Kotou Lotofoaki

HE KOʼE ʼE MAʼUHIGA?

Ka tou lotofoaki, tatau aipe pe ʼe veliveli te meʼa ʼae ʼe tou foaki, ʼe tou fiafia pea ʼe ʼi ai te ʼuhiga ʼo totatou maʼuli. Neʼe fai te ʼu sivi pea neʼe ha mai ai ka tou lotofoaki pea ʼe lelei ki totatou maʼuli malolo pea mo te fakakaukau. Ohage la, ʼe siʼisiʼi ai totatou lotohoha, totatou tuʼania, totatou tosio, maʼia mo ʼotatou mamahi. Pea ʼe toe lelei ai mo tatatou moe.

ʼE faigafua anai hatatou tali te tokoni ʼa ʼihi, moka ʼe tou foaki ki ʼihi he foʼi falā peʼe ko he tahi age meʼa. Ko Howard ʼae ʼe maʼuli ʼi Pilitania ʼe ina ui: “Ko au mo toku ʼohoana, ʼe ma kumi he ʼu faigamalie ke ma lotofoaki ai pea mo tokoni ki ʼihi. Koia, moka ʼaoga mai leva kia maua he tokoni, ʼe mole ma ufiufi ai.” ʼE moʼoni, ko natou ʼae ʼe lotofoaki ʼe mole natou fakatalitali ke toe liufaki age he meʼa. Kae ʼe feala ke natou maʼu ai ni kaumeʼa lelei ʼe tokoni anai kia natou ʼi te ʼu faigataʼaʼia.

KOTEA ʼE FEALA KE KOTOU FAI?

Kotou foaki ʼo mulimuli ki te ʼu meʼa ʼae ʼe kotou maʼu. Tatau aipe pe ʼe mole lahi te ʼu meʼa ʼae ʼe kotou maʼu, kae ʼe feala pe takotou lotofoaki. Ohage la, ʼe feala pe ke kotou fakaafe he tahi ke kotou inu ti fakatahi. Ko Duncan mo tona kiʼi famili ʼae ʼe maʼuʼuli ʼi Ouganda, ʼe natou masisiva kae ʼe natou lotofoaki moʼoni. ʼE ui e Duncan: “ ʼI te ʼAhotapu, ko au mo toku ʼohoana ʼe ma fakaafe he tahi ke matou inu ti. ʼE ma fiafia moka ʼe ma fakatahi mo ʼihi.”

ʼE moʼoni, moka ʼe tou lotofoaki ʼe tonu ke tou fakapotopoto. Ko tona fakaʼuhiga, tou foaki ʼo mulimuli pe ki te ʼu meʼa ʼae ʼe tou maʼu, naʼa tou fakamasivaʼi totatou kiʼi famili.—Sopo 17:​5.

ʼAhiʼahi fai te faʼahi ʼaeni: Kotou fakaafe he tahi ke kotou inu ti peʼe kotou foaki age pe hana meʼa inu. Pea kapau ʼe ʼi ai ni meʼa ʼe mole kei kotou fakaʼaogaʼi, he koʼe ʼe mole kotou foaki ki ʼokotou kaumeʼa peʼe ko ʼokotou vahaʼa fale? ʼE lagi ʼaoga anai te ʼu meʼa ʼaia kia natou pea ʼe natou fiafia ai anai.

Te tahi ʼu faʼahi ʼe feala ke kotou foaki. Ko ʼihi meʼa ʼofa maʼuhiga ʼe mole totogi. Ohage la, ʼe feala ke tou toʼo he temi ke tou tokakaga ai ki ʼihi. Pea ʼe toe feala foki ke tou fakalotomalohiʼi ʼihi ʼaki ʼatatou palalau. Koia, kotou fakaha tokotou ʼofa.

ʼAhiʼahi fai te faʼahi ʼaeni: ʼE feala ke kotou tokoni ki ʼihi ʼo kotou fai te ʼu gaue ʼo ʼonatou loto fale. Ohage la, ko te toe faʼu ʼo he meʼa kua maumau peʼe kotou olo ʼo fai ʼanatou fakatau. Peʼe kotou momoli he kiʼi kate ki hokotou kaumeʼa peʼe kotou faitohi ki ai ʼi te telefoni ʼo ui age pe ki ai ʼe kotou manatuʼi ia ia.

Ka tou kumi he ʼu faigamalie ke tou lotofoaki ai, ʼe tou maʼuli fiafia anai.