ko Sesu ʼaē ka ina takitaki anai te tau ʼaia ʼi Halamaketone. Tou manatuʼi ko Sesu ʼaē neʼe fili e Sehova ke hau ʼi Tona puleʼaga. Ko te tupuʼaga la ʼaia ʼo te ʼai e Sesu ʼi tona ʼulu te kolona. Pea ko te heletā ʼe ina fakahā mai ʼe ina tauʼi anai te ʼu fili ʼo te ʼAtua. ʼE tonu koa ke tou punamaʼuli ki te ʼui ʼaē ʼe fakaʼauha anai e te ʼAtua te hahaʼi agakovi fuli?

Koutou toe vakaʼi te Hisitolia 10. Koteā te meʼa ʼaē ʼe koutou sio kiai? Ko te Lōmaki lahi ʼaē neʼe ina fakaʼauha te hahaʼi agakovi. Ko ai ʼaē neʼe ina fakahoko ia te Lōmaki ʼaia? Neʼe ko Sehova ʼAtua. ʼI te temi nei koutou vakaʼi te Hisitolia 15. Koteā te meʼa ʼaē neʼe hoko? Neʼe fakaʼauha e Sehova ia Sotoma pea mo Komola ʼaki te afi.

Koutou fuli age ki te Hisitolia 33. ʼE koutou sio ki te meʼa ʼaē neʼe hoko ki te ʼu hōsi pea mo te ʼu saliote tau ʼa te kau Esipito. Ko ai ʼaē neʼe ina fakamapeʼe ifo te tai kia nātou? Neʼe ko Sehova. Neʼe ina fai te meʼa ʼaia moʼo puipui ʼo tana hahaʼi. Koutou vakaʼi te Hisitolia 76. ʼE koutou sio anai ki te fakagafua e Sehova ke fakaʼauha tana hahaʼi, te kau Iselaelite, ʼuhi ko tanatou agakovi.

Koia ʼe mole tonu ai ke tou punamaʼuli ʼi te fekauʼi mai ʼaē e Sehova ʼo tana ʼu kautau mai te lagi ke nātou fakagata ia te ʼu agakovi fuli ʼi te kele. Kae koteā anai tona faka ʼuhiga! Koutou fuli te pasina pea koutou vakaʼi pe koteā anai te fetogi ʼaē ka hoko.