Koteā ʼAē Neʼe Hoko Kia Nofe Mo No?

KO NOFE mo No, ʼe ko te ʼu higoa faka Tohi-Tapu ʼaia ʼo te ʼu kolo hau ʼo Esipito ʼo te temi muʼa, ʼaē ko Memphis mo Thèbes. Ko Nofe (Memphis) neʼe tuʼu ia kilometa e 23 ʼi te potu saute ʼo te kolo ko Le Caire, pea ʼi te potu uesite ʼo te Vaitafe ko te Nile. Kae ʼaki te temi, neʼe mole kei liliu leva ia Memphis ko te kolo hau ʼo Esipito. ʼI te kamataʼaga ʼo te taʼu 1 500 ʼi muʼa ʼo totatou temi, neʼe ʼi ai te kolo hau foʼou ʼo Esipito, ko No (Thèbes), ʼaē neʼe tuʼu ia kilometa e 500 ʼi te potu saute ʼo Memphis. ʼI te ʼu toega kaupā ʼo te ʼu fale lotu ʼo Thèbes, ʼe ʼi ai te ʼu toega kaupā ʼo te fale lotu ʼo Karnak, ʼaē neʼe lau ko te fale lahi ʼaupito ʼaia neʼe laga mo ʼona pou lalahi. Ko te kolo ko Thèbes mo tona fale lotu ko Karnak, neʼe fakatuʼu maʼa te tauhi kia Amone, te ʼatua maʼuhiga ʼo te kau Esipito.

Koteā ʼaē neʼe fakakikite e te lea faka polofeta ʼo ʼuhiga mo Memphis pea mo Thèbes? Neʼe fakamāuʼi ia te Falaone ʼo Esipito mo tona ʼu ʼatua, kae tāfito ia tonatou ʼatua maʼuhiga, ia “Amone mai No.” (Selemia 46⁠:​25, 26) Ko te kau atolasio ʼaē neʼe fakatahitahi ʼi ai neʼe tonu ke “taʼaki” ia nātou. (Esekiele 30⁠:​14, 15) Pea neʼe ko te faʼahi ʼaia ʼaē neʼe hoko. Ko te meʼa pe ʼaē ʼe kei toe ʼi te tauhi kia Amone ʼe ko he ʼu toega kaupā ʼo te fale lotu. Ko te kolo ʼo te temi nei ko Louxor ʼe ʼi ai tona koga ʼe tuʼu ʼi te kolo ʼāfea ko Thèbes, mo te tahi ʼu kolo liliki ʼe tuʼu nei ʼi te ʼu toega ʼo te kolo ʼāfea ʼaia.

ʼO ʼuhiga mo Memphis, ko te meʼa pe ʼe kei toe mai te kolo ʼaia ko tona ʼu tānuma. ʼE ʼui fēnei e te tagata sivi Tohi-Tapu ko Louis Golding: “Lolotoga te ʼu lauʼi sēkulō neʼe fakaʼaogaʼi e te kau Alape ʼaē neʼe nātou ʼohofiʼi ia Esipito ia te ʼu toega kaupā lalahi ʼo te kolo ko Memphis moʼo laga ʼaki tonatou kolo hau [ko Le Caire] ʼi te tahi kauvai ʼo te vaitafe. ʼI te lelei ʼaupito ʼo te fetuku ʼi te Vaitafe ko te Nile pea mo te gāue ʼa te kau laga fale Alape, mokā kita foli ʼi he ʼu kilometa ʼo te kolo ʼāfea ʼe mole maʼu he maka e tahi ʼe tula age ʼi te kele.” Ohage ko tona fakakikite ʼi te Tohi-Tapu, neʼe liliu moʼoni ia Memphis “ko he meʼa ʼe fakatupu punamaʼuli . . . ʼe mole ʼi ai hona hahaʼi nofo.”​—Selemia 46⁠:⁠19.

Ko te ʼu faʼifaʼitaki pe ʼaia e lua ʼo te ʼu tuʼuga faʼifaʼitaki ʼe nātou fakamoʼoni mai ki te totonu ʼo te ʼu lea faka polofeta ʼa te Tohi-Tapu. Ko te tauteaʼi ʼo Thèbes pea mo Memphis, ʼe ina fakamālohiʼi tatatou falala ki te ʼu lea faka polofeta ʼo te Tohi-Tapu ʼaē ʼe mole heʼeki hoko.​—Pesalemo 37⁠:​10, 11, 29; Luka 23⁠:43; Apokalipesi 21⁠:​3-5.

ʼE Koutou Loto Koa Ki He ʼAʼahi?

ʼI te mālama maveuveu ʼaenī, ʼe feala hakotou fiafia mo kapau ʼe koutou maʼu te ʼatamai mālama ʼaē ʼe foaki mai e te Tohi-Tapu ʼo ʼuhiga mo te ʼAtua, mo tona Puleʼaga, pea mo tana fakatuʼutuʼu fakaofoofo ʼaē neʼe ina fai ʼo ʼuhiga mo te malamanei. Kapau ʼe koutou fia ʼiloʼi he tahi ʼu meʼa ʼo ʼuhiga mo te faʼahi ʼaia, peʼe koutou loto ke fai hakotou ako Tohi-Tapu, koutou faitohi ki te Les Témoins de Jéhovah, B.P. 1741, 98874 Mont Dore, Nouvelle-Calédonie, peʼe vakaʼi te lisi ʼaē ʼi te pasina 2.