Tafitoʼaga ʼo Te Kaupepa Ako Te Maʼuli Fakakilisitiano Mo Te Faifakamafola
VAHAʼA ʼO TE ʼAHO 5-11 ʼO MALESIO
TE ʼU KOLOA ʼO TE TOHI-TAPU | MATEO 20-21
“Ko ʼAe Ia Koutou ʼe Loto Ke Liliu ʼo Lahi, ʼe Tonu Ke Ina Tauhi Koutou”
(Mateo 20:3) Neʼe toe alu ʼi te vaʼevaʼe hola hiva uhu, pea neʼe sio ai ki ʼihi ʼe natou tutuʼu noa ʼi te fakatauʼaga koloa.
nwtsty pāki mo ʼata viteo
Te Fakatauʼaga Koloa
Ohage pe ko te pāki, neʼe fakatuʼu ʼihi fakatauʼaga koloa ʼi te vaʼe ʼala. ʼI ʼihi temi, neʼe mole kei feala he feoloʼaki ʼi te ʼala ʼi te lahi fau ʼo te ʼu koloa ʼae neʼe tanaki ai e te kau faifakatau. Neʼe totogi ai e te hahaʼi te ʼu meʼa ʼae ʼe ʼaoga ki ʼonatou loto fale, te ʼu ipu kele, te ʼu ipu sioʼata pea mo te ʼu meʼa kai ʼe kei foʼou. Neʼe tonu ke olo te hahaʼi ki te ʼu fakatauʼaga koloa ʼi te ʼaho fuli ʼo toʼo meʼa kai he neʼe mole hanatou ʼu ʼaisi. Neʼe feala ke natou maʼu logo ai mai te kau faifakatau. Pea neʼe feala ke gaoʼi ai te kau toe pea ko ʼae neʼe mole hana gaue neʼe feala ke maʼu ai he gaue. Neʼe fakamalolo e Sesu te kau mahaki ʼi te fakatauʼaga koloa, pea neʼe toe faifakamafola ʼi ai ia Paulo. (Gau 17:17) Kae neʼe loto te kau sekelipa mo te kau Faliseo ke tokagaʼi natou mo fakaʼalofa age te hahaʼi ʼi te ʼu koga meʼa kaugā malie ʼaia.
(Mateo 20:20, 21) Neʼe fakaovi age kia te ia te ʼohoana ʼo Sepeteo pea mo ʼana tama, pea neʼe hu kia te ia mo ina fia fai age tana kole. 21 Neʼe ui fenei age e Sesu: “Kotea ʼae ʼe ke loto ki ai?” Neʼe ina tali fenei age: “Fakatotonu ke heheka ʼaku tama ʼaeni ʼe toko lua ʼi tou Puleʼaga, he tahi ʼi tou toʼomataʼu pea mo he tahi ʼi tou toʼohema.”
nwtsty tokoni ki te ako ʼo Mat 20:20, 21
te ʼohoana ʼo Sepeteo: ʼE ko te faʼe ʼa te ʼu apositolo ko Sakopo mo Soane. ʼI te fakamatala ʼa Maleko, neʼe ko Sakopo mo Soane ʼae neʼe fakaovi age kia Sesu. ʼO ha mai ai, ko naua te tupuʼaga ʼo te kole, kae neʼe nā fekauʼi tanā faʼe ko Salome ke palalau kia Sesu.—Mat 27:55, 56; Mko 15:40, 41; Soa 19:25.
he tahi ʼi tou toʼomataʼu pea mo he tahi ʼi tou toʼohema: ʼE fakaʼuhiga te ʼu tuʼulaga ʼaeni ʼe lua ki te fakaʼapaʼapa mo te pule. Kae ko te tuʼulaga ʼae ʼe maʼoluga age ʼe ko te faʼahi mataʼu.—Pes 110:1; Gau 7:55, 56; Lom 8:34.
(Mateo 20:25-28) Kaʼe neʼe pauʼi natou e Sesu kia te ia pea neʼe ina ui fenei age: “ ʼE kotou iloʼi ko te ʼu hau ʼo te ʼu puleʼaga ʼe natou puleʼi ia te hahaʼi pea ʼe takitaki fakamalohi natou e te kau maʼu tuʼulaga. 26 ʼE mole tonu ke feia ia koutou. Kaʼe ko ʼae ia koutou ʼe loto ke liliu ʼo lahi, ʼe tonu ke ina tauhi koutou, 27 pea ko ʼae ia koutou ʼe loto ke ʼuluaki, ʼe tonu ke liliu ko hakotou kaugana. 28 Ohage pe ko te Foha ʼo te tagata, neʼe mole haʼu ia ke tauhi ia ia, kaʼe ke ina tauhi te hahaʼi pea mo foaki tona maʼuli ko he totogi maʼa te tokolahi.”
nwtsty tokoni ki te ako ʼo Mat 20:26, 28
tauhi: Peʼe “kaugana.” ʼI te Tohi-Tapu, ʼe tau fakaʼaogaʼi te kupu Fakakeleka diakonos ki he tahi ʼe gaue ʼaki he agavaivai maʼa ʼihi. Neʼe toe fakaʼaogaʼi te kupu ʼaia kia Kilisito (Lom 15:8), ki ʼana kaugana (1Ko 3:5-7; Kol 1:23), ki te kau faifekau fakaminisitelio (Flp 1:1; 1Ti 3:8), ʼo toe feia ki te kau faifekau ʼae ʼi te ʼu loto fale (Soa 2:5, 9) pea mo te ʼu pule taki ʼo he puleʼaga (Lom 13:4).
neʼe mole haʼu ia ke tauhi ia ia, kaʼe ke ina tauhi te hahaʼi: Peʼe “neʼe mole haʼu ia ke ina fakagaueʼi ni ʼihi kae ke gaue maʼa ʼihi.”
Kumi Te ʼu Koloa ʼi Te Tohi-Tapu
(Mateo 21:9) Pea neʼe kalaga te hahaʼi ʼae neʼe muʼamuʼa pea mo natou ʼae neʼe mulimuli ia te ia, ʼo natou ui fenei: “ ʼAtua, ʼe matou kole atu, haofaki te Foha ʼo Tavite! Ke tapuakiʼi ia ia ʼae ʼe haʼu ʼi te huafa ʼo Sehova! ʼE matou kole atu, ʼAtua ʼae ʼe ʼi selo, haofaki ia ia!”
nwtsty tokoni ki te ako ʼo Mat 21:9
ʼe matou kole atu, haofaki: Peʼe “Osana.” ʼE haʼu te kupu Fakakeleka ʼaia (Osana) mai te kupusiga palalau Fakahepeleo “haofaki, fakalelei siʼou loto.” ʼI te vaega ʼaeni, ʼe fakaʼuhiga ki he kole mamahi ki te ʼAtua ke ina haofaki peʼe ke ina foaki te malo. ʼAki te temi, neʼe fakaʼaogaʼi leva te kupu ʼaia ki te faikole mo te fakavikiviki. ʼE maʼu te kupusiga palalau Fakahepeleo ʼaia ʼi te Pesalemo 118:25, ʼae ʼe kau ki te ʼu Pesalemo ʼo te Hallel ʼae neʼe tau hivaʼi ʼi te temi ʼo te Pasikate. Neʼe tali e te ʼAtua te kole ʼae ke haofaki te Foha ʼo Tavite ʼaki tana fakatuʼuake ia ia mai te mate. Ia Mateo 21:42, neʼe ui tonu e Sesu ʼe talanoa te Pesalemo 118:22, 23 ki te Mesia.
Foha ʼo Tavite: ʼE ko te fakamoʼoni ʼaia ʼe hifo mai ia Sesu mai te hologa ʼo Tavite pea ʼe ko te Mesia ʼae neʼe fakapapauʼi mai.
(Mateo 21:18, 19) ʼI te kei uhuuhu, neʼe toe liliu ki te kolo pea neʼe ina logoʼi tona fia kai. 19 Neʼe sio ki he fuʼu fiku ʼi te ala pea neʼe fakaovi age ki ai, kaʼe neʼe ko ʼona lau pe. Pea neʼe lea fenei age ki te fuʼu fiku: “ ʼE mole ke toe fua anai.” Neʼe moamoa atu aipe te fuʼu fiku.
Neʼe Ina Fakaʼaogaʼi He Fuʼu Fiku Moʼo Akoʼi He Manatu Maʼuhiga ʼo ʼUhiga Mo Te Tui
Kaʼe he koʼe neʼe fakamalaʼia e Sesu te fuʼu ʼakau ʼaia ʼo tupu ai tona moamoa? Neʼe ina fakaha tona tupuʼaga ʼi tana tali fenei: “ ʼE au tala moʼoni atu kia koutou, kapau ʼe kotou tui pea ʼe mole kotou lotolotolua, ʼe mole gata pe anai takotou fai te meʼa ʼae neʼe au fai ki te fuʼu fiku, kaʼe kapau ʼe kotou ui ki te moʼuga ʼaeni ‘Mahiki pea ke fakato ki te tai,’ ʼe hoko anai ia. Pea ko meʼa fuli ʼe kotou faikole ki ai ʼaki te tui, ʼe kotou maʼu anai.” (Mateo 21:21, 22) Neʼe ina toe fakaha ai te manatu ʼae neʼe kua ina fakaha ʼi muʼa atu ʼo ʼuhiga mo te tui ʼae ʼe feala ke ina hiki he moʼuga.—Mateo 17:20.
Koia, ko te fakamalaʼia e Sesu te fuʼu ʼakau ʼo tupu ai tona moamoa, neʼe ko te faʼifaʼitaki lelei ʼaia moʼo fakaha te ʼaoga ʼae ke tui ki te ʼAtua. Neʼe ina ui fenei: “Ko meʼa fuli ʼe kotou kole ʼi te faikole, kotou tui kua kotou maʼu, pea ʼe kotou maʼu anai.” (Maleko 11:24) Neʼe ko he ako maʼuhiga neʼe feala ke taʼofi e te ʼu tisipulo fuli ʼa Sesu. Pea neʼe toe ʼaoga tafito ki te kau apositolo ʼuhi ko te ʼu faigataʼaʼia ʼae ka tau anai mo natou. Kaʼe ʼaki te moamoa ʼo te fuʼu fiku, neʼe feala ke natou taʼofi ai te tahi ako ʼo ʼuhiga mo te ʼaoga ʼae ke malohi tanatou tui.
Ohage ko te fuʼu fiku, ko te ʼu meʼa ʼae neʼe ha ki tuʼa ʼi te puleʼaga ʼo Iselaele neʼe mole alu tahi mo tonatou ʼuhiga moʼoni. Neʼe kau te hahaʼi ʼo te puleʼaga ʼaia ki te fuakava ʼae neʼe fai mo te ʼAtua, pea neʼe hage pe neʼe natou mulimuli ki tana Lao. Kaʼe neʼe teitei pe ko te puleʼaga katoa ʼae neʼe mole natou tui pea neʼe mole natou fua. Neʼe natou liakī mo te ʼAlo totonu ʼo te ʼAtua! Koia, ʼi te haga ʼae ʼa Sesu ʼo fakamalaʼia te fuʼu fiku ʼae neʼe mole fua, ʼo moamoa ai, neʼe ina fakaha ai te meʼa ʼae ka hoko anai ki te puleʼaga ʼaia, ʼae neʼe mole fua pea neʼe mole tui.
VAHAʼA ʼO TE ʼAHO 12-18 ʼO MALESIO
TE ʼU KOLOA ʼO TE TOHI-TAPU | MATEO 22-23
“Tou Fakalogo Ki Te ʼu Fakatotonu ʼe Lua ʼAe ʼe Lalahi Age”
(Mateo 22:36-38) “ ʼAliki, ʼe ko te fakatotonu fea ʼo te Lao ʼae ʼe lahi age?” 37 Neʼe ina tali fenei age: “ ‘ ʼE tonu ke ke ʼofa kia Sehova tou ʼAtua, ʼaki tou loto katoa, mo tou maʼuli katoa pea mo tou ʼatamai katoa.’ 38 ʼE ko te ʼuluaki fakatotonu ʼaia pea mo lahi age.”
nwtsty tokoni ki te ako ʼo Mat 22:37
loto: ʼE feala ke fakaʼuhiga te kupu ʼaia ki te ʼuluagaaga ʼo he tahi. Kae kapau ʼe fakatahiʼi te kupu ʼaia mo te ʼu kupu “maʼuli” mo “ ʼatamai”, ʼe fakaʼuhiga leva ki te ʼu meʼa ʼae ʼe logoʼi e he tahi pea mo ʼona holi. ʼE fakatahiʼi te ʼu kupu ʼaia ʼe tolu (loto, maʼuli mo ʼatamai), moʼo fakamaʼuhigaʼi te ʼaoga ʼae ke katoa te ʼofa ki te ʼAtua.
maʼuli: Peʼe “maʼuli katoa.”
ʼatamai: Peʼe ko te fealagia fakakaukau. ʼE tonu ke fakaʼaogaʼi e he tahi tona fealagia fakakaukau ke ina iloʼi lelei ai te ʼAtua mo tuputupu tona ʼofa kia te ia. (Soa 17:3; Lom 12:1) ʼE tuʼu ʼi te tohi ʼo Tetelonome 6:5 te ʼu kupu Fakahepeleo ‘loto, maʼuli mo malohi.’ Kae ʼi te fakamatala ʼa Mateo, ʼi te lea Fakakeleka, ʼe tuʼu ai te kupu “ ʼatamai” kae mole ko te kupu “malohi.” He koʼe ʼe mole tatau te ʼu kupu ʼae neʼe fakaʼaogaʼi? ʼUluaki, ʼe mole maʼu ʼi te Fakahepeleo ʼafeā he kupu totonu ki te kupu “ ʼatamai,” kae ʼe fakapipiki ki te kupu “loto.” ʼE feala ke fakata te kupu ʼaia ki te ʼuluagaaga ʼo he tahi, ʼana manatu, te ʼu meʼa ʼae ʼe ina logoʼi, pea mo tana aga. (Te 29:4; Pes 26:2; 64:6.) Koia ʼae ʼe fakaʼaogaʼi ai ʼi te Fakahepeleo te kupu “loto,” kae ʼe tuʼu ia ʼi te Septante Fakakeleka, te kupu “ ʼatamai.” (Sen 8:21; 17:17; Taa 2:10; Esa 14:13) Ko te tahi tupuʼaga ʼo te fakaʼaogaʼi e Mateo te kupu “ ʼatamai” kae mole ko te kupu “malohi” ʼae ia Tetelonome 6:5, he ʼe feala ke fakaʼuhiga ai te kupu “malohi” ki te malohi fakasino pea mo te fealagia fakakaukau. Koia kua tou mahino leva ki te fakaʼuhiga ʼo te ʼu kupu Fakahepeleo mo Fakakeleka pea mo te tupuʼaga ʼo te fakaʼaogaʼi ʼi te ʼu Evaselio he ʼu kupu ʼe mole tatau mo ʼae ʼi te tohi ʼo Tetelonome.
(Mateo 22:39) Pea koʼeni te lua, ʼae ʼe tatau mo ia: ‘ ʼE tonu ke ke ʼofa ki tou tatau ohage pe ko koe totonu.’
nwtsty tokoni ki te ako ʼo Mat 22:39
te lua: Ia Mateo 22:37, neʼe tali fakahagatonu ia Sesu ki te kau Faliseo. Kae, neʼe ina toe hoko atu ia tana tali ʼi tana talanoa ki te lua fakatotonu (Le 19:18). Neʼe ina akoʼi age kia natou, ʼe pipiki fakatahi te ʼu fakatotonu ʼaia ʼe lua pea ʼe fakatafito ki ai te Lao katoa mo te ʼu tohi ʼa te kau Polofeta.—Mat 22:40.
tatau: ʼE mole fakaʼuhiga pe te kupu Fakakeleka “tatau” ki he tahi ʼe nofo ovi mai. Kae ʼe toe fakaʼuhiga ki he tahi pe.—Luk 10:29-37; Lom 13:8-10.
(Mateo 22:40) Ko te Lao katoa mo te ʼu tohi ʼa te kau Polofeta ʼe fakatafito ki te ʼu fakatotonu ʼaia ʼe lua.
nwtsty tokoni ki te ako ʼo Mat 22:40
te Lao . . . mo te ʼu tohi ʼa te kau Polofeta: Ko te “Lao” ʼe ko te ʼu tohi Fakatohi-tapu ʼae mai te Senesi ki te Tetelonome. Pea ko te ʼu tohi ʼa te kau Polofeta ʼe ko te ʼu tohi fakapolofeta ʼo te Koga Tohi-Tapu Fakahepeleo. Kae ka fakatahiʼi te ʼu tohi fuli ʼaia, ʼe fakaʼuhiga leva ki te Koga Tohi-Tapu Fakahepeleo katoa.—Mat 7:12; 22:40; Luk 16:16.
fakatafito: Ko te fakamahino ʼo te kupu Fakakeleka ʼaia ʼe: “ ʼe fakalogo ki ai.” Koia, neʼe mole ui e Sesu ʼe fakatafito pe te ʼofa ki te Lao mo te ʼu Folafola ʼe Hogofulu kae ki te Koga Tohi-Tapu Fakahepeleo katoa.—Lom 13:9.
Kumi Te ʼu Koloa ʼi Te Tohi-Tapu
(Mateo 22:21) Neʼe natou tali fenei age: “ ʼO Sesale.” Pea neʼe ina ui fenei age kia natou: “Koia, kotou liufaki te ʼu meʼa ʼa Sesale kia Sesale, kaʼe ko te ʼu meʼa ʼa te ʼAtua ki te ʼAtua.”
nwtsty tokoni ki te ako ʼo Mat 22:21
te ʼu meʼa ʼa Sesale kia Sesale: ʼE ko te aluʼaga pe ʼaia ʼe tahi neʼe talanoa ai ia Sesu ki te Hau ʼaia ʼo Loma ʼae pe ia Maleko 12:17 mo Luka 20:25. Ko “te ʼu meʼa ʼa Sesale” ʼe kau ai te totogi ʼo te ʼu gaue ʼae ʼe fakahoko e te puleʼaga. Pea ʼe toe hilifaki ki ai te fakaʼapaʼapa mo te fakalogo ki te ʼu pule ʼaia.—Lom 13:1-7.
te ʼu meʼa ʼa te ʼAtua ki te ʼAtua: ʼE kau ai te tauhi ʼa he tahi ki te ʼAtua, ʼaki tona loto katoa, mo tona ʼofa moʼoni pea mo tana fakalogo agatonu.—Mat 4:10; 22:37, 38; Gau 5:29; Lom 14:8.
(Mateo 23:24) Kau takitaki kivi, ʼe kotou fakaoʼo te namu kaʼe kotou folo te kamelo!
nwtsty tokoni ki te ako ʼo Mat 23:24
ʼe kotou fakaoʼo te namu kaʼe kotou folo te kamelo: ʼI te temi ʼo te kau Iselaele, neʼe kau te ʼu namu mo te ʼu kamelo ki te ʼu manu ʼae ʼe heʼe maʼa. (Lev 11:4, 21-24) Neʼe ui e Sesu ʼe fakaoʼo e te kau takitaki lotu ʼanatou meʼa inu naʼa ʼulihi e he kiʼi foʼi namu, kae natou heʼe maʼa ai. Kae ʼi tanatou mole fakaʼapaʼapa ki te ʼu manatu tafito ʼo te Lao, ʼe hage pe ko hanatou folo he kamelo.
VAHAʼA ʼO TE ʼAHO 19-25 ʼO MALESIO
TE ʼU KOLOA ʼO TE TOHI-TAPU | MATEO 24
“Kotou Nonofo ʼAlaʼala ʼi Te ʼu ʼAho Fakamuli”
(Mateo 24:12) Pea ʼuhi ko te ʼaʼasili ʼo te agakovi, ʼe momoko anai ia te ʼofa ʼo te tokolahi.
it-1-F p. 112-113 pal. 10
ʼOfa
ʼE Feala Ke Momoko Te ʼOfa ʼo He Tahi. Neʼe ui e Sesu ʼi tana palalau ki ʼana tisipulo, ʼe momoko anai te ʼofa (agapê) ʼo te tokolahi ʼae ʼe ui ʼe natou tui ki te ʼAtua. (Mat 24:3, 12) Pea neʼe talanoa te apositolo ko Paulo ki he koga ʼo te fakailoga ʼo te ʼu temi fakamuli ʼae ʼe ko te “manako ki te paʼaga.” (2Ti 3:1, 2) ʼE mahino ia, ʼe feala pe ki he tahi ke mole kei tokaga ki te ʼu pelesepeto faitotonu. Pea ʼe puli mamalie ai te ʼofa ʼae ʼe ina maʼu. Koia, ʼe ha ai te maʼuhiga ʼo te gaueʼi mo fakatuputupu tuʼumaʼu te ʼofa, ʼaki te metitasio ki te Folafola ʼa te ʼAtua mo te mulimuli ki ʼAna pelesepeto.—Efe 4:15, 22-24.
(Mateo 24:39) Neʼe mole natou tokagaʼi he meʼa, ʼo kaku ki te hoko mai ʼo te Tulivio pea neʼe ina ʼave ia natou fuli, ʼe toe feia pe anai mo te ʼi heni ʼo te Foha ʼo te tagata.
ʼE Koutou Fakahoko Katoa Koa Tokotou Maʼua Ki Te ʼAtua?
5 Neʼe ʼui fēnei e Sesu Kilisito ʼo ʼuhiga mo te ʼu temi faigataʼa ʼaenī: “He hage ko te temi o Noe, e feia anai te haele mai o te Foha o te tagata. Koteuhi i te temi aia, i mua o te tulivio, nee natou kai pe mo inu, nee natou faiʼohoana mo talaga ohoana o kaku ki te aho nee hu ai Noe ki te aleka. Pea nee mole natou iloi o kaku ki te hoki to a te tulivio pea nee ina ave fuli natou, e feia anai mo te haele mai o te Foha o te tagata.” (Mateo 24:37-39) ʼE mole kovi te kai pea mo te ʼinu, mo kapau ʼe kita fai fakapotopoto, pea ko te ʼohoana ʼe ko he fakatuʼutuʼu neʼe fai e te ʼAtua totonu. (Senesi 2:20-24) Kae kapau ʼe tou fakatokagaʼi, ʼe tou faiga tāfito ki te ʼu meʼa māhani ʼo te maʼuli, pea he koʼe ʼe mole tou faikole ʼo ʼuhiga mo te faʼahi ʼaia? ʼE feala kia Sehova ke tokoni mai ke tou fakamuʼamuʼa te ʼu meʼa ʼo te Puleʼaga ʼi totatou maʼuli, pea mo tou fai te meʼa ʼaē ʼe lelei, pea mo tou fakahoko totatou maʼua kia te ia.—Mateo 6:33; Loma 12:12; 2 Kolonito 13:7.
(Mateo 24:44) Koia, ke kotou nonofo teuteu mo koutou, koteʼuhi ʼe haʼu anai te Foha ʼo te tagata ʼi he hola ʼe mole kotou manatu ki ai.
Neʼe Kole e Te Kau Apositolo He Fakailoga
Neʼe ui e Sesu ʼe tonu anai ki ʼana tisipulo ke natou nonofo tokakaga, mo nonofo ʼalaʼala, pea mo nonofo teuteu. Neʼe tataʼo e Sesu te fakatokaga ʼaia, ʼaki te tahi lea fakatata ʼaeni: “Ke kotou iloʼi te faʼahi ʼaeni: Kapau neʼe iloʼi e te pule ʼo te ʼapi ia te hola ʼae ka haʼu ai te tagata kaihaʼa, neʼe nofo ʼalaʼala pea neʼe mole ina tuku ke hufi tona ʼapi. Koia, ke kotou nonofo teuteu mo koutou, koteʼuhi ʼe haʼu anai te Foha ʼo te tagata ʼi he hola ʼe mole kotou manatu ki ai.”—Mateo 24:43, 44.
Kumi Te ʼu Koloa ʼi Te Tohi-Tapu
(Mateo 24:8) Ko te ʼu aluʼaga fuli ʼaia ʼe ko te kamataʼaga ʼo te ʼu mamahi.
nwtsty tokoni ki te ako ʼo Mat 24:8
te ʼu mamahi: ʼE fakaʼuhiga te kupu Fakakeleka ʼaia ki te mamahi fanau ʼa he fafine. Koia ohage pe ko te mamahi fanau, ko te ʼu mamahi ʼae neʼe fakakikite ia Mateo 24:21 ʼe ʼaʼasili kovi anai mo loaloaga ʼi muʼa ʼo te hoko mai ʼo te mamahi lahi.
(Mateo 24:20) Kotou faikole tuʼumaʼu ke ʼaua naʼa hoko mai takotou feholaki ʼi te temi momoko peʼe ʼi te ʼaho ʼo te Sapato,
nwtsty tokoni ki te ako ʼo Mat 24:20
ʼi te temi momoko: ʼI te temi ʼaia, neʼe faigataʼa ai te fefolauʼaki ʼo kumi meʼa kai peʼe ko he nofoʼaga ʼuhi ko te ʼu ʼua lalahi mo te ʼu puvai pea mo te momoko.—Ese 10:9, 13.
ʼi te ʼaho ʼo te Sapato: ʼI te ʼu kolo ohage ko Suta, ko te ʼu fakatuʼakoi ʼo te lao ʼo te Sapato neʼe faigataʼa ai te faifagona ʼa he tahi mo hana uta ki te ʼu koga meʼa mamaʼo. Pea neʼe pupunu te ʼu matapa fuli ʼo te kolo ʼi te ʼaho ʼo te Sapato.—Vakaʼi ia Gau 1:12 mo te Appendice B12, MN.
VAHAʼA ʼO TE ʼAHO 26 ʼO MALESIO–1 ʼO APELILI
TE ʼU KOLOA ʼO TE TOHI-TAPU | MATEO 25
“Kotou Nonofo Tokaga”
(Mateo 25:1-6) Pea ʼe feala ke fakatatau te Puleʼaga ʼo selo ki he ʼu taʼahine ʼe toko hogofulu neʼe natou toʼo ʼanatou malama pea mo olo ʼo fakafetaulaki ki te tagata ʼohoana. 2 Ko te toko nima ia natou neʼe vavale, pea ko te toko nima neʼe popoto. 3 Koteʼuhi ko natou ʼae neʼe vavale, neʼe natou toʼo ʼanatou malama kaʼe neʼe mole natou ʼave he moʼi lolo. 4 Kaʼe ko natou ʼae neʼe popoto neʼe natou toʼo ʼanatou malama pea mo he moʼi lolo ʼi ʼanatou ʼaiʼaga lolo. 5 ʼI te tuai mai ʼa te tagata ʼohoana, neʼe natou tulemomoe fuli pea natou maʼumoea leva. 6 Pea neʼe kalaga fenei ʼihi ʼi te poʼuli: ‘Koʼeni te tagata ʼohoana! Kotou olo ʼo fakafetaulaki ki ai.’
(Mateo 25:7-10) Neʼe tutuʼu ake te kau taʼahine ʼaia ʼo natou teuteuʼi ʼanatou malama. 8 Neʼe ui fenei age e natou ʼae neʼe vavale kia natou ʼae neʼe popoto: ‘Kotou foaki mai hamatou moʼi lolo, koteʼuhi kua vave mate ʼamatou malama.’ 9 Neʼe ui fenei age e natou ʼae neʼe popoto: ‘ ʼE mole lagi feʼauga anai maʼa tatou fuli. Kaʼe kotou olo kia natou ʼae ʼe natou fakatau te lolo, pea mo kotou totogi hakotou moʼi lolo.’ 10 ʼI tanatou olo ʼaia ʼo totogi mai hanatou moʼi lolo, neʼe haʼu ia te tagata ʼohoana. Pea ko te ʼu taʼahine ʼae neʼe nonofo teuteu, neʼe natou hu fakatahi mo ia ki te kaitahi ʼo te faiʼohoana, pea neʼe pupunu leva te matapa.
(Mateo 25:11, 12) Ki muli age, neʼe toe tau age te ʼu taʼahine ʼe toko nima ʼae, ʼo natou ui fenei: ‘ ʼAliki, ʼAliki, avahi mai!’ 12 Neʼe ina tali fenei age: ‘ ʼE au tala moʼoni atu, ʼe mole au iloʼi koutou.’
Kumi Te ʼu Koloa ʼi Te Tohi-Tapu
(Mateo 25:31-33) Ka haʼu te Foha ʼo te tagata ʼi tona kololia, fakatahi mo te kau ʼaselo fuli, pea ʼe heka anai ʼi tona hekaʼaga fakahau fakakololia. 32 ʼE fakatahi anai ʼi ʼona muʼa te ʼatu puleʼaga, pea ʼe ina vaheʼi anai te hahaʼi, ohage pe ko te vaheʼi e te tagata tauhi ovi te ʼu ovi mai te ʼu tao. 33 Pea ʼe ina tuku anai te ʼu ovi ki tona toʼomataʼu kaʼe ko te ʼu tao ki tona toʼohema.
Tokoni ʼAki He Agatonu Ki Te ʼu Tehina ʼo Kilisito
7 Ia ʼaho nei, kua tou mahino lelei age ki te lea fakatata ʼo te ʼu ovi mo te ʼu tao. ʼE tou iloʼi ko “te Foha o te tagata,” pe ko “te Hau” ʼe ko Sesu. Ko te ʼu “tehina” ʼo te Hau ʼe ko natou ʼae neʼe fakanofo e te laumalie maʼoniʼoni pea ʼe natou hau fakatahi anai mo Sesu ʼi te lagi. (Loma 8:16, 17) Ko te ʼu “ovi” mo te ʼu “tao” ʼe ko te hahaʼi mai te ʼu puleʼaga fuli. ʼE fakamauʼi anai natou ʼi te vave fakaʼosi ʼo te mamahi lahi ʼae kua vave hoko. Pea ʼe tou iloʼi ʼe fakamauʼi anai e Sesu ia te hahaʼi ʼo mulimuli ki tanatou aga ki te kau fakanofo ʼae ʼe kei maʼuʼuli ʼi te kele.ʼE tou fakafetaʼi lahi ki te tokoni mai ʼa Sehova ke tou mahino ki te lea fakatata ʼaia pea mo ʼihi atu lea fakatata ʼi te kapite 24 mo te 25 ʼo te tohi ʼo Mateo.
(Mateo 25:40) ʼE tali fenei age anai e te Hau kia natou: ‘ ʼE au tala moʼoni atu kia koutou, ko he meʼa pe neʼe kotou fai ki ʼae ʼe veliveli ʼi ʼoku tehina ʼaeni, neʼe kotou fai kia te au.’
“Ko Koutou Ko Toku ʼu Kaumeʼa”
16 Kapau ʼe kotou maʼu ia te ʼamanaki ʼaē ki te maʼuli ʼi te kele ʼi te pule ʼo te Puleʼaga ʼo te ʼAtua, ʼe kotou lava fakahā feafeaʼi ʼe kotou kaumeʼa mo te ʼu tehina ʼo Kilisito? Tou vakaʼi faʼahi pē e tolu. ʼUluaki, ʼe kotou lava kaumeʼa mo Kilisito mo kapau ʼe kotou kau ki te gāue fai fakamafola ʼaki tokotou loto kātoa. Neʼe fakatotonu e Kilisito ki tona ʼu tehina ke natou fakamafola ia te logo lelei ʼi te kele kātoa. (Mat. 24:14) Kae ʼe faigataʼa anai ki te toe ʼo te ʼu tehina ʼa Kilisito ʼaē kei māʼuʼuli ʼi te kele iā ʼaho nei hanatou fakahoko ia te maʼua ʼaia, mo kanapau lā neʼe mole natou maʼu ia te tokoni ʼo tonatou ʼu kaumeʼa ia te tahi ʼu ovi. ʼE mahino ia, ʼi te temi fuli pē ʼaē ʼe kau ai ia nātou ʼo te kalasi ʼo te tahi ʼu ovi ki te gāue fai fakamafola, ʼe natou tokoni ai ki te ʼu tehina ʼo Kilisito ke natou fakahoko ia tanatou gāue taputapu. Ko Kilisito pea mo te kalasi ʼo te tagata kaugana agatonu pea mo poto ʼe natou fakafetaʼi ʼaupitō ki te tokoni ʼaia ʼo tonatou ʼu kaumeʼa.
17 Lua, ʼe feala kiā nātou ʼo te kalasi ʼo te tahi ʼu ovi ke natou tokoni ki te ʼu tehina ʼo Kilisito ʼaki tanatou foaki he falā moʼo lagolago ki te gāue fai fakamafola. Neʼe fakalotomālohiʼi e Sesu ia tana ʼu tisipulo ke natou fai honatou ʼu kaumeʼa mo “te ʼu koloa heʼe faitotonu.” (Luka 16:9) ʼE mole fakaʼuhiga te ʼu palalau ʼaenī, ʼe tou lava totogi ia Sesu pea mo Sehova ke nā liliu ko hotatou ʼu kaumeʼa. Kae ko tona fakaʼuhiga, ʼaki tatatou fakaʼaogaʼi ʼaē ia totatou ʼu koloa moʼo lagolago ki te ʼu gāue ʼo te Puleʼaga, ʼe tou fakamoʼoni ai ki tatatou fakakaumeʼa pea mo totatou ʼofa, ʼo mole gata ʼaki pē ʼi tatatou palalau kae ʼe tou toe fakahā “ ʼaki he ʼu gāue pea mo te moʼoni.” (1 Soa. 3:16-18) ʼE tou foaki te lagolago fakapaʼaga ʼaia mokā tou kau ki te gāue fai fakamafola, mokā tou foaki he falā ki te ʼu gāue laga fale pea mo te taupau ʼo tatatou ʼu fale tauhi, pea mokā tou foaki he falā ki te gāue fai fakamafola ʼi te mālamanei kātoa. Peʼe lahi peʼe veliveli te meʼa ʼaē ʼe tou foaki, kae ʼe mahino papau ia ko Sehova pea mo Sesu ʼe nā leleiʼia tatatou foaki ʼaia ʼaki he loto fiafia.—2 Ko. 9:7.
18 Tolu, ʼe tou fakamoʼoni e tātou fuli ʼe tou kaumeʼa mo Kilisito, ʼaki tatatou fakalogo ki te takitaki ʼa te ʼu tagata ʼāfea ʼi te kōkelekāsio. Ko te ʼu tagata ʼaia neʼe filifili nātou ʼaki te laumālie māʼoniʼoni, ʼi te takitaki ʼo Kilisito. (Efe. 5:23) Neʼe tohi fēnei e te ʼapositolo ko Paulo: “Kotou fakalogo kiā nātou ʼaē ʼe natou takitaki koutou, pea mo kotou talagafua.” (Hep. 13:17) ʼI ʼihi temi, ʼe lagi faigataʼa kiā tātou hatatou fakalogo ki te takitaki ʼaē ʼe foaki mai e te ʼu tagata ʼāfea, ʼaē ʼe fakatafito ki te Tohi-Tapu. ʼE tou ʼiloʼi ia tonatou ʼuhiga heʼe haohaoa, pea ʼe feala ai ke tou maʼu ia he ʼu manatu ʼe mole lelei ʼo ʼuhiga mo tanatou ʼu tokoni. Kae ko Kilisito, te Pule ʼo te kōkelekāsio, ʼe ina leleiʼia te fakaʼaogaʼi ʼo te ʼu tagata agahala ʼaia. Koia, ko tatatou faʼahiga tali ia tanatou pule ʼe fakahā lelei ai peʼe tou fia kaumeʼa mo Kilisito. Kā tou loto fakamolemole ki te ʼu hala ʼa te ʼu tagata ʼāfea pea mo tou mulimuli fakafiafia ki tanatou takitaki, ʼe tou fakahā ai ia totatou ʼofa ʼaē kiā Kilisito.