ʼE Feala Koa Ke Koutou Falala Ki Te Tohi-Tapu?

KAPAU ʼe koutou hue te Tohi-Tapu, ʼe koutou ʼamanaki anai koa ʼe koutou maʼu he foʼi piesi? Koteā te ʼui ʼo ʼuhiga mo te foʼi piesi siliva ʼāfea ʼaenī?

E tokolahi ʼe nātou manatu ko te Tohi-Tapu ʼe ko he tohi ʼāfea ʼe talanoa ki he ʼu fakamatala faikehe pea mo te ʼu aga ke fai ʼe lelei. Kae, ʼe mole nātou tui ko te ʼu fakamatala ʼa te Tohi-Tapu ʼe ko he ʼu hisitolia moʼoni, ʼo mole nātou fakamoʼoni ai ko te Folafola ʼo te ʼAtua. Kae, ʼe ʼi ai te fakamoʼoni mālohi ki te moʼoni ʼaē ʼo te Tohi-Tapu. Ko te foʼi piesi ʼaenī (neʼe fakalahi) ʼe ko he faʼifaʼitakiʼaga lelei. Koteā te meʼa ʼe ʼui e te mataʼi tohi?

Ko te foʼi piesi neʼe fai ʼi Talesi, ko te kolo ʼi te faʼahi ʼo te potu toga-hahake ʼaē ʼi te temi nei ko te fenua ko Tulukia. Ko te foʼi piesi neʼe tā ʼi te lolotoga pule ʼo te kovana Pelesia ko Mazaeus ʼi te fā sēkulō ʼi muʼa ʼo totatou temi. ʼE fakahā e te foʼi piesi ko Mazaeus ko te pule ʼo te koga meʼa “ ʼi ʼoluʼaga atu ʼo te Liuʼa”, ʼaē ko te Liuʼa ʼo te Eufalate. Kae he koʼe koa ʼe maʼuhiga te talanoa ʼaia?

Koteʼuhi ʼe koutou maʼu anai te fakahā pe ʼaia ʼi takotou Tohi-Tapu. Ko Esitalasi 5:6–6:13 ʼe talanoa ki te tohi neʼe fai lolotoga ʼo te te temi hau Pelesia ko Taliusi pea mo te kovana ʼe higoa ko Tattenaï. Neʼe ko te fihifihia ʼo ʼuhiga mo te kau Sutea ʼaē neʼe nātou laga tonatou fale lotu ʼi Selusalemi. Ko Esitalasi neʼe ko te tagata faiva ʼi te hiki ʼo te Lao ʼa te ʼAtua, pea ʼe feala ke koutou falala ki te totonu ʼo te ʼu meʼa neʼe ina tohi. ʼE koutou lau anai ia Esitalasi 5:6 pea mo te kapite 6:13 neʼe talanoa ai kia Tattenaï “ko te kovana ʼi ʼoluga atu ʼo te Liuʼa”.

Neʼe faitohi ia Esitalasi ʼi te lagi taʼu 460 ʼi muʼa ʼo totatou temi, ko he ʼu taʼu e 100 ʼi muʼa ʼo te tuki ʼo te foʼi piesi ʼaenī. Neʼe ʼi ai te hahaʼi neʼe feala ke hage kia nātou ko te fakahā ʼaia ʼo ʼuhiga mo he tagata ʼāfea maʼu tuʼulaga ʼe ko he fakamatala noa ia. Kae kapau ʼe feala ke koutou falala ki te ʼu tagata faitohi ʼo te Tohi-Tapu tatau aipe ʼi te ʼu taʼi fakamatala veliveli ʼaia, ʼe mole koa la koutou toe falala aipe ki te tahi ʼu meʼa neʼe nātou tohi?

ʼI te ʼu ʼuluaki alatike e lua ʼo te numelo ʼaenī, ʼe koutou maʼu anai te tahi ʼu tupuʼaga ʼo te taʼi falala ʼaia.

ʼE Koutou Loto Koa Ki He ʼAʼahi?

ʼI te malamanei ʼaē ʼe maveuveu, ʼe feala hakotou fiafia ʼaki he ʼiloʼi lelei ʼo te Tohi-Tapu ʼo te ʼAtua, tona Puleʼaga, pea mo tana fakatuʼutuʼu neʼe ina fai ki te malamanei. Kapau ʼe koutou fia ʼiloʼi tona tahi ʼu naunau peʼe koutou loto ki he tahi moʼo taki he ako Tohi-Tapu mo koutou, faitohi ki te Sosiete “Les Témoins de Jéhovah”, B.P. 787, Nouméa, Niu-Kaletonia, peʼe vakaʼi te lisi ʼaē ʼi te pasina 2.