ʼE Manatuʼi Feafeaʼi Anai Koutou e Sehova?

“MANATUʼI ʼau, Ê toku ʼAtua.” ʼI te ʼu faikole ʼa Nehemia, neʼe lahi tana fakaʼaogaʼi te ʼu kupu ʼaia. (Nehemia 5⁠:19; 13⁠:​14, 31) ʼI te agamāhani, ka felāveʼi te hahaʼi mo he ʼu faigataʼaʼia, pea ʼe nātou kole mamahi feiā ki te ʼAtua.

Kae koteā ʼaē ʼe loto kiai te hahaʼi mokā nātou kole ki te ʼAtua ke ina manatuʼi nātou? ʼE mahino ia ʼe mole nātou loto pe ke manatuʼi e te ʼAtua tonatou higoa. Kae ʼe nātou fakaʼamu ohage ko te tagata fai fakapō ʼaē neʼe matehi ia tafa ʼo Sesu. Ko te tagata ʼaia, neʼe ina kole mamahi fēnei kia Sesu: “Manatui au moka ke haeleʼage ki tou Puleaga.” Neʼe mole ina loto ia ke manatuʼi pe e Sesu pe neʼe ko ai ia ia, kae neʼe ina loto foki ke fai e Sesu he meʼa maʼana​—ei ke ina fakatuʼuake.​—Luka 23⁠:⁠42.

Koia, ʼe fakahā mai e te Tohi-Tapu, ka “manatuʼi” e te ʼAtua he tahi, pea ko tona faka ʼuhiga ʼe ina fai anai he meʼa lelei. Ohage la, ʼi te kua lōfia ʼo te kele lolotoga ʼaho e 150, “neʼe manatuʼi e te ʼAtua ia Noe . . . , pea neʼe faka agi e te ʼAtua te matagi ʼi te fuga kele, pea neʼe kamata hifohifo ai te ʼu vai.” (Senesi 8⁠:⁠1) Hili kiai ni ʼu sēkulō, ko Samisoni ʼaē neʼe fakakiviʼi pea mo seiniʼi e te kau Filisitini, neʼe faikole fēnei: “Sehova, manatuʼi ʼau, fakalelei siʼi ʼou loto, ka ke foaki mai te mālohi, fakalelei siʼi ʼou loto, ʼi te lakaga pe ʼaenī e tahi.” Neʼe manatuʼi e Sehova ia Samisoni ʼo ina foaki kia ia te mālohi ʼaē ʼe fakalaka ʼi te mālohi ʼo te tagata, ʼo ina fakaʼauha ai te ʼu fili ʼo te ʼAtua. (Kau Fakamāu 16⁠:​28-30) Ohage ko Nehemia, neʼe tapuakinaʼi e Sehova tana ʼu faiga, pea neʼe toe fakatuʼu ai te tauhi moʼoni ʼi Selusalemi.

Neʼe tohi fēnei e te ʼapositolo ko Paulo: “Pea ko mea nee tohi i te temi mua, nee tohi o uhiga mo totatou akoʼi, ke tou mau te falala aki te kataki, mo te poupouki o te Tohi-tapu.” (Loma 15⁠:⁠4) Kapau ʼe tou manatuʼi ia Sehova ʼo tou haga fai tona finegalo, ohage ko tana ʼu kaugana ʼi te temi muʼa, pea ʼe tou lava falala ʼe manatuʼi anai tatou e Sehova pea ʼe tokoni mai anai ke tou maʼu te ʼu meʼa ʼaē ʼe ʼaoga kia tatou ʼi te ʼaho fuli, mo tokoni mai kia tatou ʼi te ʼu temi faigataʼa, pea mo hāofaki tatou ʼi te temi ʼaē ka ina fakahoko ai tana fakamāu ki te hahaʼi heʼe tui.​—Mateo 6⁠:33; 2 Petelo 2⁠:⁠9.

ʼE Koutou Loto Koa Ki He ʼAʼahi?

ʼI te mālama maveuveu ʼaenī, ʼe feala hakotou fiafia mo kapau ʼe koutou maʼu te ʼatamai mālama ʼaē ʼe foaki mai e te Tohi-Tapu ʼo ʼuhiga mo te ʼAtua, mo tona Puleʼaga, pea mo tana fakatuʼutuʼu fakaofoofo ʼaē neʼe ina fai ʼo ʼuhiga mo te malamanei. Kapau ʼe koutou fia ʼiloʼi he tahi ʼu meʼa ʼo ʼuhiga mo te faʼahi ʼaia, peʼe koutou loto ke fai hakotou ako Tohi-Tapu, koutou faitohi ki te Sosiete “Les Témoins de Jéhovah,” B.P. 1741, 98810 Mont Dore, Nouvelle-Calédonie, peʼe vakaʼi te lisi ʼaē ʼi te pasina 30.