KA TOTOGI KOVI TE MAʼULI

Kotou Falala ʼe Fetogi Anai Te Aluʼaga ʼAia

ʼE kotou kau koa ia natou ʼae ʼe mole hiki ʼonatou totogi kae tuputupu pe te totogi kovi ʼo te maʼuli? ʼE lagi ʼe kotou tuʼania naʼa mole feala ke kotou tokakaga ki tokotou kiʼi famili. Kapau koia, ʼe lagi kotou lotohoha ʼo ʼuhiga mo te ka haʼu. Tatau aipe pe ʼe kotou tau mo he aluʼaga faigataʼa, kae ʼe maʼuhiga ke kotou lotofalala.

HE KOʼE ʼE MAʼUHIGA?

Ko he tahi ʼe lotofalala, ʼe mole fakaʼamu pe ke hoko he ʼu aluʼaga fakafiafia. ʼE ina toe uga foki ia ia ke ina faigaʼi ke lelei tona aluʼaga. Ohage la, neʼe fai te ʼu sivi ʼo ha ai ko te hahaʼi ʼae ʼe natou maʼu ni manatu ʼe lelei. . .

ʼe natou katakiʼi te ʼu aluʼaga faigataʼa
ʼe natou fai ni fetogi ʼo mulimuli ki tonatou aluʼaga
ʼe natou toʼo ni tonu fakapotopoto ʼe tokoni ke natou maʼu he maʼuli malolo ʼe lelei mo maʼuli fimalie

KOTEA ʼE FEALA KE KOTOU FAI?

ʼUluaki, kotou vakaʼi pe tokoni feafeaʼi atu te Tohi-Tapu ʼi te temi nei. ʼE maʼu ʼi te Tohi-Tapu he ʼu tokoni ʼe ʼaoga atu ke kotou tauʼi te totogi kovi ʼo te maʼuli. Pea ʼe kotou toe mahino ai foki ʼe ʼi ai tokotou tokoni pea ʼe ʼi ai te ʼu faʼahi ʼe feala ke kotou fai ʼi te temi nei mo te temi ʼae ka hoko mai ai te ʼu aluʼaga faigataʼa.

“ ʼE leʼoleʼo anai koe e te fealagia fakakaukau, pea ʼe haofaki anai koe e te fakasiosio tonu.”—Taʼaga Lea 2:11.

Lua, kotou vakaʼi pe kotea ʼae ʼe ui ʼi te Tohi-Tapu ʼo ʼuhiga mo te ka haʼu. Ka kotou mahino ʼe fakapotopoto te ʼu tokoni ʼi te Tohi-Tapu, lagi ʼe kotou fia iloʼi anai he tahi ʼu faʼahi ʼo ʼuhiga mo te ka haʼu. Ohage la, ʼe kotou iloʼi anai ʼe fia foaki atu e te ʼAtua ia “he ka haʼu mo he ʼamanaki.” (Selemia 29:11) Kae ʼe fakahoko feafeaʼi anai e te ʼAtua ia tana fakapapau ʼaia? ʼE ina fakahoko anai ʼaki tona Puleʼaga.

KOTEA TE PULEʼAGA ʼO TE ʼATUA? PEA KOTEA ANAI ʼANA GAUE?

Ko te puleʼaga ʼo te ʼAtua ʼe ko he puleʼaga ʼe ina takitaki anai te kele katoa mai te lagi. (Taniela 2:44; Mateo 6:10) ʼI te temi ʼaia, ʼe mole toe ʼi ai anai te mamahi mo te masiva, pea ʼe maʼuli tokalelei anai te hahaʼi fuli. Pea ʼe natou maʼu anai ia meʼa fuli ʼae ʼe ʼaoga ke natou maʼuli fiafia ai, ohage pe ko tona ui ʼi te ʼu vaega ʼaeni:

“ ʼE ke fiafia anai mo maʼuli fimalie.”—Pesalemo 128:2.

“ ʼE mole natou [te hahaʼi ʼae ʼe fakalogo ki te Puleʼaga] kinakina noa anai.”—Esaia 65:23.

“ ʼE mahu anai te fulumeto ʼi te kele.”—Pesalemo 72:16.

Ko te toko lauʼi miliona hahaʼi ʼe natou tui papau ki te ʼu fakapapau ʼaia, he ʼe natou iloʼi “ ʼe mole feala ke loi” te ʼAtua. (Tito 1:2) Koia, he koʼe ʼe mole kotou vakaʼi e koutou totonu ia te Tohi-Tapu? ʼE tokoni atu anai ia te ʼamanaki ʼaia, ke kotou ʼutakiʼi te ʼu fihifihia fakapaʼaga pea ke kotou tui papau ki he ka haʼu taulekaleka.