Neʼe Toe Mate Foki Ia Sesu Maʼa Tou Tehina Pea Mo Tou Tuagaʼane

Neʼe foaki e Sesu tona maʼuli maʼa te hahaʼi agahala. (Lom 5:8) Koia ʼe tou lotofakafetaʼi ki te ʼofa ʼaia ʼo Sesu kia tatou. Kae, ʼi ʼihi temi ʼe tonu ke tou manatuʼi neʼe toe mate foki ia Kilisito maʼa tou tehina pea mo tou tuagaʼane. ʼE feafeaʼi hatatou faʼifaʼitaki te ʼofa ʼo Sesu ki ʼotatou tehina mo tuagaʼane ʼae ʼe agahala ohage pe ko tatou? Tou vakaʼi aluʼaga ʼe tolu. ʼUluaki, ʼaua naʼa tou fakatahi pe mo ʼotatou kaumeʼa kae ke tou toe fakatahi foki mo natou ʼae ʼe mole agaʼi fenua peʼe mole lanu tahi mo tatou. (Lom 15:7; 2Ko 6:12, 13) Lua, ʼe lelei ke tou tokakaga ki ʼatatou palalau peʼe ko he meʼa ʼe tou fai ʼe feala ke fakamamahiʼi ai ʼihi. (Lom 14:13-15) Pea kapau neʼe agahala atu he tahi, foimo fakamolemole ki ai. (Luk 17:3, 4; 23:34) Koia, kapau ʼe tou faiga malohi ʼo lotofakamolemole, ʼe tapuakiʼi anai e Sehova te kokelekasio ke haga maʼuli aipe ʼi te tokalelei mo te logo tahi.

VAKAʼI TE ʼATA VITEO KE KE LILIU ʼO TAULEKALEKA AGE PEA MO TALI KI TE ʼU FEHUʼI ʼAENI:

• 

  ʼI te kamata, kotea ʼae neʼe logoʼi e Miki ʼo ʼuhiga mo tana kokelekasio?

• 

  Kotea ʼae neʼe fetogi ai ʼana manatu?

• 

  Neʼe tokoni feafeaʼi te faʼifaʼitaki ʼo Sesu kia Miki ke fetogi ai tana manatu? (Mko 14:38)

• 

  ʼE tokoni feafeaʼi mai te Taaga lea 19:11 ke tou maʼu he ʼu manatu ʼe lelei ʼo ʼuhiga mo ʼotatou tehina mo tuagaʼane?