Kāpite 14
Te Taulekaleka ʼo Te Hekaʼaga Fakahau ʼo Sehova ʼi Selō
Te meʼa ʼaē neʼe hā 2—Fakahā 4:1–5:14
Te manatu tāfito: ʼE hoko te ʼu meʼa fakaofoofo iā muʼa ʼo te hekaʼaga fakahau ʼaē ʼe heka ai ia te ʼAtua moʼo faifakamāu
Te temi ʼaē ʼe hoko ai: Ko te meʼa ʼaia neʼe hā, ʼe ina fakahā mai te ʼu meʼa ʼaē neʼe hoko talu mai te taʼu 1914 ʼo aʼu ki te fakaʼosi ʼo te ʼu Taʼu e Afe pea mo te ʼu meʼa ʼaē kā hoa kiai, mokā fakavikiviki anai kiā Sehova ia te ʼu fakatupu fuli, ʼaē ʼi te lagi pea mo te kele.—Fakahā 5:13
1. He koʼē ʼe tonu ke tou tokagaʼi lelei ia te ʼu meʼa ʼaē neʼe hā kiā Soane?
NEʼE kamata fakahā mai e Soane kiā tātou te tahi ʼu meʼa fakaofoofo ʼaē neʼe hā. ʼAki te laumālie, neʼe kei nofo ia ʼi te ʼaho ʼo te ʼAliki. Koia, ko te ʼu meʼa ʼaē neʼe ina fakamatala ʼe maʼuhiga ʼaupitō kiā tātou ʼaē ʼe māʼuʼuli moʼoni ʼi te ʼaho ʼaia. ʼAki te ʼu meʼa ʼaia neʼe hā, neʼe fakahā mai e Sehova te ʼu meʼa fakapulipuli ʼo te ʼu meʼa ʼaē ʼe hoko moʼoni ʼi selō, pea mo ina fakahā mai tana ʼu fakamāu ʼaē kā ina fakahoko anai ki te kele. Tahi ʼaē meʼa, peʼe tou maʼu te ʼamanaki ʼaē ko te māʼuʼuli ʼi selō peʼe ʼi te kele, ko te ʼu fakahā ʼaia ʼe tokoni mai ke tou ʼiloʼi totatou tuʼulaga ʼi te fakatuʼutuʼu ʼa Sehova. Koia, ʼe tonu anai kiā tātou fuli ke tou haga tokagaʼi lelei ia te ʼu palalau ʼaenī ʼa Soane: “Fiafia ia ia ʼaē ʼe ina lau leʼolahi, pea mo nātou ʼaē ʼe logo ki te ʼu folafola ʼo te lea faka polofetā ʼaenī, pea mo natou mulimuli te ʼu meʼa ʼaē ʼe tohi ai.”—Fakahā 1:3.
2. Koteā te meʼa ʼaē neʼe hoko kiā Soane?
2 Ko te meʼa ʼaē neʼe sio leva kiai Soane, ʼe makehe age ia ʼi te ʼu ʼata ʼaē ʼe tou lava maʼu ʼi te ʼu fime viteo ʼo te temi ʼaenī! Neʼe ina tohi fēnei: “Hili te ʼu meʼa ʼaia, neʼe au sio pea koʼenī te matapā ʼe ava ʼi selō, pea ko te ʼuluaki leʼo ʼaē neʼe au logo kiai, neʼe hagē ia ko ʼaē ʼa he puhi fakatagi, neʼe palalau mo au ʼo ʼui māʼana: ‘Hake mai ki ʼoluga, pea ʼe au fakahā atu anai ia te ʼu meʼa ʼaē ʼe tonu ke hoko.’ ” (Fakahā 4:1) ʼAki te meʼa ʼaē neʼe hā kiā Soane, neʼe hū ia ki te lagi fakapulipuli ʼaē ʼe ʼafio ai ia Sehova, ʼaē ʼe mamaʼo age ʼi te lagi ʼaē kua kaku kiai te kau tagata ʼaē neʼe ʼolo ki te māhina, ʼo fēia pea mo te ʼu fakapupuʼaga fetuʼu ʼo te ʼatulaulau. Neʼe hagē ko he fakaafe ʼo Soane ke hū ʼi te matapā ʼaē ʼe tuku ava, ke mamata ki te potu fakatalakitupua, ko te potu tauʼoluga ʼaupitō ʼo te lagi fakalaumālie, ʼaē ʼe ʼafio ai ia Sehova totonu ʼi tona hekaʼaga fakahau. (Pesalemo 11:4; Isaia 66:1) ʼI toe pilivilēsio leva!
3. Koteā ʼaē ʼe tou manatuʼi ʼaki te leʼo ʼaē ʼe “hagē ia ko ʼaē ʼa he puhi fakatagi,” pea ʼe mahino papau ia ko ai tona Matapuna?
3 ʼE mole fakahā mai ʼi te Tohi-Tapu peʼe ʼa ʼai te “ ʼuluaki leʼo” ʼaia. Ohagē ko te leʼo mālohi ʼo Sesu ʼaē neʼe tou logo kiai ki muʼa atu, ʼe hagē ko te tatagi ʼa he puhi fakatagi moʼo fai ʼo he fakatotonu. (Fakahā 1:10, 11) ʼE tou manatuʼi ai te fakatatagi mālohi ʼo te puhi fakatagi, ʼaē neʼe ina fakahā te ʼafioʼaga ʼo Sehova ʼi te moʼuga ʼo Sinai. (Ekesote 19:18-20) ʼE mahino papau ia, ʼe ko Sehova ia te Matapuna fakatalakitupua ʼo te pāui ʼaia. (Fakahā 1:1) Neʼe ina ʼavahi ia te matapā, ke feala kiā Soane, ʼaki te ʼu meʼa ʼaē neʼe hā ki ai, ke hū ki te potu ʼaē ʼe taputapu ʼaupitō ʼo te potu lahi ʼaē ʼe hoko ai te pule faʼitaliha ʼa Sehova.
Te ʼAfio ʼAē ʼe Gigila ʼa Sehova
4. (a) He koʼē ko te meʼa ʼaē neʼe hā kiā Soane ʼe maʼuhiga ki te kau Kilisitiano fakanofo? (b) He koʼē ko te meʼa ʼaē neʼe hā ʼe maʼuhiga kiā nātou ʼaē ko tanatou ʼamanaki ko te māʼuʼuli ʼo heʼegata ʼi te kele?
4 Koteā ʼaē neʼe sio kiai ia Soane? Tou fakalogo age muʼa ki tana fakamatala mai te ʼaluʼaga fakaofoofo ʼaē neʼe hoko kiā te ia: “Hili te ʼu meʼa ʼaia, neʼe taki au e te mālohi ʼo te laumālie: pea koʼenī neʼe kua fakatoka te hekaʼaga fakahau ʼi te lagi, pea ʼe heka ai te tahi ʼi te hekaʼaga fakahau.” (Fakahā 4:2) Fokifā pē, neʼe ʼave fakalaumālie ia Soane e te mālohi gāue ʼo Sehova ki te hekaʼaga fakahau ʼo Sehova. ʼI meʼa fakaofoofo leva ʼaē neʼe hoko kiā Soane! ʼI te potu ʼaia, neʼe fakahā fakatomuʼa age kiā te ia te lagi ʼaē kua vaheʼi kiā te ia pea mo ʼihi kau Kilisitiano fakanofo, ko “he tōfiga ʼe heʼe popo, heʼe ʼuli, heʼe fefe.” (1 Petelo 1:3-5; Filipe 3:20) Ko te meʼa ʼaia ʼaē neʼe hā kiā Soane, ʼe toe maʼuhiga kiā nātou ʼaē ko tanatou ʼamanaki ko te māʼuʼuli ʼo heʼegata ʼi te kele. ʼE feala ai hanatou mahino ki te kolōlia ʼo te ʼafioʼaga ʼo Sehova pea mo te agaaga ʼo te puleʼaga ʼaē ʼi selō, ʼaē ʼe ina fakaʼaogaʼi moʼo fakamāuʼi ia te ʼu puleʼaga pea mo puleʼi ia te hahaʼi ʼaē ʼe māʼuʼuli ʼi te kele. ʼE moʼoni ia, ko Sehova ʼe ko te ʼAtua fai fakatuʼutuʼu lelei ʼaupitō!
5. Ko ai ia ia totonu ʼaē neʼe sio ki ai ia Soane, ʼaē neʼe fakatātā e te tāpunu ʼo te ʼaleka ʼo te fuakava?
5 ʼE lahi te ʼu meʼa ʼaē neʼe sio kiai ia Soane ʼi selō, ʼe tatau mo te ʼu naunau ʼo te tapenakulo ʼi te toafa. Neʼe faʼu te tapenakulo ʼaia kua hili kiai taʼu e 1 600, ko he sagatualio ʼo te tauhi moʼoni ʼa te kau Iselaele. ʼI te Potu Taputapu ʼAupitō ʼo te tapenakulo ʼaia, neʼe tuku ai te ʼaleka ʼo te fuakava, pea neʼe palalau ia Sehova totonu mai te fuga tāpunu ʼaulo ʼo te ʼAleka ʼaia. (Ekesote 25:17-22; Hepeleo 9:5) Koia, ko te tāpunu ʼo te ʼAleka neʼe ina fakatātā ia te hekaʼaga fakahau ʼo Sehova. ʼI te temi leva ʼaia, neʼe sio ia Soane kiā ia totonu ʼaē neʼe fakatātā e te fuga tāpunu ʼo te ʼaleka: te Tuʼi ʼAliki ko Sehova ʼe heka ʼi tona hekaʼaga fakahau taulekaleka ʼaupitō ʼaē ʼi selō!
6. Koteā ʼaē ʼe fakamatala mai e Soane ʼo ʼuhiga mo tana faʼahiga sio kiā Sehova pea mo tona faʼahiga malave ʼaē kiā te ia, pea he koʼē ʼe tau mo feʼauga ia te ʼu palalau ʼaia?
6 ʼO mole hagē ko te ʼu polofetā muʼamuʼa ʼaē neʼe hā age kiā nātou ia te hekaʼaga fakahau ʼo Sehova, ʼe mole fakamatala kātoa mai e Soane ia te Māʼoniʼoni ʼaē ʼe heka ʼi ai. (Esekiele 1:26, 27; Taniela 7:9, 10) Kae neʼe ina fakamatala mai pe neʼe malave feafeaʼi ki ai tana sio kiā ia ʼaē ʼe heka ʼi te hekaʼaga fakahau: “Pea ko ia ʼaē ʼe heka, ʼe tatau tona agaaga mo he maka sasipa pea mo he maka maʼugataʼa lanu kula, pea neʼe takatakai ia te hekaʼaga fakahau e te nuanua ʼe tatau tona agaaga mo he emelote.” (Fakahā 4:3) ʼI taulekaleka makehe leva! Neʼe sio ia Soane ki he meʼa taulekaleka ʼe tapa gigila ohagē ko he ʼu maka gigila maʼugataʼa. ʼI ʼalutahi leva ʼo te faʼahi ʼaia mo te fakamatala ʼa te tisipulo ko Sake, ʼi tana ʼui ʼaē ko Sehova ko “te Tamai ʼo te ʼu mālama ʼaē ʼi selō”! (Sake 1:17) ʼI te ʼosi pē ʼo tana tohi ia te Fakahā, neʼe ʼui totonu fēnei e Soane: “Ko te ʼAtua ʼe ko he mālama pea ʼe mole ʼiloga he fakapōʼuli e tahi ʼi takita fakatahi mo ia.” (1 Soane 1:5) ʼE moʼoni ko Sehova ʼe ko te ʼAtua ʼaē ʼe lahi tokotahi tona kolōlia!
7. Koteā ʼaē ʼe fakatātā e te nuanua ʼaē ʼe ina ʼātakai ia te hekaʼaga fakahau ʼo Sehova?
7 Kotou fakatokagaʼi, neʼe sio ia Soane ki te nuanua ʼe ina ʼātakai ia te hekaʼaga fakahau, ʼe lanu fuluʼi hega ohagē ko te emelote. Ko te kupu Faka Keleka ʼaē ʼe fakaliliu ʼi henī ʼaki te kupu nuanua (iris) ʼe faka ʼuhiga ki te vaelua ʼo he meʼa ʼe takafuafua lelei. Ko te nuanua ʼaē ʼe ʼuluaki talanoa kiai ia te Tohi-Tapu, ʼe ko te nuanua ʼo te temi ʼo Noe. ʼI te ʼosi hifo ʼo te ʼu vai ʼo te tulivio, neʼe fakaʼasi e Sehova te nuanua ʼi te ʼu ʼao, ʼo ina fakamahino fēnei ia te ʼuhiga fakatā ʼo te nuanua: “ ʼE au fakatuʼu taku nuanua ʼi te ʼu ʼao, pea ʼe tonu anai ke liliu ko he fakaʼiloga ʼo te fuakava ʼaē ʼaʼaku pea mo te kele. Pea ʼe mahino ia ʼe au manatuʼi anai taku fuakava ʼaē ʼaʼaku pea mo koutou, pea mo te nefesi maʼuli fuapē ʼi te kakano fuapē; pea ʼe mole toe liliu anai te ʼu vai ko he tulivio moʼo fakaʼauha ʼo te kakano fuapē.” (Senesi 9:13, 15) Neʼe koteā ʼapē te meʼa ʼaē neʼe lagi manatuʼi e Soane ʼi tana sio ki te meʼa ʼaia neʼe hā ʼi te lagi? ʼI tana sio ki te nuanua, neʼe lagi ina manatuʼi ia te maʼua ʼaē ke ina maʼu he ʼu felōgoi ʼe tokalelei pea mo Sehova, ohagē ko ʼaē ʼa te kalasi ʼo Soane pea mo Sehova ʼi te temi ʼaenī. Ko te nuanua ʼaē neʼe sio kiai neʼe lagi ina tokagaʼi ai ia te tokalelei ʼaē ʼe haʼu mai te ʼafio ʼa Sehova, pea mo te tokalelei ʼaē kā mafola anai ki te hahaʼi fakalogo fuli, ʼi te temi ʼaē kā folahi ai anai e Sehova ia tona fale fehikitaki ki te hahaʼi ʼo te kele foʼou peʼe ki te sōsiete fakatagata foʼou.—Pesalemo 119:165; Filipe 4:7; Fakahā 21:1-4.
Tou Vakaʼi Peʼe Ko Ai Te Toko 24 Tagata ʼĀfea
8. Ko ai ʼaē neʼe sio ki ai ia Soane ʼi te takafoli ʼo te hekaʼaga fakahau, pea ko ai ʼaē ʼe natou fakatātā?
8 Neʼe ʼiloʼi e Soane neʼe hinoʼi te kau pelepitelō ke natou tauhi ʼi te tapenakulo ʼo te temi muʼa. Koia, neʼe lagi punamaʼuli ʼi tana sio ki te meʼa ʼaē neʼe ina fakamatala mai: “Pea ʼo ʼātakai ia te hekaʼaga fakahau ʼe ʼi ai te ʼu hekaʼaga fakahau e ʼuafulu-mā-fā, pea ʼi te ʼu hekaʼaga fakahau ʼaia neʼe au sio ʼe heheka ai te toko ʼuafulu-mā-fā tagata ʼāfea, ʼe natou kofuʼi te ʼu kofu tuʼa hina, pea mo te ʼu kolona ʼaulo ʼi tonatou ʼulu.” (Fakahā 4:4) ʼEī neʼe mole sio ia ki he kau pelepitelō, kae neʼe sio ia ki te toko 24 tagata ʼāfea ʼe heheka ʼi te ʼu hekaʼaga fakahau pea mo hili ʼi ʼonatou ʼulu ia te ʼu kolona ohagē ko he ʼu hau. Ko ai koa ia te ʼu tagata ʼāfea ʼaia? ʼE mahino papau ia, ʼe ko te kau fakanofo ʼo te kōkelekāsio faka Kilisitiano, ʼaē kua fakatuʼuake pea kua nonofo ʼi tonatou tuʼulaga ʼaē ʼi selō, ʼaē neʼe fakapapau age e Sehova kiā nātou. ʼE tou ʼiloʼi feafeaʼi ia te faʼahi ʼaia?
9, 10. ʼE tou ʼiloʼi feafeaʼi ko te toko 24 tagata ʼāfea ʼe natou fakatātā ia te kōkelekāsio ʼa te kau Kilisitiano fakanofo ʼi tonatou tuʼulaga faka kolōlia ʼaē ʼi selō?
9 ʼUluaki, ʼe ʼi ai te ʼu kolona ʼi tonatou ʼulu. ʼE ʼui ʼi te Tohi-Tapu ʼo ʼuhiga mo te kau Kilisitiano fakanofo, ʼe foaki age kiā nātou ‘te kolona ʼaē ʼe heʼe popo’ pea mo natou maʼu ia te maʼuli ʼaē ʼe mole hona gataʼaga—ia te maʼuli tuputupua. (1 Kolonito 9:25; 15:53, 54) Kae mai tona ʼuhiga ʼaē ko te toko 24 tagata ʼāfea ʼe natou heheka ʼi te ʼu hekaʼaga fakahau, ʼi te ʼaluʼaga leva ʼaia ʼe fakatātā e te ʼu kolona ʼaulo ia te tuʼulaga hau. (Vakaʼi ia Fakahā 6:2; 14:14.) ʼE fakamoʼoni e te faʼahi ʼaia, ko te toko 24 tagata ʼāfea ʼe natou fakatātā te kau tisipulo fakanofo ʼa Sesu, ʼi tonatou tuʼulaga ʼaē ʼi selō, koteʼuhi neʼe fai e Sesu tana fuakava mo nātou, ke natou heheka ʼi te ʼu hekaʼaga fakahau ʼi tona Puleʼaga. (Luka 22:28-30) ʼE gata pē kiā Sesu mo te kau tagata ʼāfea ʼaia e toko 24—ʼo mole kau ai pē lā ia te kau ʼāselo—ʼe fakahā mai ʼe natou nonofo hau ʼi selō iā muʼa ʼo te ʼafio ʼa Sehova.
10 ʼE ʼalutahi ia te fakamahino ʼaia mo te fakapapau ʼaē neʼe fai e Sesu ki te kōkelekāsio ʼo te kau Laotisē: “Kiā ia ʼaē ʼe mālo, ʼe au fakagafua anai kiā ia ke heka mo au ki toku hekaʼaga fakahau.” (Fakahā 3:21) Kae ko te tuʼulaga ʼaē ʼi selō ʼo te toko 24 tagata ʼāfea, ʼe mole gata ʼaki pē tanatou pule ʼi te puleʼaga. ʼI te kamata ʼo te tohi ʼo te Fakahā, neʼe ʼui e Soane ʼo ʼuhiga mo Sesu: “Neʼe ina fakaliliu ia tātou ko he puleʼaga, ko he kau pelepitelō maʼa tona ʼAtua pea mo Tamai.” (Fakahā 1:5, 6) Koia, ko te kau tagata ʼāfea ʼaia ʼe natou nonofo hau pea mo pelepitelō. “ ʼE natou liliu anai ko he ʼu pelepitelō ʼa te ʼAtua pea mo Kilisito, pea ʼe natou kaugā hau anai mo ia ʼi te lolotoga ʼo te ʼu taʼu ʼaē e afe.”—Fakahā 20:6.
11. He koʼē ʼe tāu mo feʼauga ke toko 24 ia te kau tagata ʼāfea, pea koteā te faka ʼuhiga ʼo te nūmelo ʼaia?
11 Neʼe sio ia Soane ki te toko 24 ʼu tagata ʼāfea ʼe natou nonofo ʼi te ʼu tafaʼaki ʼo te hekaʼaga fakahau. Koteā ʼaē ʼe maʼuhiga ai ia te nūmelo 24? ʼE lahi te ʼu ʼaluʼaga neʼe fakatātā ai ia nātou ʼaia e te kau pelepitelō agatonu ʼo te Iselaele ʼāfea. Neʼe faitohi fēnei te ʼapositolo ko Petelo ki te kau Kilisitiano fakanofo: “Ko koutou, ko te ‘faʼahiga hahaʼi kua fili, ko he kau pelepitelō fakahau, ko he puleʼaga māʼoniʼoni, ko he hahaʼi kua tuku ko hona koloa makehe.’ ” (1 Petelo 2:9) ʼE lelei ke tou fakatokagaʼi, ʼaki te temi neʼe vaheʼi ia te kau pelepitelō Sutea ʼāfea ʼo liliu ko kalasi e 24. Neʼe fakatuʼutuʼu te kalasi takitokotahi ke tauhi iā muʼa ʼo Sehova lolotoga ni ʼu vāhaʼa ʼo te taʼu, ʼo mole feala ʼi he temi ke motu ai ia te tauhi taputapu ʼaia. (1 Fakamatala 24:5-19) Koia, neʼe tāu mo feʼauga ke ʼi ai ni ʼu tagata ʼāfea e toko 24 ʼi te meʼa ʼaē neʼe hā kiā Soane ʼo ʼuhiga mo te kau pelepitelō ʼaē ʼi selō, heʼe fai hoholo tanatou tauhi ʼaē kiā Sehova, ʼo natou fai ʼi temi fuli pē. ʼI te temi ʼaē kā natou kātoa ai, ʼe ko kalasi anai e 24, pea ʼi te kalasi e tahi, ʼe ko te toko 6 000 ʼo nātou ʼaē neʼe mālo, heʼe fakahā mai iā Fakahā 14:1-4 ko te toko 144 000 (24 x 6 000) ʼe “totogi mai te lotolotoiga ʼo te mālamanei” ke natou tutuʼu mo te ʼAkeno ʼaē ko Sesu Kilisito, ʼi te moʼuga ʼo Sione ʼaē ʼi selō. Mai tona ʼuhiga ʼaē ko te nūmelo 12 ʼe faka ʼuhiga ki he kautahi fakaʼatua ʼe fakaʼaluʼalu lelei, koia ko te nūmelo 24 ʼe ina fakaliuga lua—peʼe ina fakamālohiʼi—ia te fakatuʼutuʼu ʼaia.
Te ʼu ʼUhila, Te ʼu Leʼo Pea Mo Te ʼu Mana
12. Ki muli age, koteā ʼaē neʼe sio pea mo logo kiai ia Soane, pea koteā ʼaē ʼe tou manatuʼi ʼo ʼuhiga mo “te ʼu ʼuhila, mo te ʼu leʼo pea mo te ʼu mana”?
12 Ki muli age, koteā ʼaē neʼe sio pea mo logo kiai ia Soane? “Pea neʼe haʼu ki tuʼa mai te hekaʼaga fakahau, te ʼu ʼuhila, mo te ʼu leʼo pea mo te ʼu mana.” (Fakahā 4:5a) ʼAki te ʼaluʼaga ʼaenī ʼe tou manatuʼi ai te tahi ʼu hā fakaofoofo ʼo te mālohi ʼaē ʼi te lagi ʼo te ʼAtua! Ohagē lā, ʼi te “hifo ifo” ʼa Sehova ki te moʼuga ʼo Sinai, neʼe ʼui fēnei e Moisese: “ ʼI te tolu ʼaho, ʼi te ʼuhu, neʼe hoko te meʼa ʼaenī: neʼe tō te mana pea mo tapa te ʼuhila, pea neʼe ʼi ai te toe ʼao mātolu ʼi te fuga moʼuga, pea mo te logo mālohi ʼo te puhi tala. . . . Pea ʼi te ʼāsili mālohi ʼo te tatagi ʼo te puhi tala, neʼe lea ai ia Moisese, pea neʼe tali age e te ʼAtua moʼoni kiā te ia ʼaki he leʼo.”—Ekesote 19:16-19.
13. Koteā ʼaē ʼe fakatātā e te ʼu ʼuhila ʼaē ʼe tapa mai te hekaʼaga fakahau ʼo Sehova?
13 Lolotoga te ʼaho ʼo te ʼAliki, ʼe fakahā e Sehova tona mālohi pea mo tana ʼafioʼaga ʼi hona ʼaluʼaga fakaofoofo. Kae ʼe mole ina fakahā ʼaki he ʼu ʼuhila moʼoni, heʼe lolotoga sio ia Soane ki te ʼu fakaʼiloga. Koteā koa ʼaē ʼe fakatātā e te ʼu ʼuhila? ʼE feala ki te fatuliki ke ina faka mālamagia, kae ʼe toe feala pē foki ke ina matehi he tahi. ʼO hā ʼaki mai, ko te ʼu ʼuhila ʼaē ʼe tapa mai te hekaʼaga fakahau ʼo Sehova, ʼe natou fakatātā ia te ʼu faka mālamagia ʼaē ʼe foaki tuʼumaʼu e Sehova ki tana hahaʼi pea ʼe natou fakatātā tāfito ia tana ʼu tautea fakamataku.—Vakaʼi ia Pesalemo 18:14; 144:5, 6; Mateo 4:14-17; 24:27.
14. Iā ʼaho nei, ʼe tou logoʼi feafeaʼi ia te ʼu leʼo?
14 Koteā ʼaē ʼe fakatātā e te ʼu leʼo? ʼI te temi ʼaē neʼe hifo ai ia Sehova ki te moʼuga ʼo Sinai, neʼe palalau te leʼo kiā Moisese. (Ekesote 19:19) Pea ʼe ko te ʼu leʼo mai te lagi, ʼaē neʼe natou tala te ʼu fakatotonu pea mo te ʼu logo ʼaē ʼe tuʼu ʼi te tohi ʼo te Fakahā. (Fakahā 4:1; 10:4, 8; 11:12; 12:10; 14:13; 16:1, 17; 18:4; 19:5; 21:3) Iā ʼaho nei, neʼe toe fakahā foki e Sehova te ʼu fakatotonu pea mo te ʼu logo ki tana hahaʼi, ʼo natou maʼu ai te mahino ʼo ʼuhiga mo te ʼu lea faka polofetā pea mo te ʼu pelesepeto ʼo te Tohi-Tapu. Neʼe tautau fai te ʼu fakamahinohino ʼi te ʼu fakatahi faka mālamanei, ʼosi ʼaia pea neʼe fakahā leva ia te ʼu moʼoni faka Tohi-Tapu ʼaia ʼi te mālamanei kātoa. Neʼe ʼui fēnei e te ʼapositolo ko Paulo ʼo ʼuhiga mo te kau fai faka mafola agatonu ʼo te logo lelei: “ ʼIo, ʼe moʼoni ia, ‘ ʼi te kele kātoa, kua mafola ai tonatou leʼo, pea ko tanatou ʼu akonaki kua kaku ki te ʼu potu taupotu ʼo te kele.’ ”—Loma 10:18.
15. Koteā ia te ʼu mana ʼaē ʼe ʼuʼulu mai te hekaʼaga fakahau lolotoga te temi ʼaenī ʼo te ʼaho ʼo te ʼAliki?
15 ʼI te agamāhani, kā tapa te ʼuhila pea ʼe muli mai mo te mana. Neʼe fakatatau e Tavite “te leʼo ʼo Sehova” ki te mana. (Pesalemo 29:3, 4) ʼI te lagolago ʼaē ʼa Sehova kiā Tavite moʼo tauʼi tona ʼu fili, neʼe ʼui e Tavite ko te mana neʼe haʼu mai Tana ʼafio. (2 Samuele 22:14; Pesalemo 18:13) Neʼe ʼui age e Eliu kiā Sopo, ʼe hagē te leʼo ʼo Sehova ko te mana, mokā ina fai “he ʼu meʼa lalahi ʼe mole feala ke tou ʼiloʼi.” (Sopo 37:4, 5) Lolotoga te temi ʼaenī ʼo te ʼaho ʼo te ʼAliki, neʼe fai e Sehova tana ʼu palalau ohagē ko te ‘ ʼuʼulu ʼa te mana,’ ko te fakatātā ʼaia ʼo tana ʼu fakatokaga ki te hahaʼi ʼo ʼuhiga mo tana ʼu gāue fakatalakitupua ʼaē kā ina fakahoko anai moʼo fakaʼauha tona ʼu fili. Ko te ʼu ʼuʼulu fakatātā ʼaia ʼo te mana, neʼe fai hoholo ʼi te kele kātoa. ʼE kotou māʼuʼuli fiafia anai mo kapau ʼe kotou tokagaʼi te ʼu kalaga mālohi ʼaia pea mo kotou fakaʼaogaʼi fakapotopoto tokotou ʼu fealagia ʼi te palalau moʼo fakaʼāʼāsili te mālohi ʼo te ʼu kalaga ʼaia!—Isaia 50:4, 5; 61:1, 2.
Te ʼu Mālama Afi Pea Mo Te Tai Sioʼata
16. Koteā ʼaē ʼe fakatātā e “te ʼu mālama afi e fitu”?
16 Koteā te tahi meʼa ʼaē neʼe sio kiai ia Soane? Neʼe sio ki te meʼa ʼaenī: “Pea ʼe ʼi ai te ʼu mālama afi e fitu ʼe ulo iā muʼa ʼo te hekaʼaga fakahau, pea ʼe natou fakatātā ia te ʼu laumālie e fitu ʼo te ʼAtua. Pea iā muʼa ʼo te hekaʼaga fakahau, ʼe ʼi ai te tai sioʼata ʼe hagē ko te kilisitale.” (Fakahā 4:5b, 6a) ʼE fakahā totonu mai e Soane ia te faka ʼuhiga ʼo te ʼu mālama e fitu: “ ʼE natou fakatātā ia te ʼu laumālie e fitu ʼo te ʼAtua.” Ko te nūmelo fitu ʼe ina fakatātā ia te kātoa ʼo he meʼa fakaʼatua; koia, ʼe fakatātā e te ʼu mālama e fitu, te kātoa ʼo te mālohi faka mālamagia ʼaē ʼo te laumālie māʼoniʼoni. Iā ʼaho nei, ʼe loto fakafetaʼi ʼaupitō ia te kalasi ʼo Soane ʼi tana maʼu ia te mālamagia ʼaia, pea mo te maʼua ʼaē neʼe tuku age ke ina faka mālamagia ia te hahaʼi ʼaē ʼe pakupapaku ʼi te faʼahi fakalaumālie! ʼE tou fiafia heʼe ʼi te taʼu fuli, ko te ʼu lauʼi teau miliona nusipepa ʼo Te Tule Leʼo ʼe natou fakatapa ia te mālama ʼaia iā lea e teitei 150!—Pesalemo 43:3.
17. Koteā ʼaē ʼe fakatātā e “te tai sioʼata [ʼaē] ʼe hagē ko he kilisitale”?
17 ʼE toe sio foki ia Soane ki “te tai sioʼata ʼe hagē ko te kilisitale.” Koteā ʼapē ʼaē ʼe fakatātā e te meʼa ʼaia ʼo ʼuhiga mo nātou ʼaē ʼe fakaafe ki te malaʼe ʼo Sehova ʼaē ʼi selō? Neʼe ʼui e Paulo ko Sesu neʼe ina faka māʼoniʼoniʼi ia te kōkelekāsio, “ ʼo ina fakamaʼa ʼi te vai ʼaki ia te folafola.” (Efesi 5:26) ʼI muʼa ʼo tana mate, neʼe ʼui maʼa Sesu ki tana ʼu tisipulo: “ ʼE kua kotou ʼosi maʼa, ʼuhi ko te folafola ʼaē neʼe au tala atu kiā koutou.” (Soane 15:3) Koia, ʼe mahino ia ko te tai sioʼata ʼaia ʼaē ʼe hagē ko he kilisitale, ʼe ina fakatātā ia te Folafola ʼa te ʼAtua, ʼaē ʼe ina fakamaʼa he tahi. Ke feala hanatou hū kiā muʼa ʼo te ʼafioʼaga ʼo Sehova, ʼe tonu muʼa ki te kau pelepitelō fakahau ke fakamaʼa kātoa nātou e tana Folafola.
Kotou Sisio “Te ʼu Fakatupu Maʼuli e Fā”!
18. Koteā ʼaē ʼe sio kiai ia Soane ʼi te lotomālie pea ʼi te ʼu tafaʼaki ʼo te hekaʼaga fakahau?
18 ʼI te temi leva ʼaē, neʼe sio ia Soane ki te tahi meʼa, ʼo ina tohi fēnei: “Pea ʼi te lotomālie ʼo te hekaʼaga fakahau pea ʼi te ʼu tafaʼaki ʼo te hekaʼaga fakahau, ʼe ʼi ai te ʼu fakatupu maʼuli e fā, ʼe fonu ko te ʼu foʼi mata ʼi muʼa pea mo muli.”—Fakahā 4:6b.
19. Koteā ʼaē ʼe fakatātā e te ʼu fakatupu e fā, pea he koʼē ʼe tou fakamahino fēia?
19 Koteā ʼaē ʼe fakatātā e te ʼu fakatupu ʼaia? ʼE tou lava maʼu anai tona fakamahino, ʼaki te meʼa ʼaē neʼe hā ki te tahi polofetā, ko Esekiele. Neʼe sio ia Esekiele kiā Sehova ʼe heka ʼi tona hekaʼaga fakahau ʼi te sāliote ʼi selō, pea ʼe mulimuli kiai ia te ʼu fakatupu ʼe tatau tonatou ʼu agaaga mo nātou ʼaē ʼe fakamatalatala mai e Soane. (Esekiele 1:5-11, 22-28) Ki muli age, neʼe toe sio ia Esekiele ki te sāliote ʼaia ʼe fakatuʼu ai ia te hekaʼaga fakahau, pea ʼe mulimuli kiai ia te ʼu fakatupu. Kae ʼi te moʼi temi leva ʼaia, neʼe ina ʼui ko te ʼu fakatupu ʼaia ʼe ko te ʼu kelupimi. (Esekiele 10:9-15) ʼO mahino mai, ko te ʼu fakatupu ʼaē e fā ʼe natou fakatātā ia te ʼu tuʼuga kelupimi ʼa te ʼAtua, ʼaē ko te ʼu ʼāselo ʼe ʼi ai tonatou tuʼulaga māʼoluga ʼi Tana kautahi fakalaumālie. ʼE mole lagi punamaʼuli ia Soane, ʼi tana sio ʼaē ko te ʼu kelupimi ʼaia ʼe natou tutuʼu ovi kiā Sehova, koteʼuhi ʼi te tapenakulo ʼāfea neʼe fakatuʼu te ʼu kelupimi ʼaulo e lua ʼi te fuga tāpunu ʼo te ʼaleka ʼo te fuakava, ʼaē neʼe ina fakafofoga ia te hekaʼaga fakahau ʼo Sehova. Pea neʼe logoʼi te leʼo ʼo Sehova mai te vaha ʼo te ʼu kelupimi ʼaia, ʼi tana tala ia tana ʼu fakatotonu ki te puleʼaga ʼo Iselaele.—Ekesote 25:22; Pesalemo 80:1.
20. He koʼē ʼe feala ke tou ʼui ʼe tutuʼu te ʼu fakatupu ʼaē e fā “ ʼi te lotomālie ʼo te hekaʼaga fakahau pea ʼi te ʼu tafaʼaki ʼo te hekaʼaga fakahau”?
20 ʼE tutuʼu te ʼu fakatupu ʼaia e fā “ ʼi te lotomālie ʼo te hekaʼaga fakahau pea ʼi te ʼu tafaʼaki ʼo te hekaʼaga fakahau.” Koteā koa tona faka ʼuhiga totonu? ʼE feala ke tou mahino neʼe natou tutuʼu ʼi te takafoli ʼo te hekaʼaga fakahau, ke feala kiā nātou takitokotahi ke natou tahi tutuʼu ʼi te lotomālie ʼo te ʼu faʼahi ʼo te hekaʼaga fakahau. Koia, ko te kau fakaliliu Tohi-Tapu ʼo te La Bible en français courant neʼe natou fakanounou te kupusiga palalau Faka Keleka ʼo fēnei: “ ʼI te takafoli ʼo te hekaʼaga fakahau, pea ʼi tona ʼu tafaʼaki.” Kae ʼe toe feala pē ke tou mahino ʼaki ia te kupusiga palalau ʼaia, ko te ʼu fakatupu ʼe natou tutuʼu ʼi te lotomālie ʼo selō, ʼaē ʼe tuʼu ai ia te hekaʼaga fakahau. Ko te tupuʼaga lā ʼaia ʼo te fakaliliu fēnei ʼo te kupusiga palalau ʼaia ʼi te Tohi-Tapu ʼa te tagata ko P. Beaumont, te Nouveau Testament: “ ʼI te ʼu tafaʼaki ʼo te hekaʼaga fakahau, ʼi te lotomālie.” Ko te faʼahi tāfito ʼaē ʼe maʼuhiga tāfito, ʼe ko te tutuʼu ovi ʼa te ʼu kelupimi ki te hekaʼaga fakahau ʼo Sehova, ohagē pē ko te kau kelupimi ʼaē neʼe sio kiai ia Esekiele, ʼe natou tahi tutuʼu ʼi te ʼu tafaʼaki ʼo te sāliote ʼaē neʼe ina fakatātā ia te kautahi ʼa Sehova. (Esekiele 1:15-22) ʼE ʼalutahi ia te ʼu meʼa fuli ʼaia mo te ʼu palalau ʼo te Pesalemo 99:1: “Kua liliu ia Sehova totonu ko te hau. . . . ʼE heka ia ʼi te kau kelupimi.”
21, 22. (a) ʼE fakamatala feafeaʼi mai e Soane ia te ʼu fakatupu ʼaē e fā? (b) Koteā ʼaē ʼe tahi fakatātā e te ʼu fakatupu ʼaia e fā?
21 Neʼe toe hoko atu fēnei e Soane: “Pea ʼe hagē te ʼuluaki fakatupu maʼuli ko he laione, pea ʼe hagē te lua fakatupu maʼuli ko he vītulo mui, pea ko te tolu fakatupu maʼuli ʼe hagē tona fofoga ko ʼaē ʼo he tagata, pea ʼe hagē te fā fakatupu maʼuli ko he ʼakūila ʼe lele.” (Fakahā 4:7) He koʼē ʼe kehekehe ʼaupitō ia te ʼu fakatupu ʼaia e fā? ʼE mahino papau ia, ʼe faka ʼuhiga ia te ʼu fakatupu ʼaia e fā ki te ʼu kalitātē makehe ʼo te ʼAtua. ʼUluaki, ʼe ʼi ai te laione. ʼI te Tohi-Tapu ko te laione ʼe ina fakatātā ia te lototoʼa, tāfito lā ʼo ʼuhiga mo te faitotonu. (2 Samuele 17:10; Tāʼaga Lea 28:1) Koia, ʼe fakatātā lelei ai e te laione ia te kalitātē fakaʼatua ʼaē ko te faitotonu ʼaē ʼe fai ʼaki he lototoʼa. (Teutalonome 32:4; Pesalemo 89:14) Ko te lua fakatupu ʼe hagē ia he vītulo mui. Ko te kalitātē fea ʼaē ʼe kotou manatu kiai? Maʼa te kau Iselaele, ko te vītulo neʼe ko he manu maʼuhiga ʼuhi ko tona mālohi. (Tāʼaga Lea 14:4; vakaʼi mo Sopo 39:9-11.) Koia, ko te vītulo mui ʼe ina fakatātā ia te mālohi ʼaē ʼe foaki e Sehova.—Pesalemo 62:11; Isaia 40:26.
22 Ko te tolu fakatupu, ʼe hagē tona fofoga ko he fofoga ʼo he tagata. ʼE mahino ia ʼe ina fakatātā ia te ʼofa fakaʼatua, heʼe ʼi te kele neʼe ko te tagata tokotahi pē ʼaē neʼe fakatupu ʼo mulimuli ki te pāki ʼo te ʼAtua, koia ʼaē ʼe ina maʼu ai ia te kalitātē fakaofoofo ʼaē ko te ʼofa. (Senesi 1:26-28; Mateo 22:36-40; 1 Soane 4:8, 16) ʼE mahino ia, ʼe fakahā e te kau kelupimi ia te kalitātē ʼaia ʼi tanatou tauhi ʼaē ʼi te ʼu tafaʼaki ʼo te hekaʼaga fakahau ʼo Sehova. Kae koteā ʼaē ʼe fakatātā e te fā fakatupu? ʼE hagē tona fofoga ko ʼaē ʼo he ʼakūila ʼe lele. ʼE fakatokagaʼi mai e Sehova totonu ia te sio mamaʼo ʼa te ʼakūila ʼo ina ʼui fēnei: “ ʼE sio tuʼumaʼu tona ʼu mata ki te mamaʼo.” (Sopo 39:29) Koia ʼe fakatātā lelei e te ʼakūila ia te poto pea mo te sio mamaʼo. Ko Sehova te Matapuna ʼo te poto, pea ko tana kau kelupimi ʼe natou fakaʼaogaʼi ia te kalitātē ʼaia ʼi tanatou fakalogo ʼaē ki tana ʼu fakatotonu.—Tāʼaga Lea 2:6; Sake 3:17.
Te ʼu Fakavikiviki Ki Te Kolōlia ʼo Sehova
23. Koteā te faka ʼuhiga ki te ʼu fakatupu ʼaē e fā te ʼui ʼaē ʼe natou “fonu ko te ʼu foʼi mata,” pea koteā ʼaē ʼe tou mahino kiai ʼi te ʼui ʼaē ʼe ʼi ai tonatou ʼu hoaʼi kapakau e tolu?
23 Neʼe toe hoko atu e Soane tana fai fakamatala ʼo ʼui māʼana: “Pea ʼo ʼuhiga mo te ʼu fakatupu maʼuli ʼaē e fā, ʼe natou takitahi moʼona kapakau e ono; pea ʼe fonu ko te ʼu foʼi mata ʼi tuʼa pea mo loto. Pea ʼe mole natou mālōlō ʼi he ʼaho pea mo he pō, ʼo ʼui maʼa nātou: ‘Māʼoniʼoni, māʼoniʼoni, māʼoniʼoni ia Sehova ʼAtua, te Māfimāfi, ʼaē neʼe ʼafio, pea ʼe ʼafio nei, pea mo ʼaē ʼe haʼu.’ ” (Fakahā 4:8) Ko te ʼui ʼaē ʼe ko te ʼu fakatupu ʼaia e fā ʼe natou fonu ko te ʼu foʼi mata, ʼe hā ʼaki mai ʼe lelei tanatou sisio pea mo natou sio mamaʼo. ʼE natou fakaʼaogaʼi tuʼumaʼu tonatou ʼu mata heʼe mole he ʼaoga kiā nātou te moe. ʼO ʼuhiga mo te faʼahi ʼaia, ʼe natou faʼifaʼitakiʼi ia Sehova ʼaē neʼe tohi fēnei ʼo ʼuhiga mo ia: “ ʼO ʼuhiga mo Sehova, ko tona ʼu mata ʼe taka ʼi te kele kātoa, ke ina fakahā tona mālohi maʼa nātou ʼaē ʼe kātoa tonatou loto kiā te ia.” (2 Fakamatala 16:9) ʼI tanatou fonu ko te ʼu mata, ʼe feala ki te kau kelupimi ke natou sisio ki te ʼu potu fuli pē. ʼE molemo pulipuli he meʼa kiā nātou. Koia, ʼe kātoa iā nātou te ʼu meʼa fuli ʼaē ʼe ʼaoga moʼo fai ʼaki tanatou tauhi ʼaē kiā Sehova ʼi tana gāue faifakamāu. ʼE ʼui fēnei ʼo ʼuhiga mo ia: “Ko te ʼu mata ʼo Sehova ʼe ʼi te potu fuapē, ʼo siosioʼi te kau agakovi pea mo te kau agalelei.” (Tāʼaga Lea 15:3) Pea ʼaki tonatou ʼu hoaʼi kapakau e tolu—ʼe fakaʼaogaʼi ʼi te Tohi-Tapu ia te nūmelo tolu moʼo fakamālohiʼi he manatu—ʼe feala ki te kau kelupimi ke vave tanatou feʼoloʼaki ohagē ko te hila, moʼo kalagaʼi pea mo fakahoko ia te ʼu fakamāu ʼa Sehova.
24. ʼE feafeaʼi te fakavikiviki ʼa te kau kelupimi kiā Sehova, pea koteā te meʼa ʼaē ʼe natou fia fakahā?
24 Kotou logo age muʼa! Ko te kau kelupimi ʼe natou fai te hiva mālie pea mo faka malave loto moʼo fakavikiviki kiā Sehova: “Māʼoniʼoni, māʼoniʼoni, māʼoniʼoni ia Sehova ʼAtua, te Māfimāfi, ʼaē neʼe ʼafio, pea ʼe ʼafio nei pea mo ʼaē ʼe haʼu.” ʼE toe ʼiloga mai te mālohi ʼi tona fakaliuga tolu. ʼE tala mālohi mai e te kau kelupimi te māʼoniʼoni ʼo Sehova ʼAtua. ʼE ko ia te Matapuna pea mo te Faʼifaʼitakiʼaga tāfito ʼo te māʼoniʼoni. ʼE ina toe maʼu foki te tuʼulaga ʼaē ko “te Hau ʼo te heʼegata,” pea ʼe ko ia tuʼumaʼu aipē ia “te ʼAlefa mo te ʼOmeka, te ʼuluaki mo te fakamuli, te kamata pea mo te fakaʼosi.” (1 Timoteo 1:17; Fakahā 22:13) ʼE mole ʼi ai he temi ʼe mālōlō ai te kau kelupimi ʼi te kalagaʼi ʼo te ʼu kalitātē makehe ʼo Sehova iā muʼa ʼo tana ʼu fakatupu fuli.
25. ʼE fakahoko feafeaʼi e te ʼu fakatupu pea mo te toko 24 tagata ʼāfea tanatou ʼatolasio ʼaē kiā Sehova ʼi te logo tahi?
25 ʼI te lagi ʼo te ʼu lagi, neʼe logo mai ai te ʼu fakavikiviki ʼe fai kiā Sehova! Neʼe toe hoko atu fēnei ia te fai fakamatala ʼa Soane: “Pea ʼi te temi fuli pē ʼaē ʼe fai ai e te ʼu fakatupu maʼuli ia te faka kolōliaʼi mo te fakaʼapaʼapa pea mo fakafetaʼi kiā Ia ʼaē ʼe heka ʼi te hekaʼaga fakahau, kiā ia ʼaē ʼe maʼuli ʼo talu ai, ʼe tulolo ifo ai te toko ʼuafulu-mā-fā kau tagata ʼāfea iā muʼa ʼo Ia ʼaē ʼe heka ʼi te hekaʼaga fakahau, pea mo natou ʼatolasio kiā ia ʼaē ʼe maʼuli ʼo talu ai, pea ʼe natou lī tonatou ʼu kolona kiā muʼa ʼo te hekaʼaga fakahau, ʼo ʼui maʼa nātou: ‘ ʼE ke tāu mo feʼauga, Sehova, ʼio, tomatou ʼAtua ke ke tali ia te kolōlia, mo te fakaʼapaʼapa, pea mo te mālohi, heʼe ko koe ʼaē neʼe ke fakatupu ia meʼa fuli, pea ʼuhi ko tou finegalo neʼe māʼuʼuli pea mo fakatupu ia te ʼu meʼa ʼaia.’ ” (Fakahā 4:9-11) ʼI te Tohi-Tapu kātoa, ʼe kau ia te fakavikiviki ʼaenī ki te ʼu fakavikiviki taulekaleka lalahi ʼaē neʼe fai kiā Sehova, totatou ʼAtua pea mo Tuʼi ʼAliki!
26. He koʼē ʼe lī e te toko 24 tagata ʼāfea tonatou ʼu kolona kiā muʼa ʼo Sehova?
26 ʼE tatau te manatu ʼa te toko 24 tagata ʼāfea pea mo ʼaē ʼa Sesu, heʼe natou lī tonatou ʼu kolona kiā muʼa ʼo Sehova. ʼE mole natou fia hikihiki ia nātou iā muʼa ʼo te ʼafioʼaga ʼo te ʼAtua. ʼAki he agavaivai, ʼe natou mahino ko te tupuʼaga tāfito ʼo tonatou tuʼulaga hau, ʼe ko te fakavikiviki pea mo faka kolōlia kiā te ia, ohagē ko tona fai tuʼumaʼu e Sesu. (Filipe 2:5, 6, 9-11) ʼAki he loto fia fakalogo, ʼe natou mahino papau ki tonatou mālalo pea mo natou fakahā ʼe fakalogo tonatou tuʼulaga hau ki te pule faʼitaliha ʼa Sehova. Koia, ʼe natou logo tahi ai mo te kau kelupimi pea mo tana ʼu fakatupu agatonu fuli, ke natou fakavikiviki pea mo faka kolōliaʼi te ʼAtua, ʼaē neʼe ina fakatupu ia meʼa fuli.—Pesalemo 150:1-6.
27, 28. (a) Ko te fakamatalatala ʼa Soane ʼo ʼuhiga mo te meʼa ʼaē neʼe hā, ʼe tonu ke ina uga tātou ke tou fai teā? (b) Ko te fehuʼi fea ʼaē ʼe lagaʼi ʼo ʼuhiga mo te meʼa ʼaē neʼe logo pea mo sio kiai ia Soane ki muli age?
27 Ko ai ʼaē ʼe mole malave anai ki tona loto mo kapau ʼe ina lau ia te fakamatala ʼa Soane ʼo ʼuhiga mo te meʼa ʼaia neʼe hā? ʼE taulekaleka ʼaupitō pea mo fakatalakitupua ia te meʼa ʼaia! Kae ʼe feafeaʼi ʼapē ia tona ʼaluʼaga moʼoni? Ko te kolōlia ʼo te ʼAtua ʼe tonu ke ina uga ia te hahaʼi fuli ʼaē ʼe loto fakafetaʼi, ke natou kau fakatahi mo te ʼu fakatupu e fā pea mo te toko 24 tagata ʼāfea ʼo fakavikiviki kiā te ia, ʼo natou faikole kiā te ia pea mo kalagaʼi Tona huafa ki te kaugamālie. ʼE ko te ʼAtua lā ʼaia ʼaē ʼe maʼu ai e te kau Kilisitiano tonatou pilivilēsio ʼaē ke natou gāue ki ai ko hana kau fakamoʼoni iā ʼaho nei. (Isaia 43:10) Tou manatuʼi ko te meʼa ʼaē neʼe hā kiā Soane, ʼe hoko ʼi te ʼaho ʼo te ʼAliki, ʼaē ʼe tou lolotoga māʼuʼuli ai nei. ʼI te lakaga fuli pē ʼe feala ke takitaki tātou pea mo fakaloto mālohiʼi tātou e “te ʼu laumālie ʼaē e fitu.” (Kalate 5:16-18) ʼI te temi ʼaenī, ʼe tou maʼu ia te Folafola ʼa te ʼAtua moʼo tokoni kiā tātou ke tou māʼoniʼoni, pea ke tou tauhi ki he ʼAtua māʼoniʼoni. (1 Petelo 1:14-16) ʼE mahino papau ia, ʼe tou fiafia ʼi te lau leʼolahi ʼo te ʼu palalau ʼo te lea faka polofetā ʼaenī. (Fakahā 1:3) ʼE ina foaki mai ia he fakaloto mālohi ke tou nonofo agatonu kiā Sehova, pea ke ʼaua naʼa tuku ki te mālamanei ke ina tāʼofi tatatou hiva tona ʼu fakavikiviki ʼaki he loto faʼafai!—1 Soane 2:15-17.
28 ʼO aʼu mai ki te temi ʼaenī, neʼe fakamatala e Soane te meʼa ʼaē neʼe sio kiai, ʼi tona fakaafe ʼaē ke hū ki te matapā ʼaia neʼe ava ʼi selō. ʼI tana fakamatala fakaofoofo ʼaia, neʼe ina fakahā mai ko Sehova ʼe heka ʼi Tona hekaʼaga fakahau ʼi selō, ʼi te taulekaleka kātoa ʼo Tona kolōlia pea mo Tona ʼalikisia. Pea ʼe ʼātakatakai ia ia e te kautahi ʼaē ʼe mālohi tokotahi—ʼaē ʼe gigila ʼi tona taulekaleka pea mo tana agatonu. Neʼe lolotoga fakatoka ia te Telepinale fakaʼatua. (Taniela 7:9, 10, 18) Kua tokalelei ia meʼa fuli ke hoko te ʼaluʼaga fakaofoofo. Koteā koa ia te ʼaluʼaga ʼaia, pea koteā tona pikipikiga mo tātou iā ʼaho nei? Tou tōkakaga lelei ki te hoko atu ʼo te fakamatala!