He Fetogi ʼI Te Aluʼaga ʼo Te Tagata Maʼu Koloa Pea Mo Lasalo

Neʼe foaki e Sesu ki ʼana tisipulo he tokoni lelei ʼo ʼuhiga mo te fakaʼaogaʼi ʼo te ʼu koloa. Kaʼe neʼe mole ko ʼana tisipulo pe ʼae neʼe fagono ki ai. Neʼe toe ʼi ai mo te kau Faliseo, pea neʼe tonu foki la ke natou tokagaʼi te tokoni ʼa Sesu. Kotea tona tupuʼaga? Koteʼuhi neʼe natou “manako ki te paʼaga.” Kaʼe ʼi tanatou logo ki te ʼu meʼa ʼae neʼe ui e Sesu, neʼe natou “kamata nukinuki kia te ia.”—Luka 15:2; 16:13, 14.

Kaʼe neʼe mole mataku Sesu ia natou. Neʼe ina ui fenei: “ ʼE ko koutou ʼae ʼe kotou tala ʼe kotou faitotonu ia muʼa ʼo te tagata, kaʼe ʼe iloʼi e te ʼAtua ʼokotou loto. He ʼe ko te meʼa ʼae ʼe fakamaʼuhigaʼi e te tagata ʼe ko he meʼa fakalialia ia kia mata ʼo te ʼAtua.”—Luka 16:15.

Neʼe kua fualoa te “fakamaʼuhigaʼi e te tagata” ia te kau Faliseo, kaʼe neʼe kua hoko mai leva te temi ʼae ke fetogi ai ia tonatou aluʼaga. Ko te hahaʼi ʼaia neʼe fakamaʼuhigaʼi mo maʼu koloa, pea mo maʼu tuʼulaga ʼi te politike mo te lotu. Kaʼe neʼe tonu ke fakamalaloʼi natou. Pea ko te hahaʼi ʼae neʼe natou mahino neʼe ʼaoga kia natou te ʼu meʼa fakalaumalie, neʼe tonu ke hikihiki ake natou. Neʼe fakaha lelei e Sesu neʼe lolotoga hoko te fetogi lahi ʼaia, ʼi tana ui fenei:

“Neʼe tala te Lao mo te kau Polofeta ʼo kaku ki te temi ʼo Soane. Talu mai te temi ʼaia, ʼe tala te logo lelei ʼo te Puleʼaga ʼo te ʼAtua, pea ʼe faiga fakamalotoloto ki ai te faʼahiga hahaʼi kehekehe. Koia ʼe feala ke molehi te lagi mo te kele. Kaʼe ʼe mole feala ke molehi he kiʼi mataʼi tohi ʼo te Lao, he ʼe fakahoko fuli anai.” (Luka 3:18; 16:16, 17) Neʼe ha feafeaʼi ʼi te ʼu palalau ʼa Sesu, neʼe lolotoga hoko he fetogi?

Neʼe fiameʼalahi te kau takitaki lotu Sutea ʼi tanatou ui ʼae ʼe natou mulimuli lelei ki te Lao ʼa Moisese. Ke ke manatuʼi te temi ʼae neʼe fakamalolo ai e Sesu te tagata kivi ʼi Selusalemi, neʼe fiameʼalahi te kau Faliseo ʼo natou ui fenei: “Ko matou ko te ʼu tisipulo ʼa Moisese. ʼE matou iloʼi neʼe palalau ia te ʼAtua kia Moisese.” (Soane 9:13, 28, 29) Ko te tahi fakatuʼutuʼu ʼa te Lao ʼae neʼe fakaha e Moisese, neʼe ko te taki ʼo te hahaʼi agavaivai ki te Mesia, ʼae ʼe ko Sesu. Neʼe fakaha e Soane Patita neʼe ko Sesu te Akeno ʼo te ʼAtua. (Soane 1:29-34) ʼO kamata mai te minisitelio ʼa Soane, ko te kau Sutea agavaivai, tafito te kau masisiva, neʼe natou logo ki te tala ʼo “te Puleʼaga ʼo te ʼAtua.” ʼEi, neʼe ko he “logo lelei” maʼa te hahaʼi fuli ʼae neʼe fia fakalogo ki te Puleʼaga ʼo te ʼAtua pea mo maʼu ʼona lelei.

Neʼe hoko katoa te Lao ʼa Moisese he neʼe ina taki te hahaʼi ki te Mesia. Pea neʼe mole kei tonu ke mulimuli ki ai te hahaʼi. Ohage la, ʼi te Lao, neʼe ʼi ai te ʼu tupuʼaga kehekehe neʼe fakagafua ai ke mavete he taumatuʼa. Kaʼe neʼe fakamahino leva e Sesu, “kapau ʼe mavete he tagata mo tona ʼohoana, pea toe ʼohoana mo he tahi age, ʼe tono ia. Pea ko he tahi ʼe ʼohoana mo he fafine kua mavete, ʼe tono ia.” (Luka 16:18) Neʼe iita te kau Faliseo ʼi te ʼu palalau ʼaia, he neʼe natou leleiʼia te fai ʼo he ʼu lao ʼo ʼuhiga mo te ʼu meʼa fuli pe.

Neʼe fakamatala leva e Sesu he lea fakatata neʼe ina fakaha lelei te fetogi lahi ʼae neʼe lolotoga hoko. Neʼe talanoa tafito ki he ʼu tagata ʼe toko lua, pea neʼe fetogi katoa tonā tuʼulaga, peʼe aluʼaga. ʼI tau vakaʼi ia te lea fakatata ʼaia, ke ke manatuʼi neʼe kau ia natou ʼae neʼe fagono ki ai, te kau Faliseo ʼae neʼe manako ki te paʼaga pea neʼe fakamaʼuhigaʼi natou e te tagata.

Neʼe ui fenei e Sesu: “Neʼe ʼi ai te tagata maʼu koloa neʼe kofu ki ni teu huʼa lotuma pea mo ni teu lino pea neʼe maʼuli fimalie mo fakafiafia ʼi te ʼaho fuli. Kaʼe neʼe ʼaumai tuʼumaʼu ʼo tuku ki tona muʼa matapa ia te tagata masiva ʼe higoa ko Lasalo pea neʼe papala katoa. Neʼe fakaʼamu ke makona ʼi te ʼu meʼa ʼae neʼe maʼofa ifo mai te laupapa ʼo te tagata maʼu koloa. ʼIo, maʼiape la mo te ʼu kuli neʼe natou ʼomai ʼo ʼemo ʼona papala.”—Luka 16:19-21.

Neʼe manako te kau Faliseo ki te paʼaga, koia, neʼe faigataʼa koa te iloʼi pe ko ai ʼae neʼe fakatata ki ai e Sesu “te tagata maʼu koloa”? Neʼe toe leleiʼia foki e te kau takitaki lotu Sutea te kofuʼi ʼo he ʼu mutuʼi meʼa totogi kovi pea mo matalelei ʼaupito. Pea tatau aipe te lahi ʼo te ʼu koloa ʼae neʼe natou maʼu, kaʼe neʼe toe lahi foki mo te ʼu pilivilesio pea mo te ʼu fealagia ʼae neʼe natou maʼu. ʼEi, ko tonatou fakatatau ki he tagata neʼe kofu ki ni teu huʼa lotuma ohage ko te ʼu hau, neʼe ha ai te lelei ʼo tonatou tuʼulaga, pea ko te lino hina neʼe ha ai tanatou manatu ʼae ʼe natou faitotonu.—Taniela 5:7, MN.

Neʼe kotea te manatu ʼa te kau takitaki maʼu koloa mo fiameʼalahi ʼo ʼuhiga mo te hahaʼi masisiva? Neʼe natou fehihiʼa ki te hahaʼi ʼaia, he neʼe hage kia natou ko he kau ‘am haʼarèts, peʼe ko te hahaʼi ʼo te fenua (peʼe ʼo te kele), ʼae neʼe mole natou iloʼi te Lao pea neʼe mole tuha ke akoʼi age kia natou te Lao. (Soane 7:49) Neʼe fakatata te hahaʼi ʼaia ki “te tagata masiva ʼe higoa ko Lasalo,” ʼae neʼe ʼuakai ki te ʼu eveʼi “meʼa ʼae neʼe maʼofa ifo mai te laupapa ʼo te tagata maʼu koloa.” Ohage ko Lasalo ʼae neʼe papala katoa, ko te hahaʼi ʼaia neʼe meʼa noaʼi natou, ohage neʼe natou mahahaki ʼi te faʼahi fakalaumalie.

Neʼe hoko te aluʼaga fakaʼofaʼofa ʼaia lolotoga he temi, kaʼe neʼe iloʼi e Sesu kua hoko mai te temi ʼae ke fetogi ai te aluʼaga ʼo natou ʼae neʼe hage ko te tagata maʼu koloa pea mo natou ʼae neʼe hage ko Lasalo.

TE FETOGI ʼI TE ALUʼAGA ʼO TE TAGATA MAʼU KOLOA PEA MO LASALO

Neʼe fakamatala leva e Sesu te fetogi katoa ʼaia ʼo te ʼu aluʼaga. Neʼe ina ui fenei: “Ki muli age, neʼe mate te tagata masiva pea neʼe ʼave e te kau ʼaselo kia tafa ʼo Apalahamo. Neʼe toe mate mo te tagata maʼu koloa pea neʼe ʼavaifo. ʼI te Faitoka neʼe hiki ake ʼona mata, pea ʼi tana lolotoga mamahi neʼe sio mamaʼo kia Apalahamo pea mo Lasalo ʼi ʼona tafa.”—Luka 16:22, 23.

Ko natou ʼae neʼe fagono kia Sesu, neʼe natou iloʼi neʼe kua fualoa te mate ʼa Apalahamo pea mo tana nofo ʼi te Faitoka. ʼE fakaha lelei ʼi te Tohi-Tapu ko he tahi ʼi te Faitoka, peʼe ʼi te maloloʼaga ʼo te kau mate, ʼe mole feala ke sio peʼe ke palalau, ʼo feia pe mo Apalahamo. (Ekelesiasi 9:5, 10) Koia, maʼa te kau takitaki lotu, neʼe kotea koa te fakaʼuhiga ʼo te lea fakatata ʼaia ʼa Sesu? Kotea koa ʼae neʼe lagi ina fia fakaha ʼo ʼuhiga mo te hahaʼi ʼo feia mo te kau takitaki lotu ʼae neʼe manako ki te paʼaga?

Neʼe hoki talanoa age pe ia Sesu ki he fetogi ʼi tana ui ʼae ‘neʼe tala e te Lao mo te kau Polofeta ʼo kaku ki te temi ʼo Soane Patita, pea talu mai ai kua tala te logo lelei ʼo te Puleʼaga ʼo te ʼAtua.’ Koia, ʼaki te faifakamafola ʼa Soane pea mo Sesu Kilisito, neʼe mamate ai ia Lasalo pea mo te tagata maʼu koloa, pe neʼe hoko kia naua he fetogi, pea neʼe nā maʼu ai he ʼu tuʼulaga foʼou ia muʼa ʼo te ʼAtua.

Ko te hahaʼi agavaivai peʼe ko te kau masisiva, neʼe kua fualoa tonatou mole fafaga ʼi te faʼahi fakalaumalie. Kaʼe neʼe tokoni kia natou ia tanatou tali te logo ʼo ʼuhiga mo te Puleʼaga ʼae neʼe ʼuluaki tala age e Soane Patita, pea ki muli age e Sesu. ʼI muʼa atu, neʼe natou maʼu pe te ʼu kiʼi ‘meʼa ʼae neʼe maʼofa ifo mai te laupapa fakalaumalie’ ʼa te kau takitaki lotu. Kaʼe neʼe fafaga leva natou ʼaki te ʼu moʼoni maʼuhiga ʼo te ʼu Tohi Taputapu, tafito te ʼu manatu taulekaleka ʼae neʼe fakamahino e Sesu. Neʼe hage ki muli age neʼe lelei tonatou tuʼulaga ia muʼa ʼo Sehova ʼAtua.

Kaʼe ko te kau takitaki lotu maʼu koloa pea mo maʼuhiga, neʼe mole natou tali te logo ʼo te Puleʼaga ʼae neʼe tala e Soane pea neʼe fakamafola e Sesu ʼi te fenua katoa. (Mateo 3:1, 2; 4:17) ʼI tona fakahagatonu, neʼe natou iita, pe neʼe fakamamahiʼi natou e te logo ʼaia he neʼe tala ai te hoko mai ʼo te fakamau fakamataku ʼa te ʼAtua. (Mateo 3:7-12) Neʼe feala ke maʼu e te kau takitaki lotu ʼae neʼe manako ki te paʼaga he fimalie, mo ka na pau la neʼe tuku e Sesu mo ʼana tisipulo tanatou tala ia te logo ʼa te ʼAtua. Neʼe hage te kau takitaki ko te tagata maʼu koloa ʼi te lea fakatata, ʼae neʼe ina ui fenei: “Apalahamo, tamai, ʼofa mai kia au pea fekauʼi mai ia Lasalo ke ina fufuʼi tona muʼamuʼaʼi kauʼi tuhi ki te vai ke ina fakamokomoko toku ʼalelo, koteʼuhi ʼe kovi toku mamahi ʼi te afi ʼaeni.”—Luka 16:24.

Kaʼe neʼe mole hoko te faʼahi ʼaia. Tokolahi te kau takitaki lotu neʼe mole natou fia fetogi. Neʼe mole natou fia “fakalogo kia Moisese pea mo te kau Polofeta.” ʼAki te ʼu tohi ʼa Moisese mo te kau Polofeta, neʼe tonu leva ke natou fakamoʼoni ko Sesu neʼe ko te Mesia pea mo te Hau ʼa te ʼAtua. (Luka 16:29, 31; Kalate 3:24) Kaʼe neʼe mole natou fia fakamalalo ifo pea mo natou faʼifaʼitakiʼi te hahaʼi masisiva ʼae neʼe natou tali ia Sesu pea neʼe kua lelei tonatou tuʼulaga ia muʼa ʼo te ʼAtua. Pea ʼi te tahi age faʼahi, neʼe mole feala ki te ʼu tisipulo ʼa Sesu ke natou ʼave keheʼi te moʼoni ʼuhi pe ke fiafia ai te kau takitaki lotu peʼe ke natou maʼu ai he fimalie. ʼI tana lea fakatata, neʼe fakaha ai e Sesu te aluʼaga ʼaia ʼi te ʼu palalau ʼaeni neʼe fai e ‘Apalahamo, te tamai’ ki te tagata maʼu koloa:

“Fanau, manatuʼi neʼe ke maʼu te ʼu tuʼuga meʼa lelei ʼi tou maʼuli, kaʼe neʼe maʼu e Lasalo te ʼu meʼa kovi. ʼI te temi nei, ʼe maʼuli fimalie ʼi heni, kaʼe ko koe ʼe kovi tou mamahi. Pea ʼo hilifaki ki te ʼu meʼa fuli ʼaia, ʼe ʼi ai te vanu lahi ʼi te vaha ʼo matou mo koutou. Koia ko natou ʼae ʼe fia mavae atu ʼi heni ʼo olo atu kia koutou ʼe mole feala ia, pea ʼe toe feia pe ʼe mole feala ke fakalaka te hahaʼi mai hena kia matou.”—Luka 16:25, 26.

Neʼe ko he meʼa lelei pea mo faitotonu te hoko ʼo te fetogi katoa ʼaia! Neʼe ko he fetogi ʼi te tuʼulaga ʼo te kau takitaki lotu fiameʼalahi pea mo te hahaʼi agavaivai ʼae neʼe natou tali ia te ʼakau ʼamo ʼa Sesu pea neʼe fakafimalieʼi leva natou mo fafaga natou ʼi te faʼahi fakalaumalie. (Mateo 11:28-30) Neʼe ha lelei te fetogi ʼaia hili ki ai ni mahina, ʼi te temi ʼae neʼe fetogi ai te fuakava ʼo te Lao ʼaki te fuakava foʼou. (Selemia 31:31-33; Kolose 2:14; Hepeleo 8:7-13) ʼI te foaki e te ʼAtua ia te laumalie maʼoniʼoni ʼi te ʼaho ʼo te Penikosite ʼo te taʼu 33 H.T.S., neʼe iloʼi papau ai leva neʼe ko te ʼu tisipulo ʼa Sesu ʼae neʼe natou maʼu te ʼofa ʼo te ʼAtua kaʼe neʼe mole ko te kau Faliseo pea mo te hahaʼi lotu ʼae neʼe lagolago kia natou.