KAPITE 14
Ko Te Tauhi Fea ʼAe ʼe Loto Ki Ai Te ʼAtua?
Neʼe tou vakaʼi ʼi te kapite kua ʼosi, ʼe mole tali e te ʼAtua te ʼu lotu fuli. Kae ʼe ʼi ai te faʼahiga tauhi ʼe leleiʼia e te Tupuʼaga. Koia ko “te faʼahiga tauhi [peʼe lotu]” fea ʼae ʼe ina leleiʼia? (Sakopo 1:27, nota) Vakaʼi te manatu ʼa te Tohi-Tapu ʼo ʼuhiga mo te faʼahi ʼaia.
1. ʼE tonu ke fakatafito kitea tau tauhi?
ʼE tonu ke fakatafito ki te Tohi-Tapu. Neʼe ui fenei e Sesu ki te ʼAtua ʼi hana faikole: “Ko tau folafola ʼe ko te moʼoni.” (Soane 17:17) ʼE mole tokagaʼi e ʼihi lotu te moʼoni ʼae ʼe ʼi te Folafola ʼa Te ʼAtua, te Tohi-Tapu. ʼE haga natou ʼo fetogi ʼaki ni manatu fakatagata peʼe ko ni talatisio. Kae ʼe fehiʼa ia Sehova ia natou ʼaia ʼe natou ‘meʼa noaʼi tana fakatotonu.’ (Lau ia Maleko 7:9.) ʼE fiafia tona loto moka ke lau te Tohi-Tapu pea mo maʼuliʼi ʼana tokoni.
2. ʼE tonu ke feafeaʼi tau tauhi kia Sehova?
ʼE ko Sehova tou Tupuʼaga koia ʼae ʼe tuha pe mo ia ke ke tauhi kia te ia. (Apokalipesi 4:11) Kotea tona fakaʼuhiga? Ko tona fakaʼuhiga ke ke ʼofa mo ʼatolasio ʼateaina pe kia te ia. ʼE mole ke fakaʼaogaʼi anai he ʼu taula ʼatua, peʼe ko he ʼu pāki.—Lau ia Esaia 42:8.
ʼE tonu ke “maʼoniʼoni pea mo lelei” tau tauhi kia Sehova. (Loma 12:1) Kotea tona fakaʼuhiga? Ko tona fakaʼuhiga ke ke fakalogo ki ʼana pelesepeto ʼi tou maʼuli. Ohage la, ka ke ʼofa ia Sehova pea ʼe ke tali mo fakaʼapaʼapa ki tana manatu ʼo ʼuhiga mo te ʼohoana. Pea ʼe ke toe liʼaki foki mo te ʼu aga ʼae ʼe kovi, ohage ko te suluka, mo te toloke peʼe ko te inu kava fakavale.a
3. He koʼe ʼe tonu ke ke tauhi fakatahi mo niʼihi kia Sehova?
ʼI te vahaʼa fuli, ʼe ke maʼu te fealagia ʼae ke ke ‘fakavikiviki kia Sehova ʼi te fakatahiʼaga,’ ʼi te ʼu fono. (Pesalemo 111:1, 2) ʼE feala ai hau hiva ni fakavikiviki kia te ia. (Lau ia Pesalemo 104:33.) ʼE loto e Sehova ke ke kau ki te ʼu fono he ʼe ʼofa ia koe pea ʼe ina loto ke ke maʼuli ʼo heʼe gata. Koia ʼae ʼe maʼuhiga ai kia ia te ʼu fono. Ka ke kau ki ai, pea ʼe ke fakalotomalohiʼi ai ʼihi ʼo feia pe mo koe.
TA FAKALOLOTO
Ta vakaʼi te ʼu tupuʼaga ʼae ʼe mole tali ai e Sehova ke fakaʼaogaʼi ni pāki ʼi tana tauhi, pea mo faʼahi maʼuhiga ʼe lua moʼo vikiʼi ia ia.
4. ʼE mole tonu ke tou fakaʼaogaʼi ni fakatata peʼe ko ni pāki
ʼE tou iloʼi feafeaʼi ʼe mole ina leleiʼia? Vakaʼi te ʼATA VITEO pea fai te fehuʼi ʼaeni:
ʼI te temi muʼa, kotea neʼe hoko ʼi te fia tauhi ʼa te ʼu kaugana ʼa te ʼAtua kia te ia ʼaki he taula ʼatua?
ʼE ui e ʼihi ka natou fakaʼaogaʼi he fakatata peʼe ko he pāki, pea ʼe natou fakaovi lahi ai ki te ʼAtua. Kae ʼe mole natou iloʼi ka natou fai te faʼahi ʼaia pea ʼe natou fakamamaʼo ai mai te ʼAtua. Lau ia Ekesote 20:4-6 pea mo Pesalemo 106:35, 36, pea fai te ʼu fehuʼi ʼaeni:
Kotea ʼae ʼe tau fakaʼaogaʼi e te hahaʼi ʼi tanatou tauhi?
Kotea te manatu ʼa Sehova ʼo ʼuhiga mo te faʼahi ʼaia?
Kae ʼe feafeaʼi kia koe?
5. ʼE fakaʼateaina tatou e Sehova mai te ʼu akonaki hala
ʼE fakaʼateainaʼi feafeaʼi tatou moka tou tauhi ʼateaina pe kia Sehova? Vakaʼi te ʼATA VITEO.
Lau ia Pesalemo 91:14, pea fai te fehuʼi ʼaeni:
Kapau ʼe tou ʼofa ia Sehova ʼo tou tauhi ʼateaina pe kia te ia, kotea anai ka ina fai?
6. ʼE kau te ʼu fono ki te tauhi kia Sehova
Ka tou fai ni tali ʼi te ʼu fono, pea ʼe tou vikiʼi ai ia Sehova pea mo fefakalotomalohiʼaki. Lau ia Pesalemo 22:22, pea fai te ʼu fehuʼi ʼaeni:
ʼE ke leleiʼia koa te ʼu tali ʼae ʼe ke logo ki ai ʼi te ʼu fono?
ʼE ke fia teuteuʼi la hau kiʼi tali?
7. ʼE fiafia Sehova moka tou palalau ki te moʼoni
ʼE tou maʼu te faigamalie ʼae ke tou fakaha ki ʼihi te ʼu moʼoni Fakatohi-tapu. Lau ia Pesalemo 9:1 mo te 34:1, pea fai te fehuʼi ʼaeni:
Kotea la he manatu ʼi te ʼu moʼoni Fakatohi-tapu ʼae kua ke iloʼi ʼe ke fia vaevae anai mo he tahi?
ʼE UI E ʼIHI: “ʼE lelei fuli pe te ʼu lotu ia.”
Kotea la tau ia manatu?
MANATU TAFITO
Kapau ʼe tou loto ke tali e te ʼAtua tatatou tauhi, ʼe tonu ke tou tauhi ʼateaina pe kia te ia, mo vikiʼi ia ia ʼi te ʼu fono pea mo fakaha ki ʼihi te ʼu faʼahi ʼae ʼe tou ako.
Fehuʼi Fakamanatu
Kotea ʼe fakaʼaogaʼi e te ʼAtua moʼo akoʼi mai te faʼahiga tauhi ʼae ʼe ina leleiʼia?
He koʼe ʼe tonu ke tou atolasio ʼateaina pe kia Sehova?
He koʼe ʼe tonu ke tou fakatahitahi mo ʼihi ʼo atolasio ki te ʼAtua?
TE TAHI ʼU MANATU
Lau te hisitolia ʼaeni “Je ne suis plus esclave des idoles” pe neʼe ʼateaina feafeaʼi he fafine mai te tauhi taula ʼatua.
“La Bible transforme des vies” (Ko Te Tule Leʼo (Fakafalani) ʼaho 1 ʼo Sulio 2011)
Ko he ʼu manatu ʼe tokoni atu anai ke ke fai hau ʼu tali ʼi te ʼu fono.
“Tou Fakavikiviki Kia Sehova ʼi Te Kokelekasio” (Ko Te Tule Leʼo ʼo Sanualio 2019)
Te ʼu faiga ʼa he tagata ke kau ki te ʼu fono.
ʼE fakaʼaogaʼi te koluse e te lotu, kae ʼe ʼi ai koa hona pikipikiga mo te tauhi moʼoni?
“He Koʼe ʼe Mole Kotou Fakaʼaogaʼi Ia Te Koluse ʼi Takotou Tauhi?” (Alatike ʼi te jw.org)
a ʼE hoki vakaʼi te ʼu manatu ʼaia ʼi ʼihi atu kapite.