‘ ʼI Muʼa ʼo Te Meʼa Fuli, Ke Kotou Maʼu He ʼOfa ʼe Mālohi’

“Ko te fakaʼosi ʼo te ʼu meʼa fuli kua ovi mai. . . . ʼI muʼa ʼo te meʼa fuli, ke kotou femaʼuʼaki he ʼofa ʼe mālohi.”—1 PETELO 4:7, 8.

NEʼE mahino kiā Sesu neʼe maʼuhiga ʼaupitō tona ʼu hola fakaʼosi ʼaē mo tana ʼu ʼapositolo. Neʼe ina ʼiloʼi te meʼa ʼaē kā natou ʼamanaki fai. ʼE ʼi ai te toe gāue kā natou fakahoko, kae ohagē pē ko ia ʼe fehiʼaʼinaʼi anai ia nātou pea ʼe fakatagaʼi anai ia nātou. (Soane 15:18-20) ʼI te pō fakaʼosi ʼaia, neʼe liuliuga tana fakamanatuʼi age kiā nātou ia te maʼuhiga ʼaē ke natou ‘feʼofaʼofani.’—Soane 13:34, 35; 15:12, 13, 17.

² Ko te ʼapositolo ko Petelo ʼaē neʼe nofo ʼi ai ʼi te pō ʼaia, neʼe mahino lelei kiā ia te ʼu palalau ʼaē neʼe fai age e Sesu kiā nātou. Hili kiai ni ʼu taʼu, ʼi muʼa pē ʼo te fakaʼauha ʼo Selusalemi, neʼe ina fakahā te maʼuhiga ʼo te ʼofa. Neʼe ina fai te tokoni ʼaenī ki te kau Kilisitiano: “Ko te fakaʼosi ʼo te ʼu meʼa fuli kua ovi mai. . . . ʼI muʼa ʼo te meʼa fuli, ke kotou femaʼuʼaki he ʼofa ʼe mālohi.” (1 Petelo 4:7, 8) Ko te ʼu palalau ʼaē neʼe fai e Petelo, ʼe maʼuhiga ʼaupitō kiā nātou ʼaē ʼe māʼuʼuli ʼi “te ʼu ʼaho fakamuli” ʼo te ʼu faʼahiga meʼa ʼo te tuʼu ʼaenī. (2 Timoteo 3:1) Koteā te faka ʼuhiga ʼo te “ ʼofa ʼe mālohi” ʼaia? He koʼē ʼe maʼuhiga ke tou feʼofaʼofani? Pea ʼe feafeaʼi hatatou lava fakahā te taʼi ʼofa ʼaia?

Koteā Te Faka ʼUhiga ʼo Te “ ʼOfa ʼe MāLohi”?

³ Tokolahi ʼi tanatou manatu ko te ʼofa ʼe ko he kalitātē ʼe tonu ke tupu fēia pē. Kae neʼe mole talanoa ia Petelo ʼi henī ki he ʼofa fēia, neʼe talanoa ia ki te ʼofa ʼe lahi ʼaupitō age. Ko te kupu “ ʼofa” ʼaē ʼe talanoa kiai te koga tohi ʼo 1 Petelo 4:8, ʼe ko te fakaliliu ʼo te kupu faka Keleka agapê. Ko te kupu ʼaia agapê, ko tona faka ʼuhiga ko he ʼofa ʼe mole mālualoi kae ʼe takitaki peʼe puleʼi ʼaki he ʼu pelesepeto. ʼE ʼui fēnei ʼi te tohi: “Ko te ʼofa agapê ʼe feala ke puleʼi heʼe mole ko he kalitātē ʼe kita logoʼi pē ʼi tokita loto kae ko he tonu kua kita fakakaukauʼi lelei ʼe kita fai ʼaki he ʼu gāue.” Mai tona ʼuhiga ʼaē ʼe tou agahala fuli, koia ʼe ʼaoga ai ke fakamanatuʼi mai kiā tātou ke tou feʼofaʼofani, pea ke tou fai ʼo mulimuli ki te ʼu pelesepeto ʼa te ʼAtua.—Senesi 8:21; Loma 5:12.

⁴ ʼE mole faka ʼuhiga leva ke tou feʼofaʼofani pē heʼe ko hotatou maʼua. Ko te ʼofa agapê ʼe mole mālualoi ia, ʼe hā ia. Neʼe ʼui e Petelo ʼe tonu ke tou “femaʼuʼaki he ʼofa ʼe mālohi [ko tona fakaliliu, “ ʼe mafola”].”a (Kingdom Interlinear) Kae ko te ʼofa ʼaia ʼe fakamaʼua kiai he faiga mālohi. ʼO ʼuhiga mo te kupu faka Keleka ʼaē neʼe fakaliliu ʼaki te kupu ʼe “mālohi,” ʼe ʼui fēnei e te tagata sivi Tohi-Tapu: “ ʼE fakatatau ki te ʼu ivi ʼo he tagata faigaoʼi kua iviivi ʼi tana tuku fuli tona mālohi ke ina fakaʼosi te lele.”

⁵ Koia ʼe mole tou fakahā pē anai totatou ʼofa ʼi te temi ʼaē ʼe faigafua ai kiā tātou peʼe tou ʼofa pē kiā nātou ʼaē ʼe tou leleiʼia. Ko te ʼofa faka Kilisitiano ʼe ko he “folahi” ʼo totatou ʼofa ki niʼihi atu tatau aipē peʼe faigataʼa hatatou ʼoʼofa kiā nātou ʼaia. (2 Kolonito 6:11-13) ʼE mahino ia, ʼe tonu ke toe fakatuputupu mo gāueʼi te kalitātē ʼaia, ohagē pē ko he tagata faigaoʼi ʼe tonu ke ina fai tuʼumaʼu tana faigaoʼi ke liliu ʼo faiva ai. ʼE maʼuhiga tāfito ke tou femaʼuʼaki ia te taʼi ʼofa ʼaia, mai tona ʼu tupuʼaga ʼaenī e tolu.

He Koʼē ʼe Tonu Ke Tou Feʼofaʼofani?

⁶ ʼUluaki, ʼe tonu ke tou feʼofaʼofani “he ko te ʼofa ʼe haʼu mai te ʼAtua.” (1 Soane 4:7) ʼE ko Sehova, ia te Matapuna ʼo te kalitātē taulekaleka ʼaia, ʼaē neʼe ʼuluaki ʼofa kiā tātou. ʼE ʼui fēnei e te ʼapositolo ko Soane: “ ʼAki te meʼa ʼaenī neʼe hā ai te ʼofa ʼo te ʼAtua kiā tātou, koteʼuhi neʼe fekauʼi mai e te ʼAtua tona ʼAlo ʼulu tokotahi ki te mālamanei, ke feala ai ʼaki ia ia ke tou maʼu ai te maʼuli.” (1 Soane 4:9) Ko te ʼAlo ʼo te ʼAtua neʼe “fekauʼi mai” ke tupu ko he tagata ʼi te kele, pea ke ina fakahoko tona minisitelio, pea ke mate ʼi te pou fakamamahi—ko te ʼu meʼa fuli ʼaia neʼe hoko ‘ke feala ai hatatou maʼu ia te maʼuli.’ ʼE tonu ke feafeaʼi hatatou tali ki te ʼofa lahi ʼaia ʼo te ʼAtua? ʼE ʼui fēnei e Soane: “Kapau neʼe fēia te ʼofa ʼo te ʼAtua kiā tātou, pea ʼe maʼua foki kiā tātou ke tou feʼofaʼofani.” (1 Soane 4:11) Kotou fakatokagaʼi te manatu ʼaenī neʼe tohi e Soane: “Kapau neʼe fēia te ʼofa ʼo te ʼAtua kiā tātou”—ʼe mole kiā koutou pē ʼaē neʼe ʼofa ki ai kae neʼe ʼofa kiā tātou. ʼE tou mahino lelei ki te puani ʼaia: Kapau ʼe ʼofa te ʼAtua ki totatou ʼu tehina mo tuagaʼane, pea ʼe maʼua kiā tātou ke tou ʼofa kiā nātou.

⁷ Lua, ʼe maʼuhiga tāfito ke tou feʼofaʼofani ʼi te temi nei ke feala ai hatatou tokoni ki ʼotatou tehina ʼaē ʼe ʼaoga kiai te faʼahi ʼaia heʼe ‘kua ovi mai te fakaʼosi ʼo te ʼu meʼa fuli.’ (1 Petelo 4:7) ʼE tou māʼuʼuli nei ʼi “te ʼu temi maʼuhiga ʼaupitō mo faigataʼa tona kātakiʼi.” (2 Timoteo 3:1) ʼE faigataʼa totatou maʼuli ʼuhi ko te ʼu ʼaluʼaga ʼo te mālamanei, mo te ʼu tuʼutāmaki ʼi te kele, pea mo te fakafeagai. ʼI te ʼu ʼahiʼahi, ʼe ʼaoga kiā tātou ke tou fefakaoviʼaki. Ko he ʼofa ʼe mālohi ʼe ina nonoʼo fakatahi anai ia tātou pea mo uga ia tātou ke tou “fetokagaʼaki.”—1 Kolonito 12:25, 26.

⁸ Tolu, ʼe tonu ke tou feʼofaʼofani heʼe mole tou fia “tuku he faigamalie ki te temonio” ke mālo iā tātou. (Efesi 4:27, Tauhi Foou) ʼE lamalama e Satana te ʼu faʼahi ʼaē ʼe tōtō ai totatou ʼu tehina mo tuagaʼane—tonatou ʼu vaivaiʼaga, tanatou ʼu hala—moʼo faka tūkia ai ia tātou. ʼE tou mavae anai koa ʼi te kōkelekāsio ʼuhi pē ʼi he palalau hala peʼe ko he aga ʼa he tahi neʼe mole tou leleiʼia? (Tāʼaga Lea 12:18) ʼE mole tou mavae anai ʼi te kōkelekāsio ʼuhi pē ko te ʼu faʼahi ʼaia mo kapau ʼe tou femaʼuʼaki iā tātou he ʼofa ʼe mālohi! Ko te taʼi ʼofa ʼaia ʼe tokoni kiā tātou ke tou taupau te tokalelei pea mo tou logo tahi “ ʼaki he loto e tahi” ʼi te tauhi ki te ʼAtua.—Sofonia 3:9.

ʼE Feafeaʼi Hatatou Fakahā Totatou ʼOfa ʼAē Ki ʼIhi

⁹ ʼE tonu muʼa ke tou fakahā totatou ʼofa ʼi totatou loto fale. Neʼe ʼui e Sesu ʼe ʼiloʼi anai tana kau tisipulo moʼoni ʼi tanatou feʼofaʼofani. (Soane 13:34, 35) ʼE tonu ke hā te ʼofa ʼaia ʼi te kōkelekāsio, kae ke toe hā foki ʼi te fāmili, ʼi te maʼuli faka taumātuʼa, pea ʼi te maʼuli ʼa te ʼu mātuʼa pea mo tanā fānau. ʼE mole tonu pē ke kita logoʼi te ʼofa ki te hahaʼi ʼo tota fāmili, kae ʼe tonu foki ke fakahā tokita ʼofa ʼi takita aga.

¹⁰ ʼE feafeaʼi ki he taumātuʼa hanā fefakahāʼaki ia tonā ʼofa? Ko he tagata ʼe ʼofa moʼoni ki tona ʼohoana ʼe ina fakahā anai ki ai ʼi tana ʼu palalau pea mo tana ʼu aga, mokā nā nonofo ʼi muʼa ʼo te kaugamālie peʼe mokā ko nāua ʼāteaina pē. ʼE fakaʼapaʼapa ki tona matagafua pea mo ina tokagaʼi tana ʼu manatu, mo tana ʼu fakatuʼutuʼu pea mo te ʼu meʼa ʼaē ʼi tona loto. (1 Petelo 3:7) ʼE ina fakamuʼamuʼa te fīmālie ʼo tona ʼohoana iā ia totonu, pea ʼe ina fai ia meʼa fuli ʼe ina lavaʼi moʼo tokaga kiā ia ʼi te faʼahi fakasino, mo te faʼahi fakalaumālie, pea mo te ʼu meʼa ʼaē ʼe loto ki ai. (Efesi 5:25, 28) Ko he fafine ʼe ʼofa moʼoni ki tona ʼohoana ʼe ina fakahā ki ai he “fakaʼapaʼapa lahi,” tatau aipē mo kapau ʼi ʼihi temi neʼe mole fai e tona ʼohoana te meʼa ʼaē ʼe loto kiai. (Efesi 5:22, 33) ʼE lagolago ki tona ʼohoana pea mo fakalogo ki ai, pea ʼe mole ina fakamaʼua age anai he meʼa ʼe fakavalevale, kae ʼe lagolago tuʼumaʼu ki ai ke feala hanā tōkakaga tāfito ki te ʼu meʼa fakalaumālie.—Senesi 2:18; Mateo 6:33.

¹¹ ʼU mātuʼa, ʼe feafeaʼi hakotou fakahā tokotou ʼofa ki takotou fānau? ʼE kotou fakahā tokotou ʼofa ʼaē kiā nātou ʼaki takotou gāue kinakina moʼo foaki kiā nātou ia te ʼu meʼa ʼaē ʼe ʼaoga kiā nātou ʼi te faʼahi fakasino. (1 Timoteo 5:8) Kae ko te ʼu meʼa ʼaē ʼe ʼaoga kiā nātou, ʼe mole gata pē ʼi te foaki ʼo hanatou meʼa kai, mo honatou ʼu mutuʼi meʼa, pea mo honatou nofoʼaga. Ke feala hanatou ʼoʼofa pea mo tauhi ki te ʼAtua moʼoni mokā natou lahilahi ake, ʼe tonu ke foaki e te ʼu mātuʼa kiā nātou ia he ako fakalaumālie. (Tāʼaga Lea 22:6) Ko tona faka ʼuhiga ʼe tonu kiā koutou pea mo tokotou fāmili ke kotou ako te Tohi-Tapu, mo kotou kau ki te minisitelio pea mo te ʼu fono. (Teutalonome 6:4-7) Ke feala hakotou kau tuʼumaʼu ki te ʼu gāue fakalaumālie ʼaia, ʼe tonu ke kotou fai he ʼu sākilifisio lahi, tāfito lā heʼe tou māʼuʼuli nei ʼi te ʼu temi faigataʼa. Ko takotou tōkakaga pea mo takotou gāue kinakina moʼo foaki kiā nātou he ako fakalaumālie, ʼe ko hakotou fakahā ʼaia ʼo tokotou ʼofa kiā nātou, heʼe ʼiloga ai takotou loto ʼaē ke natou māʼuʼuli fīmālie ʼo heʼegata.—Soane 17:3.

¹² ʼE maʼuhiga ke toe fakahā e te ʼu mātuʼa tonatou ʼofa ki tanatou fānau ʼaki tanatou tōkakaga ki te ʼu meʼa ʼaē ʼe natou hoha kiai. Ko te tamaliki ʼe lotovaivai gafua; koia ʼaē ʼe ʼaoga ai ke kotou fakahā tuʼumaʼu age kiā nātou tokotou ʼofa. Ko takotou ʼui age ʼaē ʼe kotou ʼoʼofa kiā nātou, pea toe lahi mo te ʼofa ʼaē ʼe kotou foaki age kiā nātou, ʼe feala ai leva ke natou ʼiloʼi papau ai, ʼe ʼofainaʼi ia nātou pea ʼe ʼi ai mo tonatou maʼuhiga. Kotou ʼoʼofa pea mo fakavikiviki fakamālotoloto kiā nātou, ke tupu ai hanatou ʼiloʼi, ʼe kotou tokagaʼi pea mo leleiʼia tanatou ʼu faiga. Kotou akonakiʼi ia nātou ʼaki te ʼofa, heʼe mahino ai leva kiā nātou ʼe kotou loto ke natou liliu ki ʼamuli ko he ʼu hahaʼi ʼe lelei. (Efesi 6:4) Ko te ʼu taʼi fakahāhā ʼofa ʼaia ʼe ko he ʼu fakatafito moʼo laga ʼo he fāmili fiafia pea mo logo tahi, pea mo teuteuʼi ke ina lava tekeʼi te ʼu faigataʼaʼia ʼo te ʼu ʼaho fakamuli ʼaenī.

¹³ Ko te ʼofa ʼe ina uga ia tātou ke tou fakalaka ʼi te ʼu hala ʼa ʼihi. Kotou manatuʼi, ʼi te temi ʼaē neʼe fakaloto mālohiʼi ai e Petelo te kau Kilisitiano ke natou “femaʼuʼaki he ʼofa ʼe mālohi,” neʼe ina fakahā te tupuʼaga ʼo te maʼuhiga ʼo te fai ʼo te aga ʼaia: “Heʼe ko te ʼofa ʼe ina ʼuʼufi he tuʼuga agahala.” (1 Petelo 4:8) Ko te “ ʼuʼufi” ʼo te ʼu agahala ʼe mole faka ʼuhiga leva ke ‘fufū’ te ʼu agahala mamafa. ʼE tonu ke fakahā te ʼu agahala ʼaia pea ke fakatokatoka e te ʼu tehina takitaki ʼo te kōkelekāsio. (Levitike 5:1; Tāʼaga Lea 29:24) Heʼe kapau ʼe mole tou fai ia te faʼahi ʼaia, pea ʼe mole leva ko he ʼofa ʼaia pea mo he fakaʼapaʼapa ki te Tohi-Tapu, mo kapau ʼe tou tuku ki he tahi ʼe agahala ke hoko atu tana fai te meʼa ʼaē ʼe kovi ki niʼihi ʼe mole hanatou hala.—1 Kolonito 5:9-13.

¹⁴ ʼI te agamāhani, ko te ʼu hala ʼo totatou ʼu tehina mo tuagaʼane ʼe ko te ʼu kiʼi hala noa pē. Ko tātou fuli ʼi ʼihi temi ʼe tou tūkia ʼi tatatou ʼu palalau peʼe ʼi tatatou aga, ʼo feala ai ki ʼihi ke natou lotomamahi peʼe ke natou ʼiʼita. (Sake 3:2) ʼE tonu koa ke tou foimo valokiʼi te ʼu hala ʼa ʼihi? Ko te taʼi fai ʼaia ʼe ina fakatupu aipē te hoko ʼo he ʼu tokakovi ʼi te kōkelekāsio. (Efesi 4:1-3) Kapau ʼe tou ʼofa, pea ʼe mole tou ‘valoki anai he hala’ ʼo hotatou tehina. (Pesalemo 50:20) Ohagē pē ko te fakamomole pea mo te pena ʼe nā ʼuʼufi te ʼu faʼahi ʼaē ʼe mole faʼa lelei ʼo he kaupā, ʼe toe fēia pē mo te ʼofa ʼe ina ʼuʼufi te ʼu hala ʼa ʼihi.—Tāʼaga Lea 17:9.

¹⁵ Ko te ʼofa ʼe ina uga anai ia tātou ke tou tokoni ki niʼihi ʼe ʼaoga tāfito kiai te faʼahi ʼaia. ʼI te kua ʼāsili kovi ʼo te maʼuli, ʼi te ʼu ʼaho fakamuli ʼaenī, ʼe feala ʼi ʼihi temi ke ʼaoga ki ʼotatou tehina ia he tokoni fakakoloa peʼe ko he tokoni moʼo faka faigafua ʼo te maʼuli. (1 Soane 3:17, 18) Ohagē lā, neʼe tau koa he tahi ʼi te kōkelekāsio mo he fihifihia faka paʼaga peʼe mole kei gāue? Kapau ʼe feala ke tou tokoni kiā nātou ʼaia ʼaki he ʼu koloa pea ʼe tou fai anai te faʼahi ʼaia ʼaki te meʼa ʼaē ʼe tou lavaʼi. (Tāʼaga Lea 3:27, 28; Sake 2:14-17) ʼE ʼaoga koa ke fai he ʼu gāue ʼi he fale ʼo he finematuʼa vītua? He koʼē ʼe mole tou fai he fakatuʼutuʼu moʼo fai ʼo he ʼu gāue ʼi ai.—Sake 1:27.

¹⁶ ʼE mole tou fakahā pē anai totatou ʼofa kiā nātou ʼaē ʼe nofo ovi mai kiō tātou. ʼI ʼihi temi, ʼe tou maʼu logo ko he ʼu kaugana ʼa te ʼAtua ʼe nonofo ʼi he ʼu fenua neʼe hoko ai he ʼu ʼafā, peʼe ko he ʼu mafuike, peʼe ko he ʼu maveuveu. Lagi kiā nātou ʼaia ʼe ʼaoga fakavilivili kiā nātou hanatou meʼa kai, mo honatou ʼu mutuʼi meʼa, pea mo ʼihi age meʼa. ʼE mole toe lau ʼi te temi ʼaia peʼe ko he tahi ʼe kau ʼi he tahi lanu. ʼE tou “ ʼoʼofa ki te fāmili kātoa ʼo te ʼu tehina.” (1 Petelo 2:17) Koia ohagē ko te ʼu kōkelekāsio ʼo te ʼuluaki sēkulō, ʼe tou fiafia ʼi te lagolago ki te ʼu tokoni ʼaē ʼe fai moʼo foaki kiā nātou ʼaia ʼe tau mo te faigataʼaʼia. (Gāue 11:27-30; Loma 15:26) Kapau ʼe tou fakahā fēia totatou ʼofa ʼi te ʼu faʼahi fuli ʼo totatou maʼuli, pea ʼe tou fakamālohiʼi ai anai te noʼo ʼaē ʼe tupu ai tatatou logo tahi ʼi te ʼu ʼaho fakamuli ʼaenī.—Kolose 3:14.

¹⁷ Ko te ʼofa ʼe ina uga ia tātou ke tou tala te logo lelei ʼo te Puleʼaga ʼo te ʼAtua ki te hahaʼi. Tou vakaʼi te faʼifaʼitaki ʼa Sesu. He koʼē neʼe fai faka mafola pea mo faiakonaki? Koteʼuhi neʼe “ ʼofa mamahi” ki te hahaʼi he neʼe natou ʼāhua ʼi te faʼahi fakalaumālie. (Maleko 6:34) Neʼe mole gaohi fakaleleiʼi ia nātou pea neʼe kākāʼi ia nātou e te kau tauhi ovi faka lotu, ʼaē neʼe tonu ke natou akoʼi age kiā nātou te ʼu moʼoni fakalaumālie pea mo foaki age kiā nātou he ʼamanaki. Koia ko Sesu ʼi te lahi pea mo te fakamālotoloto ʼo tona ʼofa, pea mo tona manavaʼofa, neʼe ina fakafīmālieʼi te hahaʼi ʼaki tana fakahā age kiā nātou “te logo lelei ʼo te puleʼaga ʼo te ʼAtua.”—Luka 4:16-21, 43.

¹⁸ Iā ʼaho nei, ʼe tokolahi te hahaʼi ʼe ʼāhua ʼi te faʼahi fakalaumālie pea neʼe kākāʼi ia nātou, pea ʼe mole hanatou ʼamanaki. Kapau ohagē ko Sesu, ʼe tou tōkakaga ki te ʼu meʼa fakalaumālie ʼaē ʼe ʼaoga ki te hahaʼi ʼaē ʼe heʼeki natou ʼiloʼi te ʼAtua moʼoni, pea ʼe tou fakahā anai kiā nātou ʼaki te ʼofa pea mo te manavaʼofa ia te logo lelei ʼo te Puleʼaga ʼo te ʼAtua. (Mateo 6:9, 10; 24:14) ʼI te kua nounou ʼo te temi, kua maʼuhiga ʼaupitō ʼi te temi nei ke tou faka mafola te logo ʼaē kā ina haofaki te hahaʼi.—1 Timoteo 4:16.

“Ko Te Fakaʼosi ʼo Te ʼu Meʼa Fuli Kua Ovi Mai”

¹⁹ Kotou manatuʼi, neʼe kamata e Petelo ia tana tokoni ʼaē ke tou feʼofaʼofani ʼaki te ʼu palalau ʼaenī: “Ko te fakaʼosi ʼo te ʼu meʼa fuli kua ovi mai.” (1 Petelo 4:7) Kua vave fetogi te mālama agakovi ʼaenī kae fakatuʼu te mālama foʼou pea mo faitotonu ʼa te ʼAtua. (2 Petelo 3:13) Koia ʼe mole ko te temi ʼaenī ke tou fakaʼauʼauganoa ai. Neʼe fakatokagaʼi fēnei tātou e Sesu: “Kotou tokaga kiā koutou totonu, [ʼo manavasiʼi] naʼa mamafa tokotou ʼu loto ʼi te lahi fau ʼo te kai, pea mo te lahi fau ʼo te ʼinu, pea mo te ʼu tuʼania ʼo te maʼuli, pea mo fokifā pē kua hoko fakapunamaʼuli mai kiā koutou te ʼaho ʼaia [ʼi te moʼi lakaga pē ʼaia] ohagē ko he hele.”—Luka 21:34, 35.

²⁰ Koia, ke tou fai ia meʼa fuli ke tou “nonofo ʼalaʼala,” pea ke tou ʼiloʼi tuʼumaʼu peʼe tou ʼifea ʼi te hoholo ʼo te temi. (Mateo 24:42) Tou tōkakaga ki te ʼu fakahala ʼa Satana ʼaē ʼe feala ke lelu ai tatatou ʼalaʼala. ʼAua naʼa tou tuku ki te mālama agakovi ʼaenī pea mo heʼeʼofa ke ina tāʼofi tatatou fakahā ia te ʼofa ki ʼihi. Kae ko te meʼa ʼaē ʼe maʼuhiga tāfito, ke tou fakaovi tuʼumaʼu ki te ʼAtua moʼoni ko Sehova, ʼaē ko tona Puleʼaga ʼe takitaki e te Mēsia kā ina vave fakahoko tana fakatuʼutuʼu faka kolōlia ki te kele.—Fakahā 21:4, 5.

[Nota]

TE ʼU FEHUʼI ʼO TE AKO

• Koteā te tokoni fakaʼosi ʼaē neʼe fai e Sesu ki tana kau tisipulo, pea koteā ʼaē ʼe hā mai ai neʼe mahino lelei ia Petelo ki te tokoni ʼaia? (Pal. 1-2)

• Koteā te faka ʼuhiga ʼo te “ ʼofa ʼe mālohi”? (Pal. 3-5)

• He koʼē ʼe tonu ke tou feʼofaʼofani? (Pal. 6-8)

• ʼE feafeaʼi hakotou fakahā tokotou ʼofa ʼaē ki ʼihi? (Pal. 9-18)

• He koʼē ʼe mole ko he temi ke tou fakaʼauʼauganoa ai, pea koteā ʼaē ʼe tonu ke tou tui papau ʼo fai? (Pal. 19-20)

[Paki ʼo te pasina 29]

Ko he fāmili logo tahi ʼe faigafua age hana nofo teuteu ki te tauʼi ʼo te ʼu faigataʼaʼia ʼo te ʼu ʼaho fakamuli ʼaenī

[Paki ʼo te pasina 30]

Ko te ʼofa ʼe ina uga ia tātou ke tou tokoni kiā nātou ʼaē ʼe ʼaoga tāfito kiai te faʼahi ʼaia

[Paki ʼo te pasina 31]

ʼE ko he aga ʼofa mo kapau ʼe tou faka mafola te logo lelei ʼo te Puleʼaga ʼo te ʼAtua ki niʼihi