He ʼu Manatu ʼe Moʼoni

Luka 1:3

TE MANATU ʼAE KE TAʼOFI: Fakaʼaogaʼi he ʼu aluʼaga ʼe moʼoni ke tokoni kia natou ʼae ʼe fagono atu ke natou mahino ki te ako ʼae ʼe tonu ke taʼofi.

TONA FAʼAHIGA FAI:

• Fakaʼaogaʼi he ʼu manatu ʼe tuha mo te falala. Fakatafito ʼau palalau ki te Folafola ʼa te ʼAtua ʼo ke faiga ke ke lau fakahagatonu ʼi te Tohi-Tapu. Kapau ʼe ke talanoa ki he aluʼaga fakasienesia, peʼe ko he logo, peʼe ko he hisitolia, peʼe ko he tahi atu ʼu aluʼaga ʼe tokoni ki tau manatu, ke ke vakaʼi muʼa pe ʼe moʼoni peʼe kua fetogi te ʼu aluʼaga.

• Fakaʼaogaʼi lelei te ʼu manatu ʼae neʼe ke maʼu. Fakaha he ako ʼe maʼu mai te ʼu vaega ʼo mulimuli pe ki te ʼu vaega ki muʼa atu pea ki muli mai, mo te logo tafito ʼo te Tohi-Tapu pea mo te ʼu tohi ʼae ʼe foaki mai e te “tagata faifekau agatonu mo poto.” (Mat. 24:45) Ka ke fakaʼaogaʼi he manatu ʼi he tahi age tohi, kae mole ko te Tohi-Tapu peʼe ko ʼatatou tohi, toe mulimuli lelei pe ki te manatu ʼo ia ʼae neʼe ina tohi.

• Tokoni ki te hahaʼi ke natou fakakaukauʼi te ʼu manatu. Ka ke ʼosi lau te vaega peʼe ke palalau ki he manatu, fai he ʼu fehuʼi fakapotopoto, peʼe ke toʼo he faʼifaʼitaki ke tokoni kia natou ke natou mahino ki te ako ʼae ʼe tonu ke taʼofi.