Koteā ʼAē ʼe Kotou Fakaʼaogaʼi Kiai Ia Tokotou Maʼuli?
• Tokolahi te hahaʼi ʼi tanatou tōkakaga fau ki tanatou ʼu gāue ʼaē ʼi te ʼaho fuli, ʼe mole kei natou fakakaukauʼi pe koteā ʼaē ʼe natou fakaʼaogaʼi kiai tonatou maʼuli.
• Ko te Tohi-Tapu ʼe ina fakatokagaʼi mai te ʼu meʼa fakatalakitupua ʼaē kā ʼamanaki hoko mai. ʼE ina toe fakatokaga mai ia te toe fetogi lahi kā hoko ʼi te mālamanei ʼo ʼuhiga mo te ʼu fakatuʼutuʼu fakatagata. Ke tou mahino lelei ki te ʼu fakatokaga ʼaia pea mo tou hao foki mai ai, ʼe tonu ke tou foimo fai he puleʼaki kiai.
• Ko ʼihi ʼe natou ʼiloʼi te ʼu fakakikite ʼi te Tohi-Tapu pea ʼe natou faiga ke natou fakalogo kiai, kae ʼe fakaleluʼi ia nātou e te ʼu tuʼania ʼo te maʼuli.
• ʼE kotou fiafia koa ki takotou faʼahiga fakaʼaogaʼi ʼo tokotou maʼuli? Kā kotou fai he ʼu fakatuʼutuʼu, ʼe kotou fakakaukauʼi koa peʼe malave feafeaʼi anai ki takotou ʼu fakatuʼutuʼu ki te kā haʼu?
[Talanoa/Paki ʼo te pasina 9]
Koteā ʼAē ʼe Maʼuhiga Tāfito Kiā Koutou?
Kotou fakahā ʼaki he ʼu nūmelo, pe ko te puani fea ʼi te ʼu manatu ʼaē ʼe tuʼu ʼi lalo, ʼe kotou fakamuʼamuʼa ʼi tokotou maʼuli.
ʼE lahi te ʼu puani ʼi te ʼu puani ʼaia ʼe maʼuhiga ki totatou maʼuli, kae kapau ʼe tonu ke kotou filifili, ko te puani fea ʼaē ʼe tuʼulaga ʼuluaki ʼi tokotou maʼuli, peʼe tuʼulaga lua? ʼo kotou fai hoholo ai.
․․․ Te ʼu fakafiafia pea mo te ʼu mālōlō
․․․ Taku gāue
․․․ Toku fīmālie fakasino
․․․ Toku maʼuli fiafia ʼāteaina
․․․ Toku ʼohoana
․․․ Taku ʼu mātuʼa
․․․ Taku fānau
․․․ Hoku ʼapi matalelei, mo hoku ʼu mutuʼi meʼa matalelei
․․․ Ke au lelei ʼi te ʼu meʼa fuli
․․․ Taku tauhi ki te ʼAtua
[Talanoa ʼo te pasina 10, 11]
ʼE Taki Koa Ia Koutou e Te ʼu Tonu ʼAē ʼe Kotou Fai Ki Te Meʼa ʼAē ʼe Kotou Loto Kiai?
KOTOU FAKAKAUKAUʼI TE ʼU FEHUʼI ʼAENĪ ʼE TUʼU ʼI LALO
TE ʼU FAKAFIAFIA PEA MO TE ʼU MĀLŌLŌ: Ko te ʼu fakafiafia ʼaē ʼe au fili, ʼe au mālōlō ai koa? ʼE au kumi koa ia he ʼu meʼa ʼe mālohi ke logoʼi e toku sino, ʼo tupu ai hoku mahaki, pea mo feala ai ke au māʼimoa? ʼE feala koa ki he faʼahiga “fakafiafia ʼi he ʼu kiʼi hola pē” ke au mamahi ai ʼi toku maʼuli kātoa? Tatau aipē peʼe lelei te fakafiafia ʼaē neʼe au fili, kae ʼe au fakaʼaogaʼi koa he temi lahi kiai, ʼo mole kei au maʼu he temi ki te fai ʼo te ʼu meʼa ʼaē ʼe maʼuhiga age?
TAKU GĀUE: ʼE au gāue faka feʼauga pē koa moʼo totogi te ʼu meʼa ʼaē ʼe ʼaoga tāfito ki toku maʼuli, peʼe kua liliu te gāue ia ko he meʼa kua au kaugana kiai? Kua au mahaki koa heʼe kua lahi fau taku tokaga ki taku gāue? ʼE au leleiʼia age koa haku gāue hola fakalaka, ʼi he maʼu ʼo hoku temi ke au nofo ai mo toku ʼohoana pea mo taku fānau? Kapau lā ʼe kole mai e toku pātolō ke au fai he gāue ʼe fakatuta ai ki toku leʼo ʼo loto peʼe tupu ai haku mole kei fai fakalelei ia toku ʼu maʼua fakalaumālie, ʼe au tali anai koa ke au fai te gāue ʼaia ke ʼaua naʼa fakamavae au?
TOKU FĪMĀLIE FAKASINO: ʼE au meʼa noaʼi koa toku fīmālie fakasino peʼe au tokaga ʼo taupau fakalelei? ʼE ko he faʼahi koa ʼe au palalau tuʼumaʼu kiai? ʼE au fakahā ai koa taku tokaga ʼaē ki toku fāmili ʼi taku tokaga ki te faʼahi ʼaia?
TOKU MAʼULI FIAFIA ʼĀTEAINA: ʼE ko he faʼahi koa ʼe au fakamuʼamuʼa ʼi te meʼa fuli? ʼE au fakamuʼamuʼa age koa toku maʼuli fiafia ʼi ʼaē ʼo toku ʼohoana peʼe ʼo toku fāmili? ʼI toku ʼuhiga kaugana ʼa te ʼAtua, ʼe lelei koa te ʼu faiga ʼaē ʼe au fai ke au aʼu kiai?
TOKU ʼOHOANA: ʼE au tokaga pē koa ki ai mokā kua au faigamālie? ʼE au fakaʼapaʼapa koa ki ai, heʼe tuha mo ia te faʼahi ʼaia? Ko taku tui koa ki te ʼAtua ʼaē ʼe ina takitaki taku aga ʼaē ʼe au fai ki toku hoa?
TAKU ʼU MĀTUʼA: Kapau ʼe kei au veliveli, ʼe au fakalogo koa ki taku ʼu mātuʼa: ʼo au tali fakaʼapaʼapa age kiā nāua mokā nā palalau mai, ʼo au fai te ʼu gāue ʼaē ʼe nā fakatotonu mai, ʼo au mulimuli ki te ʼu hola ʼaē kua nā faka tuʼakoi mai ke au haʼu ai ki fale, ʼo au fakamamaʼo mai te ʼu fakakaugā kovi pea mo te ʼu gāue ʼaē kua nā fakatokaga mai kiai? Kapau kua au lahi, ʼe kei au fakaʼapaʼapa koa ʼo fakalogo kiā nāua, ʼo au foaki ia te tokoni ʼaē ʼe ʼaoga kiā nāua? Ko te aga ʼaē ʼe au fai kiā nāua, ʼe au fai pē heʼe lelei kiā au peʼe au fai ʼo mulimuli ki te tokoni ʼa te Folafola ʼa te ʼAtua?
TAKU FĀNAU: ʼE au mahino koa ko toku maʼua ke au akoʼi ki taku fānau ia te ʼu aga ʼaē ʼe tonu ke natou fai, peʼe au tuku te faʼahi ʼaia ke fai e te faleako? ʼE lahi koa te temi ʼaē ʼe au tokaga ai ki taku fānau, peʼe kua au tuku ki he ʼu gaoʼi, mo te televisio peʼe ko te olotinatea ke natou maʼumaʼua ai? ʼE tonu koa ke au akonakiʼi tuʼumaʼu taku fānau mokā neʼe natou maumauʼi he ʼu pelesepeto faka Tohi-Tapu, peʼe hoki au akonakiʼi pē nātou ʼi te temi ʼaē ʼe au ʼita ai?
HOKU ʼAPI MATALELEI, MO HOKU ʼU MUTUʼI MEʼA MATALELEI: Koteā ʼaē ʼe ina takitaki taku tokaga kiā au pea mo te ʼu meʼa ʼaē ʼe au maʼu—ko te manatu ʼa te hahaʼi? peʼe ko te fīmālie ʼo toku fāmili? peʼe ko toku ʼuhiga kaugana ʼa te ʼAtua?
KE AU LELEI ʼI TE ʼU MEʼA FULI: ʼE maʼuhiga tāfito koa kiā au ke au fai fakalelei he faʼahiga meʼa pē? ʼE au faiga koa ke au laka age ʼi ʼihi? ʼE au hoha koa mo kapau ʼe gāue lelei age he tahi iā au?
TAKU TAUHI KI TE ʼATUA: ʼE maʼuhiga age koa kiā au toku leleiʼia e te ʼAtua, peʼe ko haku fia lelei ki toku ʼohoana, mo taku fānau, mo taku ʼu mātuʼa peʼe ko toku pātolō? ʼI haku faiga ki hoku ʼu lelei faka koloa, ʼe au tuku ai anai koa taku tauhi ʼaē ki te ʼAtua ke tuʼulaga lua ʼi toku maʼuli?
KOTOU FAKAKAUKAUʼI FAKALELEI TE ʼU TOKONI FAKA TOHI-TAPU ʼAENĪ
ʼE tuʼulaga fia ia te ʼAtua ʼi tokotou maʼuli?
Tagata Tānaki 12:13: “Manavasiʼi ki te ʼAtua moʼoni pea mo taupau tana ʼu fakatotonu. He koʼenā te maʼua kātoa ʼo te tagata.”
KOTOU FAI IA TE ʼU FEHUʼI ʼAENĪ: ʼE au fakahā koa ʼi toku maʼuli ʼe au manavasiʼi ki te ʼAtua? ʼE ko taku fakalogo koa ki te ʼu fakatotonu ʼa te ʼAtua ʼaē ʼe ina takitaki taku faʼahiga fakahoko ʼo toku ʼu maʼua ʼi toku loto fale, ʼi taku gāue, ʼi te faleako? Peʼe hoki au tauhi pē ki te ʼAtua mokā kua au ʼāteaina mai toku ʼu maʼua ʼaē ʼe au tokaga tāfito kiai peʼe ko te ʼu fihifihia ʼo te maʼuli?
ʼE feafeaʼi takotou felōgoi mo te ʼAtua?
Tāʼaga Lea 3:5, 6: “Falala kiā Sehova ʼaki tou loto kātoa pea ʼaua naʼa ke falala ki tou ʼatamai. ʼI tou ʼu ala fuli tokagaʼi ia ia, pea ko ia, ʼe ina fakatonutonuʼi anai tou ʼu ala foufou.”
Mateo 4:10: “Ko Sehova, tou ʼAtua, ʼaē ʼe maʼua ke ke ʼatolasio ki ai, pea ʼe ko ia tokotahi pē ʼaē ʼe maʼua ke ke tauhi ki ai ʼaki he tauhi tapu.”
KOTOU FAI IA TE ʼU FEHUʼI ʼAENĪ: ʼE au mulimuli koa ki te manatu ʼo te ʼu koga tohi ʼaia? ʼE au fakahā ai koa taku falala pea mo taku pipiki ki te ʼAtua ʼi taku ʼu gāue ʼaē ʼe au fai ʼi te ʼaho fuli pea mo taku faʼahiga fakatokatoka ʼaē ia toku ʼu fihifihia?
ʼE maʼuhiga feafeaʼi kiā koutou ia te lau pea mo te ako ʼo te Tohi-Tapu?
Soane 17:3: “Ko te faka ʼuhiga ʼaenī ʼo te maʼuli heʼegata, ke natou ako ke natou ʼiloʼi ia koe, te ʼAtua moʼoni [pē] e tahi, pea mo ia ʼaē neʼe ke fekauʼi mai, ia Sesu Kilisito.”
KOTOU FAI IA TE ʼU FEHUʼI ʼAENĪ: ʼE au fakahā koa ʼe au tui moʼoni ki te Folafola ʼa te ʼAtua ʼaki te temi ʼaē ʼe au fakaʼaogaʼi ki te lau pea mo te metitāsioʼi ʼo te folafola ʼaia?
ʼE maʼuhiga feafeaʼi kiā koutou ia te kau ki te ʼu fono ʼo te kōkelekāsio faka Kilisitiano?
Hepeleo 10:24, 25: “Tou fetokagaʼaki ke tou uga iā tātou ki te ʼofa pea mo te ʼu gāue matalelei, ʼo mole tou tuku tatatou ʼu fakatahi, . . . tāfito lā heʼe kua kotou sio ki te fakaovi mai ʼo te ʼaho.”
Pesalemo 122:1: “Neʼe au fiafia ʼi tanatou ʼui mai ʼaē kiā au: ‘Tou ʼolo ki te fale ʼo Sehova.’ ”
KOTOU FAI IA TE ʼU FEHUʼI ʼAENĪ: ʼE hā koa ʼi toku maʼuli ʼe maʼuhiga kiā au te fakatotonu ʼaia ʼaē ʼe maʼu ʼi te Folafola ʼa te ʼAtua? Koteā ʼaē ʼe fakahā e taku ʼu agamāhani? ʼI te māhina ʼaenī kua hili, neʼe au tō fono koa he neʼe au tokaga ki he tahi age ʼu gāue?
ʼE kotou faʼafai koa ʼo palalau ki te ʼAtua pea mo tana ʼu fakatuʼutuʼu?
Mateo 24:14: “Ko te logo lelei ʼaenī ʼo te puleʼaga ʼe faka mafola anai ʼi te kele kātoa, ko he meʼa fakamoʼoni . . . pea hoko mai ai leva te fakaʼosi.”
Mateo 28:19, 20: “Kotou ʼolo pea ke kotou fai ni ʼu tisipulo ʼi te hahaʼi ʼo te ʼu fenua fuli pē, . . . ʼo kotou akoʼi ia nātou ke natou mulimuli ki te ʼu meʼa fuli pē ʼaē neʼe au fakatotonu atu kiā koutou.”
Pesalemo 96:2: “Kotou hiva maʼa Sehova, kotou tapuakiʼi tona huafa. ʼI te ʼaho fuli pē kotou fakahā te logo lelei ʼo tana haofaki.”
KOTOU FAI IA TE ʼU FEHUʼI ʼAENĪ: ʼE au fakamuʼamuʼa koa te gāue ʼaia ʼi toku maʼuli? Ko taku ʼu faiga ʼaē ke au kau kiai, ʼe au fakahā ai koa taku tui moʼoni ʼaē ki te maʼuhiga ʼo totatou temi?