AKO 10

Te ʼAveʼave ʼo Tou Leʼo

Taaga Lea 8:4

TE MANATU ʼAE KE TAʼOFI: Ke tasilo te ʼu manatu ʼae ʼe ke fakaha, pea ke fetofetogi te agaaga ʼo tou leʼo ke malave ki te loto ʼo te hahaʼi.

Fetofetogi te malohi ʼo tou leʼo. Hikihiki te malohi ʼo tou leʼo moʼo fakamaʼuhigaʼi te ʼu manatu tafito pea mo uga te hahaʼi ke natou maʼuliʼi. Ke ke toe fai feia moka ke lau ʼi te Tohi-Tapu te ʼu fakamau ʼa Sehova. Kapau ʼe ke loto ke fia logo he tahi, peʼe ke ina toe logoʼi te tuʼania, peʼe ko te mataku moka ke talanoa ki he aluʼaga, ʼe feala ke hifo te malohi ʼo tou leʼo.

ʼE mole tonu ke malohi tuʼumaʼu tou leʼo, naʼa ui leva e natou ʼae ʼe fagono atu ʼe ke munaʼi natou. Tokaga naʼa tokagaʼi fau koe ʼi tau mole palalau ohage ko te mahani.
Fetofetogi te ʼaveʼave ʼo tou leʼo. Fakaha te fiafia, peʼe fakamaʼuhigaʼi he manatu ʼe talanoa ai ki te lahi ʼo he meʼa, peʼe ko te loaloaga ʼo he faifagona, ʼaki hau hikihiki te malohi ʼo tou leʼo, ke hage ʼe ke leʼo kiki, mo kapau foki ʼe feala ʼi tau lea. ʼE feala ke hifo te malohi ʼo tou leʼo, moʼo fakaha te mamahi peʼe ko te tuʼania.
Palalau vave peʼe mamalie. Palalau vave moʼo fakaha he manatu fakafiafia. Palalau mamalie moka ke fakaha he ʼu manatu maʼuhiga.

ʼAua naʼa ke hoko fetogi tau faʼahiga palalau, naʼa punamaʼuli ai te hahaʼi. Pea ke mole vave fau tau palalau ʼo tupu ai te mole mahino ʼa te hahaʼi, koteʼuhi ʼe mole matala lelei ʼau palalau.