Tafitoʼaga ʼo Te Kaupepa Ako Te Maʼuli Fakakilisitiano Mo Te Faifakamafola
© 2023 Watch Tower Bible and Tract Society of Pennsylvania
VAHAʼA ʼO TE ʼAHO 1-7 ʼO MAIO
TE ʼU KOLOA ʼO TE TOHI-TAPU | 2 KOLONIKO 17-19
“Ke Ke Maʼu Te Faʼahiga Sio ʼa Sehova Ki ʼIhi”
ʼE Tou Tokagaʼi Anai Koa Te ʼu Meʼa ʼAe Neʼe Tohi?
7 Tou talanoa leva ʼi heni kia Sosafate, te foha ʼo Asa. Neʼe lahi te ʼu kalitate neʼe ina maʼu pea neʼe fiafia ai ia Sehova. Pea ka tuku tana falala kia Sehova, neʼe lahi te ʼu gaue lelei neʼe ina fai. Kae, neʼe ina toe toʼo he ʼu tonu ʼe kovi. Ohage la, neʼe ina fakaʼohoanaʼi tona foha mo te ʼofafine ʼo te Hau agakovi ko Akapo. Ki muli age, neʼe kau Sosafate mo Akapo ki te tauʼi ʼo te kau Asilia, logo la neʼe fakatokaga age e te polofeta ko Mikea ke ʼaua tana fai te faʼahi ʼaia. ʼI te tau, neʼe tauʼi e te kau Asilia ia Sosafate pea neʼe natou faiga ke natou matehi ia ia. (2 Klk. 18:1-32) ʼI tana toe liliu ki Selusalemi, neʼe kole fenei age e te polofeta ko Seu ki ai: “Pe e totonu kia koe ke ke tokoni ki te tagata agakovi pe e ke ofa kia natou ae e fehihia [kia Sehova]?”—Lau ia 2 Koloniko 19:1-3.
Kotou Metitasio Ki Te ʼOfa Fualoa ʼo Sehova
8 ʼE loto e Sehova ke tou iloʼi ʼe ʼofa ia tatou. ʼE fakalaka tana sio ʼi totatou ʼuhiga agahala koteʼuhi ʼe ina kumi te meʼa ʼae ʼe lelei ia tatou. (2 Klk. 16:9) Ohage la, neʼe ina fakaha te faʼahi ʼaia ʼo ʼuhiga mo te Hau ʼo Suta ko Sosafate. Neʼe toʼo e Sosafate ia he tonu ʼe mole lelei ʼaki tana kau mo te Hau ʼo Iselaele ko Akapo pea mo tana tauʼi ia te kau Silia ʼi Lamoti ʼi Kileate. Tatau aipe pe neʼe fakaha e te ʼu polofeta loi ʼe toko 400 ki te tagata agakovi ko Akapo ʼe malo anai ʼi te tau. Kae neʼe ui e te polofeta ʼa Sehova ko Mikea kia Sosafate pea mo Akapo, kapau ʼe nā olo ki te tau ʼe mole nā malo anai. Pea neʼe hoko moʼoni te faʼahi ʼaia. Neʼe mate ia Akapo ʼi te tau pea neʼe meihiʼi mate ia Sosafate. Hili te tau, neʼe fakaʼaogaʼi e Sehova ia Seu moʼo tokoniʼi ia Sosafate ʼo ʼuhiga mo tana hala. Pea neʼe toe ui fenei e Seu: “Nee ina mau ia koe ni mea lelei.”—2 Klk. 18:4, 5, 18-22, 33, 34; 19:1-3.
9 ʼI ni taʼu ki muʼa atu, neʼe ui e Sosafate ki te ʼu tama ʼaliki, mo te kau Levite pea mo te kau pelepitelo, ke natou ʼaʼahi te ʼu kolo fuli ʼo Suta moʼo akoʼi ki te hahaʼi te Lao ʼa Sehova. Neʼe fua lelei te gaue ʼaia ʼo tupu ai te iloʼi e te hahaʼi mai te tahi ʼu puleʼaga ia Sehova. (2 Klk. 17:3-10) Koia, logo la neʼe toʼo e Sosafate he tonu ʼe mole lelei ki ʼamuli, kae neʼe mole galoʼi e Sehova ia te ʼu meʼa lelei ʼae neʼe ina fai ki muʼa atu. ʼE ko he faʼifaʼitaki lelei ʼaia maʼa tatou koteʼuhi ʼi ʼihi temi ʼe tou fai he ʼu lakahala. Kae kapau ʼe tou foaki te meʼa ʼae ʼe lelei tuku pau ki te tauhi ʼae kia Sehova, ʼe haga ʼofa anai kia tatou pea ʼe mole ina galoʼi anai te ʼu meʼa lelei ʼae neʼe tou fai.
Te ʼu Koloa Fakalaumalie
Ke Ke Tauhi Kia Sehova Mo He Loto Katoa
10 Ko Sosafate, ia te foha ʼo Asa, “nee haele . . . ia ia i te ala o tana tamai ko Asa.” (2 Klk. 20:31, 32) ʼO feafeaʼi? Ohage pe ko tana tamai, neʼe ina fakalotomalohiʼi te hahaʼi ke natou haga tauhi kia Sehova. Neʼe ina fekauʼi te ʼu tagata ʼo te ʼu kolo ʼo Suta ke natou akoʼi te hahaʼi ʼo natou fakaʼaogaʼi “te tohi a te lao a [Sehova].” (2 Klk. 17:7-10) Neʼe toe alu ki he telituale ʼo te puleʼaga noleto ʼo Iselaele, ki te hahaʼi ʼae neʼe maʼuʼuli ʼi te ʼu moʼuga ʼo Efalaimi. Kotea tona tupuʼaga? Koteʼuhi ke ina “toe aumai . . . natou [kia Sehova].” (2 Klk. 19:4) ʼEi, ko Sosafate neʼe ko he hau “nee ina kumi [ia Sehova] i tona loto katoa.—2 Klk. 22:9.
11 Ia ʼaho nei, ʼe loto e Sehova ke tou akoʼi te hahaʼi ʼae ʼi te malamanei katoa ke natou iloʼi ia ia. Pea ʼe feala kia tatou fuli ke tou kau ki te gaue ʼaia. ʼE kua ke fakatuʼutuʼu koa ke ke kau ki te gaue ʼaia ʼi te mahina fuli? ʼE ke fia akoʼi koa te Tohi-Tapu ki ʼihi ke feala hanatou toe atolasio mo natou kia Sehova? ʼE ke faikole koa ʼo ʼuhiga mo te aluʼaga ʼaia? ʼEi, kapau ʼe ke fai he ʼu faiga, ʼe tokoni atu anai ia Sehova kia koe ke ke kamata he ako Tohi-Tapu mo he tahi. ʼE ke lotolelei anai koa ʼo sakilifisioʼi tou temi ke ke fai he ako ʼa he tahi? Ohage ko Sosafate, neʼe faiga ʼo tokoni ki ʼihi ke natou toe liliu mai ʼo tauhi kia Sehova. ʼO toe feia pe mo koe, ʼe feala ke ke tokoni ki he tehina peʼe ko he tuagaʼane kua vaivai ʼi te faʼahi fakalaumalie. Pea tahi, ʼe fai e te kau tagata ʼafeā he ʼu fakatuʼutuʼu ke natou olo ʼaʼahi mo tokoni kia natou ʼae ʼi tonatou telituale kua fakamavae pea kua natou fakahemala ki ʼanatou agahala.
VAHAʼA ʼO TE ʼAHO 8-14 ʼO MAIO
TE ʼU KOLOA ʼO TE TOHI-TAPU | 2 KOLONIKO 20-21
“Kotou Falala Kia Sehova Tokotou ʼAtua”
Tou Tau’i Fakatahi Ia Te Fakaʼosi ʼo Te Malama ʼAeni
8 ʼI te temi ʼo te Hau ko Sosafate, neʼe haʼu ia he foʼi kautau malohi moʼo ʼohofiʼi ia te hahaʼi ʼa te ʼAtua. (2 Klk. 20:1, 2) Kotea ʼae neʼe fai te kau Iselaele ʼi tonatou ʼa takai e te foʼi kautau fakamataku ʼaia? Neʼe natou tuku ia tanatou falala kia Sehova pea neʼe natou kole ia tana takitaki. (Lau ia 2 Koloniko 20:3, 4.) Neʼe mole faigaʼi e te kau Iselaele ke natou tahi maʼu hana puleʼaki, kae neʼe natou fakatahitahi fuli. ʼE ui fenei ʼi te Tohi-Tapu: “Nee tuu ia Suta katoa ia mua o [Sehova], mo onatou mokopuna fuli, mo onatou ohoana mo onatou foha.” (2 Klk. 20:13) Neʼe ko te puleʼaga katoa, tupulaga mo matutuʼa, ʼae neʼe falala kia Sehova pea neʼe natou mulimuli ki te ʼu fakatotonu ʼae neʼe fai age. Neʼe natou nonofo fakatahi pea neʼe puipui natou e Sehova mai ʼonatou fili. (2 Klk. 20:20-27) ʼE ko he faʼifaʼitaki lelei ʼaia ʼo ʼuhiga mo te tauʼi ʼo te fakafeagai ʼi totatou ʼuhiga hahaʼi ʼa te ʼAtua?
ʼU Taumatuʼa Foʼou, Kotou Fakamuʼamuʼa Ia Sehova
7 Neʼe fekauʼi e Sehova te Levite ko Sakasiele ke alu ʼo palalau kia Sosafate. Neʼe ui fenei age e Sehova: “Ke kotou olo pe, ke kotou tutuu i ai, pea e kotou sisio anai ki te haofaki ae ka tuku anai e [“Sehova,” NWT] kia koutou.” (2 Klk. 20:13-17) ʼI te agamahani ʼe mole feia te fakahoko ʼo he tau. Kae ʼe mole ko he tagata ʼae neʼe ina fai te ʼu fakatotonu ʼaia, ʼe ko Sehova. Koia, neʼe fakalogo Sosafate kia Sehova he neʼe falala katoa kia te ia. Neʼe alu leva Sosafate pea mo tana hahaʼi ke felaveʼi mo ʼona fili. Neʼe mole ina fakatuʼu ʼi muʼa tana kau solia faiva, kae he kau hiva ʼe mole hanatou ʼu mahafu tau. Neʼe nofo ia Sehova mo Sosafate. Pea neʼe malo ai ia ia ʼi ʼona fili.—2 Klk. 20:18-23.
Te ʼu Koloa Fakalaumalie
it-2 1190 ¶5-6
Seolame
ʼO tupu ko te agakovi ʼo tona ʼohoana ko Atelia, neʼe mole muli’i e Seolame te aga fakahagatonu ʼo tana tamai ko Sosafate. (2Ha 8:18) Neʼe tamate’i e Seloame ʼona tehina ʼe toko 6 mo ni kau ʼaliki ʼo Suta, pea ina fakahala’i tana haha’i ʼo natou lituʼa kia Sehova kae natou tauhi ki te ʼu ʼatua loi. (2Kk 21:1-6, 11-14) Neʼe tokakovi ai tona temi hau katoa, ʼaki ni fihi ʼi te loto puleʼaga mo ni tokakovi ʼi tuʼa puleʼaga. Neʼe fakafeagai leva ia Etome pea toe malaga ia Lipina ʼo fakafeagai ki Suta. (2Ha 8:20-22) Neʼe faitohi ia Elia ʼo fakatokaga ia Seolame: “Koia, ʼe tauteaʼi lahi anai e Sehova tau hahaʼi, mo ʼou foha, mo ʼou ʼohoana pea ʼe ina pulihi anai ʼou koloa fuli.” Pea ko koe, Hau Seloame, “ ʼe lahi te ʼu mahaki ʼe ke tau anai mo ia, ʼo kau ki ai te mahaki ʼo te gākau, pea ʼe lelesili kovi anai ʼi te ʼaho fuli ʼo kaku ki te haʼu ki tuʼa ʼo tou gākau ʼuhi ko te mahaki ʼaia.”—2Kk 21:12-15.
Pea neʼe hoko te aluʼaga ʼaia. Neʼe fakafeala e Sehova ke ʼohofi te fenua e te kau Alape mo te kau Filisitini ʼo natou punupunu ʼona ʼohoana mo ʼona foha. Neʼe fakagafua e te ʼAtua ke hao pe ia Seoase (ʼae neʼe toe higoa ko Akasia), te foha muli ʼo Seloame, kae ko te fakahola ʼaia, neʼe ko tona finegalo ʼuhi ko te fuakava ʼo te Puleʼaga ʼae neʼe fai mo Tavite. “Hili te ʼu meʼa fuli ʼaia, neʼe fakato e Sehova kia [Seloame] he mahaki ʼo te gākau, pea neʼe mole feala ke faitoʼo.” Hili ki ai taʼu ʼe lua, “neʼe haʼu tona gākau ki tuʼa.” Ko te iku’aga ʼaia ʼo te tagata agakovi ʼaeni, “neʼe mole lotomamahi he tahi ʼi tana mate.” Neʼe ʼavaifo leva ʼi te nofoʼaga ʼo Tavite, kae “neʼe mole tuku tona sino ʼi te tanuma ʼo te ʼu hau.” Neʼe fakaheka leva ia Akasia tona foha ʼo fetogi ʼi te tuʼulaga hau.—2Kk 21:7, 16-20; 22:1; 1Kk 3:10, 11.
VAHAʼA ʼO TE ʼAHO 15-21 ʼO MAIO
TE ʼU KOLOA ʼO TE TOHI-TAPU | 2 KOLONIKO 22-24
“ ʼE Fakapale e Sehova Ia Natou ʼAe ʼe Lototoʼa”
ʼE Lituʼa Ia Seoasi Kia Sehova ʼUhi Ko ʼOna Kaumeʼa
KO TE aluʼaga ʼae neʼe hoko ʼi Selusalemi, te kolo ʼae ʼe tuʼu ai te fale lotu ʼo Sehova, ʼe fakamataku. Kua tamateʼi ia te Hau ko Akasia, pea fai e tana faʼe ia Atelia ia he faʼahi ʼe fakamanavahe. ʼE ina fekau ke tamateʼi ia te ʼu foha ʼo te hau, ʼona mokopuna totonu. He neʼe fia liliu ko he fafine ʼaliki.
Kae neʼe fakahola leva ia tona tahi mokopuna kei meamea, ko Seoasi, kae mole ina iloʼi. E ke fia iloʼi pe neʼe hoko feafeaʼi? Neʼe fufu te tamasiʼi e Sokapeta, tana ki’i fa’e, ʼi te fale lotu. ʼE ina lava fai ia te faʼahi ʼaia ʼuhi he ’e pelepitelo lahi ia tona ʼohoana ia Seosata, ʼo nā taupau mo puipui ai te fanau.
ʼE Lituʼa Ia Seoasi Kia Sehova ʼUhi Ko ʼOna Kaumeʼa
Lolotoga ta’u ʼe ono, neʼe taupau fakafufu ia Seoasi ʼi te fale lotu. Pea ina akoʼi ai, ia alu’aga fuli ʼo ʼuhiga mo Sehova mo ʼana lao. ʼI tona taʼu fitu, neʼe tonu leva e Seosata, kua hoko te temi ʼae ke fakanofo ai ke hau. E ke fia iloʼi pe neʼe feafeaʼi te fakahoko ʼo te faha’i ʼaia, pe neʼe iku feafeaʼi te kui fafine ʼa Seoasi, te fineʼaliki agakovi?
Neʼe pauʼi e Seosata, te ʼu tagata le’o ʼo te ʼu hau ʼo Selusalemi, ki he fono fakafufu. Pea ina fakamatala age tana taupau fakafufu, mo tona ʼohoana ia te foha ʼo te hau ko Akasia. Pea ina fakaha age leva ia Seoasi, ʼo natou tonu tahi, ko ia ʼae tuha ke hau.
Hili ʼaia neʼe fakahu leva Seoasi ki tuʼa, pea hili e Seosata ia te pale fakahau ki tona ʼulu, pea “neʼe natou pasipasi leva pea mo ui: ‘Ke fua manuʼia tau ʼafio, e hau!’ ” Neʼe puipui takai ia ia e te ʼu tagata leʼo. ʼI te logo ʼa Atelia ki te ʼu kalaga fakafiafia, neʼe hu ki tuʼa ʼo lele, ʼo kalagaʼi leʼo lahi tana feagai. Kae neʼe fekau atu aipe e Seosata te ʼu tagata leʼo, ke natou tamate’i.—2 Hau 11:1-16.
it-1 776 ¶8
ʼAvaifo, Tanuma
Neʼe ʼalikisia ia te ʼavaifo ʼo Seosata, te Pelepitelo Lahi agatonu, koteʼuhi neʼe ʼavaifo ʼi te “Kolo ʼo Tavite ohage ko te ʼu hau.” Ke tou mahino lelei, ko he fa’ahi maʼuhiga ʼaupito neʼe hoko ki te tagata ʼaeni, pea ʼe gata mo ia, ʼuhi he neʼe fakagafua ke ʼavaifo ʼi he fale maka fakahau, kae neʼe mole kau ʼi te hakoga hau.—2Kk 24:15, 16.
Te ʼu Koloa Fakalaumalie
it-2 1231 ¶10
Sakalia
12. Ko te foha ʼo te Pelepitelo Lahi ko Seosata. Hili te mate ʼa Seosata, neʼe lituʼa leva te hau ko Seoasi ki te tauhi moʼoni, ʼaki tana mulimuli ki te ʼu tokoni ʼae ʼe kovi, kae mole fakalogo ki te ʼu pelepitelo ʼa Sehova. Neʼe fakatonutonuʼi malohi te hahaʼi e Sakalia, te tehina ʼo Seoasi (2Kk 22:11), ʼo ʼuhiga mo te aluʼaga ʼaia. Neʼe mole fakahemala te haha’i, kae natou tuki makaʼi ia Sakalia ʼi te tāmuʼa ʼo te fale lotu. ʼI muʼa ʼo tana mate, neʼe ui e Sakalia: “Ke vakaʼi e Sehova te aluʼaga ʼaia pea ke ina tauteaʼi koe ʼuhi ko tau aga.” Neʼe logo’i te kole ʼa te polofeta, koteʼuhi neʼe maumau’i kovi e te fo’i tau Silia ia Suta, kae neʼe fakapogi leva Seoasi e ʼana tagata faifekau ʼe lua, “koteʼuhi neʼe ina fai he ligi toto ʼi tana matehi te ʼu foha ʼo Seosata.” ʼI te Tohi-Tapu “Septante” mo “Vulgate” ʼe ui, neʼe mate ia Seoasi ʼuhi ko te lagavaka ʼo te toto ʼo te “foha” ʼo Seosata. ʼI te ʼu tohi ʼo te kau “Massorètes” mo “Peshitta” ʼe tohi ai “te ʼu foha,” ʼe fakaʼaoga te toko haha’i, ko te tokaga’i ʼaia ʼo te lelei mo te maʼuhiga ʼo te pelepitelo mo polofeta ko Sakalia, te foha ʼo Seosata.—2Kk 24:17-22, 25.
VAHAʼA ʼO TE ʼAHO 22-28 ʼO MAIO
TE ʼU KOLOA ʼO TE TOHI-TAPU | 2 KOLONIKO 25-27
“ ʼE Lava Foaki Atu e Sehova ʼo Lahi Age ʼi Te Meʼa ʼAia”
it-2 1186 ¶3
Seoasi
Ko te toko teau afe ʼo tana kau solia, neʼe fakagafua e Seoasi ke fakaʼaoga e te hau o Suta ke tau’i ʼaki ia Etome. Kae ʼaki te ʼu tokoni ʼa te “te tagata ʼa te ʼAtua moʼoni,” neʼe fakaliliu leva natou. Neʼe natou iita ʼi tonatou fakaliliu ki ʼonatou ʼapi, logo la neʼe kua totogi fakatomuʼa natou ʼo taki teau taleta pa’aga (660 600 $). Neʼe lagi natou manatu ki te ʼu koloa ʼo te tau, ʼae ka natou hala ai. Tupuʼaga ʼaia, ʼi te foki ʼo tonatou fagona ki te Noleto, neʼe natou tau’i mo kaihaʼa leva te ʼu kolo ʼo te puleʼaga ʼo te Saute, ʼo kamata mai Samalia (ʼe fakamahalo, ko tonatou nofoʼaga tau) ʼo kaku ki Pete-oloni.—2Kk 25:6-10, 13.
“Kotou ʼAhiʼahi” Te Agalelei ʼa Sehova
16 Kotou fai he ʼu sakilifisio ma’a Sehova. ʼE mole ʼaoga leva ke tou fakafisi ki he maʼuli fimalie ke lelei’ia tatou e Sehova. (Ekl. 5:19, 20) Neʼe talanoa Sesu ʼi tana lea fakatata ki he tagata neʼe gaue kinakina ʼo tanaki hona ʼu koloa kae neʼe ina meʼa noaʼi te ʼAtua. Koia kapau ʼe tou filifili ke mole tou fai ni sakilifisio maʼa Sehova, ʼe tou hage pe ko te tagata ʼaia ʼi te lea fakatata ʼa Sesu. (Lau ia Luka 12:16-21.) Ko te tehina ko Christian ʼe maʼuli ʼi Falani, neʼe ina ui fenei: “Neʼe mole au foaki kia Sehova mo toku famili ia toku temi pea mo toku malohi.” Ko ia pea mo tona ʼohoana neʼe nā fai te tonu ʼae ke nā pionie. Kae ke hoko te fakatuʼutuʼu ʼaia, neʼe tonu ke nā mavae ʼi ʼana gaue fakamalama pea mo maʼuli fakafeʼauga. Koia neʼe nā faimenasi pea neʼe nā fiafia ʼi te meʼa pe ʼae ʼe nā maʼu logo la ʼe mole lahi ke feafeaʼi. Neʼe ʼi ai koa he ʼaoga ʼo te ʼu sakilifisio ʼaia? ʼE ui fenei e Christian: “Kua lahi age tamā fiafia ʼi te faifakamafola he ʼe ma sisio ʼe ako e tamā kau ako pea mo ʼa’ahi ke natou iloʼi ia Sehova.”
Te ʼu Koloa Fakalaumalie
ʼE ʼi Ai Koa Hokotou Faʼifaʼitaki Fakalaumalie?
ʼI TANA kei taʼu 16, neʼe fakanofo ia Osiasi ki te tuʼulaga hau ʼo Suta, te pule’aga ʼo te Saute. Neʼe ʼafio lolotoga ta’u ʼe 50, mai te fakaʼosi ʼo te 9 ki te kamata ʼo te 8 sekulo ia mu’a ʼo totatou temi. ʼI tona temi tupulaga neʼe ina fai tautonu “te meʼa ʼae ʼe lelei kia mata ʼo Sehova.” Kotea ʼae neʼe ina uga ia ia, ke haga haʼele ʼi te faitotonu? ʼE ma’u ʼi te hisitolia: “Neʼe . . . haga kumi [e Osiasi] ia te ʼAtua ʼi te temi ʼo Sakalia, ʼae neʼe ina akoʼi age kia ia te manavasiʼi ki te ʼAtua moʼoni. ʼI te temi ʼae neʼe ina kumi ai ia Sehova, neʼe tapuakiʼi ia ia e te ʼAtua moʼoni.”—2 Koloniko 26:1, 4, 5.
Ko te gata ʼaia ʼo te ʼu vaega ʼi te Tohi-Tapu, ʼe tou maʼu ai te fakamatala ʼo te tagata faitokoni ʼaeni ʼo te hau. Kae ʼe mahino ia, ʼi tona ʼuhiga faiako ki “te manavasiʼi ki te ʼAtua moʼoni,” neʼe fua lelei te fakahinohino ʼa Sakalia ki te hau tupulaga, ke ofe’i ai ki te aga ʼae ʼe totonu. ʼE ui ʼi te ʼu tohi tala manatu ki te Tohi-Tapu (The Expositor’s Bible) ko Sakalia neʼe ko he tagata ʼatamai malama ki te ʼu tohi taputapu, neʼe ina ma’u “te fakasiosio fakalaumalie, pea poto ʼi te vaevae ʼo tona ʼatamai malama.” ʼE ui e he tagata sivi Tohi-Tapu, ʼe feala ke tou tui: “Neʼe ma’u e Sakalia he ʼatamai feʼauga ki te ʼu lea fakapolofeta, neʼe tauhi agatonu mo agalelei . . . ’e mahino ia neʼe tau tana aga ia Osiasi.”
VAHAʼA ʼO TE ʼAHO 29 ʼO MAIO–4 ʼO SUNIO
TE ʼU KOLOA ʼO TE TOHI-TAPU | 2 KOLONIKO 28-29
“Kotou Tauhi Kia Sehova Tatau Aipe Pe Neʼe Mole Tuku e ʼAkotou Matuʼā He Faʼifaʼitaki Lelei”
Faʼifaʼitakiʼi Te ʼu Kaumeʼa ʼo Sehova
8 Neʼe kehe leva te aluʼaga ʼae neʼe hoko kia Esekiasi pea mo ʼae neʼe hoko kia Lute. Neʼe kau Esekiasi ki he puleʼaga neʼe tauhi kia Sehova. Kae, neʼe mole nonofo agatonu fuli te kau Iselaele. Ko te Hau ko Akase, ia te tamai ʼa Esekiasi, neʼe ko he tahi neʼe agakovi. Neʼe mole fakaʼapaʼapa ki te fale lotu ʼo Sehova. Neʼe ina uga te hahaʼi ke natou tauhi ki te tahi ʼu ʼatua. Pea neʼe ina toe sakilifisioʼi ʼona foha ki te ʼu ʼatua hala ʼaki tana tutu maʼuli natou. Koia, neʼe maʼuli mamahi ia Esekiasi ʼi tana kei veliveli!—2 Hau 16:2-4, 10-17; 2 Klk. 28:1-3.
Faʼifaʼitakiʼi Te ʼu Kaumeʼa ʼo Sehova
9 Neʼe feala ke maʼu e Esekiasi ia he ʼu manatu ʼe mole lelei peʼe ita kia Sehova ʼuhi ko te faʼifaʼitaki kovi ʼo tana tamai ko Akase. Ia ʼaho nei, ko ʼihi ʼe natou tau mo he ʼu faigataʼaʼia ʼe veliveli age ʼi te ʼu faigataʼaʼia ʼae neʼe tau mo Esekiasi. Kae, ʼe natou manatu ʼe ʼi ai te ʼu tupuʼaga lelei ke natou “itaita . . . [kia Sehova]” peʼe ki tana kautahi. (Taag. 19:3) ʼI te manatu ʼa ʼihi, kapau neʼe mole lelei tonatou maʼuli fakafamili, ʼe natou maʼuʼuli mamahi anai peʼe natou toe fai pe anai te ʼu lakahala ʼae neʼe fai e ʼanatou matuʼā. (Esk. 18:2, 3) Kae, ʼe moʼoni koa te ʼu manatu ʼaia?
10 Kailoa, he ʼe fakamoʼoni ki ai te maʼuli ʼo Esekiasi. Koia, ʼe mole ʼi ai he tupuʼaga ke tou iita ai kia Sehova. ʼE mole ko ia te tupuʼaga ʼo te ʼu aluʼaga fakalotomamahi ʼae ʼe hoko ki te hahaʼi. (Sopo 34:10) ʼE moʼoni, ʼe feala ki te ʼu matuʼā ke natou akoʼi ʼanatou fanau te fai ʼo te meʼa ʼae ʼe lelei. Kae ʼe ʼi ai ʼihi matuʼā ʼe natou tuku ia he ʼu faʼifaʼitaki kovi ki ʼanatou fanau. (Taag. 22:6; Kol. 3:21) ʼE mole fakaʼuhiga leva ʼe fakalogo totatou ʼuluagaaga ki totatou maʼuli fakafamili. Kotea tona tupuʼaga? Koteʼuhi neʼe foaki mai e Sehova ia te loto faʼitaliha, ko tona fakaʼuhiga ʼe feala ke tou filifili te fai ʼo te meʼa ʼae ʼe lelei peʼe kovi. (Tet. 30:19) Neʼe fakaʼaogaʼi feafeaʼi e Esekiasi tona loto faʼitaliha?
11 Logo la ko tana tamai neʼe kau ʼi te ʼu hau agakovi ʼo Suta, kae ko Esekiasi neʼe ko te hau agalelei. (Lau ia 2 Hau 18:5, 6.) (Vakaʼi te nota ʼi te fakaʼosi ʼo te alatike.) Neʼe mole ina muliʼi te faʼifaʼitaki kovi ʼo tana tamai. Kae, neʼe fakalogo lelei ki te ʼu polofeta ʼa Sehova, ohage la ko Esaia, mo Mikea pea mo Oseo. Neʼe mulimuli lelei ki ʼanatou tokoni mo tali ʼanatou fakatonutonu. ʼAki te ʼu tokoni ʼaia, neʼe lotomalohi ai ke ina fakatokatoka ia te ʼu fihifihia ʼae neʼe fai e tana tamai. Neʼe ina fakamaʼa te fale lotu, neʼe ina kole ki te ʼAtua ke fakamolemole ki te ʼu agahala ʼa te hahaʼi pea neʼe ina maumauʼi te ʼu taula ʼatua ʼo te fenua. (2 Klk. 29:1-11, 18-24; 31:1) Ki muli age, ʼi te temi ʼae neʼe fakamatakuʼi ai e te hau Asilia ko Senakelipe ke ina ʼohofi ia Selusalemi, neʼe lototoʼa pea neʼe tui ia Esekiasi. Neʼe falala ki te puipui ʼa Sehova pea neʼe ina fakalotomalohiʼi tana hahaʼi. (2 Klk. 32:7, 8) ʼI te tahi temi ʼo tona maʼuli, neʼe fia lahi ia Esekiasi. Kaʼe neʼe fakatonutonuʼi e Sehova ia ia pea neʼe ina tali ʼaki he agavaivai. (2 Klk. 32:24-26) ʼE mahino ia, ko Esekiasi ʼe ko he faʼifaʼitakiʼaga lelei kia tatou. Neʼe mole liliu ʼo agakovi ʼuhi ko tona maʼuli fakafamili. Kae, neʼe ina fakaha neʼe kaumeʼa mo Sehova.
Te ʼu Koloa Fakalaumalie
w12 15/2 24-25
Ko Natane Neʼe Ko He Tagata Puipui ʼo Te Tauhi Maʼa
ʼI tana agatonu ki te tauhi kia Sehova, neʼe lagolago fiafia ia Natane ki te fakatuʼutuʼu ʼa Tavite, ke ina laga te ʼuluaki malumaluga ʼo te tauhi ma’a. Kae, ʼi te aluʼaga leva ʼaeni, ʼe mole palalau ia Natane ʼi te huafa ʼo Sehova, kae ina fakaha tana manatu. ʼI te po ʼaia, neʼe kole age e te ʼAtua ki te polofeta ke ina fakaha ki te hau, he manatu ʼe mole tatau: ʼE mole anai ko ia, kae ko hona foha ʼae ka ina laga anai te fale lotu. ʼE toe fakaha e Natane kia Tavite ʼe fai anai e te ʼAtua ia he fuakava mo ia ʼuhi ‘ke fakatuʼu anai tona hekaʼaga fakahau ke malohi ʼo talu ai.’—2 Sam. 7:4-16.
Neʼe mole alu tahi te manatu ʼa Natane ki te fale lotu mo ʼae, ʼo te finegalo ʼo te ʼAtua. Neʼe mole feagai kae neʼe fetogi tana manatu ʼo lagolago ki te fakatuʼutuʼu ʼa te ʼAtua. Koʼena te faʼifaʼitaki lelei, moka fakatonutonuʼi kita e te ʼAtua. Ki muli age neʼe iloga ʼaki te ʼu gaue ʼa Natane, neʼe kei tapuakina e te ʼAtua. ʼE mahino, neʼe fakaʼaogaʼi ia ia e Sehova, ʼo feia mo Kate, te tagata fai puleʼaki, ke nā tokoni kia Tavite ki te fakatuʼutuʼu ʼo te toko 4 000 kau hiva mo maholo ʼae ka tauhi ʼi te fale lotu—1 Klk. 23:1-5; 2 Klk. 29:25.
VAHAʼA ʼO TE ʼAHO 5-11 ʼO SUNIO
TE ʼU KOLOA ʼO TE TOHI-TAPU | 2 KOLONIKO 30-31
“ ʼE Lelei Ke Tou Fakatahitahi”
pb Ko Esekiasi
Esekiasi
Tana Fakamalotoloto Ki Te Tauhi Moʼoni. Neʼe fakaha e Esekiasi tana fakamalotoloto ki te tauhi ʼa Sehova ʼi te temi pe ʼae neʼe hau ai ʼi tona taʼu 25. Ko tana ʼuluaki gaue ʼae neʼe ina fai neʼe ko te toe avahi ʼo te fale lotu pea mo ina toe gaohi fakaleleiʼi. Pea, ina pauʼi te ʼu pelepitelo pea mo te kau Levite, pea ina ui age kia natou: “ ʼE au loto ke au fakatuʼutuʼu he fuakava mo te ʼAtua ʼo Iselaele.” Ko te fuakava ʼaia ʼo te faitotonu, ohage ko te fuakava ʼo te Lao, ʼae ʼe kei fakaʼaoga kae ʼe meʼa noaʼi, ʼe hage kua toe fakafoʼou ʼi Suta. ʼAki te lotomalohi neʼe ina toe fakatokatoka te gaue ʼa te kau Levite, pea mo ina toe fai mo te ʼu fakatuʼutuʼu ʼo ʼuhiga mo te ʼu meʼa fai maholo pea mo te ʼu hiva fakavikiviki. Neʼe ko te mahina ʼo Nisani, ʼae ʼe fakamanatu ai te Pasikate, kae neʼe heʼe maʼa te fale lotu pea mo te ʼu pelepitelo pea mo te kau Levite. ʼI te ʼaho 16 ʼo Nisani, neʼe fakamaʼa te fale lotu pea mo toe ʼai ki ai tona ʼu ipu. Pea neʼe ko he ʼaho makehe moʼo fai ʼo he ʼu Faifakalelei maʼa te hahaʼi katoa ʼo Iselaele. ʼUluaki, neʼe ʼaumai e te ʼu tama ʼaliki te ʼu sakilifisio, ʼo natou molaga ʼo ʼuhiga mo te ʼu agahala ʼo te puleʼaga, ʼo te sagatualio, pea mo te hahaʼi, ʼo hoa mai ki ai mo te ʼu molaga ʼe lauʼi afe ʼe fai e te hahaʼi.—2Kk 29:1-36.
pb-Esekiasi
Esekiasi
ʼUhi ko te heʼe maʼa ʼa te hahaʼi neʼe mole feala tanatou kau ki te Pasikate ʼi tona temi tonu, neʼe fakahoko e Esekiasi te Lao ʼo ina fakagafua ai kia natou ʼae neʼe heʼe maʼa ke natou fakamanatu te Pasikate ʼi he mahina ki ʼamuli. Neʼe mole gata pe te faʼahi ʼaia ʼi Suta kae neʼe toe kau ai mo Iselaele ʼi tana fakamomoli te ʼu tohi neʼe ʼave e te ʼu tagata lele ʼi te fenua mai Pele-sepa ki Tane. Neʼe tokolahi ia natou ʼae neʼe natou vaʼi te ʼu tagata lele ʼaia; kae ko ʼihi hahaʼi, tafito ʼi Asele, mo Manase, pea mo Sepulone, neʼe natou agavaivai ʼo ʼomai ki Selusalemi, pea ko ʼihi neʼe ʼomai mai Efalaimi pea mo Isakale. Tahi ʼae meʼa, neʼe tokolahi te hahaʼi tauhi kia Sehova neʼe mole Iselaele neʼe kau ai. Neʼe lagi faigataʼa kia natou ʼaia ʼo te puleʼaga ʼo te potu tokelau tanatou fakatuʼutuʼu ke natou kau ki te tauhi moʼoni. Ohage pe ko te ʼu tagata lele, neʼe natou tautau felaveʼi mo te fakafeagai pea mo vaʼi ia natou, ʼuhi ko te puleʼaga ʼo te ʼu telepi e hogofulu neʼe kua fakaʼofaʼofa, kua taʼomia ia e te tauhi hala pea mo gaohi koviʼi e te kau Asilia.—2Kk 30:1-20; Num 9:10-13.
pb-Ko Esekiasi
Esekiasi
ʼI te ʼosi ʼo te Pasikate, neʼe fai te lafeti ʼo te ʼu Keke ʼe mole hona meʼa fakatupu lolotoga ʼaho ʼe fitu, ʼaki te lahi ʼo te fiafia ʼo te kokelekasio katoa neʼe natou fakatuʼutuʼu ai ke toe hoko atu te lafeti ʼaia ia ʼaho ʼe fitu. Maʼia pe la te ʼu temi faigataʼaʼia ʼaia neʼe natou maʼu ai te tapuakina ʼa Sehova koia la ʼae “neʼe ʼi ai te fiafia lahi ʼi Selusalemi, he ʼe talu mai te ʼu ʼaho ʼo Salomone te foha ʼo Tavite te hau ʼo Iselaele neʼe mole heʼeki hoko he meʼa feia ʼi Selusalemi.”—2Kk 30:21-27.
Ko te toe fakafoʼou ʼaia pea mo te toe fakatuʼu ʼo te tauhi moʼoni neʼe mole ko he fakatahi fakatemi pe ia, ʼuhi ko te ʼu meʼa ʼae neʼe hoa atu ki ai. ʼI muʼa ʼo tanatou liliu ki tonatou ʼu ʼapi neʼe natou maumauʼi te ʼu pou taputapu, mo te ʼu potu maʼoluga pea mo te ʼu ʼaletale, pea mo natou tuʼusi te ʼu pou taputapu ʼi Suta pea mo Pesamino ʼo feia aipe mo Efalaimi pea mo Manase. (2 Kk 31:1) Neʼe tuku e Esekiasi te faʼifaʼitaki ʼi tana maumauʼi te gata kapa ʼae neʼe fai e Moisese, koteʼuhi neʼe kua liliu ko te tamapua ʼa te hahaʼi, ʼo natou fai sakilifisio ki ai. (2 Ha 18:4) ʼI te ʼosi ʼo te lafeti lahi ʼaia neʼe tokaga ia Esekiasi ke hoko atu te tauhi moʼoni, ʼaki tana fakatokatoka te ʼu kalasi ʼo te ʼu pelepitelo pea mo tokaga ke feʼauga te ʼu meʼa ʼofa ke lagolago ki te ʼu gaue ʼo te fale lotu; ʼo ina faigaʼi ke natou mulimuli ki te Lao ohage ko te foaki ʼo te time pea mo te ʼu ʼuluaki fua ki te kau Levite pea mo te ʼu pelepitelo, pea neʼe lotolelei ki ai te hahaʼi.—2Kk 31:2-12.
Te ʼu Koloa Fakalaumalie
“Kapau ʼe Kotou Iloʼi Te ʼu Faʼahi ʼAia, ʼe Kotou Fiafia Mo Kapau ʼe Kotou Fai”
14 Ko te tahi faʼahiga fakaha ʼo tatatou agavaivai, ʼe ko tatatou fagono lelei ki ʼihi. ʼE ui mai ia Sakopo 1:19, ke tou “lotolelei ʼo fagono.” Ko Sehova ʼae ʼe lelei tukupau ia tana fagono. (Sen 18:32; Sos 10:14) Ohage la, tou lau ia te faipalalau ʼae ʼe tou maʼu ia Ekesote 32:11-14. (Lau.) Logo la neʼe mole ʼaoga ke fakaha e Moisese kia Sehova tana manatu ʼo ʼuhiga mo te aluʼaga ʼae neʼe hoko, kae neʼe tuku aipe e Sehova ke ina fai te faʼahi ʼaia. ʼE tou fagono anai koa ʼaki he kataki fualoa ki he tahi neʼe faihala ki muʼa atu pea mo tou mulimuli anai ki tana manatu? Ko Sehova, ʼe fagono ʼaki he kataki fualoa ki te hahaʼi fuli ʼae ʼe faikole age kia te ia ʼaki te tui.
15 Tou fai te ʼu fehuʼi ʼaeni: ‘Kapau ʼe agavaivai ʼaupito ia Sehova ʼo fagono ki te hahaʼi ohage ko tana fai kia Apalahamo, Lasele, Moisese, Sosue, Manoa, Elia pea mo Esekiasi, ʼe mole tonu koa la ke au faʼifaʼitakiʼi ia ia? ʼE feala koa ke toe lahi age taku fakamaʼuhigaʼi ʼoku tehina fuli, ʼo au fagono ki ʼanatou manatu pea mo mulimuli ki ai moka ʼe feala? ʼE ʼi ai koa he tahi ʼi toku kokelekasio peʼe ko toku famili ʼe ʼaoga ke au tokaga ki ai ʼi te temi nei? Kotea ʼae ka au fai anai maʼa ia?’—Sen 30:6; Tfm 13:9; 1Ha 17:22; 2Kk. 30:20.
VAHAʼA ʼO TE ʼAHO 12-18 ʼO SUNIO
TE ʼU KOLOA ʼO TE TOHI-TAPU | 2 KOLONIKO 32-33
“Kotou Fakalotomalohi ʼOkotou Tehina ʼi Te ʼu Temi Faigataʼa”
it-1 212 ¶6
Asilia
Senakelipe. Neʼe ʼohofi te pule’aga ʼo Suta e Senakelipe, foha ʼo Sargon 2, ʼi te 14 ta’u ʼo te temi hau ʼo Esekiasi (732 I.M.T.S.) (2Ha 18:13; Esa 36:1) ʼo tupu ko te fakafeagai ʼa Akase tana tamai, ki te puleʼi fakamalohi ʼo Suta e te kau Asilia. (2Ha 18:7) Neʼe ʼoho ai ia Senakelipe ki Suta, ʼo ina nofo’i kolo ʼe 46 (vakaʼi ia Esa 36:1, 2.) Neʼe fakaheka leva e Senakelipe, mai Lakisi tona nofo’aga tau, ia he tukuhau ki Suta, ko taleta aulo ʼe 30 (env. 11 560 000 $) mo taleta pa’aga ʼe 300 (env. 1 982 000 $) (2Ha 18:14-16; 2Kk 32:1; Vakaʼi mo Esa 8:5-8.) Logo la te kua totogi ʼo te tuʼa, kae neʼe toe fekau’i e Senakelipe he tagata fekau, ke alu ʼo fakamaʼua, ke fakamaʼu lalo ia te foʼi tau ʼa Selusalemi. (2Ha 18:17–19:34; 2Kk 32:2-20) Koia, ʼi te po pe ʼe tahi, neʼe tamateʼi leva e Sehova ia te tagata tau ʼe toko teau valu hogofulu ma nima afe, ʼo holomuli ai te tagata Asilia fiatuʼu, mo liliu ki Ninive (2Ha 19:35, 36), ʼo mate ʼi tona fakapogi e ʼona foha ʼe toko lua. Neʼe fetogi ʼi te tuʼulaga hau e Esale-atone, tona tahi foha. (2Ha 19:37; 2Kk 32:21, 22; Esa 37:36-38) Ko te fakamatala ʼo te ʼu alu’aga ʼaeni, gata ki te fakaʼauha ʼo te fo’i tau Asilia, ʼe ta ʼi te maka ʼo Senakelipe mo ʼae ʼo Esale-atone.—ILLUSTRATION et PHOTO, Vol. 1, p. 957.
Ko Ai Te ʼu Tauhi Ovi ʼe Toko Fitu Mo Te ʼu Pule ʼe Toko Valu Ia ʼAho Nei?
12 ʼE lotolelei tuʼumaʼu ia Sehova ke ina fai te ʼu faʼahi ʼae kia tatou ʼe mole tou lavaʼi. Kae ʼe ina fakamaʼua mai ke tou fai ia meʼa fuli ʼe tou lavaʼi. ʼE ui ʼi te Tohi-Tapu ko Esekiasi neʼe kumi tokoni ki “tana kau pule pea mo tana kau tagata toa,” pea neʼe ina fakatotonu “ke tapunui te u vai ae nee tutuu i te tua kolo. . . . Nee loto malohi leva ia Esekiasi; nee ina toe fau leva te kaupa ae nee maumau, pea nee ina toe hiki ake leva ia ia ke maoluga o kaku ki te tule leo, nee ina toe fai leva mo te tahi age kaupa ki tua, . . . pea nee ina teuteui leva ni mahafu mo ni paletau o lahi osi.” (2 Klk. 32:3-5) Lolotoga te temi ʼaia, neʼe fakaʼaogaʼi e Sehova ia Esekiasi mo ʼana tama ʼaliki pea mo te kau polofeta agatonu, moʼo puipui pea mo taupau Tana hahaʼi.
Ko Ai Te ʼu Tauhi Ovi ʼe Toko Fitu Mo Te ʼu Pule ʼe Toko Valu Ia ʼAho Nei?
13 ʼOsi ʼaia, pea neʼe fai e Esekiasi ia te faʼahi ʼe maʼuhiga age ʼi te puipui ʼo te ʼu vai peʼe ko te fakamalohi ʼo te ʼu kaupa ʼo te kolo. Neʼe ko he tagata tauhi ovi lelei ia ia, koia ʼae neʼe ina fakatahiʼi ai te hahaʼi pea mo ina fakalotomalohiʼi natou ʼaki te ʼu palalau ʼaeni: “Aua pe naa kotou tuania he mea pea aua pe naa kotou matataku ki te hau o Asilia mo tana solia kaugamalie ae e nofo mo ia; koteuhi e lahi age te malohi ia tatou i ae ia natou. E nofo mo ia he nima kakano, kae e nofo mo tatou [ia Sehova], totatou Atua, ae e tokoni mai anai kia tatou pea e tau anai [maʼa] tatou.” Neʼe fakamanatuʼi e Esekiasi ki te hahaʼi, ʼe ko Sehova ʼae ka tau anai maʼa natou. Neʼe tokoni ai kia natou ke natou tui ki te ʼAtua pea mo lotomalohi. Pea neʼe fakaha ai e Esekiasi mo ʼana tama ʼaliki pea mo ʼana tagata toʼa, ʼo toe feia mo te ʼu polofeta ko Mikea pea mo Esaia, ko natou neʼe ko he ʼu tagata tauhi ovi lelei ohage pe ko tona fakapapau e Sehova ʼaki tana polofeta.—2 Klk. 32:7, 8; lau ia Mikea 5:5, 6.
Te ʼu Koloa Fakalaumalie
Kotea Ia Te Fakahemala Moʼoni?
11 Koia, neʼe tali ai e Sehova ki te ʼu faikole ʼa Manase. ʼI tana fakalogo ki ʼana faikole, neʼe ina tokagaʼi kua fetogi. ʼI te malave kia ia ʼana kolekole, neʼe ina fakatotonu ke ina toe liufaki age tona tuʼulaga hau. Neʼe fai ai e Manase ia meʼa fuli moʼo fakaha ia tana fakahemala moʼoni. Neʼe ina fai ia te meʼa ʼae neʼe mole fai e Akapo. Neʼe fetogi tana aga pea neʼe ina tauʼi fakamalotoloto ia te tauhi hala. Neʼe ina toe fakalotomalohiʼi te hahaʼi ke natou toe fakahoko ia te tauhi moʼoni. (Lau ia 2 Koloniko 33:15, 16.) Neʼe lagi ʼaoga ki ai te lototoʼa mo te tui, koteʼuhi neʼe ko he fakaneke kovi ki tona famili, mo te kau ʼaliki pea mo tana hahaʼi lolotoga he ʼu taʼu ʼe hogofulu tupu. Kae ʼi te ʼu taʼu fakaʼosi ʼo tona maʼuli, neʼe faiga ke ina fakatokatoka te ʼu meʼa kovi ʼae neʼe ina fai. Koia neʼe liliu ai ko he faʼifaʼitaki lelei ki tona mokopuna ko Sosiasi, ʼae neʼe liliu ki muli age ko he hau lelei.—2 Hau 22:1, 2.
12 Kotea te ako mai te faʼifaʼitaki ʼa Manase? Neʼe fakataulalo ia Manase ʼo mole gata ai. Neʼe faikole kia Sehova ʼo kole ki ai tona manavaʼofa. Pea neʼe fetogi tana aga. Neʼe ina fai ia meʼa fuli ke ina fakatokatoka ia te ʼu meʼa kovi ʼae neʼe ina fai. Neʼe faiga ke tauhi kia Sehova pea mo fakalotomalohiʼi ʼihi ke natou fai feia. Ko te aluʼaga ʼae neʼe hoko kia ia, ʼe ko he fakalotomalohi kia natou ʼae neʼe natou fai ni agahala mamafa. ʼE ha mai ʼi tona hisitolia, ko Sehova ʼe ko he ʼAtua ‘ ʼe agalelei pea mo fakamolemole.ʼ (Pes. 86:5) ʼE feala ke fakamolemole mai ia Sehova mo kapau ʼe tou fakahemala moʼoni.
VAHAʼA ʼO TE ʼAHO 19-25 ʼO SUNIO
TE ʼU KOLOA ʼO TE TOHI-TAPU | 2 KOLONIKO 34-36
“ ʼE Kotou Maʼu Katoa Koa Te ʼu Lelei ʼo Te Folafola ʼa Te ʼAtua?”
pb Ko Ulita
Ulita
ʼI te logo ʼa Sosiasi ki te lau ʼo te “tohi ʼo te lao” ʼae neʼe maʼu e te pelepitelo lahi ko Ilekisa ʼi te lolotoga ʼo te toe laga ʼo te fale lotu, neʼe ina fekauʼi tana kau fakafofoga ke natou fakafehuʼi ia Sehova. Neʼe natou olo ai kia Ulita ʼae neʼe ina tala age kia natou te ʼu folafola ʼa Sehova, ʼo ina fakaha age ʼe hoko moʼoni anai ki te fenua aposita te ʼu malaʼia fuli ʼae neʼe tuʼu ʼi te “tohi,” ʼuhi ko tanatou talagataʼa. Neʼe toe ui age foki e Ulita, ko Sosiasi ʼe mole tau anai mo ia te tautea ʼaia koteʼuhi neʼe agavaivai ia muʼa ʼo Sehova, pea ʼe toe fakatahi anai ia mo tana ʼu kui pea mo ʼave anai ki tona faitoka ʼi te fimalie.—2Ha 22:8-20; 2Kk 34:14-28.
Tou Faʼafai Maʼa Te Fale ʼo Sehova!
20 ʼI te temi gaue ʼae neʼe fakatuʼutuʼu e te Hau ko Sosiasi, ko te Pelepitelo Lahi ko Ilikia neʼe ina “maʼu ia te tohi ʼo te lao ʼa Sehova ʼae neʼe tohi e Moisese.” Neʼe ina ʼavage te tohi ʼaia kia Safane, te sikalaipe ʼo te hau, ʼae ki muli age, neʼe ina kamata lau kia Sosiasi. (Lau ia 2 Fakamatala 34:14-18.) Neʼe kotea ʼae neʼe hoko ai? ʼI te lotomamahi ʼae ʼa te hau, neʼe ina hae atu aipe tona ʼu kofu pea neʼe ina fakatotonu ki te ʼu tagata ke natou olo ʼo fakafehuʼi ia Sehova. ʼAki te polofeta ko Ulita, neʼe foaki e te ʼAtua ia te logo ʼe ina tauteaʼi ai ʼihi aga fakalotu neʼe fai ʼi Suta. Kae neʼe tokagaʼi te ʼu fakatuʼutuʼu lelei ʼae neʼe fai e Sosiasi moʼo molehi ia te ʼu aga ʼo te tauhi taula ʼatua, pea neʼe ʼofainaʼi ia ia e Sehova logo la te ʼu malaʼia ʼae neʼe fakakikite ka hoko anai ki te puleʼaga katoa. (2 Fkma. 34:19-28) Kotea ʼae ʼe feala ke tou ako mai te faʼahi ʼaia? ʼE lagi hage totatou loto ko Sosiasi. ʼE tou foimo tali anai te takitaki ʼa Sehova, ʼo tou mulimuli ki te fakatokaga ʼo ʼuhiga mo te ʼu meʼa ʼae ʼe lava hoko mo kapau ʼe tou tuku ke taʼofi e te apositasia pea mo te aga heʼe faitotonu ia tatatou tauhi ʼae ki te ʼAtua. Pea ʼe feala ke tou falala ʼe tokagaʼi anai e Sehova tatatou faʼafai maʼa te tauhi maʼa, ohage ko tana fai mo Sosiasi.
Te ʼu Koloa Fakalaumalie
ʼE Tou Tokagaʼi Anai Koa Te ʼu Meʼa ʼAe Neʼe Tohi?
15 Kotea leva te ako ʼe tou taʼofi mai te faʼifaʼitaki ʼo Sosiasi? Logo la neʼe ko he hau agalelei, kae neʼe ina fai he lakahala neʼe feala ke mate ai. (Lau ia 2 Koloniko 35:20-22.) Kotea ʼae neʼe hoko? Neʼe alu ia Sosiasi ʼo tauʼi ia Neko, te hau ʼo Esipito, logo la neʼe mole ʼi ai he tupuʼaga ʼo tana fai te faʼahi ʼaia. Neʼe ui age e Neko kia Sosiasi ʼe mole fia tau mo ia. ʼE ui ʼi te Tohi-Tapu ko te ʼu palalau ʼa Neko “nee hau mai te Atua.” Kae, neʼe alu pe ia Sosiasi ki te tau pea neʼe matehi ai ia ia. He koʼe neʼe laga tau kia Neko? ʼE mole fakaha mai ʼi te Tohi-Tapu te faʼahi ʼaia.
16 Neʼe tonu muʼa kia Sosiasi ke ina kumi ke ina iloʼi pe ko te ʼu palalau ʼae neʼe fai e Neko, neʼe haʼu moʼoni mai ia Sehova. ʼO feafeaʼi? Neʼe feala pe ke ina kole kia Selemia, te polofeta ʼa Sehova. (2 Klk. 35:23, 25) Pea tahi, neʼe tonu ke vakaʼi e Sosiasi te ʼu aluʼaga ʼae neʼe hoko. Neʼe alu ia Neko ki Kalekemisi ʼo tauʼi te tahi puleʼaga kae mole ko Selusalemi. Pea neʼe mole faiga ia Neko ke laukovi kia Sehova peʼe ko tana hahaʼi. ʼEi, neʼe mole fakakaukauʼi lelei e Sosiasi te ʼu aluʼaga ʼaia neʼe hoko ʼi muʼa ʼo hana toʼo he tonu. Kotea te ako maʼa tatou? Ka ke tau mo he fihifihia ʼe ʼaoga ai ke ke toʼo he tonu, ʼe ʼaoga muʼa ke ke mahino ki te meʼa ʼae ʼe loto e Sehova ke ke fai.
17 Ka ke toʼo he tonu, ʼe tonu muʼa ke ke kumi te ʼu pelesepeto ʼo te Tohi-Tapu ʼae ʼe feala ke tokoni atu pea ʼe feafeaʼi hau haga ʼo maʼuliʼi. ʼI ʼihi aluʼaga, ʼe ke fia fai anai he tahi age ʼu fekumi ʼi ʼatatou tohi. Peʼe ke kole tokoni anai ki he tagata ʼafeā. ʼE feala ke tokoni atu anai ke ke fakakaukauʼi he tahi age ʼu pelesepeto Fakatohi-tapu. Fakakaukauʼi age muʼa te aluʼaga ʼaeni: Ko he tuagaʼane ko tona ʼohoana ʼe mole tauhi kia Sehova. ʼE fakatuʼutuʼu ke alu ʼo faifakamafola ʼi he tahi age ʼaho. (Gaue 4:20) Kae ʼi te ʼaho ʼaia, ʼe mole loto e tona ʼohoana ke alu ʼo faifakamafola. ʼE ina ui age ʼe tahitahiga te temi ʼe nā fakatahi ai pea ʼe ina fia ʼave muʼa ia ia ki he koga meʼa. Koia, ʼe fakakaukauʼi e te tuagaʼane te ʼu vaega Fakatohi-tapu ʼae ʼe tokoni anai ki ai ke ina toʼo he tonu fakapotopoto. ʼE ina iloʼi ʼe tonu ke fakalogo ki te ʼAtua pea mo te fakatotonu ʼae neʼe foaki mai e Sesu ke tou fai ni tisipulo. (Mat. 28:19, 20; Gaue 5:29) Kae, ʼe ina toe manatuʼi foki ʼe tonu ki te fafine ke fakalogo ki tona ʼohoana. Pea ʼe tonu ki te ʼu kaugana ʼa te ʼAtua ke natou fakapotopoto. (Efe. 5:22-24; Flp. 4:5) ʼE faiga koa tona ʼohoana ke tuku tana alu ʼo faifakamafola? Peʼe loto pe ia ke nā fakatahi muʼa mo tona ʼohoana ʼi te ʼaho ʼaia? ʼI totatou ʼuhiga kaugana ʼa Sehova, ʼe tou fia toʼo anai he ʼu tonu ʼe fakapotopoto pea ʼe fakafiafiaʼi ai tona loto.
VAHAʼA ʼO TE ʼAHO 26 ʼO SUNIO–2 ʼO SULIO
TE ʼU KOLOA ʼO TE TOHI-TAPU | ESETALASI 1-3
“Kotou Tuku Ke Fakaʼaogaʼi Koutou e Sehova”
ʼE Kotou Sisio Koa Ki Te Meʼa ʼAe Neʼe Sio Ki Ai Ia Sakalia?
NEʼE fiafia moʼoni ia te kau Sutea. Neʼe ‘fafagu e Sehova ʼAtua ia te laumalie ʼo Siliusi, Hau ʼo Pelesia’ ke ina fakaʼateainaʼi te kau Iselaele, ʼae neʼe kua fualoa tanatou ʼaunofo ʼi Papiloni. Neʼe fakaha e te hau ki te kau Sutea ke natou toe liliu ki tonatou fenua pea ke natou toe ‘fakatuʼu te fale ʼo Sehova, te ʼAtua ʼo Iselaele.’ (Eset. 1:1, 3) ʼI fakatotonu fakafiafia leva. Ko tona fakaʼuhiga ʼe toe fakatuʼu anai ia te tauhi ki te ʼAtua moʼoni ʼi te fenua ʼae neʼe ina foaki ki tana hahaʼi.
ʼE Haofaki Koe e Te ʼu Saliote Pea Mo Te Kolona Fakahau
2 Neʼe iloʼi e Sakalia ko te kau Sutea ʼae neʼe toe liliu ki Selusalemi, neʼe ko he kau atolasio ʼa Sehova. Neʼe ko natou ʼae “nee fafagu onatou loto e te Atua [moʼoni],” ke natou mavae ʼi ʼonatou ʼapi mo ʼanatou matani gaue ʼi Papiloni. (Esetalasi 1:2, 3, 5) Neʼe natou mavae ʼi he koga meʼa neʼe kua natou iloʼi lelei ki he fenua neʼe heʼeki sisio ki ai te tokolahi ia natou. Pea neʼe maʼuhiga ʼaupito ki te kau Sutea ʼaia ia te toe laga ʼo te fale lotu ʼo Sehova. Koia ʼae neʼe natou tali ai ke natou faifagona ʼi he ala neʼe fakatupu tuʼutamaki, he neʼe kilometa 1 600, pea neʼe tokakovi mo moʼugaʼia.
Te ʼu Koloa Fakalaumalie
Ko He ʼu Puani Maʼuhiga ʼi Te Tohi ʼa Esetalasi
1:3-6. Ohage ko ʼihi ʼo te kau Iselaele ʼae neʼe nonofo ʼi Papiloni, tokolahi te kau Fakamoʼoni ʼa Sehova ʼe mole natou lava kau ki te minisitelio temi katoa peʼe mole natou lava olo ʼo gaue ʼi te ʼu potu ʼae ʼe ʼaoga lahi ai he kau faifakamafola. Kae ʼe natou lagolago aipe pea mo fakalotomalohi ia natou ʼae ʼe natou lavaʼi te koga ʼaia, pea ʼe natou foaki te ʼu meʼa ʼofa ʼe lagolago ki te gaue faifakamafola ʼo te Puleʼaga pea mo te gaue ʼae ko te fai ʼo ni tisipulo.