Tafitoʼaga ʼo Te Kaupepa Ako Te Maʼuli Fakakilisitiano Mo Te Faifakamafola
VAHAʼA ʼO TE ʼAHO 2-8 ʼO MAIO
TE ʼU KOLOA ʼO TE TOHI-TAPU | 1 SAMUELE 27-29
“Te Fakatuʼutuʼu Tau ʼa Tavite”
it-1 71
Akise
ʼI te fehola’aki ʼa Tavite ia Saulo, ne’e tu’a lua tana hola ʼo nono ʼi te kolo ʼo Akise. ʼI te ʼuluaki, ʼi tana sio ʼae ʼe mahalohalo kovi te haha’i kia ia, ne’e ina faʼifaʼitakiʼi he tahi ʼe galivale, ʼo faihala ai ia Akise ʼo haga noa ki ai he ’e ʼi tana tonu ko Tavite ʼe vale kae ʼe mole agakovi. (1Sa 21:10-15; Ps 34:sus.; 56:sus.) ʼI te tu’a lua, ne’e ko Tavite pea mo te toko 600 tagata tau pea mo ʼonatou famili ne’e fakatotonu e Akise ke natou nonofo ma’u i te kolo o Tesikelake. ʼI te lolotoga ʼo te ta’u katoa pea mo mahina ʼe fa, ʼi tanatou ma’u’uli ai, ne’e faihala ia Akise ʼo ina ui ʼe tau ulufi e Tavite te ʼu kolo ʼo Suta ʼo kumi ma’uli ai, kae ne’e ko te ʼu kolo ia ʼo Kesuli, ʼo Kisili pea mo te kau Amaleke ʼae ne’e fai ai te kaiha’a e Tavite mo tana ʼu tagata tau. (1Sa 27:1-12) ʼI te tui ʼa Akise ki te ʼu loi ʼa Tavite ne’e faihala ʼo fakanofo ia Tavite ke tauhi ki tona ma’uli moka hoko te tau ʼae mo Saulo. Kae ʼi mu’a pe ʼo te hoko ʼo te tau, ne’e kole e te kau tama ʼaliki tau ʼo te kau Filisitini kia Akise ke fakamavae Tavite mo tana hahaʼi ʼo natou mavae ai ʼi te kolo ʼo Tesikelake. (1Sa 28:2; 29:1-11) ʼI te liliu ʼa Tavite ʼo hau, ne’e fakahoko tau ki te kolo ʼo Kiete, ʼe mahino papau ne’e mole mate ai ia Akise, he ne’e kei ma’uli pe ʼi te temi hau ʼo Salomone.—1Ha 2:39-41; vakaʼi KIETE.
w21.03 4 8
ʼU Tehina Tupulaga, ʼe Feafeaʼi He Falala Atu ʼa ʼIhi Kia Koutou?
8 Neʼe toe tau ia Tavite mo te tahi fihifihia. Neʼe tonu ke fakatalitali fualoa ʼi muʼa ʼo tana pule ki Suta. (1 Sam. 16:13; 2 Sam. 2:3, 4) Koia ʼae neʼe tonu ke kataki fualoa. Logo la tana fakatalitali ʼaia, neʼe mole lotovaivai ia Tavite mo nofo noa. Ohage la, ʼi tana nofo ʼi te fenua ʼo te kau Filisitini, neʼe ina tauʼi ai te ʼu fili ʼo Iselaele.—1 Sam. 27:1-12.
it-2 255 6
Loi
Kapau ʼe ui fakahagatonu e te Tohi-Tapu ʼe ina tautea’i te loi ʼae ʼe fakatupu mamahi, ʼe mole ko he taku’aga lelei ʼaia ke tou fakamatala he ʼu alu’aga ʼe mo’oni ki he hahaʼi ʼe mole tonu ke natou ilo’i. Ne’e fenei te tokoni ʼa Sesu: “ ʼAua naʼa kotou foaki ia te meʼa ʼae ʼe maʼoniʼoni ki te ʼu kuli peʼe kotou laku ʼakotou mataʼi tofe ki te ʼu puaka, naʼa natou molomoloki pea natou haga ʼo ʼohofi koutou.” (Mat 7:6) Koia ʼae ʼi te tahi ʼu alu’aga, ne’e mole fakakatoa lelei e Sesu tana ʼu fakamahino ki te haha’i pea ne’e mole ina tali fuli te ʼu fehu’i ʼae ne’e fai age ki ai. (Mat 15:1-6; 21:23-27; Soa 7:3-10) Ne’e fai feia ia Apalahamo, Isaake, Laape pea mo Eliseo, ka natou palalau mo te hahaʼi ʼae ʼe mole tui kia Sehova, ʼe natou fakafeʼauga pe ʼanatou fakamatala ki tonatou ʼu ʼuhiga totonu.—Sen 12:10-19; kap. 20; 26:1-10; Sos 2:1-6; Skp 2:25; 2Ha 6:11-23.
Te ʼu Koloa Fakalaumalie
w10 1/1 20 5-6
ʼE Feala Koa Ki Te Kau Mate Ke Natou Fai He Me’a Ki Totatou Ma’uli?
Tou fakakaukau’i age mu’a, ʼe ui ʼi te Tohi-Tapu, ka mate he tahi pea ʼe toe liliu ki te kele, pea ʼi te temi ʼaia ‘ ʼe mole kei ina ilo’i mo logo’i he me’a.’ (Pesalemo 146:4) Ko Saulo ʼo feia kia Samuele, ne’e mole puli kia naua te fehi’a ʼo te ʼAtua kia natou ʼae ʼe kumi tokoni ki te haha’i ʼae felogoi mo te kau mate pea mo te haha’i faifakakikite. Ne’e ko te hau totonu pe ʼae ne’e ina ʼuluaki fakama’ua ke fakama’a te fenua mai te ʼu fa’ahiga fai ʼo te kau temonio.—Levitiko 19:31.
Tou fakaloloto totatou fakakaukau. Kapau ne’e ko Samuele ʼae ne’e ha kia ia ʼae ʼe felogo’i mo te kau mate, ne’e feala koa ki te polofeta agatonu ʼaia ʼa Sehova ke ina me’a noaʼi te lao ʼo tona ʼAtua ʼae ʼe ina tapuʼi te ʼu felogoi ʼaia. ʼAua na’a galo ia tatou, ʼi te temi ʼaia ne’e mole kei felogoi ia Sehova mo Saulo. Kapau ʼe tou sio fakapoto, ʼe mole feala ki he tahi ʼe felogoi mo te kau mate ke ina fakamalohi’i te ʼAtua Malohi ke palalau mo Saulo ʼaki he polofeta kua ʼosi mate. Kailoa ia. Ne’e ko he tahi pe ia ne’e ina kofu te pāki ʼo Samuele ke ui ai ko te polofeta agatonu ʼo te ʼAtua. Ko te Samuele ʼae ne’e ha ʼi te faitoka kia ia ʼae ʼe felogoi mo te kau mate ne’e ko he laumalie kovi pe’e ko he temonio.
VAHAʼA ʼO TE ʼAHO 9-15 ʼO MAIO
TE ʼU KOLOA ʼO TE TOHI-TAPU | 1 SAMUELE 30-31
“Kotou Lotomalohi ʼUhi Ko Te Tokoni ʼa Sehova”
w06 1/8 27 12
Kotou Manavasiʼi Kia Sehova Pea Ke Kotou Fiafia
12 Ko te manavasiʼi ʼa Tavite kia Sehova neʼe mole gata ʼaki pe tana taʼofi ia ia ke mole ina fai he meʼa ʼe kovi. Neʼe ina maʼu ai he malohi moʼo fai he ʼu puleʼaki pea mo aga fakapotopoto ʼi ʼona faigataʼaʼia. Lolotoga he taʼu katoa pea mo mahina ʼe fa, ko Tavite mo ʼana tagata neʼe natou feholaki mai ia Saulo ʼo nonofo ʼi Sikelake, ʼi te fenua ʼo Filisitini. (1 Samuele 27:5-7) ʼI te tahi ʼaho ʼae neʼe pupuli ai te ʼu hahaʼi tagata, neʼe hufi te kolo e te kau tagata kaihaʼa Amaleke, ʼo tutu te kolo pea mo natou ʼave ia ʼonatou ʼohoana fuli, mo ʼanatou fanau pea mo ʼanatou faga manu. ʼI tanatou toe liliu mai ki te kolo ʼo sio ki te meʼa ʼae neʼe hoko, neʼe fetagihi ia Tavite pea mo ʼana tagata. Neʼe natou iita ʼaupito pea neʼe natou fia taumakaʼi ia Tavite, kae logo la te ʼu faigataʼaʼia ʼaia, neʼe haga taupau aipe e Tavite tana falala. (Taʼaga Lea 24:10) Ko tana manavasiʼi ʼae ki te ʼAtua, neʼe ina uga ia ia ke haga kia Sehova ʼo ‘kole ki ai tona malohi.’ ʼAki te tokoni ʼa te ʼAtua, ko Tavite mo ʼana tagata neʼe natou lava tauʼi te kau Amaleke pea mo natou toe maʼu ʼanatou meʼa fuli ʼae neʼe kaihaʼa.—1 Samuele 30:1-20.
ʼE Taupau Tatou e Sehova Ki Te Fakamaʼuli
14 Neʼe fetaulaki Tavite mo te ʼu aluʼaga fakalotomamahi ʼi tona maʼuli. (1 Sam. 30:3-6) Ko te ʼu palalau ʼae neʼe ina fai ʼaki te takitaki ʼo te laumalie, ʼe ha ai neʼe iloʼi e Sehova tona loto. (Lau ia Pesalemo 34:18; 56:8, MN.) ʼE toe iloʼi e te ʼAtua totatou loto. ʼE fakaovi mai kia tatou moka tou “loto fasifasi” peʼe “lotomamahi.” ʼE tou maʼu ai he fakalotofimalie, ohage pe ko Tavite ʼae neʼe hiva fenei: “E au fiafia anai mo nekenekea i tou kalasia: Koteuhi e ke sio ki toku mamahi, e ke iloi te u mataku o toku loto.” (Pes. 31:7) ʼE mole sio pe Sehova ki totatou lotomamahi, kae ʼe toe lagolago kia tatou ʼaki tana foaki mai he fakalotofimalie pea mo he fakalotomalohi. ʼE ina fai te faʼahi ʼaia ʼaki te ʼu fono.
Te ʼu Koloa Fakalaumalie
Ko He ʼu Puani Maʼuhiga ʼi Te Tohi ʼo ʼUluaki Samuele
30:23, 24. Ko te tonu ʼaia, ʼae ʼe fakatafito kia Numelo 31:27, ʼe ina fakaha mai ʼe fakamaʼuhigaʼi e Sehova ia natou ʼae ʼe natou lagolago ki te kokelekasio. Logo pe he faʼahiga meʼa ʼe tou fai, kae ʼe tonu ke tou ‘gaue ʼaki ʼotatou loto katoa, ohage ʼe tou gaue kia Sehova kae mole ki te tagata.’—Kolose 3:23.
VAHAʼA ʼO TE ʼAHO 16-22 ʼO MAIO
TE ʼU KOLOA ʼO TE TOHI-TAPU | 2 SAMUELE 1-3
“Kotea ʼe Tou Ako Mai ‘Te Nahau’?”
Kotou Fakaʼapaʼapa Kia Natou ʼAe ʼe Pule Kia Koutou
9 Neʼe lotomamahi koa ia Tavite ʼi tona gaohi koviʼi? Neʼe kalaga fenei kia Sehova: “ ʼE ʼi ai . . . te kau pule aga fefeka ʼe natou kumi toku nefesi.” (Pesalemo 54:3) Neʼe ina avahi tona loto kia Sehova, ʼo ina ui fenei: “Haofaki au mai toku ʼu fili, E toku ʼAtua . . . Ko te hahaʼi malolohi ʼe natou ʼohofiʼi au, kae neʼe mole au agatuʼu, pea neʼe mole haku agahala, E Sehova. Logo la neʼe mole [haku] hala, kae ʼe natou feleleʼi pea mo natou nofo teuteu. Tokagaʼi taku pauʼi pea mo ke sio.” (Pesalemo 59:1-4) Neʼe kua hoko koa kia koutou he meʼa feia neʼe mole kotou fai he meʼa ʼe kovi ki he tahi ʼe maʼu tuʼulaga, kae ʼe ina fakatupu aipe hokotou ʼu fihifihia? Neʼe fakaʼapaʼapa tuʼumaʼu ia Tavite kia Saulo. ʼI te mate ʼo Saulo, neʼe mole fiafia Tavite, kae neʼe ina fai te hiva fakaʼofaʼofa, ʼo ina ui fenei: “Ko Saulo pea mo Sonatane, ko te ʼu tagata ʼe tau mo feʼauga ke ʼofainaʼi pea neʼe nā agalelei lolotoga tonā maʼuli . . . Neʼe nā lele vave age ʼi te ʼu akuila, mo malohi age ʼi te ʼu laione. ʼU taʼahine ʼo Iselaele, kotou fetagihi kia Saulo.” (2 Samuele 1:23, 24) ʼE ko he faʼifaʼitaki lelei ʼaia ʼo te fakaʼapaʼapa moʼoni ki te fakanofo ʼa Sehova, logo pe la neʼe gaohi koviʼi e Saulo ia Tavite.
Ko Te Lavakiʼi ʼo He Tahi ʼe Ko He Fakailoga ʼo Te ʼu Temi Fakaʼosi!
8 ʼE toe maʼu ʼi te Tohi-Tapu te ʼu fakamatala ʼo te hahaʼi neʼe agatonu. Tou vakaʼi te faʼifaʼitaki ʼo te foʼi toko lua ia natou ʼaia pea mo te ako ʼe feala ke tou taʼofi mai ai. Tou kamata mo Sonatane, te ʼuluaki foha ʼo te Hau ko Saulo pea neʼe nofo agatonu kia Tavite. Neʼe tonu ʼe ko ia ʼae ka liliu ko te Hau ʼo Iselaele, kae neʼe filifili e Sehova ia Tavite. Neʼe fakaʼapaʼapa Sonatane ki te tonu ʼae neʼe fai e Sehova. Neʼe mole maheka ia kia Tavite. Kae “nee pipiki leva te laumalie o Sonatane ki te laumalie o Tavite” pea neʼe ina fakapapau kia Tavite ʼe nofo agatonu anai kia ia. Neʼe ina toe tuku age foki kia Tavite ʼona kofu, mo tana heleta, mo tana nahau pea mo tona kiliʼi pipi, ko tana fakaha ʼaia te fakaʼapaʼapa ki tona ʼuhiga hau. (1 Sam. 18:1-4) Neʼe tokoni Sonatane kia Tavite, ʼo ina fia foaki tona maʼuli moʼo puipui ʼaki ʼo ia mai te ʼu nima ʼo Saulo. Neʼe agatonu Sonatane kia Tavite, ʼo ina ui fenei kia ia: “E ke pule anai ki Iselaele, pea ko au, e au nofo anai i te tuulaga lua i ou tafa.” (1 Sam. 20:30-34; 23:16, 7) Koia, ʼi te mate ʼo Sonatane ʼe mole tou punamaʼuli ai ki te fakaha e Tavite tona lotomamahi pea mo tona ʼofa kia ia ʼi te hiva mate ʼae neʼe ina tohi.—2 Sam. 1:17, 26.
Te ʼu Koloa Fakalaumalie
it-1 928 3
Tehina
Ko te kupu “tehina” ʼe toe fakaʼaoga’i kia natou ʼae ʼe fakatahi ʼo faifaitahi ʼo ʼuhiga mo he fakatu’utu’u ʼe natou fa’u tahi ki ai. Ohage la, ko te Hau ko Hilame mai te kolo ʼo Tile ne’e ina fakahigoa te Hau ko Salomone ko tona tehina, ʼuhi ne’e mole gata ’aki pe tana tatau ʼi te nofo faka’aliki kae ne’e ma’uhiga ke nā felogoi lelei tupu ko te ʼu koloa ʼae ne’e fetuku mai ohage ko te ʼakau pea mo te tahi atu ʼu me’a ne’e ʼaoga kia naua mo’o taupau te ʼu fale lotu. (1Ha 9:13; 5:1-12) Ne’e tohi fenei e Tavite ‘Kotou sisio! Ko he me’a lelei pea mo matalelei ki he ʼu tehina tanatou nonofo fakatahi ʼo faifaitahi.’ ʼO tou mahino ai ʼe mole feala ke tou ui mo fakamo’oni ʼe tou ma’u pe te tokalelei pea mo te logo tahi ʼi te ʼu felogoi fakatautehina ʼi te toto. (Ps 133:1) Ne’e ko te ʼofa fakakaume’a pea mo te ʼu lelei ʼae ne’e nā fe’aveʼaki ʼae ne’e ina fakamalohi Tavite ke ina pau’i Sonatane ko tona tehina. (2Sa 1:26) Ko he ʼu kaume’a ʼe felogoi ʼi tana ʼu aga, tana ʼu fakatu’utu’u pea mo tana ʼu manatu, tatau aipe pe ’e kovi, ʼe ui anai ʼe nā tau tehina.—Taa 18:9.
VAHAʼA ʼO TE ʼAHO 23-29 ʼO MAIO
TE ʼU KOLOA ʼO TE TOHI-TAPU | 2 SAMUELE 4-6
“Tou Tuʼania Tuʼumaʼu Naʼa Tou Fakamamahiʼi Te Loto ʼo Sehova”
Ko He ʼu Puani Maʼuhiga ʼi Te Tohi ʼo Lua Samuele
6:1-7. Logo la neʼe lelei te ʼu fakatuʼutuʼu ʼa Tavite, kae ʼi tana faigaʼi ʼae ke ʼai te Aleka ki he saliote neʼe mole alu tahi ia mo te fakatotonu ʼa te ʼAtua pea neʼe to kovi ai. (Ekesote 25:13, 14; Numelo 4:15, 19; 7:7-9)[10] Ko te fā ʼa Usea ʼo taʼofi te Aleka ke ʼaua naʼa to ʼe toe fakaha ai foki ʼe mole feala ki he ʼu fakatuʼutuʼu lelei ke natou fetogi te ʼu meʼa ʼae ʼe fakamaʼua mai e te ʼAtua.
w05 1/2 27 20
ʼE Fai Tuʼumaʼu e Sehova Ia Te Aga ʼAe ʼe Totonu
20 Tou manatuʼi, neʼe iloʼi lelei e Usea ia te Lao. Ko te Aleka neʼe ina fakafofoga ia te ʼafio ʼa Sehova ia natou. Neʼe fakaha lelei ʼi te Lao neʼe mole tonu ki he tahi neʼe mole fakagafua e te lao ke fafa ki te Aleka, ʼo ina fakatokagaʼi fakalelei age ʼe ina matehi anai ia natou ʼae ka mole natou fakalogo ki te fakatuʼutuʼu ʼaia. (Numelo 4:18-20; 7:89) Koia, ko te hiki ʼo te puha taputapu ʼaia, neʼe ko he gaue neʼe mole tonu ke meʼa noaʼi e Usea, ʼae neʼe ko te Levite (neʼe mole ko he pelepitelo), pea neʼe ina iloʼi lelei pe ia te Lao. Pea tahi, ʼi te ʼu taʼu ki muʼa atu, neʼe ʼave te Aleka ki te ʼapi ʼo tana tamai, ke ina taupau. (1 Samuele 6:20–7:1) Neʼe tuku ai te Aleka ia taʼu ʼe 70, ʼo aʼu ki te temi ʼae neʼe toe hiki ai e Tavite. Talu mai tana kei veliveli, neʼe iloʼi lelei e Usea ia te ʼu lao ʼo ʼuhiga mo te Aleka.
w05 1/2 27 21
ʼE Fai Tuʼumaʼu e Sehova Ia Te Aga ʼAe ʼe Totonu
21 Ohage ko te meʼa ʼae neʼe tou vakaʼi ki muʼa atu, ʼe sio ia Sehova ki te ʼu loto. Kapau ʼe ui ʼi tana Folafola neʼe “mole [aga] fakaʼapaʼapa” ia Usea, ʼe mahino ia neʼe sio ia Sehova ki te ʼu meʼa kovi ʼae ʼi tona loto kae ʼe mole fakaha ʼi te hisitolia. Ko Usea neʼe ko he tagata fialahi koa, neʼe ko hana agamahani koa te mole fakalogo ki te ʼu faʼahi ʼae neʼe fakatuʼakoi age e te Lao? (Taʼaga Lea 11:2) Ko tana ʼave ia te Aleka ʼae neʼe taupau e tona famili, kae sio ki ai ia te hahaʼi, neʼe fakatupu ai koa hana fiameʼameʼa? (Taʼaga Lea 8:13) Neʼe mole feʼauga koa te tui ʼa Usea ki te fealagia ʼo te nima ʼo Sehova ke ina puke maʼu ia te puha taputapu ʼae neʼe ina fakatata Tona ʼafioʼaga ʼi tonatou lotolotoiga? Logo la ʼe mole tou iloʼi papau pe koʼe neʼe fai e Usea ia te faʼahi ʼaia, kae ʼe tou iloʼi ko Sehova neʼe ina fai ia te aga ʼae ʼe totonu. ʼE mahino ia neʼe sio ki te loto ʼo Usea ko te tupuʼaga la ʼaia ʼo Tana matehi atu aipe ia ia.—Taʼaga Lea 21:2.
Te ʼu Koloa Fakalaumalie
Kotou Tuku Tuʼumaʼu Takotou Kavega Kia Sehova
Ko Tavite ʼi tona ʼuhiga hau neʼe tonu ke ina tali te ʼu mamahi ʼae neʼe hoko ʼi te faʼahi ʼaia. ʼE ha ʼi tana aga, maʼia mo natou ʼae ʼe felogoi lelei mo Sehova ʼe feala ʼi ʼihi temi, ke mole natou tali te ʼu aluʼaga faigataʼa ʼae ʼe hoko kia natou. Neʼe ʼuluaki ita ia Tavite. Pea neʼe mataku. (2 Samuele 6:8, 9) Neʼe ko he ʼahiʼahi lahi ʼae neʼe hoko ki ʼana felogoi lelei mo Sehova. ʼI te moʼi lakaga ʼaia, ʼe hage mai neʼe mole tuku e Tavite tana kavega kia Sehova, ʼi tana mole mulimuli ki ʼana fakatotonu. ʼE feala koa ke hoko kia tatou ia te faʼahi ʼaia ʼi ʼihi temi? ʼE tou tukugakoviʼi koa ia Sehova ʼo ʼuhiga mo te ʼu fihifihia ʼae ʼe tupu ʼuhi ko tatatou mole fakalogo ki ʼana fakatotonu?—Taʼaga Lea 19:3.
VAHAʼA ʼO TE ʼAHO 30 ʼO MAIO–5 ʼO SUNIO
TE ʼU KOLOA ʼO TE TOHI-TAPU | 2 SAMUELE 7-8
“Neʼe Fai e Sehova Ia He Fuakava Mo Tavite”
“ ʼE Tuʼu Malohi Anai . . . Tou Puleʼaga”
Neʼe malave ki te loto ʼo Sehova ia te lotomalohi ʼae ʼa Tavite ke ina laga hona fale lotu. Moʼo tali ki te ʼu faiga fakamalotoloto ʼaia ʼa Tavite pea mo mulimuli ki te lea fakapolofeta, neʼe fai e te ʼAtua ia te fuakava mo Tavite, ʼe ina fakanofo anai he tahi ʼi te hologa hau ʼo Tavite ke hau anai ʼo talu ai. Neʼe tala e Natane te fakapapau maʼuhiga ʼa te ʼAtua kia Tavite, ʼo ina ui fenei: “ ʼE mahino papau ia ʼe tuʼu malohi anai ʼi ʼou muʼa tou ʼapi pea mo tou puleʼaga ʼo aʼu ki he ʼu temi ʼe mole iloʼi hona gataʼaga; ko tou ʼafioʼaga ʼe liliu anai ʼo tuʼu malohi anai ʼo aʼu ki he ʼu temi ʼe mole iloʼi hona gataʼaga.” (Vaega 16) Ko ai te Tofiʼa heʼe gata ʼo te fuakava ʼaia ia Ia ʼae ka Hau anai ʼo talu ai?—Pesalemo 89:20, 29, 34-36.
“ ʼE Tuʼu Malohi Anai . . . Tou Puleʼaga”
Ko Sesu ʼo Nasaleti neʼe hifo mai te hologa ʼo Tavite. ʼI te fakaha ʼo te tupu ʼa Sesu neʼe ui fenei e te ʼaselo: “ ʼE foaki anai e Sehova ʼAtua kia te ia te hekaʼaga fakahau ʼo Tavite tana tamai, pea ʼe hau anai ia ki te ʼapi ʼo Sakopo ʼo talu ai, pea ko tona puleʼaga, ʼe mole ʼi ai anai hona gataʼaga.” (Luka 1:32, 33) Koia ko te fuakava ʼae neʼe fai mo Tavite, neʼe fakahoko ʼaki ia Sesu Kilisito. Koia, ʼe pule Sesu, kae neʼe mole ko he tagata ʼae neʼe ina fakanofo ia ia ki te tuʼulaga ʼaia, ʼe ko te fakapapau maʼuhiga ʼa te ʼAtua ʼae neʼe feala ai ke pule ʼo talu ai. Tou manatuʼi age muʼa, ʼe hoko tuʼumaʼu pe ia te ʼu fakapapau ʼa te ʼAtua.—Esaia 55:10, 11.
w14 15/10 7 14
Tou Tui Malohi Ki Te Puleʼaga
14 Neʼe fai e Sehova kia Tavite, te Hau ʼo Iselaele, ia he fakapapau ʼe higoa ko te fuakava ʼae neʼe fai mo Tavite. (Lau ia 2 Samuele 7:12, 6.) Neʼe fakapapau e Sehova ʼe hifo mai anai ia te Mesia mai te hologa ʼo Tavite. (Luka 1:30-33) Koia neʼe foaki ai e Sehova ʼihi atu ʼu fakamahino ʼo ʼuhiga mo te hologa ʼo te Mesia. Neʼe ui e Sehova, ko ia ʼae ʼe “maʼua” ke liliu ko te Hau ʼo te Puleʼaga Fakamesia, ʼe haʼu anai ʼi te hologa ʼo Tavite. (Esk. 21:25-27) ʼAki ia Sesu, ko te ʼuhiga hau ʼo Tavite ʼe tuʼu malohi anai ʼo talu ai. Pea ʼe mahino papau ia, ko te hakoga ʼo Tavite, ‘ ʼe tuʼu anai ʼo heʼe gata pea ko tona hekaʼaga fakahau ʼe tuʼu anai ohage ko te laʼa.’ (Pes. 89:35-38) ʼE feala hatatou falala ʼe mole aga fakakaka anai ia te pule ʼa te Mesia. Pea ko te ʼu tapuakina ʼae ka tou maʼu ʼaki ia tana pule, ʼe heʼe gata anai.
Te ʼu Koloa Fakalaumalie
it-1 623 2
ʼAho Fakaʼosi
Te Lea Fakakikite ʼa Palaame. Ia muʼa ʼo te hu ʼo te kau Iselaele ki te Kele ʼo Te Fakapapau ne’e fakaha e te polofeta ko Palaame kia Palaake, te Hau ʼo Moape: “Haʼu muʼa, ke au fakaha atu te meʼa ʼae ka fai e te hahaʼi ʼaeni ki tau hahaʼi ʼi te ka haʼu. . . . ʼE haʼu anai he fetuʼu mai ia Sakopo, ʼe malaga anai he tokotoko fakahau mai Iselaele. ʼE ina foaʼi moʼoni anai te laʼe ʼo Moape pea mo te ʼu foʼi ʼulu ʼo te ʼu foha agamalohi fuli.” (Num 24:14-17) ʼI te ʼuluaki hoko ʼo te lea fakapolofeta, ko te “fetu’u” ne’e ko te hau ko Tavite, ʼae ne’e malo ʼi te kau Moape. (2Sa 8:2) Kae ʼi te hoko ʼo te lea fakapolofeta ʼaeni, ‘ko te ʼu ʼaho fakamuli’ ʼae ʼe talanoa ki ai te vaega, ne’e kamata ʼi te temi ʼae ne’e fakanofo ai Tavite ko te hau. Kapau ne’e fakata e Tavite ia Sesu ʼi tona ʼuhiga Hau Mesia, ko te lea fakapolofeta ʼe toe fakaʼuhiga kia Sesu ʼi te temi ʼae ʼe ina pule’i ai tona ʼu fili.—Esa 9:7; Ps 2:8, 9.
VAHAʼA ʼO TE ʼAHO 6-12 ʼO SUNIO
TE ʼU KOLOA ʼO TE TOHI-TAPU | 2 SAMUELE 9-10
“Neʼe Fakaha e Tavite Ia Tona ʼOfa Agatonu”
w06 15/6 14 6
ʼE Mo’oni, ʼe Feala Ke Manu’ia Tokotou Ma’uli
Ne’e tohi fenei e Tavite ‘Manuʼia ia ia ʼae ʼe tokaga ki te masiva.’ Pea ina toe hoko atu ‘ ʼI te ʼaho ʼo te malaʼia ʼe haofaki anai Sehova ia ia. ʼE mauli fiafia anai ʼuhi ko Sehova.’ (Pesalemo 41:1, 2) Ko te ʼofa agatonu ʼae ne’e fakaha e Tavite kia Mefiposete, te foha maʼimoa ʼo tona kaumeʼa moʼoni ko Sonatane, ʼe ko he faʼifaʼitaki lelei ʼo te faʼahiga tokagaʼi ia ia ʼae ʼe masiva.—2 Samuele 9:1-13.
w05 15/5 17 11
Ko He ʼu Puani Maʼuhiga ʼi Te Tohi ʼo Lua Samuele
9:1, 6, 7. Neʼe fakahoko e Tavite tana fakapapau. Mo tatou foki ʼe tonu ke tou fakahoko ʼatatou fakapapau.
w02 15/2 14 10
ʼE Natou ʼUtakiʼi Te ʼu Mamahi ʼo Tonatou Kakano
10 Hili ki ai ni ʼu taʼu, neʼe fakaha e te Hau ko Tavite te lotoʼofa kia Mefiposete ʼuhi he neʼe ʼofa lahi kia Sonatane. Neʼe ina foaki age kia ia te ʼu kele ʼo Saulo, pea neʼe ina hinoʼi ia te tagata kaugana ʼa Saulo ʼae ko Sipa ke ina gaueʼi te ʼu kele ʼaia. Neʼe toe ui age e Tavite kia Mefiposete: ‘ ʼE ke kai tuʼumaʼu anai te pane ʼi toku laupapa.’ (2 Samuele 9:6-10) ʼE mahino ia ko te lotoʼofa ʼo Tavite neʼe ina fakafimalie ia Mefiposete pea mo tokoni ki ai ke siʼisiʼi tona mamahi ʼuhi ko tona maʼimoa. ʼE ko he ako lelei kia tatou! ʼE tonu mo tatou ke tou agalelei kia natou ʼae ʼe tau mo he mamahi ʼi te kakano.
Te ʼu Koloa Fakalaumalie
it-2 270
Kava
ʼE kaugā malie te hahaʼi tagata ʼae ne’e maʼu’uli ʼi te potu Esite ʼo te Eulopa ʼi te temi muʼa, ʼo kau ai mo te kau Iselaele, ne’e natou tokakaga lelei ki ʼonatou ʼu kava he ne’e fakaʼapa’apa’ia. Ne’e tapuʼi e te lao ʼo te Mafimafi te hoko kosi ʼo te lau’ulu ʼo feia ki te fakagata ʼo te ʼu kava. (Lev 19:27; 21:5) Ne’e ko he agaʼi lotu ʼo ʼihi atu ʼi te kau pagani.
VAHAʼA ʼO TE ʼAHO 13-19 ʼO SUNIO
TE ʼU KOLOA ʼO TE TOHI-TAPU | 2 SAMUELE 11-12
“Kotou Lolomi Ia Te ʼu Holi Kovi”
w21.06 17 10
ʼE Feala Hau Hao Mai Te ʼu Hele ʼa Te Tevolo
10 Neʼe lahi te ʼu meʼa neʼe foaki age e Sehova ki te Hau ko Tavite, ohage la ko he ʼu koloa, mo te iloa, pea mo te malo ʼi ʼona fili. Neʼe lotofakafetaʼi ia Tavite, ʼo ina ui ko te ʼu meʼa ʼofa ʼo Sehova ʼe ‘lahi fau ke ina fakamatala fuli natou.’ (Pes. 40:5) Kae ʼi te tahi temi, neʼe mole kei feʼauga kia Tavite te ʼu meʼa ʼae neʼe ina maʼu. Neʼe holi ki he tahi ʼu meʼa. Logo la neʼe lahi ʼona ʼohoana, kae neʼe holi ia ki he tahi age fafine neʼe kua ʼohoana. Ko te fafine ʼaia neʼe ko Pate-sepa, ʼae neʼe ʼohoana mo Ulia, te tagata Heti. Neʼe manatu pe ia Tavite kia ia totonu, pea neʼe momoe leva mo Pate-sepa. Ki muli age, neʼe faitama te fafine. Neʼe kovi te meʼa ʼaia neʼe fai e Tavite. Kae neʼe ina fai te tahi meʼa neʼe kovi age. Neʼe ina fakatuʼutuʼu ke matehi ia Ulia. (2 Sam. 11:2-15) Neʼe manatu koa Tavite ʼe mole iloʼi e Sehova te ʼu meʼa ʼae neʼe ina fai? Logo la neʼe kua fualoa te tauhi ʼa Tavite kia Sehova, kae neʼe liliu ʼo manumanū. Pea neʼe mamahi lahi ai. Ki muli age neʼe vete e Tavite tana agahala, pea neʼe fakahemala. ʼE mahino ia, neʼe fiafia ia Tavite ʼi tana iloʼi ʼae neʼe fakamolemole age ia Sehova kia ia!—2 Sam. 12:7-13.
w19.09 17 15
Tou Fakalogo Kia Sehova
15 Neʼe foaki e Sehova kia Tavite te tuʼulaga ʼae ko te pule famili. Kae neʼe ina toe fakanofo ke pule ki Iselaele katoa. Ko Tavite neʼe ko he hau, koia ʼae neʼe ina maʼu ai he toe malohi. Neʼe ina fakaʼaogaʼi kovi te malohi ʼaia ʼi ʼihi temi. Pea neʼe ina fai he ʼu agahala mamafa. (2 Sam. 11:14, 15) Kae ʼi tana fakalogo kia Sehova, neʼe ina tali leleiʼi ia tona fakatonutonuʼi. Neʼe ina vetevete kia Sehova te ʼu meʼa ʼae neʼe ina logoʼi ʼi tona loto. Pea neʼe faiga malohi ke ina muliʼi te ʼu tokoni ʼa Sehova. (Pes. 51:1-4) Pea tahi, neʼe agavaivai ke ina tali te ʼu tokoni ʼae neʼe foaki age e he ʼu tagata mo he ʼu fafine. (1 Sam. 19:11, 12; 25:32, 33) Neʼe taʼofi e Tavite he ʼu ako mai ʼana agahala, pea neʼe liliu tana tauhi kia Sehova ʼo maʼuhiga ʼaupito ʼi tona maʼuli.
Ke Akoʼi ʼOkotou Leʼo ʼo Loto ʼAki Te ʼu Lao Pea Mo Te ʼu Pelesepeto ʼa Te ʼAtua
7 ʼE mole hoki tou tau pe mo he ʼu fihifihia ʼuhi ko tatatou talagataʼa ki te ʼu lao ʼa te ʼAtua pea hoki tou iloʼi ai leva te meʼa ʼae ʼe lelei mo ʼae ʼe kovi. ʼE tou lava maʼu he ʼu ako mai ia natou ʼae neʼe natou fai ʼanatou lakahala ʼi muʼa atu. ʼE tou maʼu te ʼu faʼifaʼitaki ʼaia ʼi te Tohi-Tapu. ʼE ui fenei ia Taʼaga Lea 1:5: “Ke fakalogo te tagata poto, pea e ina fakalahi anai tona poto.” ʼE haʼu te tokoni ʼaia mai te ʼAtua pea ʼe ko te tokoni maʼuhiga. Ohage la, tou fakakaukauʼi te lotomamahi ʼa Tavite ʼi tana talagataʼa kia Sehova ʼuhi ko tana agahala mo Pate-sepa. (2 Sam. 12:7-14) Ka kotou lau te hisitolia ʼaia, kotou fai te fehuʼi ʼaeni: ‘Neʼe lava ʼape ke tekeʼi e Tavite te fihifihia ʼaia? Kotea pe anai ka au fai mo kapau neʼe hoko kia au te aluʼaga ʼaia? Kapau ʼe fakaneke au peʼe au fia fai he aga heʼe ʼaoga, ʼe au hage anai koa ko Tavite peʼe ko Sosefo? (Sen. 39:11-15) Kapau ʼe tou fakakaukauʼi lelei te ʼu nunuʼa ʼo te agahala, ʼe tou ʼasili ‘fehiʼa anai ki te kovi.’
Te ʼu Koloa Fakalaumalie
pb Ko Tavite
Tavite
Kae ko Sehova ʼae neʼe nofo tokaga, neʼe ina fakahe katoa te faʼahi ʼaia neʼe tonu ke fakatotonuʼi. Ka na pau la neʼe fakagafua e Sehova ke sivisivi e te ʼu tuʼi fakamau fakatagata te faʼahi ʼaia ʼo ʼuhiga mo Tavite pea mo Pate-sepa, ʼo mulimuli ki te Lao ʼa Moisese, pea ko naua toko lua ʼae neʼe agahala ʼe matehi anai, pea tahi foki ʼae, ko te toe ʼae mole heʼeki tupu mai tanā tono ʼe mate anai mo tana faʼe. (Tet 5:18; 22:22) Kae ko Sehova totonu neʼe tokaga ki te faʼahi ʼaia pea mo ina fakaha tona manavaʼofa kia Tavite ʼuhi ko te fuakava ʼo te Puleʼaga (2Sa 7:11-16), pea ʼe mahino papau ia ʼuhi he neʼe fakaha totonu e Tavite te lotomanavaʼofa (1Sa 24:4-7; fakatatau mo Skp 2:13) pea ʼuhi ko te fakahemala ʼae neʼe sio ki ai te ʼAtua mai ia naua ʼae neʼe nā agahala. (Ps 51:1-4) Kae neʼe mole nā hao mai te tautea katoa. ʼAki te gutu ʼo te polofeta ko Natane, neʼe puʼaki fenei e Sehova: “Koʼeni ʼe au fakatupu kia koe te malaʼia mai tou loto fale totonu.”—2Sa 12:1-12.
VAHAʼA ʼO TE ʼAHO 20-26 ʼO SUNIO
TE ʼU KOLOA ʼO TE TOHI-TAPU | 2 SAMUELE 13-14
“Neʼe Hoko He Tuʼutamaki He Neʼe Manatu Pe Ia Amenone Kia Ia Totonu”
pb Ko Apesalone
Apesalone
Ko Te Fakapogi ʼo Amenone. ʼUhi ko te matalelei ʼo te tokolua ʼo Apesalone, ia Tamale, neʼe holi fakavale ia Amenone, tona taʼokete kia ia. Neʼe failoi leva ia ʼo ui neʼe mahaki, pea mo fakatuʼutuʼu ke haʼu ia Tamale ki tona ʼapi ke kuka kia ia, pea neʼe ina fakaʼalikiʼi ia ia. ʼOsi ʼaia, ko te holi fakasino ʼo Amenone neʼe fetogi leva ia ko he fehiʼa fakalialia pea mo ina kapu ia Tamale ki te ala. Neʼe haga leva ia Tamale ʼo haeʼi tona kofu pulepule ʼae neʼe iloga ai tona ʼuhiga ʼofafine kei taupoʼou ʼo te hau, pea mo ina ʼai te lefulefu ki tona ʼulu pea mo felaveʼi ai mo Apesalone, ʼae neʼe mahino atu aipe ki te meʼa ʼae neʼe hoko pea neʼe mahalohalo pe kia Amenone, ʼo ha mai ai kua ina iloʼi pe te holi fakavale ʼo tona tehina. Kae neʼe fakatotonu age e Apesalone ki tona tokolua ke mole ina fai he fakakovi, pea mo ina ʼave ia ia ki tona ʼapi ke nofo ai.—2Sa 13:1-20.
w17.09 6 11
Ke Tou Maʼu Ia Te Lotololomi
11 ʼE tou toe maʼu foki ʼi te Tohi-Tapu ia he ʼu faʼifaʼitaki ʼo ni hahaʼi neʼe natou to ki te fakahala ʼae ko te fai ʼo te ʼu felaveʼi fakasino heʼe ʼaoga. Pea ʼe ha ai te ʼu fua kovi ʼe tou maʼu moka ʼe mole tou lotololomi. Kapau ʼe ke felaveʼi mo he aluʼaga ohage ko ʼae neʼe hoko kia Kim, fakakaukauʼi te aluʼaga ʼae neʼe hoko ki te tupulaga hala ʼatamai ʼae ʼe fakamatala ʼi te kapite 7 ʼo Taʼaga Lea. Toe fakakaukauʼi age te faʼifaʼitaki ʼo Amenone pea mo te ʼu nunuʼa kovi ʼo tana aga. (2 Sam. 13:1, 2, 10-15, 28-32) ʼE feala ki te ʼu matuʼā ke natou tokoni ki ʼanatou fanau ke natou maʼu ia te lotololomi pea mo te poto, ʼaki tanatou faipalalau ki te ʼu faʼifaʼitaki ʼaia lolotoga tanatou ako fakafamili.
pb Ko Apesalone
Apesalone
Hili ki ai taʼu ʼe lua, pea hoko mai ai leva mo te temi ʼo te kosi ʼo te ʼu fuluʼi akeno, neʼe ko he temi fakafiafia, ʼo fakatuʼutuʼu ai e Apesalone te katoaga ʼi Paale-atesoli ʼae ʼe tuʼu ia kilometa ʼe 22 ʼi te potu tokelau hahake ʼo Selusalemi, pea neʼe ina fakaafe te ʼu foha ʼo te hau pea mo Tavite totonu. ʼI te fakafisi ʼo tana tamai ki te fakaafe, neʼe kole mamahi e Apesalone kia te ia ke ina fekauʼi mai tona ʼuluaki foha, ia Amenone, ke ina fetogi ia ia. (Taa 10:18) ʼI te lolotoga ʼo te katoaga, ʼi te temi ʼae “neʼe fiafia [ai ia Amenone] ʼi te vino,” neʼe fakatotonu age ai e Apesalone ki tana kau kaugana ke natou matehi ia ia. Ko te ʼu foha ʼae neʼe natou toe liliu natou ki Selusalemi, pea ko Apesalone neʼe alu ʼo nofo ʼi tana kui Silia ʼi te fenua ʼo Kesuli ʼi te potu hahake ʼo te Tai ʼo Kalilea. (2Sa 13:23-38) Ko te “heleta” ʼae neʼe fakakikite e te polofeta ko Natane neʼe hu ki te “loto fale” ʼo Tavite pea ʼe nofo ai anai lolotoga tona maʼuli katoa.—2Sa 12:10.
Te ʼu Koloa Fakalaumalie
g04 22/12 8-9
Te Matalelei ʼAe ʼe Mooni
ʼI te tahi fa’ahi, tou tokagaʼi ia Apesalone, ʼe tou palalau ʼi heni ki te tahi foha ʼo Tavite. Ne’e mole fa’a lelei tana aga ke tou fakatahi mo ia, logo la te matalelei ʼo tona vaka tagata. ʼE ui fenei e te Tohi-Tapu ʼo ʼuhiga mo ia: “Neʼe mole he tahi age tagata ʼi Iselaele katoa neʼe lahi ʼaupito tona vikiʼi ohage ko Apesalone he neʼe talavou. Mai ʼona ʼalofi vaʼe ki tona foʼi ʼulu, neʼe mole pe maʼu he kiʼi mele ʼe tahi.” (2 Samuele 14:25) Kae, ʼi tana fiatuʼu ne’e fakafeagai ki tana tamai ʼo ina fa’ao te heka’aga fakahau. Ne’e ina lava ʼo faka’alikiʼi te ʼu fafine ʼo tana tamai. Ne’e fua kovi feafeaʼi kia ia tana aga pau’u? Ne’e tautea’i e te ʼAtua pea ne’e mate ʼi tona ʼu mamahi.—2 Samuele 15:10-14; 16:13-22; 17:14; 18:9, 15.
ʼE kotou lelei’ia koa ia Apesalone? Kailoa. ʼI te fakahagatonu, ko te taʼi tagata ʼaia ʼe mole kita fia fakaovi ki ai? Ko tona talavou ʼae ne’e mole hona tatau ne’e mole tokoni ki ai ʼo lolomi tana fiatuʼu pea mo tana aga he’e agatonu pea ne’e mole ina haofaki tona maʼuli. Koia ʼae, ʼe tuku mai e te Tohi-Tapu te ʼu faʼifaʼitaki ʼo te ʼu hahaʼi ne’e fakapotopoto, ʼe tou fia fakaovi ki ai logo la ʼe mole tou ilo’i pe ne’e feafea’i tonatou ʼu vaka tagata. Koia, ʼe mahino lelei mai ʼi heni, ko te meʼa ʼae ʼe maʼuhiga mo matalelei, ko te aga fakapotopoto ʼae ʼe ha lelei ai te ʼu vilitute ʼo te ʼAtua.
VAHAʼA ʼO TE ʼAHO 27 ʼO SUNIO–3 ʼO SULIO
TE ʼU KOLOA ʼO TE TOHI-TAPU | 2 SAMUELE 15-17
“Neʼe Agatuʼu ia Apesalone ʼUhi Ko Tona Fialahi”
it-2 630
ʼE Haʼele ʼi Mu’a ʼo Taki Te Ala
ʼI te ʼu fenua Esite ʼo te Eulopa, ne’e ko he aga’i fenua ke lele ʼo he ʼu tagata ʼi muʼa ʼo te saliote ʼo te hau mo puipui tana fagona, ke ilo’i e te haha’i pea mo tokoni ki ai ʼi te ʼu alu’aga fuli pe. (1Sa 8:11) ʼI tanā fiatu’u ne’e faʼifaiʼtaki’i e Apesalone mo Atonisa te fa’ahiga fai ʼaia ʼo nā fakatu’u ai ia mu’a ʼo tanā saliote te toko nimagofulu tagata lele.—2Sa 15:1; 1Ha 1:5; vakaʼi TAGATA LELE.
Tou Tauhi Ki Te ʼAtua ʼAe ʼe Ina Foaki Te ʼAteaina
5 ʼE lahi te ʼu faʼifaʼitaki ʼi te Tohi-Tapu ʼo te ʼu hahaʼi neʼe natou fakaneke ʼihi ke natou fai he ʼu meʼa ʼe kovi. ʼE kau ia natou ʼaia te foha ʼo te Hau ko Tavite, ʼae ko Apesalone. Ko Apesalone neʼe talavou ʼaupito ia. Kae ohage ko Satana, neʼe ina tuku ke tuputupu ʼi tona loto he holi ʼe kovi. Neʼe ina fia faʼao te tuʼulaga hau ʼo tana tamai, logo la neʼe mole ko ia ʼae neʼe tonu ke ina maʼu te tuʼulaga ʼaia. ʼI tana faiga ke ina maʼu te meʼa ʼae neʼe loto ki ai, neʼe ina fakaoloolo ia te hahaʼi ke natou tui ʼe fia tokoni moʼoni kia natou kae ko tonatou hau ʼe mole feia ia. Ohage pe ko te meʼa ʼae neʼe fai e te Tevolo ʼi te ʼoloto ʼo Eteni, neʼe fakaoloolo e Apesalone te hahaʼi ke natou manatu ʼe fia tokaga kia natou pea neʼe toe fasituʼu ia ki tana tamai.—2 Sam. 15:1-5.
it-1 1100-1101
Hepelone
Hili ki ai ni ʼu taʼu, ko Apesalone, foha ʼo Tavite, ne’e toe liliu ki Hepelone, kolo ʼaia ʼae ne’e ina kamata fakatu’utu’u ai te fakakaukau ʼae ke ina fa’ao te heka’aga fakahau ʼo tana tamai, kae ne’e mole hoko ʼo lava. (2Sa 15:7-10) Kapau ne’e ina fili te kolo ʼo Hepelone ke kamata tana ʼu fakatu’utu’u ʼae ke ina ma’u te hekaʼaga fakahau, ko Hepelone ne’e ko te kolo takimu’a ʼaia ʼo Suta pea ne’e tupu ai, pea ne’e mole puli ki he tahi te hisitolia lelei ʼo te kolo. Ki tona hoko atu, ko te Hau ko Lopoame, te mokopuna ʼo Tavite ʼae ne’e ina toe laga’i. (2Kk 11:5-10) ʼI te hili ʼo te maumau’i ʼo Suta e te kau Papiloni pea ʼi te toe liliu mai ʼo te kau Sutea, ko ʼihi ia natou ʼaia ne’e natou fai te tonu ʼae ke natou fakatu’u honatou nofo’aga ʼi Hepelone (Kiliate-alepa).—Nee 11:25.
Te ʼu Koloa Fakalaumalie
w18.08 6 11
ʼE Moʼoni Koa Mo Katoa Te ʼu Logo ʼAe ʼe Tou Maʼu?
11 ʼE feala ʼi ʼihi temi ke fai ʼo ʼuhiga mo tatou he ʼu fakamatala ʼe mole katoa tona moʼoni pea ʼe tou mamahi ai. Neʼe hoko te aluʼaga ʼaia kia Mefiposete. Neʼe foaki e te Hau ko Tavite kia Mefiposete te ʼu kele fuli ʼo tana kui ko Saulo. (2 Sam. 9:6, 7) Kae ki muli age neʼe logo ia Tavite ki he ʼu fakamatala loi ʼo ʼuhiga mo Mefiposete. Neʼe ina toe toʼo ai te ʼu kele fuli ʼae neʼe ina foaki kia Mefiposete, kae neʼe mole ina kumi muʼa pe ʼe moʼoni te fakamatala ʼae neʼe logo ki ai. (2 Sam. 16:1-4) Ki muli age, ʼi te felogoi leva ʼae ʼa Tavite mo Mefiposete, neʼe mahino ai kia Tavite neʼe faihala, pea ina toe liufaki ai ʼihi kele kia Mefiposete. (2 Sam. 19:24-29) Ka na pau la neʼe kumi muʼa e Tavite ia te moʼoni, kae mole tui fakavilivili atu aipe ki te ʼu fakamatala ʼae neʼe logo ki ai, neʼe mole mamahi ia Mefiposete ʼi te aluʼaga heʼe faitotonu ʼaia.