Te ʼu Malo ʼo Te Puleʼaga ʼe​—Fakamoʼoni e Te Lao Ia Te Logo Lelei

KE KE fakakaukauʼi muʼa ia te aluʼaga ʼaeni: ʼI tau lolotoga faifakamafola, ʼe ke logo ki te tagi mai mamaʼo ʼo te siti, pea ʼe fakahaʼuhaʼu ʼo malohi. ʼE ke kamata faipalalau mo he tahi ʼi tona ʼapi, kaʼe ko ia ʼae ʼe kolua kaugā gaue, ʼe mole kei tokaga atu ia. ʼE lolotoga sio ia ki te motoka polisi. ʼE fakaovi atu te tagata polisi, pea ina fehuʼi atu fenei: “ ʼE ko kolua ʼaeni ʼae ʼe kolua palalau ki te hahaʼi ʼo ʼuhiga mo te Tohi-Tapu? Koteʼuhi neʼe meo ʼihi.” Pea ʼe ke tali age anai ʼaki he fakaʼapaʼapa, ʼo ke ui ko kolua ko ni Fakamoʼoni ʼa Sehova. Kotea ʼae ka hoko anai kia koulua?

ʼE mulimuli anai te faʼahi ʼaia ki te aga ʼa te puleʼaga ki te kau Fakamoʼoni ʼa Sehova ʼi tou fenua. ʼE natou fakahoko faʼifaʼitaliha koa tanatou tauhi? Kapau koia, pea ʼe lagi ʼuhi ko te ʼu tehina mo tuagaʼane ʼo te ʼu taʼu ki muʼa atu, ʼae neʼe natou gaue kinakina ki “te haofaki ʼo te logo lelei pea mo fakamoʼoni ki ai e te lao.” (Filp. 1:7, MN) ʼI he potu pe ʼe ke maʼuli ai, ʼe feala ke malohi age tau tui mo kapau ʼe ke vakavakaʼi te ʼu fakamatala ʼo he ʼu fakamau neʼe malo ai te kau Fakamoʼoni ʼa Sehova. ʼI te faʼahi 4 ʼaeni, ʼe tou vakaʼi anai ʼihi fakamatala. ʼAki te ʼu malo ʼaia, ʼe tou tui ai ʼe moʼoni te Puleʼaga, koteʼuhi neʼe mole hoko ʼaki pe totatou malohi.