AKO 2

Palalau Ohage Ko Te Mahani

2 Kolonito 2:17

TE MANATU ʼAE KE TAʼOFI: Palalau ohage ko tau palalau mahani, ke ha pe ʼe malave feafeaʼi kia koe te manatu ʼae ka ke palalau ki ai pea mo te meʼa ʼae ʼe ke logoʼi ʼo ʼuhiga mo natou ʼae ʼe fakalogo atu.

TONA FAʼAHIGA FAI:

Teuteuʼi lelei pea ke ke faikole kia Sehova. Faikole kia Sehova ke tokoni atu ke ʼaua tau tokaga fau kia koe, kae ke ke tokaga ki te faʼahi ʼae ʼe ke fakaha. ʼE tonu ke ke mahino lelei ki te ʼu puani tafito ʼae ka ke palalau anai ki ai. Fakaha te ʼu manatu ʼaki ʼau palalau ʼa koe totonu. Kae ʼe mole ke lau pe anai te ʼu kupu ʼae ʼe tuʼu ʼi he tohi.

Kapau ʼe ke fakatuʼutuʼu ke ke lau he vaega Tohi-Tapu peʼe ko he manatu ʼi he tahi age tohi, ke ke fakamamahani mo te meʼa ʼae ka ke lau anai ke hoholo lelei ai tau lautohi. Kapau ʼe maʼu ai he ʼu palalau ʼa he tahi, ke ke fakaha ʼi tau lautohi ʼe malave ki tou loto pea ʼe ke lau ohage pe ko te palalau mahani ʼa te hahaʼi.
Fai he ʼu palalau ʼe haʼu mai tou loto. Fakakaukauʼi te ʼu tupuʼaga ʼae ke iloʼi ai e te hahaʼi te logo lelei. Manatuʼi ia natou. Pea ʼe feala anai ke ha ʼi tau faʼahiga tuʼu, mo tau fakaʼaogaʼi ʼou nima, mo te agaaga ʼo tou fofoga ia tau fakamalotoloto pea mo tau agalelei.

ʼE feala ke ke palalau ohage pe ko te mahani, kae ʼe tonu ke ke palalau ʼaki he fakaʼapaʼapa pea ke mahino lelei mo totonu, ke ha ai ʼe maʼuhiga te faʼahi ʼae ʼe ke fakaha.
Sioʼi te nofoʼaki peʼe ko he tahi ʼe fagono atu. Ke ke sioʼi te nofoʼaki peʼe ko he tahi mo kapau ʼe mole ko he aga ʼe heʼe fakaʼapaʼapa. Moka ke fai hau akonaki, sioʼi he tahi ʼi te nofoʼaki pea ke hiki atu ki he tahi, kae ʼaua tau sioʼi te nofoʼaki katoa peʼe vave fau tau sioʼi natou.