ʼAua Naʼa Kotou Tuʼania Te Fakaʼosi ʼo Te Malama ʼAeni

Kua vave ʼosi te faʼa kataki ʼa Sehova ki te malama ʼaeni. ʼE pulihi anai ia te ʼu lotu hala fuli, ʼe fakatahi anai te ʼu puleʼaga ke natou tauʼi ia te hahaʼi ʼa Sehova, pea ʼe pulihi anai e Sehova ia te kau agakovi ʼi Alamaketone. ʼE tou fakaʼamu fuli ke hoko mai te ʼu aluʼaga ʼaia.

ʼE moʼoni, ʼe mole tou iloʼi te ʼu aluʼaga fuli ʼae ka hoko anai ʼi te mamahi lahi. Ohage la, ʼe mole tou iloʼi te ʼaho ʼae ka kamata anai. ʼE mole tou iloʼi pe kotea te takuʼaki ʼa te ʼu puleʼaga ke tupu ai tanatou ʼohofi te ʼu lotu fuli. ʼE mole tou iloʼi pe ʼe fualoa te ʼoho e te ʼu puleʼaga ia te hahaʼi ʼa Sehova, pe kotea anai ka natou fai. ʼE mole tou iloʼi pe ʼe pulihi feafeaʼi anai e Sehova ia te kau agakovi ʼi Alamaketone.

Kae ʼe tou maʼu ʼi te Tohi-Tapu ia te ʼu manatu fuli ʼae ʼe ʼaoga kia tatou ke tou lototoʼa pea ke ʼaua naʼa tou tuʼania ia te ka haʼu. Ohage la, kua tou mahino ʼe tou maʼuʼuli nei ʼi te ʼu “ ʼaho fakamuli.” (2Ti 3:1) Kua tou iloʼi ʼe “fakanounou” anai ia te ʼohofi ʼo te ʼu lotu ke ʼaua naʼa pulihi mo te lotu moʼoni. (Mat 24:22) ʼE tou iloʼi ʼe haofaki anai e Sehova tana hahaʼi. (2Pe 2:9) Pea ʼe tou iloʼi neʼe filifili e Sehova ia Sesu ke ina pulihi ia te kau agakovi pea mo puipui ia tana hahaʼi ʼi Alamaketone.​—Apk 19:11, 15, 16.

ʼE “matataku” anai te hahaʼi moka hoko te ʼu aluʼaga ʼaia. Kae kapau ʼe tou lau mo metitasio ki te ʼu gaue ʼae neʼe fai e Sehova ʼi te temi muʼa, ʼo feia mo ʼana fakapapau ʼo ʼuhiga mo te ka haʼu, ʼe feala ai ke tou tutuʼu tonu pea mo falala kua vave hoko mai totatou haofaki.​—Luk 21:26, 28.