‘Neʼe Mole Natou Nofo Tokaga’

KAPAU ʼe mole tou fakalogo ki te ʼu fakatokaga heʼe tou fakaʼauʼauganoa, ʼe feala ke tou tuʼutāmaki.

ʼI te taʼu 1974, ʼi Ositalalia ʼi te kolo ʼo Darwin neʼe tagi te sirène moʼo fakatokagaʼi te hahaʼi ki te ʼamanaki hoko mai ʼo te ʼafā kae neʼe natou lolotoga teuteuʼi ia te lafeti. Kae ʼi te kolo ʼaia, neʼe talu te hoko ʼo te ʼafā kua hili kiai taʼu e 30. Koteā leva ʼaē ʼe tonu ai ke natou tui ko te ʼafā ʼaē kā ʼamanaki hoko mai ʼe kovi age anai ia? Tokolahi te hahaʼi neʼe hoki natou tokagaʼi te kovi ʼo te ʼafā ʼi te temi ʼaē neʼe natou sisio ai ki te taʼaki e te matagi ia te ʼu ʼato pea maumauʼi te ʼu kaupā ʼo te ʼu ʼapi ʼaē neʼe natou ʼolo ʼo fenonoʼi ai. ʼI te ʼaho ake, neʼe kua molemole kātoa ʼosi te kolo.

ʼI te māhina ʼo Novepeli 1985, ʼi Colombie, neʼe mapuhi te moʼuga afi. ʼI te huhuʼa ʼa te nive pea mo te ʼaisi, neʼe tafe ai te pela ki Armero ʼo mamate ai ia te toko 20 000 tupu hahaʼi. Neʼe ʼi ai koa he fakatokaga fakatomuʼa? Lolotoga te ʼu māhina ki muʼa atu neʼe galulu ai te moʼuga. Kae ʼi tanatou kua māhani ʼi te nofo ovi ʼi te punaʼaga afi, tokolahi te hahaʼi neʼe mole natou tuʼaniaʼi te faʼahi ʼaia. Ko te kau takitaki logolā tanatou kua ʼiloʼi te ʼamanaki hoko mai ʼo te tuʼutāmaki, kae neʼe mole natou fai he puleʼaki moʼo fakatokaga ki te hahaʼi. Ko te ʼu logo ʼaē neʼe tala ʼi te lātio neʼe hagē pē ia ʼe natou fakafīfīmālie te hahaʼi ʼaia. Pea neʼe mole fakahā fakahagatonu e te ʼu logo ʼaē neʼe tala ifo mai te ʼēkelesia ki te hahaʼi ʼe natou ʼamanaki ki he tuʼutāmaki. Lolotoga te pōʼuli neʼe paʼulu tuʼa lua te moʼuga afi. Kana neʼe ko koutou, ʼe kotou feholaki anai koa ʼo kotou liʼaki tokotou ʼu koloa? Tokosiʼi te hahaʼi neʼe natou foimo fai tautonu ia te faʼahi ʼaia.

ʼI te agamāhani ʼe fakahā fakatomuʼa e te hahaʼi ʼaē ʼe natou sivi te gaūgaūe ʼo te kele ia te koga meʼa tonu ʼo te kele ʼaē kā galulu ai. Kae tahitahiga tanatou lava fakahā te temi tonu ʼaē kā hoko ai. ʼI te taʼu 1999, neʼe mamate ʼi te ʼu mafuike ia te toko 20 000 hahaʼi ʼi te mālamanei. Tokolahi iā nātou ʼaia neʼe mamate neʼe mole natou ʼamanaki ʼe hoko anai kiā natou he meʼa fēia.

ʼE Kotou Feafeaʼi Ki Te ʼu Fakatokaga ʼAē ʼe Foaki Atu e Te ʼAtua?

ʼI muʼa mamaʼo atu, neʼe kua fakahā fakalelei ʼi te Tohi-Tapu ia te ʼu meʼa ʼaē kā hoko anai ʼi te ʼu ʼaho fakamuli. ʼO ʼuhiga mo te faʼahi ʼaia, ʼe fakaloto mālohiʼi mai tātou ke tou fakakaukau ki “te ʼu ʼaho ʼaē ʼo Noe.” ʼI “te ʼu ʼaho ʼaia ʼi muʼa ʼo te tulivio,” neʼe tōkakaga pē te hahaʼi ki te ʼu gāue māhani ʼo te maʼuli, logolā tanatou tuʼaniaʼi te mahu ʼo te agamālohi. Ohagē pē ko te fakatokaga ʼaē neʼe foaki age e te ʼAtua ki tana tagata kaugana ko Noe, ‘neʼe mole natou fakatokagaʼi he meʼa ʼo aʼu ki te haʼu ʼa te tulivio pea neʼe ʼave fuli ai ia nātou.’ (Mateo 24:37-39) Kana neʼe ko koutou lā, ʼe kotou fakalogo anai koa ki te fakatokaga? ʼE kotou fakalogo koa ki te fakatokaga ʼaē ʼe fai atu ʼi te temi nei?

Pea kanapau lā neʼe ko koutou ʼaē neʼe nonofo ʼi Sotoma, ʼo ovi atu ki te Tai Mate, ʼi te temi ʼo Lote, te ʼilāmutu ʼo Apalahamo? Neʼe hagē te fenua ko he palatiso, pea neʼe koloaʼia te kolo, pea ko te hahaʼi neʼe maʼuli fakafīfīmālie. ʼI te temi ʼo Lote ko te hahaʼi “neʼe natou kakai, neʼe natou ʼiʼinu, neʼe natou totogi, neʼe natou fakatau, neʼe natou tō gāue, neʼe natou laga fale.” Kae ko te mālama ʼaē neʼe māʼuʼuli ai te hahaʼi neʼe kovi ʼaupitō tanatou aga heʼeʼaoga. Kana neʼe ko koutou lā, ʼe kotou tui anai koa ki te tala fakahagatonu e Lote ia te agakovi ʼa te hahaʼi? ʼE kotou fakalogo anai koa kiā Lote ʼi tana ʼui ʼaē ko te ʼAtua ʼe ina ʼamanaki fakaʼauha ia te kolo ʼo Sotoma? Peʼe lagi ʼi takotou manatu ʼe fakahuahua ia, ohagē ko te manatu ʼo nāua ʼaē neʼe feala pē ke liliu ko te ʼu ʼohoana ʼo tona ʼu ʼofafine? Pea kapau lā neʼe kua kotou kamata feholaki, ʼe kotou toe maliu anai koa ʼo sio ki muli ohagē ko te ʼohoana ʼo Lote? Pea tatau aipē pe neʼe mole tokagaʼi e te hahaʼi ʼo Sotoma ia te fakatokaga ʼa Lote, kae ʼi te ʼaho ʼaē neʼe hū ai ki tuʼa mai te kolo “neʼe tō ifo mai te lagi te ʼua afi mo te sulifa, ʼo fakaʼauha fuli ai ia nātou.”—Luka 17:28, 29.

ʼI totatou temi, tokolahi te hahaʼi ʼe mole natou nofo tokaga. Kae ko te ʼu faʼifaʼitaki ʼaenī e lua ʼaē ʼe tuʼu ʼi te Folafola ʼa te ʼAtua ʼe ko he fakatokaga kiā tātou pea mo fakaloto mālohiʼi ia tātou ke tou NONOFO ʼALAʼALA!

[Talanoa/Paki ʼo te pasina 22]

Neʼe Hoko Moʼoni Koa He Tulivio ʼi Te Kele Kātoa?

Kapau ʼe kaugamālie ia nātou ʼaē ʼe natou fakafisi kiai, kae ʼi te Tohi-Tapu ʼe fakahā lelei ai neʼe hoko moʼoni te tuʼutāmaki ʼaia.

Ko Sesu Kilisito totonu neʼe talanoa ki te faʼahi ʼaia, neʼe sio tonu ia ki te fakaʼauha ʼaia he neʼe nofo ia ʼi selō.

[Talanoa/Paki ʼo te pasina 23]

Neʼe Fakaʼauha Moʼoni Koa Ia Sotoma Pea Mo Komola?

ʼE fakamoʼoni kiai te ʼalekeolosia.

ʼE talanoa kiai te hisitolia.

Neʼe talanoa ia Sesu Kilisito ki te fakaʼauha ʼaia neʼe hoko moʼoni, ʼe talanoa kiai te ʼu tohi e 14 ʼo te Tohi-Tapu.