KAPITE 10

ʼE Fua Lelei Feafeaʼi Kia Koe Te ʼu Fono?

Pepa

Neʼe kua ke kau koa ki he fono ʼa te kau Fakamoʼoni ʼa Sehova? Kapau heʼeki ke alu, ʼe lagi ke tuʼania ʼi tau iloʼi ʼae ko tau hoki kau ʼaia ki ai. ʼE lagi ke feuiʼaki fenei: ‘Kotea ʼae ʼe fai ʼi te ʼu fono? He koʼe ʼe maʼuhiga? He koʼe ʼe tonu ke au kau ki ai?’ Ka ke fakatahi mo ʼihi ʼe malohi anai ʼau felogoi mo te ʼAtua pea ʼe toe tokoni atu ki tou maʼuli. Pea ko te aluʼaga ka tou vakaʼi ʼi te kapite ʼaeni.

1. He koʼe ʼe fakatahitahi te kau Fakamoʼoni ʼa Sehova?

Neʼe fakaha e he tagata faitohi-tapu tona tupuʼaga tafito, ʼo ina ui fenei: “ʼI te fakatahi lahi, ʼe au fakavikiviki anai kia Sehova.” (Pesalemo 26:12) ʼO toe feia pe ia ʼaho nei, ʼe ko te agamahani ʼa te kau Fakamoʼoni ʼa Sehova ia te fakatahitahi pea ʼe natou fiafia. ʼI te malamanei katoa, ʼe natou fakatahitahi ʼi te vahaʼa fuli ʼo tauhi ki te ʼAtua, mo hiva fakavikiviki kia te ia pea mo faikole. Pea tuʼa lua peʼe tuʼa tolu ʼi te taʼu, ʼe natou fai ni fakatahi lalahi moʼo fakavikiviki kia Sehova.

2. Kotea ka ke ako ʼi te ʼu fono ʼaia?

ʼI te ʼu fono ʼa te kau Fakamoʼoni ʼa Sehova, ʼe natou akoʼi ai te Tohi-Tapu. ‘ʼE natou fakamahino lelei pea mo fakaha tona fakaʼuhiga.’ (Lau ia Neemia 8:8.) Kapau ʼe ke kau ki ai, ʼe lahi age anai te ʼu faʼahi ʼe ke ako ʼo ʼuhiga mo Sehova ʼo feia mo ʼona kalitate. Ka ke logo ki te palalau tuʼumaʼu ki tona ʼofa, pea ʼe toe lahi age anai tau fia fakaovi kia te ia. ʼE ke toe tokagaʼi ai tana fia tokoni atu ke ʼi ai he ʼuhiga ʼo tou maʼuli.—Esaia 48:17, 18.

3. ʼE fua lelei feafeaʼi kia koe tau fakatahi mo ʼihi?

ʼE kole mai e Sehova ke “tou fetokagaʼaki ke tou feugaʼaki ki te ʼofa pea mo te ʼu gaue lelei, ʼo mole tou liakī tatatou fakatahi.” (Hepeleo 10:24, 25) ʼI te ʼu fono, ʼe ke felaveʼi ai mo ni hahaʼi ʼe natou tokagaʼi moʼoni niʼihi pea ʼe natou fia iloʼi he tahi ʼu manatu ʼo ʼuhiga mo te ʼAtua, ohage pe ko koe. ʼE ke logo anai ki hanatou fakamatala ni aluʼaga neʼe natou maʼu ai ni fakalotomalohi ʼi te Tohi-Tapu. (Lau ia Loma 1:11, 12.) ʼE ke feiloʼiʼaki ai anai mo he kau selipatea peʼe ko ni taumatuʼa ʼe fiafia logo la ʼe natou tau mo ni fihifihia. Koia ʼae ʼe loto ai e Sehova ke tou fakatahi tuʼumaʼu.

TA FAKALOLOTO

Ta vakaʼi te ʼu meʼa ʼe hoko ʼi te ʼu fono ʼa te kau Fakamoʼoni ʼa Sehova pea he koʼe ʼe maʼuhiga ke ta kau ki ai.

4. Te ʼu fono ʼa te kau Fakamoʼoni ʼa Sehova

ʼI te ʼuluaki sekulo, neʼe fakatahitahi tuʼumaʼu te kau Kilisitiano ke natou atolasio kia Sehova. (Loma 16:3-5) Lau ia Kolose 3:16, pea fai te fehuʼi ʼaeni:

Neʼe atolasio feafeaʼi te kau ʼuluaki Kilisitiano kia Sehova?

Ia ʼaho nei, ʼe fakatahitahi tuʼumaʼu te kau Fakamoʼoni ʼi ʼonatou fale fono. Kapau ʼe ke fia iloʼi pe ʼe feafeaʼi ʼanatou fono, vakaʼi te ʼATA VITEO. Hili ia, vakaʼi te pāki ʼe fakaha ai he fono pea fai te ʼu fehuʼi ʼaeni:

ʼATA VITEO: Kotea ʼAe ʼe Fai ʼi Te Fale Fono? (2:12)

Kotea la he ʼu aluʼaga neʼe ke tokagaʼi ʼi tau sioʼi te foʼi ʼata mo tau lau te vaega ʼo Kolose 3:16 ʼe nā tatau ai?
ʼI te ʼata viteo peʼe ʼi te pāki, ʼe ʼi ai la he faʼahi tafito neʼe malave kia koe?

Lau ia 2 Kolonito 9:7, pea fai te fehuʼi ʼaeni:

He koʼe ʼe mole totogi te ʼu fono ʼa te kau Fakamoʼoni ʼa Sehova?

Ta vakaʼi fakatahi te aluʼaga ka vakaʼi ʼi te fono ʼo te vahaʼa ka haʼu.

Kotea la he koga ʼo te fono ʼe ke leleiʼia peʼe ʼaoga kia koe?

Kua ke iloʼi koa?

ʼI te jw.org, ʼe ke maʼu ai te ʼu koga meʼa mo te ʼu hola ʼo te ʼu fono, ʼi te malamanei katoa.

Te ʼu pāki: ʼE lahi te ʼu pāki ʼe fakaha ai te ʼu meʼa ʼe hoko ʼi he Fale Fono ʼi muʼa ʼo te fono, peʼe ʼi te lolotoga peʼe ʼi tona fakaʼosi. Ko te ʼu pāki ʼaia ʼe tou maʼu ʼi te ʼu pāki 1 ki te 4.

1. Ko he Fakamoʼoni ʼe tuʼu mai muʼa ʼo ina fai he akonaki Fakatohi-tapu lolotoga he fono.

ʼI ʼamatou fono, ʼe ʼi ai te ʼu akonaki, te ʼu faʼifaʼitaki mo te ʼu ʼata viteo. Pea ʼe kamata mo fakaʼosi te ʼu fono ʼaki he hiva mo te faikole
ʼE ʼi ai ʼihi koga ʼo te fono, ʼe feala ai ke faitali te nofoʼaki
ʼE fakatalitali te hahaʼi fuli: te ʼu famili, te kau selipatea, te kau matuʼa pea mo te kau tupulaga
ʼE mole totogi e te kau Fakamoʼoni ʼa Sehova te hu ki ʼanatou fale fono. Pea ʼe mole fai he tae falā

5. ʼE ʼaoga ni faiga malohi ki te kau ki te ʼu fono

Ta vakaʼi te faʼifaʼitaki ʼo te famili ʼo Sesu. ʼI te taʼu fuli, neʼe tonu ke natou haʼele ia kilometa ʼe 100 ʼi he koga meʼa moʼugaʼia ke natou kaku ki te Fale Lotu, ʼi Selusalemi. Lau ia Luka 2:39-42, pea fai te ʼu fehuʼi ʼaeni:

ʼI tau manatu la, neʼe faigafua koa te faifagona ʼaia ki Selusalemi?
Kia koe la kotea te ʼu faiga ʼe tonu ke ke fai ke ke kau ki te ʼu fono?
Kia koe ʼe ʼi ai koa hona ʼaoga? Kotea tona tupuʼaga?

Te ʼu pāki: ʼE teuteuʼi e Sosefo mo Malia tanā faifagona. 1. ʼE hili e Sosefo ni taga ki he ʼasino kae ʼe tokaga ia Malia ki te meʼa ʼae ke ʼave. 2. Ko he mape ʼe fakaha ai te faifagona mai Nasaleti ki Selusalemi.

ʼE ui ʼi te Tohi-Tapu ʼe maʼuhiga ke tou fakatahitahi ʼo atolasio ki te ʼAtua. Lau ia Hepeleo 10:24, 25, pea fai te fehuʼi ʼaeni:

He koʼe ʼe tonu ke tou kau tuʼumaʼu ki te ʼu fono?

ʼE UI E ʼIHI: “Kua feʼauga pe taku ako te Tohi-Tapu ʼi fale, ʼe mole ʼaoga ia ke au toe fakatahi mo ʼihi.”

Kotea la he vaega peʼe ko he faʼifaʼitaki ka ke fakaʼaogaʼi moʼo fakaha te meʼa ʼae ʼe loto ki ai Sehova?

MANATU TAFITO

Ka ke kau ki te ʼu fono, ʼe lahi te ʼu faʼahi ka ke ako ʼo ʼuhiga mo Sehova, ʼe ke fakamalohiʼi ai ʼau felogoi mo ia pea ʼe ke atolasio ai kia te ia ʼo fakatahi mo ʼihi.