ʼE ke iloʼi koa he tahi ʼi te kau Fakamoʼoni ʼa Sehova? ʼE lagi ko hou vahaʼa fale, peʼe ko hou kaugā gaue peʼe ko hou kaugā ako, peʼe ko he tahi neʼe kua palalau atu ʼo ʼuhiga mo te Tohi-Tapu. Kaʼe ko ai moʼoni koa ia matou? Pea he koʼe ʼe matou fakamafola ia te ʼu akonaki ʼae ʼe matou tui ki ai?

ʼE matou hage pe ko te hahaʼi fuli. ʼE matou ʼomai mai he ʼu agaʼi fenua pea mo ni aluʼaga fakasosiale kehekehe. ʼI muʼa atu, neʼe matou takitahi mo tana lotu pea ko ʼihi neʼe mole pe la natou tui ki te ʼAtua. ʼI muʼa ʼo tamatou liliu ko he kau Fakamoʼoni ʼa Sehova, neʼe matou toʼo he temi ke matou vakavakaʼi fakalelei ia te ʼu akonaki ʼo te Tohi-Tapu. (Gaue 17:11) Neʼe matou tali ia te ʼu akonaki ʼaia pea mo fai ia te tonu ʼae ke matou tauhi kia Sehova ʼAtua.

ʼE matou maʼu tapuakina ʼuhi ko te ako ʼo te Tohi-Tapu. Ohage pe ko te hahaʼi fuli, ʼe matou tau mo te ʼu fihifihia pea ʼe ʼi ai mo ʼomatou vaivaiʼaga. Kaʼe ʼi tamatou faigaʼi ʼae ke matou maʼuliʼi ia te ʼu pelesepeto Fakatohi-tapu ʼi te ʼaho fuli, ʼe matou tokagaʼi ʼona fua lelei ʼi tomatou maʼuli. (Pesalemo 128:​1, 2) Pea ʼe ko he tupuʼaga ʼaia ʼo tamatou fakaha ki te hahaʼi ia te ʼu lelei ʼae neʼe matou ako ʼi te Tohi-Tapu.

ʼE matou maʼuliʼi te ʼu lekula ʼa te ʼAtua. Ko te ʼu lekula ʼaia ʼe akoʼi ʼi te Tohi-Tapu ʼe ina uga tatou ke tou ʼofa pea mo fakaʼapaʼapa ki te hahaʼi, pea mo fai ia te ʼu aga ʼae ʼe lelei ohage ko te aga fakahagatonu pea mo te manavaʼofa. ʼE toe lagolago ki te maʼuli malolo pea mo te lelei ʼo te gaue ʼa te hahaʼi ʼo te fenua, pea mo ʼekenaki ia te logo tahi ʼi te famili pea mo te lelei ʼo te aga. ʼI tamatou iloʼi papau ʼae “ ʼe mole fakapalatahi te ʼAtua,” koia ʼe matou kau ki te foʼi famili fakalaumalie moʼoni ʼi te malamanei, he ʼe matou ʼateaina mai te ʼu fihi ʼi te ʼu lanu pea mo te politike. Logo la ʼe matou hage pe ko te hahaʼi fuli kaʼe ʼe matou faʼufaʼu ia he foʼi famili ʼe makehe.​—Gaue 4:13; 10:​34, 35.

• Kotea ʼae ʼe tatau ai ia te kau Fakamoʼoni ʼa Sehova pea mo te hahaʼi fuli?

• Kotea te ʼu lekula ʼae ʼe ako e te kau Fakamoʼoni ʼa Sehova ʼi te Tohi-Tapu?

Tokolahi te hahaʼi ʼe natou manatu ko te kau Fakamoʼoni ʼa Sehova ʼe ko te higoa ʼaia ʼo he lotu foʼou. Kaʼe ia taʼu ʼe 2 700 ki muʼa atu, neʼe ui e te ʼAtua moʼoni ʼo ʼuhiga mo ʼana kaugana ko natou ko ʼana “tagata fakamooni.” (Esaia 43:​10-12) ʼI muʼa ʼo te taʼu 1931, neʼe fakahigoaʼi matou ko te kau Ako ʼo Te Tohi-Tapu. He koʼe leva neʼe matou toʼo ia te higoa ʼae ko te kau Fakamoʼoni ʼa Sehova?

ʼE matou fakaha ai ia te huafa ʼo tomatou ʼAtua. ʼI te fakaliliu ʼo ʼihi Tohi-Tapu, neʼe fetogi ia te huafa ʼaia ʼaki te ʼu higoa fakatuʼulaga, ohage ko ʼAliki, ʼAtua, peʼe Eteleno. Kaʼe ʼo mulimuli ki te ʼu tohi ʼafeā, ʼe ha teitei tuʼa 7 000 ʼi te Tohi-Tapu ia te huafa ʼo te ʼAtua, ʼae ko Sehova. Ohage la, neʼe fakaha e te ʼAtua moʼoni kia Moisese ia tona huafa totonu, ʼae ko Sehova. Pea neʼe ina ui fenei kia ia: “Koena toku huafa ki te heegata.” (Ekesote 3:15) ʼAki te faʼahi ʼaia, ʼe makehe ia mai te ʼu ʼatua loi. ʼE matou fiafia ʼi te fua ʼo te huafa maʼoniʼoni ʼo te ʼAtua.

ʼE ina fakamahino ia tamatou gaue. Ko te ʼu hahaʼi ʼo te temi muʼa, ʼo kamata mai te tagata faitotonu ko Apele, neʼe natou fakaha ia tanatou tui ʼae kia Sehova. Lolotoga te ʼu taʼu, ko Noe, mo Apalahamo, mo Sala, mo Moisese, mo Tavite pea mo ʼihi atu, neʼe natou kau ki ‘te kau fakamoʼoni ʼae neʼe hage ko he ʼao lahi.’ (Hepeleo 11:4–12:⁠1) Ohage pe ko he tahi ʼe fakamoʼoni ʼi te telepinale maʼa he tahi neʼe mole ina fai hana hala, ʼe matou lotomalohi ʼo fakaha ia te moʼoni ʼo ʼuhiga mo tomatou ʼAtua.

ʼE matou faʼifaʼitakiʼi ai ia Sesu. ʼE fakahigoaʼi ia ia ʼi te Tohi-Tapu ko “te fakamoʼoni agatonu mo moʼoni.” (Fakaha 3:14) Neʼe ui e Sesu totonu ʼe tonu ke ina ‘fakaha ia te huafa ʼo te ʼAtua’ pea mo ‘fakamoʼoni ki te moʼoni’ ʼo ʼuhiga mo te ʼAtua. (Soane 17:26; 18:37) Neʼe tonu ki te ʼu tisipulo agatonu ʼa Kilisito ke natou fua pea mo fakaha ia te huafa ʼo Sehova. Pea ʼe faigaʼi fakamalotoloto e te kau Fakamoʼoni ʼa Sehova ke natou fai ia te faʼahi ʼaia.

• He koʼe neʼe toʼo e te kau Ako ʼo Te Tohi-Tapu ia te higoa ʼae ko te kau Fakamoʼoni ʼa Sehova?

• Neʼe talu mai ʼanafea ia te kua ʼi ai ʼa te kau fakamoʼoni ʼa Sehova ʼi te kele?

• Ko ai ia te tagata Fakamoʼoni lahi ʼa Sehova?

Neʼe fakakikite ʼi te Tohi-Tapu, ʼi te hili ʼo te mate ʼo Kilisito, ʼe malaga ake anai he ʼu tagata faiakonaki loi ʼi te lotolotoiga ʼo te kau Kilisitiano moʼoni pea ʼe natou ʼulihi anai ia te moʼoni Fakatohi-tapu. (Gaue 20:​29, 30) Pea ʼaki te temi, neʼe hoko moʼoni ia te faʼahi ʼaia. Neʼe natou fakatahiʼi ia te ʼu akonaki ʼa Sesu pea mo te ʼu manatu fakapagani, ʼo tupu ai te faʼahiga Lotu Fakakilisitiano. (2 Timoteo 4:​3, 4) ʼE tou iloʼi papau feafeaʼi ʼe tou maʼu ia ʼaho nei ia te mahino totonu ʼo ʼuhiga mo te ʼu akonaki ʼae ʼe akoʼi moʼoni mai ʼi te Tohi-Tapu?

Kua hoko mai te temi ʼae ke fakaha ai e Sehova ia te moʼoni. Neʼe ina fakakikite, ʼi te temi fakamuli ʼe tuputupu anai ia te mahino ʼo ʼuhiga mo te moʼoni. (Taniela 12:⁠4) ʼI te taʼu 1870, neʼe fakatokagaʼi e te kiʼi kutuga ʼae neʼe natou fekumi ia te moʼoni ʼe lahi ia te ʼu akonaki ʼo te ʼu lotu ʼe mole fakatafito ki te Tohi-Tapu. Koia la ʼae neʼe natou fai ai he ʼu fekumi ke natou mahino ki te ʼu akonaki totonu ʼo te Tohi-Tapu, pea neʼe tokoni age ia Sehova ke natou mahino ki tana Folafola.

Neʼe ako fakalelei e te ʼu tagata fakamalotoloto ia te Tohi-Tapu. Ko te kau Ako ʼo Te Tohi-Tapu fakamalotoloto ʼaia, te ʼuluaki higoa ʼa te kau Fakamoʼoni ʼa Sehova, neʼe natou mulimuli ki te faʼahiga ako ʼo te Tohi-Tapu ʼe kei fakaʼaogaʼi ʼi te temi nei. Neʼe natou talanoa ki te ʼu manatu takitahi. Kapau neʼe natou maʼu he vaega Tohi-Tapu ʼe mahino gataʼa, pea neʼe natou kumi he tahi age ʼu vaega moʼona fakamahino. Ka natou maʼu he tonu ʼe alu tahi mo te Tohi-Tapu katoa, pea neʼe natou tohi. ʼAki tanatou mulimuli ki te fakamahino ʼi te Tohi-Tapu, neʼe natou toe maʼu ai ia te moʼoni ʼo ʼuhiga mo te huafa ʼo te ʼAtua pea mo tona Puleʼaga, mo tana fakatuʼutuʼu ʼo ʼuhiga mo te hahaʼi pea mo te kele, mo te aluʼaga ʼo te kau mate, pea mo te ʼamanaki ki te fakatuʼuake. Neʼe tokoni age ʼanatou fekumi ke natou ʼateaina mai te ʼu akonaki loi pea mo te ʼu aga ʼae ʼe kovi.​—Soane 8:​31, 32.

ʼI te taʼu 1879, neʼe mahino ki te kau Ako ʼo Te Tohi-Tapu kua hoko ia te temi ʼae ke lahi age ia te fakaha ʼo te moʼoni. ʼI te taʼu pe ʼaia, neʼe natou kamata ta ai ʼi te lea Fakapilitania ia te nusipepa ʼae ʼe kei matou tufa ʼi te temi nei, ʼae Ko Te Tule Leʼo ʼe Ina Kalagaʼi Te Puleʼaga ʼo Sehova. ʼI te temi nei, ʼe matou vaevae ia te ʼu moʼoni Fakatohi-tapu ki te hahaʼi ia fenua ʼe 240 pea mo lea ʼe 750 tupu. Neʼe mole heʼeki ʼi ai he temi neʼe mahu feia ai ia te mahino totonu ʼae ki te moʼoni.

• ʼI te hili ʼo te mate ʼo Kilisito, kotea ʼae neʼe hoko ki te moʼoni Fakatohi-tapu?

• Kotea ʼae neʼe ina toe fakafealagia mai ke tou maʼu ia te moʼoni mai te Folafola ʼa te ʼAtua?

Lolotoga ni taʼu, neʼe fakaʼaogaʼi mo ta pea mo tufa e te kau Fakamoʼoni ʼa Sehova ia te ʼu Tohi-Tapu kehekehe. Kaʼe neʼe matou tokagaʼi ia te ʼaoga ʼo he fakaliliu foʼou ʼe tokoni anai ki te hahaʼi ke natou aʼu ki “te ʼatamai malama totonu ʼo te moʼoni,” ʼae ko te finegalo ʼaia ʼo te ʼAtua ki te hahaʼi takitokotahi. (1 Timoteo 2:​3, 4) Koia ʼi te taʼu 1950, neʼe matou kamata ta ʼihi koga ʼo tamatou Tohi-Tapu Fakaliliu ʼo Te Malama Foʼou, ʼi te lea Fakapilitania. ʼE ko he fakaliliu ʼe tuha mo te falala pea mo totonu ia lea ʼe 130, ʼo kau ai te lea Fakaʼuvea.*

* Kua maʼu ʼi te lea Fakaʼuvea te Fakaliliu ʼo Te Malama Foʼou ʼo Te Koga Tohi-Tapu Fakakeleka Fakakilisitiano.

Neʼe ʼaoga ia he Tohi-Tapu ʼe mahino gafua. ʼAki te temi ʼe fetogi ia te ʼu lea pea ʼe maʼu ʼi ʼihi fakaliliu ʼafeā ia he ʼu kupusiga palalau ʼafeā ʼe faigataʼa tatatou mahino ki ai. Tahi ʼae, kua maʼu ia te ʼu tohi ʼafeā ʼe teitei tatau mo te ʼu ʼuluaki tohi, ʼo fakafealagia ai ke mahino lelei age ia te ʼu lea ʼae neʼe tohi ʼaki te Tohi-Tapu, te lea Fakahepeleo, mo te Fakaalamea pea mo te Fakakeleka.

Neʼe ʼaoga he fakaliliu ʼe totonu. Neʼe mole tonu ki te kau faifakaliliu ke natou fetogi faʼifaʼitaliha ia te Tohi-Tapu kaʼe ke natou mulimuli fakalelei ki te ʼu tohi ʼafeā ʼae neʼe haʼu mai te ʼAtua. Kaʼe ʼe lahi ia te ʼu fakaliliu ʼo te Tohi-Tapu ʼe mole maʼu ai ia te huafa ʼo te ʼAtua ʼae ko Sehova.

Neʼe ʼaoga ke ʼi ai he fakaliliu ʼe ina fakamaʼuhigaʼi ia Ia ʼae ʼe haʼu mai ai te Tohi-Tapu. (2 Samuele 23:⁠2) Ohage ko tona ha mai ʼi te pāki ʼae ʼe tuʼu ki lalo ifo, neʼe toe fakaʼaogaʼi ʼo teitei tuʼa 7 000 ʼi te Tohi-Tapu Fakaliliu ʼo Te Malama Foʼou ia te huafa ʼo Sehova ohage ko te ʼu tohi ʼafeā. (Pesalemo 83:​18, MN ) Neʼe matou maʼu mai te ʼu fekumi fakamalotoloto ʼaia lolotoga ni taʼu ia he Tohi-Tapu ʼe faigafua tona lau pea ʼe ina fakaha lelei ia te ʼu manatu ʼa te ʼAtua. Pe ʼe ke maʼu ia te Tohi-Tapu Fakaliliu ʼo Te Malama Foʼou ʼi tau lea peʼe kailoa, ʼe matou fakalotomalohiʼi koe ke liliu ia te lau ʼo te Folafola ʼa Sehova ʼi te ʼaho fuli ko hau agamahani.​—Sosue 1:8; Pesalemo 1:​2, 3.

• He koʼe neʼe matou ui neʼe ʼaoga he fakaliliu foʼou ʼo te Tohi-Tapu?

• ◼ Ko te agamahani fea ʼae ʼe lelei ki he tahi ʼe ina fia ako ia te finegalo ʼo te ʼAtua?