ʼE Fakaafe Koutou e Te ʼAtua Ke Koutou Kaumeʼa Mo Ia

ʼE loto e te ʼAtua ke koutou kaumeʼa mo ia. Neʼe kua koutou manatu koa ʼe feala ke koutou kaumeʼa mo ia ʼaē ʼe lahi tokotahi ʼi te ʼatulaulau? Ko Apalahamo ʼaē neʼe maʼuli ʼi te temi muʼa, neʼe fakahigoaʼi ko te kaumeʼa ʼo te ʼAtua. (Sakopo 2:23) ʼE toe talanoa te Tohi-Tapu ki te tahi ʼu hahaʼi neʼe kaumeʼa mo te ʼAtua pea neʼe lahi te ʼu tapuakina ʼaē neʼe nātou maʼu. Ia ʼaho nei, ʼe ʼi ai te ʼu hahaʼi mai te ʼu potu kehekehe ʼo te kele kua nātou kaumeʼa mo te ʼAtua. ʼE feala mo koutou ke koutou kaumeʼa mo te ʼAtua.

ʼE lelei age pe hakita kaumeʼa mo te ʼAtua. ʼE mole he temi ʼe kākāʼi ai e te ʼAtua tona ʼu kaumeʼa agatonu. (Pesalemo 18:25) ʼE lelei age hakita kaumeʼa mo te ʼAtua ʼi hakita maʼu koloā. Ka mate he tahi ʼe maʼu koloā, pea ʼe maʼu tona ʼu koloā e te tahi ʼu hahaʼi. Kae ko te hahaʼi ʼaē ʼe nātou kaumeʼa mo te ʼAtua, ʼe ʼi ai tonatou ʼu koloā ʼe mole lava faʼao e he tahi.—Mateo 6:19.

Ko ʼihi ʼe nātou faiga anai ke tuku takotou fia ʼiloʼi te ʼAtua. Māʼia mo ʼihi ʼo takotou ʼu kaumeʼa pea mo tokotou famili ʼe nātou fai anai te faʼahi ʼaia. (Mateo 10:36, 37) Kapau ʼe vāʼi koutou e te hahaʼi peʼe nātou fakamatakuʼi koutou, pea koutou fai te fehuʼi ʼaenī, ‘Ko ai ʼaē ʼe ʼau fia lelei ki ai—ko te tagata pe ko te ʼAtua?’ Koutou fakakaukauʼi te faʼahi ʼaenī: Kapau ʼe ʼui atu e he tahi ke tuku takotou kai, ʼe koutou fakalogo anai koa kia ia? Kailoa! Heʼe kapau ʼe koutou fia maʼuʼuli pea ʼe tonu ke koutou kakai. Kae ʼe lava foaki atu e te ʼAtua te maʼuli heʼegata. Koia ʼaua naʼa koutou tuku he tahi ke ina tāʼofi takotou fia ʼiloʼi ʼaē peʼe lava feafeaʼi hakotou liliu ko he kaumeʼa ʼo te ʼAtua.—Soane 17:3.