Ko Te ʼu Kaumeʼa ʼo Te ʼAtua ʼe Nātou Maʼuʼuli Anai ʼi Te Palatiso

ʼE mole hage anai te Palatiso ko te mālama ʼaē ʼe tou maʼuʼuli ai ʼi te temi ʼaenī. Neʼe mole loto e te ʼAtua ke maʼu ʼi te kele, te tokakovi, te ʼu mamahi, pea mo te tuʼania. ʼI te ka haʼu, ʼe fakaliliu anai e te ʼAtua te kele ko he Palatiso. ʼE feafeaʼi anai te Palatiso? Tou vakaʼi pe koteā ʼaē ʼe ʼui e te Tohi-Tapu:

Ko he ʼu hahaʼi agalelei. ʼE nofoʼi anai te Palatiso e te ʼu kaumeʼa ʼo te ʼAtua. ʼE nātou feagaleleiʼaki anai. ʼE nātou mulimuli anai ki te ʼu ala faitotonu ʼo te ʼAtua.—Tāʼaga Lea 2:21.

ʼE mahu anai te meʼa kai. ʼI te Palatiso, ʼe mole toe ʼi ai anai he hoge. ʼE ʼui fēnei e te Tohi-Tapu: “ ʼE mahu anai te pulapula [pe ko te meʼa kai] ʼi te kele.”—Pesalemo 72:16.

Te ʼu ʼapi matalelei pea mo te gāue fakafiafia. ʼI te Palatiso fakakelekele, ʼe tahi maʼu anai e te famili tona ʼapi. ʼE tou fai fuli anai te ʼu gāue ʼaē ʼe tou maʼu ai te fiafia moʼoni.—Isaia 65:21-23.

ʼE tokalelei anai te malamanei katoa. ʼE mole toe fetauʼaki anai te hahaʼi pea mo mamate ʼi te ʼu tau. ʼE ʼui fēnei e te Folafola ʼa te ʼAtua: “[Ko te ʼAtua] ʼe ina fakagata te ʼu tau.”—Pesalemo 46:8, 9.

ʼE pulihi anai te mahaki. ʼE fakapapau fēnei mai e te Tohi-Tapu: “ ʼE mole he tahi [ʼi te Palatiso] ʼe ina ʼui anai: ‘ ʼE ʼau mahaki.’ ” (Isaia 33:24) Tahi ʼaē meʼa, ʼe mole toe ʼi ai anai he māʼimoa, he kivi, he tuli, pe ko he tahi ʼe noa.—Isaia 35:5, 6.

ʼE mole toe ʼi ai anai he mamahi pea mo te mate. ʼE ʼui fēnei e te Folafola ʼa te ʼAtua: “E mole toe mau anai te mate. E mole toe mau anai he putu, pe ko he lauga, pe ko he mamahi, koteuhi kua puli te malama-nei afea.”—Apokalipesi 21:4.

ʼE fakaʼauha anai te hahaʼi agakovi. ʼE fakapapau fēnei mai e Sehova: “Ko te hahaʼi agakovi, ʼe toʼo anai nātou ʼi te kele; pea ko te hahaʼi kākā ʼe taʼaki ai anai nātou.”—Tāʼaga Lea 2:22.

ʼE feʼofaʼofani anai te hahaʼi pea mo nātou fefakaʼapaʼapaʼaki. ʼE mole toe maʼu anai te heʼe faitotonu, te agamālohi, te loto mānumānu, pea mo te fehiʼa. ʼE logo tahi anai te hahaʼi, pea ʼe nātou mulimuli anai ki te ʼu ala faitotonu ʼa te ʼAtua.—Isaia 26:9..