Neʼe punamaʼuli te ʼu fafine ʼi tanatou tau atu ki te fale maka, he neʼe hage ia kua tuʼu gaʼasi. Neʼe lele ai ia Malia Maketalena kia “Simone Petelo pea mo te tahi age tisipulo, ʼae neʼe ʼofa ai ia Sesu,” ia te apositolo ko Soane. (Soane 20:2) Kaʼe ko te ʼu fafine ʼae neʼe nonofo ʼi te fale maka, neʼe natou sisio ki he ʼaselo. Pea ʼi te loto fale maka, neʼe ʼi ai te tahi ʼaselo “neʼe ina tui tona kofu hina loa.”—Maleko 16:5.

Neʼe ui fenei e te tahi ʼi te ʼu ʼaselo kia natou: “ ʼAua naʼa kotou matataku. ʼE kotou kumi ia Sesu, te tagata Nasaleti, ʼae neʼe tutuki ki te pou. Kaʼe kua fakatuʼuake ia pea ʼe mole ʼi heni. Kotou sisio ki te faʼahi ʼae neʼe natou tuku ai. Kaʼe kotou olo ʼo fakaha fenei ki ʼana tisipulo pea mo Petelo: ‘ ʼE muʼamuʼa ia koutou ki Kalilea, pea ʼe kotou sisio anai kia te ia ʼi ai, ohage ko tana ui atu.’ ” (Maleko 16:6, 7) Ko te ʼu fafine ʼaia neʼe “natou tekelili pea mo punamaʼuli,” ʼo natou feleleʼi ai ʼo fakamatala ki te ʼu tisipulo.—Maleko 16:8.

Neʼe maʼu e Malia ia Petelo pea mo Soane. Neʼe kua hela pea neʼe ina ui fenei kia naua: “Neʼe natou toʼo ia te ʼAliki mai te fale maka pea ʼe mole matou iloʼi pe neʼe natou ʼave ia ia kifea.” (Soane 20:2) Neʼe feleleʼi ia Petelo pea mo Soane. Neʼe gaholo age ia Soane pea neʼe muʼa ia ki te fale maka. Neʼe fakasiosio ki loto pea neʼe sio ki te ʼu moʼi kie, kaʼe neʼe nofo pe ia ʼi tuʼa.

ʼI te tau mai ʼa Petelo, neʼe hu ia ki loto. Neʼe sio ki te ʼu moʼi kie lino pea mo te kie ʼae neʼe takatakai ʼaki te ʼulu ʼo Sesu. Neʼe hu ia Soane ki loto, pea neʼe tui leva ki te fakamatala ʼa Malia. Logo la te ʼu meʼa ʼae neʼe ui e Sesu ki muʼa atu, kaʼe neʼe mole nā mahino neʼe kua fakatuʼuake ia. (Mateo 16:21) Neʼe nā feʼekeʼaki pe kotea ʼae neʼe hoko pea neʼe nā toe liliu ai ki ʼonā ʼapi. Kaʼe ko Malia neʼe toe liliu ki te fale maka pea neʼe nofo ai.

ʼI te temi ʼaia, neʼe olo te tahi ʼu fafine ʼo fakaha ki te ʼu tisipulo kua fakatuʼuake ia Sesu. ʼI tanatou feleleʼi ʼaia, neʼe natou felaveʼi mo Sesu. Neʼe ui age e Sesu ke ʼaua naʼa natou matataku, kaʼe ke natou olo ʼo tala ki ʼana tisipulo ʼe tonu ke natou olo ki Kalilea ke natou felaveʼi ʼi ai mo ia.—Mateo 28:9, 10; Luka 24:8-10.

ʼI muʼa atu, ʼi te hoko ʼo te mafuike pea mo te ha ʼo te ʼu ʼaselo, ko te ʼu tagata solia ʼae neʼe ʼi te fale maka neʼe “natou tekelili pea neʼe mole kei natou gaūgaūe.” ʼI tanatou mole kei matataku, neʼe natou olo ki te kolo pea neʼe “natou fakamatala ki te kau pelepitelo pule te ʼu meʼa fuli ʼae neʼe hoko.” Neʼe talaga ai leva te kau pelepitelo mo te kau takitaki Sutea. Neʼe natou fai ai te tonu ʼae ke totogi te kau solia ke ʼaua naʼa natou fakaha te meʼa ʼae neʼe hoko kaʼe ke natou ui fenei: “Neʼe ʼomai ʼana tisipulo ʼi te poʼuli ʼo kaihaʼa tona sino kaʼe neʼe matou lolotoga momoe.”—Mateo 28:4, 11, 13.

Neʼe feala ke matehi te kau solia Loma ʼae neʼe tulemomoe lolotoga tonatou temi leʼo, koia neʼe fakapapau fenei age e te kau pelepitelo: “Kapau ʼe logo te kovana ki te faʼahi ʼaeni [tanatou loi ʼo ʼuhiga mo tanatou tulemomoe], ʼaua naʼa kotou tuʼania, ʼe matou fakamahino age anai kia ia.” (Mateo 28:14) Neʼe toʼo e te kau solia te paʼaga pea neʼe natou fai te ʼu meʼa ʼae neʼe ui age e te kau pelepitelo. Neʼe mafola ai ʼi te kau Sutea te loi ʼaia ʼo ʼuhiga mo te kaihaʼa ʼo te sino ʼo Sesu.

Neʼe kei tagi pe ia Malia Maketalena ʼi te fale maka. ʼI tana punou ifo ʼo fakasiosio ki te loto fale maka, neʼe sio ki te ʼu ʼaselo ʼe toko lua neʼe nā teu hina. Neʼe nā heheka ʼi te faʼahi ʼae neʼe tuku ai te sino ʼo Sesu, ko te tahi ʼi te ʼulu pea ko te tahi ʼi te ʼu vaʼe. Neʼe nā fehuʼi fenei age ki ai: “Fafine, he koʼe ʼe ke tagi?” Neʼe tali fenei e Malia: “Neʼe natou toʼo ia toku ʼAliki, pea ʼe mole au iloʼi pe neʼe natou ʼave ia ia kifea.” ʼI te maliu atu ʼa Malia, neʼe sio ki te tahi tagata. Neʼe toe fai age e te tagata te fehuʼi ʼa te ʼu ʼaselo pea mo hoko atu fenei: “Ko ai ʼae ʼe ke kumi?” Neʼe manatu ia ko te tagata faiʼoloto, koia, neʼe ina ui fenei ki ai: “Tagata, kapau neʼe ke ʼave ia ia, fakaha mai pe neʼe ke tuku ia ia kifea, pea ʼe au toʼo mai anai.”—Soane 20:13-15.

ʼI tona ʼuhiga moʼoni, neʼe faipalalau ia Malia mo Sesu ʼae kua fakatuʼuake, kaʼe neʼe mole ina iloʼi ia ia. Kaʼe ʼi tana ui “Malia!” neʼe ina iloʼi ai neʼe ko Sesu, ʼuhi ko tana faʼahiga palalau. Neʼe ui fakafiafia fenei e Malia: “Laponi!” (ko tona fakaʼuhiga “Faiako!”) Kaʼe ʼi tana tuʼania ʼae naʼa hake Sesu ki selo, neʼe tapiki ai Malia kia te ia. Koia, neʼe ui fenei e Sesu ki ai: “Tuku tau tapiki mai kia te au, koteʼuhi ʼe heʼeki au hake ki te Tamai. Kaʼe ke ke alu ki ʼoku tehina ʼo ke ui fenei kia natou: ‘ ʼE au hake ki taku Tamai pea ko takotou Tamai, pea ki toku ʼAtua pea ko tokotou ʼAtua.’ ”—Soane 20:16, 17.

Neʼe lele ia Malia ki te koga meʼa ʼae neʼe fakatahitahi ai te kau apositolo pea mo te tahi ʼu tisipulo. Neʼe ina ui fenei kia natou: “Neʼe au sio ki te ʼAliki!” Neʼe hilifaki tana fakamatala ki te fakamatala ʼae neʼe fai age e te tahi ʼu fafine. (Soane 20:18) Kaʼe “neʼe matafaikehe kia natou” te ʼu fakamatala ʼaia.—Luka 24:11.

Neʼe ko te ʼAhotapu, ʼaho 16 ʼo Nisani pea neʼe lotovaivai te kau tisipulo. Neʼe mole natou mahino pe koʼe neʼe tuʼu gaʼasi te fale maka. (Mateo 28:9, 10; Luka 24:11) Ki muli age, ʼi te ʼaho pe ʼaia, neʼe mavae ia Keleopasi mo te tahi tisipulo mai Selusalemi, ʼo nā olo ki Emausi, ʼae neʼe tuʼu ia kilometa ʼe teitei 11.

ʼI tanā faifagona, neʼe nā faipalalau ʼo ʼuhiga mo te ʼu meʼa ʼae neʼe hoko. Pea neʼe fakaovi age he tagata ʼo natou olo fakatahi. Neʼe ina fehuʼi fenei age kia naua: “Kotea ʼae neʼe kolua palalau ki ai ʼi takolua haʼele?” Neʼe tali fenei age e Keleopasi: “Ko koe koa ko he matapule ʼe nofo tokotahi ʼi Selusalemi? ʼE mole ke iloʼi koa koe te ʼu meʼa ʼae neʼe hoko ʼi ai ʼi te ʼu ʼaho ʼaeni?” Neʼe fehuʼi fenei age e te tagata: “Kotea te ʼu meʼa ʼaia?”—Luka 24:17-19.

Neʼe nā tali fenei age: “Ko te ʼu meʼa ʼo ʼuhiga mo Sesu, te tagata Nasaleti. Neʼe matou falala ʼe ko te tagata ʼaia ka ina haofaki ia Iselaele.”—Luka 24:19-21.

Pea neʼe fakamatala age leva e Keleopasi pea mo te tahi tisipulo te ʼu meʼa ʼae neʼe hoko ʼi te ʼaho pe ʼaia. Neʼe nā ui age neʼe olo ʼihi fafine ki te fale maka ʼae neʼe tuku ai te sino ʼo Sesu, kaʼe neʼe kua tuʼu gaʼasi pea neʼe ha age ki te ʼu fafine he ʼu ʼaselo neʼe nā ui age kua maʼuli ia Sesu. Neʼe nā fakamatala age neʼe toe olo mo ʼihi ki te fale maka pea “neʼe natou maʼu atu ohage pe ko tona fakamatala e te ʼu fafine.”—Luka 24:24.

Neʼe ha lelei neʼe mole mahino ia te ʼu tisipulo ʼaia ʼe toko lua ki te fakaʼuhiga ʼo te ʼu meʼa ʼae neʼe hoko. Koia, neʼe fakatonutonuʼi e te tagata tanā manatu hala ʼae neʼe tupu ai tanā mole tui kua fakatuʼuake ia Sesu. Neʼe ina ui fenei: “Hahaʼi vavale pea mo tuai ʼi te tui ki te ʼu meʼa fuli ʼae neʼe talanoa ki ai te kau polofeta! Neʼe mole tonu koa ke tau ia Kilisito mo te ʼu mamahi ʼaia pea ke hu ki tona kololia?” (Luka 24:25, 26) Pea neʼe ina fakamahino age kia naua he ʼu tuʼuga vaega ʼi te ʼu Tohi Taputapu ʼae neʼe talanoa ʼo ʼuhiga mo Kilisito.

Neʼe natou fakaovi atu leva ki Emausi. Neʼe fia logo ia te ʼu tisipulo ʼe toko lua ki he tahi age ʼu meʼa, koia neʼe nā kole mamahi fenei age ki te tagata: “Nofo mo maua koteʼuhi kua afiafi.” Neʼe ina tali pea neʼe natou kakai. Neʼe fai e te tagata he kole, mo tofi te pane pea ina ʼavage kia naua, pea neʼe nā iloʼi ai ia ia kaʼe neʼe puli leva ia. (Luka 24:29-31) Neʼe nā iloʼi papau ai kua maʼuli ia Sesu.

Neʼe fiafia ia te ʼu tisipulo ʼaia ʼe toko lua pea nā ui fenei ʼo ʼuhiga mo te meʼa neʼe hoko: “Neʼe mole vela koa la ʼotā loto ʼi tana palalau mai ʼi te ala pea mo tana fakamahino lelei mai te ʼu Tohi Taputapu?” (Luka 24:32) Neʼe nā toe liliu atu aipe ki Selusalemi, ʼo nā olo ki te kau apositolo pea mo ʼihi atu. ʼI muʼa ʼo te fakamatala e Keleopasi pea mo ia ʼae neʼe nā ʼomai ia te meʼa neʼe hoko, neʼe fakaha fenei age e ʼihi: “Kua fakatuʼuake moʼoni ia te ʼAliki, pea neʼe ha kia Simone!” (Luka 24:34) Pea neʼe nā fakamatala leva te ha age ʼa Sesu kia naua. ʼEi, neʼe nā toe sio mata mo naua kia Sesu.

Pea neʼe natou punamaʼuli fuli leva he neʼe ha ia Sesu kia natou ʼi te koga fale. Neʼe faigataʼa hanatou tui ki ai, he neʼe natou fakamaʼumaʼu te ʼu matapa ʼi tanatou matataku ʼi te kau Sutea. Kaʼe neʼe tuʼu ia Sesu ʼi te lotomalie ʼo natou. Neʼe ina ui fenei: “Ke ia koutou te tokalelei.” Kaʼe neʼe natou matataku. Ohage pe ko te meʼa ʼae neʼe hoko ki muʼa atu, “neʼe natou manatu ai ʼe ko he laumalie ʼae ʼe natou sisio ki ai.”—Luka 24:36, 37; Mateo 14:25-27.

Moʼo fakamoʼoni age kia natou neʼe mole natou sisio ki he laumalie kaʼe neʼe ko ia mo he sino fakakakano, neʼe fakaha age e Sesu ʼona nima mo ʼona vaʼe, pea neʼe ina ui fenei age: “He koʼe ʼe kotou hoha pea mo kotou lotolotolua? Kotou sisio ki ʼoku nima mo ʼoku vaʼe, ʼe ko au totonu. Kotou fa mai kia au pea mo sisio, koteʼuhi ʼe mole maʼu e he laumalie he kakano pea mo he ʼu hui ohage ko au ʼaeni ʼe kotou sisio mai ki ai.” (Luka 24:36-39) Neʼe natou fiafia pea mo punamaʼuli, kaʼe neʼe kei faigataʼa tanatou tui papau ʼe ko Sesu ʼae ʼe tuʼu ʼi ʼonatou muʼa.

ʼI tana fia tokoni age ke natou mahino neʼe ko ia moʼoni, neʼe ina kole fenei: “ ʼE ʼi ai koa he meʼa kai ʼi heni?” Neʼe natou foaki age he moʼi ika neʼe tunu pea neʼe ina kai. Neʼe ina ui fenei leva: “ ʼI taku kei nofo mo koutou [ʼi muʼa ʼo taku mate], neʼe au tala atu te ʼu folafola ʼaeni: ʼE tonu ke hoko te ʼu meʼa fuli ʼae neʼe tohi ʼo ʼuhiga mo au ʼi te Lao ʼa Moisese, mo te kau Polofeta pea mo te ʼu Pesalemo.”—Luka 24:41-44.

Ohage pe ko te tokoni ʼa Sesu kia Keleopasi pea mo te tahi tisipulo ke nā mahino ki te ʼu Tohi Taputapu, neʼe ina toe fai feia kia natou fuli ʼae neʼe fakatahitahi ʼi te koga fale. Neʼe ina ui fenei: “Koʼeni te ʼu folafola ʼae kua tohi: ʼE mamahi anai ia Kilisito pea ʼe fakatuʼuake anai mai te kau mate ʼi te tolu ʼaho. Pea, ʼo kamata mai Selusalemi, ʼe fakamafola anai ʼi tona huafa ia he logo ʼi te ʼu fenua fuli ke fakahemala te hahaʼi mai ʼanatou agahala pea ke fakamolemole kia natou. ʼE tonu ke kotou fakamoʼoni ki te ʼu faʼahi ʼaia.”—Luka 24:46-48.

Neʼe mole fakatahi ia te apositolo ko Tomasi mo natou, pea ʼe mole tou iloʼi tona tupuʼaga. ʼI te ʼu ʼaho ki muli age, neʼe fakaha fenei age kia ia e te ʼu tisipulo, ʼaki he lotofiafia: “Neʼe matou sisio ki te ʼAliki!” Kaʼe neʼe tali fenei age e Tomasi: “Kapau ʼe mole au sio ki te fakailoga ʼo te ʼu faʼo ʼi ʼona nima pea mo ʼai toku kauʼi tuhi ki te fakailoga ʼo te ʼu faʼo, mo toku nima ki tona faʼahi vakavaka, ʼe mole au tui anai ki ai.”—Soane 20:25.

Hili ki ai ʼaho ʼe valu, neʼe toe fakatahitahi te kau tisipulo ʼi te ʼapi, neʼe natou fakamaʼumaʼu te ʼu matapa pea neʼe fakatahi leva mo natou ia Tomasi. Neʼe ha ia Sesu ʼi te lotomalie ʼo natou ʼaki he sino fakakakano pea ina ui fenei: “Ke ia koutou te tokalelei.” Pea neʼe haga kia Tomasi ʼo ina ui fenei age: “ ʼAi tou kauʼi tuhi ki heni, pea sio ki ʼoku nima, pea ke ʼai tou nima ki toku faʼahi vakavaka, pea tuku tau lotolotolua, kaʼe ke ke tui.” Neʼe kalaga fenei ia Tomasi kia te ia: “Toku ʼAliki mo toku ʼAtua!” (Soane 20:26-28) ʼEi, neʼe tui papau leva ia Tomasi kua maʼuli ia Sesu pea kua liliu ko he ʼaselo malohi ʼe ina fakafofoga ia Sehova ʼAtua.

Neʼe ui fenei e Sesu ki ai: “ ʼE ke tui koa he ʼe kua ke sio kia au? Fiafia ia natou ʼae ʼe tui kaʼe neʼe heʼeki sisio.”—Soane 20:29.