Tou Fakatokatoka Te ʼu Fihi ʼAē ʼe Hoko ʼi He ʼu Fakatuʼutuʼu Ki He Gāue Fakamālama

Ohagē ko tona tohi iā 1 Kolonito 6:1-8, neʼe talanoa ia te ʼapositolo ko Paulo ki te ʼu tehina ʼe natou ʼave honatou ʼu tehina ki te ʼu telepinale. Neʼe ina fakahā ia tana mole leleiʼia ia te ‘lava ʼolo ʼaē ʼa ʼihi Kilisitiano ʼo Kolonito ki te telepinale kiā muʼa ʼo ni hahaʼi heʼe faitotonu.’ (Vaega 1) Neʼe foaki e Paulo te ʼu tupuʼaga tāfito ʼaē ʼe mole tonu ai ki ni ʼu Kilisitiano ke natou ʼave he tahi Kilisitiano ki te telepinale ʼo te mālamanei, kae ke natou fakatokatoka tonatou ʼu fihi, ʼo natou mulimuli ki te ʼu tokoni ʼaē ʼe tuku age ʼi te kōkelekāsio. Tou vakaʼi age ʼihi tupuʼaga ʼo te fai ʼo te tokoni ʼaia, pea mo he ʼu ʼaluʼaga ʼe lagi mole ʼaoga anai kiai ia te tokoni ʼaia.

Kapau ʼe tou fihi mo he tahi tehina ʼo ʼuhiga mo he gāue neʼe tou fakatuʼu mo ia, ʼe tou faiga tāfito anai ke tou fakatokatoka te fihi ohagē ko te manatu ʼa Sehova, kae ʼaua naʼa tou fakatokatoka ʼaki totatou poto fakatagata. (Tāʼaga Lea 14:12) Ohagē ko tona fakahā e Sesu, tou fakatokatoka fakavilivili he fihi ʼi muʼa ʼo hana liliu ko he toe fihifihia kovi. (Mateo 5:23-26) Kae meʼa fakaʼofaʼofa, heʼe ko ʼihi Kilisitiano ʼi te lahi fau ʼo tonatou ʼita, neʼe natou ʼave ai te fihi ki te ʼu telepinale. Neʼe ʼui fēnei e Paulo: “ ʼE ko he lavā kātoa ʼo koutou ʼi takotou fefakamāumeʼaʼaki.” Koteā tona tupuʼaga? Ko tona tupuʼaga tāfito heʼe ko te taʼi fai ʼaia ʼe feala ke ʼulihi ai te matagafua ʼo te kōkelekāsio pea mo te ʼAtua ʼaē ʼe tou ʼatolasio ki ai. Koia ʼe maʼuhiga kiā tātou ia te fehuʼi ʼaenī neʼe fai e Paulo: “He koʼē ʼe mole kotou tuku ke kovi kiā koutou?”—Vaega 7.

Neʼe toe fakahā e Paulo neʼe foaki e te ʼAtua ki te kōkelekāsio he fakatuʼutuʼu lelei moʼo fakatokatoka te ʼu tuʼuga fihi ʼaē ʼe feala ke hoko. Ko te kau tagata ʼāfea ʼe ko he ʼu tagata Kilisitiano ʼe aga fakapotopoto ʼuhi ko te ʼatamai mālama ʼaē ʼe natou maʼu ʼo ʼuhiga mo te ʼu moʼoni Fakatohi-tapu, pea ʼe ʼui e Paulo ko nātou ʼaia “ ʼe feala ke [natou] fakamāuʼi [te ʼu] tehina” “ ʼi te ʼu meʼa ʼo te maʼuli ʼaenī.” (Vaega 3 ki te 5) Neʼe fakahā e Sesu ko te ʼu fihi ʼaē ʼe pipiki ki he ʼu aga ʼe kovi neʼe fai, ohagē ko te loi peʼe ko te kaihaʼa, ʼe tonu ke fakatokatoka ʼo mulimuli ki te ʼu faʼahiga fai e tolu: ʼuluaki, ʼe tonu ke fakatokatoka te fihi ʼaia e nāua pē ʼaē neʼe fetokakoviʼaki; lua, kapau ko te ʼuluaki fakatuʼutuʼu neʼe mole hona fua, pea ʼe tonu ke ʼi ai he fakamoʼoni e tahi peʼe lua; pea tolu, kapau ko te lua fakatuʼutuʼu neʼe mole hona fua, pea ʼe tonu ke fakahā te fihi ʼaia ki te kōkelekāsio ʼaē ʼe fakafofoga e te kau tagata ʼāfea.—Mateo 18:15-17.

ʼE mahino ia, ko te kau tagata ʼāfea ʼe mole ko he ʼu tuʼi fakamāu peʼe ko he ʼu hahaʼi fai matani gāue, pea ʼe mole ko honatou maʼua ke natou foaki he ʼu tokoni ʼo ʼuhiga mo te lao peʼe ko te gāue. ʼE mole natou fai ni ʼu lao ke mulimuli kiai te ʼu tehina moʼo fakatokatoka tonatou ʼu fihi ʼo ʼuhiga mo tanatou ʼu gāue fakamālama. Kae ʼe natou kumi ke natou tokoni kiā nātou fuli ʼo te fihi ʼaia ke natou mulimuli ki te ʼu tokoni ʼo te Tohi-Tapu pea ke natou felōgoi tahi ʼo ʼuhiga mo te puleʼaki ʼaē ke natou fai moʼo fakatokatoka ia te fihi ʼaia. ʼO ʼuhiga mo te fihi ʼaē ʼe faigataʼa fau, ʼe lagi natou fia palalau anai mo te taupau fakasilikō peʼe ko te ʼu tehina ʼo te filiale ʼa te kau Fakamoʼoni ʼa Sehova. Kae ʼe ʼi ai te ʼu ʼaluʼaga ʼe mole fakaʼaoga anai kiai ia te tokoni ʼaē neʼe fai e Paulo. Koteā te ʼu ʼaluʼaga ʼaia?

ʼI ʼihi ʼaluʼaga, ʼe lagi tonu ke ʼalu he tehina ki te telepinale heʼe fakamaʼua mai e te lao kae ʼe mole ina fai anai te faʼahi ʼaia ke ina maʼu ai hana meʼa pea ʼe ina fia taupau te tokalelei. Ohagē lā, ʼe lagi tonu ke ʼalu ki te telepinale heʼe ko te fakatuʼutuʼu pē ʼaia ke feala ai hana maʼu ia te pepa ke māvete ai mo tona ʼohoana, peʼe ke ina maʼu ai he tokoni fakapaʼaga moʼo taupau tana fānau, peʼe ko te falā ʼaē ʼe tonu ke lī age e tona ʼohoana ʼi tanā kua māvete, peʼe ke ina maʼu he falā he neʼe hoko kiā ia he tuʼutāmaki, peʼe ke tohi tona higoa iā nātou ʼaē ʼe tonu ke foaki age ki ai he falā he neʼe mole haʼele lelei tanatou matani gāue, pea mo fai he pepa fakamoʼoni ʼe tohi ai tana ʼu fakatuʼutuʼu ʼo ʼuhiga mo te vaevae ʼo tona ʼu koloa. ʼE ʼi ai mo te ʼu ʼaluʼaga ʼaē ʼe lagi fia ʼalu ai he tehina ki te telepinale moʼo kumi tokoni moʼona puipui mokā ʼe ʼave anai ia ia ke fakamāuʼi ʼi he telepinale.a

Kapau ʼe fai te ʼu faʼahi ʼaia ʼaki te manatu ʼaē ke mole hoko he fihi, pea ʼe mole fakafeagai ia ki te tokoni ʼaē neʼe fai e Paulo ʼaki te takitaki ʼa te ʼAtua.b Kae ko te meʼa ʼaē ʼe tonu ke fakamuʼamuʼa e he Kilisitiano ʼe ko te tapuhā ʼo te huafa ʼo Sehova pea mo te tokalelei pea mo te logotahi ʼo te kōkelekāsio. ʼE ʼiloʼi tāfito te ʼu tisipulo ʼa Kilisito ʼuhi ko tonatou ʼofa, pea “ko te ʼofa [ia]. . . ʼe mole ina kumi pē te meʼa ʼaē ʼe ʼaoga kiā te ia.”—1 Kolonito 13:4, 5; Soane 13:34, 35.