ʼE ʼi Ai Koa Hokotou ʼAselo Tauhi?

ʼE mole akoʼi mai ʼi te Tohi-Tapu ʼe takitahi te tagata mo tona ʼaselo tauhi. ʼE moʼoni neʼe ui fenei e Sesu: “Kotou tokakaga naʼa kotou meʼa noaʼi he tahi ia natou liliki ʼaeni [te ʼu tisipulo ʼa Kilisito], he ʼe au tala atu kia koutou, ʼe sisio tuʼumaʼu ʼanatou ʼaselo ʼae ʼi selo ki te fofoga ʼo taku Tamai ʼae ʼe ʼi selo.” (Mateo 18:10) Kaʼe ʼe mole fakaʼuhiga leva ʼe takitahi pe te tagata mo tona ʼaselo tauhi. Neʼe fia ui mai e Sesu ko te kau ʼaselo ʼe tokakaga tafito ki ʼana tisipulo takitokotahi. Koia, ko te kau atolasio moʼoni ʼe mole natou fai anai ia he ʼu meʼa fakatupu tuʼutamaki ki tonatou maʼuli, ʼo natou manatu ʼe puipui anai natou e te ʼu ʼaselo ʼa te ʼAtua.

Ko tona fakaʼuhiga koa ʼe mole tokoni te kau ʼaselo ki te hahaʼi? Kailoa. (Pesalemo 91:11) Ko ʼihi e natou logoʼi ʼe ko te ʼAtua ʼae neʼe ina fekauʼi age he ʼaselo moʼo puipui pea mo takitaki natou. Pea ko te aluʼaga la ʼaia ʼae neʼe logoʼi e Kenneth neʼe tou talanoa ki ai ʼi te kamata. ʼE mole feala ke tou ui ʼe ko te ʼAtua tuʼumaʼu pe ʼae neʼe ina fakahoko ia he faʼahi feia. ʼE tautau hoko ki te kau Fakamoʼoni ʼa Sehova he ʼu aluʼaga neʼe tokoni age ai te kau ʼaselo kia natou ʼi te faifakamafola. Kaʼe ʼuhi ʼae ʼe mole feala hatatou sisio ki te kau ʼaselo, ʼe mole tou iloʼi papau ai pe ʼe fakaʼaogaʼi feafeaʼi e te ʼAtua ia te kau ʼaselo moʼo tokoni ki te hahaʼi ʼi te ʼu aluʼaga kehekehe. Kaʼe ʼe mole kovi anai mo kapau ʼe tou fakamalo ki te ʼAtua Mafimafi ki he tokoni neʼe lagi ina foaki mai.—Kolose 3:15; Sakopo 1:17, 18.