Tou Fai He ʼu Tonu Fakapotopoto

KO TE loto faʼitaliha ʼe ko he meʼa ʼofa mai te ʼAtua. Ka na neʼe mole tou maʼu la te potu ʼaia, ʼe tou hage anai ko he ʼu masini, ʼo mole tou pule ki te ʼu meʼa ʼe tou fai. Kae ʼaki te potu ʼaia ʼe tou tau ai mo te ʼu fihifihia. ʼAki totatou loto faʼitaliha, ʼe tonu ke tou fai he ʼu tonu ʼi totatou maʼuli katoa.

ʼE moʼoni ia, ʼe lahi te ʼu tonu ʼe mole faʼa maʼuhiga. Ko ʼihi, ohage ko te fili ʼo he gāue peʼe ko he teuteu ʼohoana, ʼe malave ki totatou maʼuli katoa. Pea ʼe ʼi ai ʼihi tonu ʼe malave ki te hahaʼi. Ko ʼihi tonu ʼe fai e te ʼu mātuʼa ʼe malave ki ʼanatou fānau. Pea tahi ʼaē meʼa, ʼe lahi te ʼu tonu ʼe tou fai ʼe tonu ke tou huʼi maʼua ki te ʼAtua.—Loma 14:12.

Te ʼAoga ʼo He Tokoni

ʼE mole maʼu he fakamatala lelei ʼo ʼuhiga mo te ʼu tonu ʼaē neʼe fai e te tagata. Ko te tonu ʼaē neʼe fai e te ʼu ʼuluaki tagata neʼe fakatupu malaʼia. Neʼe fakatotonu e Eva ke ina fakaʼaogaʼi te fuaʼi ʼakau ʼaē neʼe tapuʼi age e te ʼAtua. Ko tana filifili, ʼaē neʼe fakatafito ki tona holi, neʼe ina fakaneke ai tona ʼohoana ke kau mo ia ki te talagataʼa ki te ʼAtua, pea koia ʼaē ʼe tau ai te malamanei mo te toe mamahi lahi. ʼE lahi te ʼu ʼaluʼaga ʼe hā ai neʼe lahi te ʼu tonu neʼe fai e te tagata ʼaki pe tona loto faʼitaliha kae mole ina tokagaʼi te ʼu pelesepeto faitotonu. (Senesi 3:6-19; Selemia 17:9) Pea ka tou tau mo he ʼu tonu mamafa, pea ʼe tou mahino ai ki te ʼu tuʼakoi ʼo tatou tagata.

Koia ʼe mole tou punamaʼuli ai mo kapau ʼe tonu ke fai he ʼu tonu maʼuhiga, ko te tokolahi ʼe nātou kumi tokoni ki he tahi ʼu matapuna ʼe māʼoluga age ʼi te tagata. ʼE fakamatala mai e te Tohi-Tapu, ʼi te tahi lakaga neʼe ʼi ai te tonu maʼuhiga neʼe tonu ke fai e Nepukanesa lolotoga te temi tau. Logope neʼe ko te hau, kae neʼe ina logoʼi te maʼua ʼaē ke ina “fakaʼaogaʼi te faifakalauʼakau,” moʼo fakafehuʼi ʼo te ʼu laumālie. Koia ʼe fakamatala fēnei: “Neʼe ina lulu te ʼu kauʼi nahau. Neʼe ina fakafehuʼi ʼaki te ʼu telafime; neʼe ina sioʼi te ʼate.” (Esekiele 21:21) ʼE toe feiā pe ʼi te temi nei, tokolahi ʼe nātou ʼolo ki te hahaʼi fai fakakikite, mo te hahaʼi ʼaē ʼe nātou vakaʼi te ʼu fetuʼu, pea mo te tahi ʼu faʼahiga fai moʼo kumi tokoni ki te ʼu laumālie. Kae ʼe kākāʼi nātou.—Levitike 19:31.

ʼE ʼi ai te Tokotahi ʼe tou lava falala katoa ki ai pea ʼi te lolotoga ʼo te hisitolia ʼo te tagata, neʼe tokoni ki ai ke ina fai he ʼu tonu ʼe fakapotopoto. Ko te tokotahi ʼaia ʼe ko Sehova ʼAtua. Ohage la, ʼi te temi muʼa, neʼe fakatoʼo e te ʼAtua ki tana hahaʼi, ia Iselaele, te Ulime pea mo te Tumime—neʼe lagi ko he ʼu meʼa taputapu neʼe fakaʼaogaʼi e te puleʼaga ʼo Iselaele ʼi he ʼaluʼaga neʼe maʼuhiga ʼaupito. ʼAki te Ulime pea mo te Tumime, neʼe tali fakahagatonu age e Sehova ki te ʼu fehuʼi, pea mo tokoni ki te kau tagata ʼāfea ke nātou ʼiloʼi papau peʼe ʼalutahi tanatou ʼu tonu mo tona finegalo.—Ekesote 28:30; Levitike 8:8; Faka au 27:21.

Koutou tokagaʼi te tahi faʼifaʼitaki. ʼI te kole age kia Seteone ke ina takitaki te kautau ʼo Iselaele moʼo tauʼi ʼo Matiane, neʼe tonu ke ina vakavakaʼi peʼe ina tali anai te pilivilesio maʼuhiga ʼaia. Ko Seteone, neʼe ina fia ʼiloʼi papau peʼe tokoni age anai ia Sehova, koia neʼe ina kole ke ina fakahoko he milakulo. Neʼe ina kole ke palapalaʼi e te hahau te fuluʼi ōvi ʼaē ka ina tuku ʼi tuʼa ʼi te po katoa, kae ke mole palapala te kele ʼi tona ʼu tafaʼaki. ʼI te po ʼo te ʼapogipogi, neʼe ina kole age ke moamoa te fuluʼi ōvi kae ke palapala e te hahau te kele ʼi tona ʼu tafaʼaki. Neʼe fai lelei e Sehova te ʼu milakulo ʼaē neʼe kole age e Seteone. Ko te faʼahi ʼaia neʼe ina uga ia Seteone ke ina fai te tonu ʼaē ʼe lelei, pea ʼaki te tokoni ʼa te ʼAtua, neʼe ina tauʼi katoa te ʼu fili ʼa Iselaele.—Kau Fakamāu 6:33-40; 7:21, 22.

Kua Feafeaʼi ʼi Te Temi Nei?

ʼI te temi nei, ʼe kei tokoni ia Sehova ki tana kau kaugana mokā nātou tau mo he ʼu tonu maʼuhiga. ʼO feafeaʼi? ʼE tonu koa ke tou kole ohage ko Seteone, he ʼu ‘ ʼahiʼahi ki te fuluʼi ōvi,’ ko tona faka ʼuhiga ke fakahoko he ʼu fakaʼiloga e Sehova moʼo fakahā mai kia tatou te meʼa ʼaē ʼe tonu ke tou fai? Neʼe fia ʼiloʼi e te taumatuʼa peʼe tonu ke nā ʼolo ki he koga meʼa ʼe ʼaoga lahi ai he kau fai faka mafola ʼo te Puleʼaga. Moʼo fai te tonu ʼaia, neʼe nā fai muʼa te ʼahiʼahi. Neʼe nā fakatuʼutuʼu ke nā fakatau tonā ʼapi. Kapau leva ʼe fakatau tonā ʼapi ʼi he ʼaho kua faka tuʼakoi kiai, ʼo fai ki tona tau ʼaē neʼe fakatuʼu peʼe laka, ko tona faka ʼuhiga neʼe loto e te ʼAtua ke nā mavae. Kae kapau leva ʼe mole hoko te faʼahi ʼaia, ko tona faka ʼuhiga neʼe mole loto e te ʼAtua ke nā mavae.

Neʼe mole toʼo te ʼapi e he tahi. Neʼe ko he faka ʼuhiga koa neʼe mole loto e Sehova ke gāue te taumatuʼa ʼaia ʼi he tahi koga meʼa ʼe ʼaoga lahi ai he kau gāue? ʼE moʼoni, ʼe hage ia ko he fiameʼalahi te tala fakahagatonu ʼo te meʼa ʼaē ʼe fai e Sehova peʼe ko te meʼa ʼaē ʼe mole ina fai maʼa tana kau kaugana. ʼE mole feala ke tou ʼui ʼi te temi nei ʼe mole fai e Sehova he puleʼaki moʼo fakahā mai tona finegalo maʼa tatou. (Isaia 59:1) Kae ʼe mole tonu ke tou ʼamanaki ke fai puleʼaki feiā te ʼAtua ki te ʼu tonu maʼuhiga ʼaē ʼe tou fai, ʼo tou tuku ke fai e te ʼAtua te tonu maʼa tatou. Māʼiape la mo Seteone, neʼe lahi te ʼu tonu maʼuhiga neʼe ina fai kae neʼe mole ʼi ai he ʼu fakaʼiloga faka milakulo mai ia Sehova!

Kae ʼe ʼui mai e te Tohi-Tapu ʼe lava takitaki tatou e te ʼAtua. ʼE ina fakakikite fēnei ʼo ʼuhiga mo totatou temi: “ ʼE logo anai tou ʼu taliga ki he folafola ʼe haʼu mai ʼou tuʼa, ʼo ina ʼui fēnei: ‘Koʼeni te ala. Koutou haʼele ai,’ mo kapau ʼe tonu ke koutou ʼolo ki te faʼahi mataʼu peʼe kapau ʼe tonu ke koutou ʼolo ki te faʼahi hema.” (Isaia 30:21) Ka tonu ke tou fai he ʼu filifili maʼuhiga, pea ʼe lelei ke tou ʼiloʼi papau muʼa peʼe ʼalutahi tatatou ʼu tonu mo te finegalo ʼo te ʼAtua, pea mo fai ʼaki tona poto māʼoluga. ʼO feafeaʼi? ʼO tou lau tana Folafola pea tou tuku ke liliu ko ‘he mālama tutu ki totatou ʼu vaʼe, pea ko he mālama ki totatou ala.’ (Pesalemo 119:105; Tāʼaga Lea 2:1-6) Moʼo fai te potu ʼaia, ʼe tonu ke tou fakamāmāhani ʼo fakaʼaogaʼi te ʼatamai mālama totonu mai te Tohi-Tapu. (Kolose 1:9, 10) Pea mokā ʼe ʼi ai he tonu ke fai, ʼe tonu ke tou kumi fakalelei te ʼu pelesepeto faka Tohi-Tapu fuli ʼe ʼalutahi mo te faʼahi ʼaia. Ko te ʼu faʼahiga kumi ʼaia ʼe ina faka fealagia ai kia tatou ke tou “ ʼiloʼi papau te ʼu meʼa ʼaē ʼe maʼuhiga tāfito.”—Filipe 1:9, 10, MN.

ʼE tonu foki ke tou palalau kia Sehova ʼi te faikole, ʼo tou falala ʼe fagono mai anai kia tatou. ʼE ko he meʼa fakaloto fīmālie hatatou fakamahino ki tatatou ʼAtua ʼofa te filifili ʼaē ʼe tonu ke tou fai, pea mo te ʼu faʼahiga puleʼaki ʼe tou tokagaʼi ki te filifili ʼaia! Koia, ʼe tou lava kole ke ina takitaki tatou ke tou fai he filifili fakapotopoto. Ko te meʼa ʼe tautau hoko anai, ʼe fakamanatuʼi mai anai e te laumālie maʼoniʼoni te ʼu pelesepeto faka Tohi-Tapu ʼaē ʼe tonu ke fakaʼaogaʼi, peʼe tokoni mai anai ke tou mahino lelei ki te vaega ʼaē ʼe ʼalutahi mo te ʼaluʼaga ʼe tau mo tatou.—Sakopo 1:5, 6.

ʼI te kokelekasio ʼe toe foaki foki e Sehova te ʼu tagata kua fakapotopoto, ʼe feala hatatou palalau mo nātou ʼo ʼuhiga mo tatatou ʼu tonu. (Efeso 4:11, 12) Logola ʼe tou fakalavelave anai ki ʼihi tanatou manatu, kae ʼe mole tonu ke tou kumi tokoni ki he ʼu hahaʼi kehekehe ʼo aʼu ki tatatou maʼu he tahi ʼe ina tala mai te tonu ʼaē ʼe tou fia logo kiai, ʼo tou muliʼi tana tokoni. ʼE tonu foki ke tou manatuʼi te fakatokaga ʼaē neʼe hoko kia Lopoame. Neʼe tonu ke ina fai te tonu maʼuhiga, pea neʼe fai age te ʼu tokoni fakapotopoto e te ʼu tagata matutuʼa ʼaē neʼe tauhi ki tana tāmai. Neʼe mole mulimuli ki tanatou tokoni, kae neʼe ʼalu ia ki te kau tagata ʼe taʼiake tahi mo ia. ʼI tana muliʼi tanatou tokoni, neʼe ina fai ai te tonu neʼe kovi ʼaupito pea ko te koga lahi ʼo tona puleʼaga neʼe mole kei fia fakalogo kia ia.—1 Hau 12:1-17.

Ka koutou kumi tokoni, koutou ʼolo kia nātou ʼaē kua fakapotopoto, ʼaē kua nātou mālama lelei ki te Tohi-Tapu pea mo fakaʼapaʼapa ki te ʼu pelesepeto faitotonu. (Tāʼaga Lea 1:5; 11:14; 13:20) Kapau ko he meʼa ʼe fealagia, koutou toʼo he temi ke koutou metitasio ki te ʼu pelesepeto ʼe pipiki kiai, pea mo te ʼu kumi fuli ʼaē neʼe koutou fai. Kapau ʼe koutou vakaʼi te ʼu meʼa ʼaia ʼaki te Folafola ʼa Sehova, ʼe koutou mahino lelei anai pe koteā te tonu ʼaē ʼe lelei ke koutou fai.—Filipe 4:6, 7.

Te ʼu Tonu ʼAē ʼe Tou Fai

ʼE ʼi ai te ʼu tonu ʼe mole fakaʼapē lua tona fai. ʼI te temi ʼaē neʼe fakatotonu age ki te kau ʼapositolo ke ʼaua naʼa nātou toe fai faka mafola, neʼe nātou ʼiloʼi neʼe tonu ke nātou haga fai tanatou fagonogono ʼo ʼuhiga mo Sesu, pea neʼe nātou foimo fakahā atu aipe ki te Sanetualio tanatou tonu ʼaē ke nātou fakalogo ki te ʼAtua ʼi hanatou fakalogo ki te tagata. (Gaue 5:28, 29) Ko ʼihi tonu ʼe lagi tonu anai ke fakakaukauʼi koteʼuhi ʼe mole fakahā fakahagatonu mai e te Tohi-Tapu he tonu ki te potu ʼaia. Kae ʼe mū tuʼumaʼu te ʼu pelesepeto ʼa te Tohi-Tapu ke feala ai hatatou fai he tonu ʼe lelei. Ohage la, logope ʼe lahi te ʼu fakafiafia ʼo te temi nei neʼe mole maʼu ʼi te temi ʼo Sesu, kae ʼe fakahā fakalelei mai e te Tohi-Tapu te meʼa ʼaē ʼe leleiʼia e Sehova pea mo te meʼa ʼaē ʼe mole ina leleiʼia. Koia, ko te Kilisitiano ʼaē ʼe ina tali te ʼu fakafiafia ʼaē ʼe ina fakaneke te agamālohi, te aga heʼeʼaoga, peʼe ko te agatuʼu ʼe mahino ia ʼe ina fai te tonu ʼe kovi.—Pesalemo 97:10; Soane 3:19-21; Kalate 5:19-23; Efeso 5:3-5.

ʼI ʼihi temi, ʼe feala pe ke lelei he ʼu tonu e lua. Ko te gāue ʼi he koga meʼa ʼe ʼaoga lahi ai he kau gāue, ʼe ko he pilivilesio maʼuhiga pea ʼe feala ke kita maʼu ai he ʼu tapuakina lalahi. Kae kapau ʼe filifili e he tahi ke mole ina fai te faʼahi ʼaia, ʼe kei feala pe hana fai he gāue ʼe lelei ʼi tona kokelekasio. ʼI te tahi lakaga, ʼe lagi tou fai anai he tonu ʼe feala ai ke tou fakahā ʼe tou ʼofa lahi kia Sehova peʼe tou fakahā te meʼa ʼaē ʼe maʼuhiga ʼaupito ki totatou maʼuli. Koia, ʼe fakagafua e Sehova ke tou fakaʼaogaʼi totatou loto faʼitaliha ke tou fakahā peʼe tuku moʼoni koa ʼifea totatou loto.

ʼI te agamāhani, ʼe malave ki ʼihi te ʼu tonu ʼaē ʼe tou fai. Ohage la, neʼe fiafia te kau Kilisitiano ʼo te ʼuluaki sēkulō ʼi tanatou ʼāteaina mai ʼihi tapu ʼo te Lao. Ohage la neʼe nātou lava fakafisi peʼe nātou tali he meʼa kai neʼe heʼemaʼa ʼi te Lao. Kae neʼe fakaloto mālohi nātou ke nātou tokagaʼi te ʼu leʼo ʼo loto ʼo ʼihi ʼi tanatou fakaʼaogaʼi te ʼāteaina ʼaia. ʼE lahi te ʼu ʼaluʼaga ʼe feala ke fakaʼaogaʼi kiai te ʼu palalau ʼaenī ʼa Paulo ʼo ʼuhiga mo te ʼu tonu ʼaē ʼe tou fai: “Ke koutou tokakaga naʼa koutou liliu ko he ʼu meʼa fakatupu tūkia.” (1 Kolonito 10:32, MN ) ʼE lahi te ʼu tonu ʼe tou fai ʼe tou tokakaga ai naʼa tou fakatupu tūkia ki ʼihi. Pea tahi ʼaē meʼa, ko te ʼofa ki totatou kāiga ʼe ko te lua fakatotonu maʼuhiga ʼaia.—Mateo 22:36, 39.

Te Ikuʼaga ʼo Te ʼu Tonu ʼAē ʼe Tou Fai

Ko te ʼu tonu ʼaē neʼe fai ʼaki he leʼo ʼo loto ʼe lelei pea neʼe fakatafito ki te ʼu pelesepeto faka Tohi-Tapu, ʼe ʼi ai tuʼumaʼu tona ikuʼaga lelei ki he temi loaloaga. Lagi ʼi te lakaga pe ʼaia, ʼe hage ko he sakilifisio. ʼI te temi ʼaē neʼe ʼui ai e te kau ʼapositolo ʼe nātou haga faka mafola anai ʼo ʼuhiga mo Sesu, neʼe huipiʼi nātou pea neʼe toe tuku age nātou. (Gaue 5:40) ʼI te fakatotonu ʼa te toko tolu Hepeleo—ia Satalake, mo Mesake pea mo Apeteneko —ʼe mole nātou tulolo anai ki te paki ʼa Nepukanesa, neʼe fakatupu tuʼutāmaki kia nātou. Neʼe feala ke matehi nātou ʼuhi ko te tonu ʼaē neʼe nātou fai ʼo mulimuli ki tanatou tui. Kae neʼe nātou ʼiloʼi ʼe leleiʼia pea mo tapuakina nātou e te ʼAtua.—Taniela 3:16-19.

Kapau ʼe tou felāveʼi mo he ʼu fihifihia ʼuhi ko te tonu ʼaē neʼe tou fai, ʼe mole tonu ke tou ʼui neʼe kovi te tonu ʼaia. ʼE feala pe ki “te ʼu temi mo te ʼu meʼa fakafokifā” ke nātou fetogi te ʼu ikuʼaga ʼo te ʼu tonu ʼaē neʼe tou fai, tatau aipe pe neʼe lelei ʼi te kamata. (Tagata Tānaki 9:11) Pea tahi ʼaē meʼa, ʼe tau tuku e Sehova ke hoko he ʼu fihifihia moʼo vakaʼi peʼe maʼuhiga tatatou fakapapau. Neʼe tonu kia Sakopo ke tau po katoa mo te ʼaselo pea neʼe hoki tapuakina ai ia ia. (Senesi 32:24-26) ʼE lagi tonu mo tatou ke tou tauʼi he fihifihia, tatau aipe peʼe tou fai te meʼa ʼaē ʼe totonu. Kae kapau leva ʼe ʼalutahi te ʼu tonu ʼaē ʼe tou fai mo te finegalo ʼo te ʼAtua, ʼe tou lava falala ʼe tokoni mai anai ke tou kātakiʼi pea ki muli age ʼe ina tapuakina anai tatou.—2 Kolonito 4:7.

Koia, kapau ʼe ʼi ai he tonu maʼuhiga ke koutou fai, ʼaua naʼa koutou falala ki takotou poto. Koutou kumi te ʼu pelesepeto faka Tohi-Tapu ʼaē ʼe pipiki kiai. Koutou fakahā kia Sehova te ʼaluʼaga. Kapau ko he meʼa ʼe fealagia, koutou ʼolo ki he kau Kilisitiano kua fakapotopoto. Pea ke koutou lotomālohi. Koutou fakaʼaogaʼi fakalelei te loto faʼitaliha ʼaē neʼe foaki atu e te ʼAtua. Koutou fai he tonu ʼe lelei pea mo koutou fakahā kia Sehova ʼe totonu tokotou loto kia te ia.

[Paki ʼo te pasina 28]

Koutou vakaʼi te Folafola ʼa te ʼAtua ʼi muʼa ʼo takotou fai he ʼu tonu maʼuhiga

[Paki ʼo te pasina 28, 29]

Koutou palalau kia Sehova ʼo ʼuhiga mo te ʼu tonu ka koutou fai

[Paki ʼo te pasina 30]

ʼE feala ke koutou palalau ki te ʼu tonu maʼuhiga ka koutou fai mo he kau Kilisitiano kua fakapotopoto