“Kotou Maʼuliʼi Te Folafola”

1-2. He koʼe ʼe fiafia ia te ʼu kaugana ʼa te ʼAtua? (Sakopo 1:​22-25)

ʼE LOTO e Sehova pea mo tona ʼAlo ke manuʼia totatou maʼuli. ʼE ui fenei ʼi te Pesalemo 119:2: “Manuʼia ia natou ʼae ʼe natou muliʼi ʼana fakamanatu, ʼae ʼe natou kumi ia ia ʼaki tonatou loto katoa.” Ki muli age, neʼe fakapapauʼi e Sesu: “Manuʼia ia natou ʼae ʼe natou logo ki te folafola ʼa te ʼAtua pea mo natou taupau!”—Luka 11:28.

² Ko te ʼu kaugana ʼa Sehova ʼe ko he hahaʼi fiafia. Kotea tona tupuʼaga? ʼE lahi te ʼu fahaʼi ʼe tupu ai tatatou fiafia. ʼE kau tafito ki ai ia tatatou lau te Folafola ʼa te ʼAtua ʼi te ʼaho fuli mo tatatou faiga ʼae ke tou maʼuliʼi te ʼu meʼa ʼae ʼe tou ako.—Lau ia Sakopo 1:​22-25.

3. ʼE fua lelei feafeaʼi kia tatou moka tou maʼuliʼi ia te ʼu meʼa ʼae ʼe tou lau ʼi te Folafola ʼa te ʼAtua?

³ Ka “tou maʼuliʼi te folafola” ʼe lahi te ʼu fua lelei ʼe tou maʼu. Ohage la, ʼe tou iloʼi ka tou fai ia te fahaʼi ʼaia ʼe fiafia ai ia Sehova, ʼo tou toe fiafia ai mo tatou. (Ekl. 12:13) Pea ka tou maʼuliʼi te ʼu tokoni ʼae ʼi te Folafola ʼa te ʼAtua, ʼe toe lelei age totatou maʼuli fakafamili pea mo tatatou ʼu felogoi mo ʼotatou tehina mo tuagaʼane ʼae ʼi te kokelekasio. ʼE mahino ia, neʼe hoko te ʼu fahaʼi ʼaia ʼi tou maʼuli. Tahi ʼae ʼe tou hao mai te ʼu fihifihia ʼae ʼe tau mo natou ʼae ʼe mole natou mulimuli ki te ʼu fakatotonu ʼa Sehova. ʼE hage pe ko tona ui e te Hau ko Tavite ʼi he hiva neʼe ina tohi. Neʼe palalau ai ki te lao mo te ʼu fakatotonu pea mo te ʼu fakamau ʼa Sehova. Neʼe ina ui fenei ʼi te fakaʼosi: “ʼE maʼu ai he fakapale lahi ʼi tona maʼuliʼi.”—Pes. 19:​7-11.

4. He koʼe ʼe mole faigafua te maʼuliʼi te Folafola ʼa te ʼAtua?

⁴ Ke tou maʼuliʼi ia te Folafola ʼa te ʼAtua, ʼe tonu ke tou lau pea mo ako ia te Tohi-Tapu ke tou mahino ai ki te meʼa ʼae ʼe loto e Sehova ke tou fai. Kae ʼe moʼoni ʼe mole faigafua te toʼo ʼo he temi ke tou fakahoko ia te fahaʼi ʼaia he ʼe lahi totatou maʼumaʼua. Koia ʼe tou vakaʼi anai he ʼu tokoni ke feala ai hatatou lau te Tohi-Tapu ʼi te ʼaho fuli ʼo feia mo he ʼu tokoni ke tou fakakaukauʼi ai te ʼu meʼa ʼae ʼe tou lau. Pea ʼe tou vakaʼi leva te ʼu fahaʼi ʼi totatou maʼuli ʼe feala ke tou maʼuliʼi ai te ʼu meʼa ʼae neʼe tou ako.

FAKATUʼUTUʼU HE TEMI KE KE LAU TE FOLAFOLA ʼA TE ʼATUA

5. Kotea te ʼu maʼua ʼae ʼe tou maʼu pea ʼe ʼaoga lahi ki ai he temi?

⁵ Tokolahi te ʼu kaugana ʼa Sehova ʼe natou maʼumaʼua ʼaupito. ʼE lahi totatou temi ʼe tou fakahoko ai ʼotatou maʼua ʼae ʼe fakaha mai ʼi te Tohi-Tapu. Ohage la, ʼe tonu ke tou gaue ke feala ai hatatou maʼu te ʼu meʼa ʼae ʼe ʼaoga kia tatou mo ʼae ʼotatou kiʼi famili. (1 Tim. 5:8) Tokolahi te ʼu Kilisitiano ʼe natou tokakaga ki he tahi ʼe mahaki peʼe vaivai matuʼa ʼi tonatou kiʼi famili. Pea ʼe toe tonu foki ke tou tahi tokaga ki tona maʼuli malolo pea ʼe ʼaoga he temi ki te fahaʼi ʼaia. Kae ʼe mole gata ai, ʼe toe ʼi ai he ʼu gaue maʼuhiga ʼe tonu ke tou fai ʼi te kokelekasio. ʼE kau ki ai ia tatatou lagolago ki te faifakamafola. Koia ʼaki te ʼu maʼua fuli ʼaia ʼe ke maʼu, ʼe feafeaʼi hau toʼo he temi ke ke lau ai te Tohi-Tapu ʼi te ʼaho fuli mo metitasio pea mo ke maʼuliʼi te meʼa ʼae ʼe ui mai ʼi te Tohi-Tapu?

6. Kotea ʼae ʼe feala ke ke fai ke ke fakamuʼamuʼa ai ia te lau ʼo Tohi-Tapu? (Vakaʼi mo te pāki.)

⁶ Kia tatou Kilisitiano ko te lau ʼo te Tohi-Tapu ʼe kau ki “te ʼu meʼa ʼae ʼe maʼuhiga ʼaupito.” Koia ʼe ko he fahaʼi ʼe tonu ke tou fakamuʼamuʼa. (Flp. 1:10) ʼO ʼuhiga mo te tagata manuʼia, ʼe ui ʼi te ʼuluaki pesalemo “ʼe fiafia ia ʼi te lao ʼa Sehova, pea ʼe ina lau leʼo veliveli Tana lao ʼi te ʼaho mo te po.” (Pes. 1:​1, 2) ʼE ha lelei mai ai ʼe tonu ke tou toʼo he temi ke tou lau ai te Tohi-Tapu. Pea ko te temi lelei fea ʼae ʼe tonu ke tou fai ai te fahaʼi ʼaia? ʼE lagi tou tahi filifili pe anai te temi ʼae ʼe tou leleiʼia. Kae ko te meʼa ʼae ʼe maʼuhiga ke tou filifili te temi ʼae ʼe feala ai ke tou lau ʼi te ʼaho fuli. ʼE ui e te tehina ko Victor: “ʼE au leleiʼia taku lau te Tohi-Tapu ʼi te uhu logo la ʼe mole au fia ʼala vave ʼi te uhu. Kae ko te temi ʼaia ʼe mole fakaleluʼi ai au e he meʼa peʼe ko he tahi. Pea ʼe feala ai ke au fakakaukauʼi mo tokaga lelei ki taku lautohi.” ʼE lagi toe feia mo koe? Fai te fehuʼi ʼaeni: ‘Ko te temi fea ʼae ʼe lelei kia au ke au lau ai te Tohi-Tapu?’

FAKAKAUKAUʼI TE MEʼA ʼAE ʼE KE LAU

7-8. Kotea ʼae ʼe feala ke ina taʼofi tatatou maʼu ia te ʼu fua lelei mai tatatou lau ia te Tohi-Tapu? Tuku mai he faʼifaʼitaki.

⁷ Kapau ʼe ke fakatuʼutuʼu he temi ke ke lau ai te Tohi-Tapu ʼe ʼi ai te tahi fahaʼi ʼe tonu ke ke tokaga ki ai. Heʼeki ke lau koa la he meʼa pea ʼosi age mole kei ke manatuʼi? Neʼe kua hoko pe te fahaʼi ʼaia kia tatou fuli pea ʼe feala ke toe hoko moka tou lau ia te Tohi-Tapu. Ohage la ʼe ke fakatuʼutuʼu ke ke lau he ʼu kapite ʼi te ʼaho fuli, ʼe ko he fahaʼi ʼe lelei. ʼE tonu ke tou fai he ʼu fakatuʼutuʼu pea mo tou mulimuli ki ai. (1 Ko. 9:26) Kae kapau ʼe tou fia maʼu he ʼu fua lelei ʼe lahi age mai tatatou lau ia te Tohi-Tapu, ʼe ʼi ai te tahi fahaʼi ʼe tonu ke tou fai.

⁸ Tou vakaʼi te faʼifaʼitaki ʼaeni: ʼE ʼaoga te ʼua ke maʼuli lelei te ʼu fuʼu ʼakau. Pea ka lahi te to ʼo te ʼua ʼi he kiʼi temi nounou, mole kei feala ke ulu te vai ki te kele pea fua kovi ai ki te ʼu fuʼu ʼakau. Kae ʼe lelei age moka ʼua veliveli he ʼe feala ke ulu te vai ki te kele ʼo maʼuli lelei ai te ʼu fuʼu ʼakau. ʼO toe feia pe ʼe mole tonu ke tou lau fakavilivili ia te Tohi-Tapu. Koteʼuhi kapau ʼe tou lau feia, pea ʼe mole tou toʼo ai he temi ke tou fakakaukauʼi mo manatuʼi te meʼa ʼae neʼe tou lau pea mo maʼuliʼi.—Sakp. 1:24.

9. Kotea ʼae ʼe tonu ke tou fai moka ko hatatou agamahani te lau fakavilivili ʼo te Tohi-Tapu?

⁹ ʼE ke tokagaʼi koa ʼe ke lau fakavilivili ia te Tohi-Tapu? Kotea ʼae ʼe tonu ke ke fai? Lau mamalie. Faiga ke ke toʼo he temi feʼauga moʼo fakakaukauʼi te meʼa ʼae ʼe ke lau peʼe ko ʼae kua ke ʼosi lau. ʼE ko te ʼu tokoni ʼaia ʼe fai atu pea ʼe mole tonu ia ke ke tuʼania. ʼE feala pe ke ke fakatuʼutuʼu ke loaloaga atu te temi ʼae ʼe ke fai ai tau ako ke feala ai hau fakakaukauʼi. Peʼe ke filifili ke veliveli age te ʼu vaega ʼae ʼe ke lau ke ke maʼu ai leva te temi ʼae ke ke fakakaukauʼi. ʼE ui e Victor ʼae kua tou ʼosi palalau ki ai: “ʼE mole lahi te ʼu koga ʼae ʼe au lau ʼi te Tohi-Tapu, ʼe lagi ko he kapite pe ʼe tahi. ʼUhi ʼae ʼe au fai taku lautohi ʼi te kei uhuuhu, ʼe feala ai ke au fakakaukauʼi te ʼu meʼa ʼae neʼe au lau ʼi te ʼaho katoa.” ʼE fakalogo pe kia koe te lahi ʼo te ʼu meʼa ʼae ʼe ke lau ʼi te Tohi-Tapu. Kae ko te meʼa ʼae ʼe maʼuhiga ke ke lau mamalie ke fua lelei ai kia koe tau fakakaukauʼi te meʼa ʼae ʼe ke lau.—Pes. 119:97; vakaʼi te fakamatala ʼae ʼe ʼa takai “Te ʼu Fehuʼi Ke Tou Fai.”

10. ʼE feafeaʼi hau maʼuliʼi te fahaʼi ʼae ʼe ke ako? Tuku mai he faʼifaʼitaki. (1 Tesalonika 5:​17, 18)

¹⁰ Tatau aipe te temi ʼae kua ke fakatuʼutuʼu ai ke ke lau ia te Tohi-Tapu mo tona loaloaga, ʼe tonu ke ke fakakakaukauʼi pe feafeaʼi tau maʼuliʼi te meʼa ʼae neʼe ke lau. Ka ke lau he koga ʼo te Tohi-Tapu, fai te fehuʼi ʼaeni: ‘ʼE feafeaʼi haku maʼuliʼi nei peʼe ki muli age te manatu ʼaeni neʼe au ako?’ Tou toʼo he faʼifaʼitaki. Hage la kua ke ʼosi lau ia 1 Tesalonika 5:​17, 18. (Lau.) Fai muʼa hau kiʼi tuʼu ʼo fakakaukauʼi te lahi pea mo te loloto ʼo tau faikole. ʼE feala ke ke toe fakakaukauʼi te ʼu fahaʼi ʼae ʼe ke fakafetaʼi ai kia Sehova. Lagi ko fahaʼi ʼe tolu ʼe ke fia fakafetaʼi ai kia Sehova. Maʼia pe ʼe ko he kiʼi temi nounou ʼae ʼe ke fakakaukau ai ki te ʼu meʼa ʼae neʼe ke ako mai tau lau ia te Tohi-Tapu, kae ʼe tokoni atu anai ke ke mahino ki te Folafola ʼa te ʼAtua pea mo maʼuliʼi. Pea kapau ʼe ke maʼuliʼi ʼi te ʼaho fuli he fahaʼi neʼe ke lau ʼi te Tohi-Tapu, ʼaki te temi ʼe toe lelei age anai ia tau tauhi ʼae kia Sehova. ʼE feafeaʼi moka ʼe ke sio ʼe lahi te ʼu fahaʼi ʼae ʼe tonu ke ke maʼuliʼi?

FAI HE ʼU FAKATUʼUTUʼU FAKAPOTOPOTO

11. He koʼe ʼi ʼihi temi ʼe feala ke ke lotovaivai ʼi tau tokagaʼi ʼae ʼe lahi te ʼu fahaʼi ʼe tonu ke ke gaueʼi? Tuku mai he faʼifaʼitaki.

¹¹ Ka ke lau te Tohi-Tapu pea mo fakakaukauʼi pe feafeaʼi tau maʼuliʼi ia te ʼu tokoni, ʼe feala ke ke lotovaivai he ʼe ke tokagaʼi ʼe lahi te ʼu fahaʼi ʼe tonu ke ke gaueʼi. Ohage la, ʼi te Monite, ʼi tau lau ia te Tohi-Tapu, ʼe tuʼu ai ia te tokoni ʼae ke tekeʼi te aga fakapalatahi. (Sakp. 2:​1-8) Pea ʼe ke fakakaukauʼi ai ʼe feala ke lelei age tau aga ki ʼihi pea ʼe ke fakatuʼutuʼu ai ke ke fai ni fetogi. ʼE ko he meʼa lelei ʼaia! Pea ʼi te Feliatolu ʼe ke lau he ʼu vaega ʼe ha ai te maʼuhiga ʼae ke ke tokaga ki ʼau palalau. (Sakp. 3:​1-12) Pea ʼe ke manatuʼi ai ʼi ʼihi temi ʼe ke fai ni palalau ʼe fakatupu lotovaivai. Koia, ʼe ke fakatuʼutuʼu ai ke lahi age tau fai he ʼu palalau moʼo fakalotomalohiʼi ʼihi. ʼI te Feliafa, ʼi tau lau ia te Tohi-Tapu ʼe ha ai te ʼu tuʼutamaki ʼo te fakakaumeʼa mo te malamanei. (Sakp. 4:​4-12) Pea ʼe ke mahino ai ʼe tonu ke ke filifili lelei te ʼu meʼa ʼae ʼe ke lau, mo sioʼi pea mo te ʼu musika ʼae ʼe ke fakalogo. ʼI te Felianima leva, ʼi tau ʼosi lau te Tohi-Tapu, ʼe ke ui ai: “Oi, mole au iloʼi pe ʼe au lavaʼi anai, he ʼe lahi ʼosi te ʼu fetogi ʼe tonu ke au fai.”

12. He koʼe ʼe mole tonu ke ke lotovaivai moka ʼe ha ʼi tau lau te Tohi-Tapu ʼe tonu ke ke fai he ʼu fetogi? (Vakaʼi mo te kiʼi nota.)

¹² Kapau ʼe ke tokagaʼi ʼe lahi te ʼu fetogi ʼe tonu ke ke fai, ʼaua naʼa ke lotovaivai. ʼE ha ai tau agavaivai pea ʼe ke loto ke leleiʼia koe e Sehova. Ko he tahi ʼe agavaivai pea mo ina sivisivi ia ia totonu, ʼe ina lau ia te Tohi-Tapu ʼaki te fakatuʼutuʼu ʼae ke ina tokagaʼi te ʼu fahaʼi ʼae ʼe tonu ke ina gaueʼi.a Pea ke ke toe manatuʼi ko te kofuʼi ʼo “te ʼuluagaaga foʼou” ʼe ʼaoga ki ai he temi. (Kol. 3:10) Kotea ʼae ka tokoni atu ke ke haga maʼuliʼi te Folafola ʼa te ʼAtua?

13. ʼE feafeaʼi hau fai he ʼu fakatuʼutuʼu fakapotopoto? (Vakaʼi mo te pāki.)

¹³ ʼE lelei age ke ke fai he fakatuʼutuʼu fakapotopoto ʼi hau faiga ke ke fai te ʼu fetogi fuli ʼae neʼe ke lau ʼi te Tohi-Tapu ʼi he temi ʼe tahi. (Taag. 11:2) ʼAhiʼahi fai te fahaʼi ʼaeni: Fai he lisi ʼo te ʼu fahaʼi ʼae ʼe tonu ke ke gaueʼi pea ke filifili muʼa ke ke gaueʼi he fahaʼi ʼe tahi peʼe lua pea hoki ke vakaʼi leva te ʼu fahaʼi ʼae ki muli age. Ko te fahaʼi fea ʼae ʼe feala ke ke kamata ai?

14. Ko te fahaʼi fea ʼae ʼe feala ke ke kamata ai?

¹⁴ ʼE feala ke ke kamata ʼaki ni fakatuʼutuʼu ʼe faigafua kia koe ia tona fakahoko. Peʼe ke filifili he fahaʼi ʼe tonu ke ke gaueʼi tafito. ʼI tau ʼosi filifili ia te fahaʼi ʼaia, fai hau ʼu fekumi ʼi ʼatatou tohi. ʼE feala hau fakaʼaogaʼi te Kumiʼaga Tohi ʼa Te Kau Fakamoʼoni ʼa Sehova. Fakaha age kia Sehova tau fakatuʼutuʼu, pea mo kole age ke ina foaki atu “te fakaʼamu pea mo te malohi” moʼona fakahoko. (Flp. 2:13) Pea faiga leva ke ke maʼuliʼi te fahaʼi ʼae neʼe ke ako. ʼI tau sio ʼae ʼe ke lava fai he ʼu fetogi peʼe kua lelei age tau fakaha he kalitate, ʼe uga ai koe ke ke fai te tahi ʼu fetogi. Pea ʼe lagi faigafua age anai tau fai te ʼu fetogi ʼaia.

TUKU TE FOLAFOLA ʼA TE ʼATUA ‘KE GAUE IA KOE’

15. Kotea ʼae ʼe kehekehe ai te hahaʼi ʼa Sehova mo natou ʼae ʼe natou lau ia te Tohi-Tapu? (1 Tesalonika 2:13)

¹⁵ Tokolahi ʼe natou fiameʼameʼa he kua tuʼa lahi tanatou lau ia te Tohi-Tapu. Kae ʼe natou tui moʼoni koa ki te ʼu meʼa ʼae ʼe akoʼi mai ʼi te Tohi-Tapu? Neʼe natou faiga koa ke natou mulimuli ki te ʼu fahaʼi ʼae ʼe akoʼi mai ʼi te Tohi-Tapu pea mo fai ni fetogi ʼi ʼonatou maʼuli? ʼE feala pe ke tou ui kailoa. Kae ʼe kehekehe ia mo te hahaʼi ʼa Sehova. Ohage ko te ʼu ʼuluaki Kilisitiano, ʼe tou tali te Tohi-Tapu “ohage ko te folafola ʼa te ʼAtua.” Pea ʼe tou fai ia meʼa fuli ke tou maʼuliʼi te ʼu tokoni ʼae ʼe haʼu mai te Tohi-Tapu.—Lau ia 1 Tesalonika 2:13.

16. Kotea ʼae ʼe tokoni mai ke tou maʼuliʼi ia te Folafola?

¹⁶ ʼE mole faigafua tuʼumaʼu ia te lau ʼo te Tohi-Tapu pea mo tona maʼuliʼi. ʼE lagi faigataʼa hatatou fakatuʼutuʼu he temi moʼona lau peʼe tou lau fakavilivili kae ʼe mole tou toʼo he temi ke tou fakakaukauʼi ai te ʼu fahaʼi ʼae ʼe tou lau. Peʼe lagi tou manatu ʼe lahi fau te ʼu fetogi ʼae ʼe tonu ke tou fai. Kotea pe te fahaʼi ʼae ʼe faigataʼa kia koe, kae ʼaki te tokoni ʼa Sehova ʼe feala pe anai hau fai ni fetogi. ʼOfa pe ke tou tali ia tana tokoni pea ke mole tou liliu ko he tahi ʼe fagono mo lotogalogalo kae ko he tahi ʼe ina maʼuliʼi te Folafola. ʼE mahino ia, ka lahi ia tatatou lau ia te Folafola ʼa te ʼAtua pea mo tou maʼuliʼi, ʼe toe lahi age anai totatou fiafia.—Sakp. 1:25.