ʼE mole matou totogi ia he kau takitaki ʼi tamatou kautahi. Kaʼe, ohage ko tona fai ʼi te ʼuluaki kokelekasio Fakakilisitiano, neʼe fakanofo ia te kau tagata ʼafeā fakapotopoto ke natou “taupau ia te kokelekasio ʼa te ʼAtua” ohage ko he ʼu tagata tauhi ovi. (Gaue 20:28) Ko te kau tagata ʼafeā ʼaia kua natou fotufotuʼa ʼi te faʼahi fakalaumalie ʼe natou takitaki pea mo tokakaga ki te kokelekasio, “ ʼo mole [natou] fai ʼaki he fakakinau kaʼe ʼaki he lotolelei ia muʼa ʼo te ʼAtua, ʼo mole ʼaki he lotomanumanū ki te paʼaga kaʼe ʼaki he faʼafai.” (1 Petelo 5:​1-3) Kotea te gaue ʼae ʼe natou fai maʼa matou?

ʼE natou tokakaga pea mo leʼoleʼo matou. ʼE foaki e te kau tagata ʼafeā ia he takitaki fakalaumalie pea mo tokoni ki te kokelekasio ke natou nonofo ovi kia Sehova. ʼI tanatou iloʼi ʼae ʼe ko he gaue maʼuhiga neʼe foaki age e te ʼAtua, koia ʼe mole natou fai he takitaki ʼe fefeka ki tana hahaʼi kaʼe ʼe natou tokoni mai ke fimalie pea mo fiafia ia tomatou maʼuli. (2 Kolonito 1:​24) Ohage ko he tagata tauhi ovi ʼe tokaga lelei ki te ʼu ovi takitahi ʼo tana faga ovi, ko te kau tagata ʼafeā ʼe natou faiga ke natou iloʼi lelei ia natou takitahi ʼo te kokelekasio.​​—Taaga Lea 27:⁠23.

ʼE natou akoʼi matou ki te faʼahiga fai ʼo te finegalo ʼo te ʼAtua. ʼI te vahaʼa fuli, ʼe takitaki e te kau tagata ʼafeā ia te ʼu fono ʼo te kokelekasio moʼo fakamalohiʼi ia tamatou tui. (Gaue 15:32) ʼE toe takitaki e te kau tagata faʼafai ʼaia ia te gaue faifakamafola, ʼo natou gaue fakatahi mo matou pea mo akoako matou ʼi te ʼu agaaga fuli ʼo te minisitelio.

ʼE natou foaki mai he ʼu fakalotomalohi kia matou takitokotahi. Ke feala hanatou foaki mai he ʼu tokoni fakalaumalie ʼe ʼaoga kia matou takitokotahi, ʼe ʼaʼahi matou e te kau tagata ʼafeā ʼo te kokelekasio ʼi ʼomatou ʼapi peʼe ʼi tomatou Fale Fono ʼo natou foaki mai he ʼu tokoni pea mo he fakalotomalohi ʼe toʼo mai te Tohi-Tapu.​​—Sakopo 5:​14, 15.

ʼO hilifaki ki ʼanatou gaue ʼaia ʼi te kokelekasio, ʼe toe fakamaʼua ki te tokolahi ʼi te kau tagata ʼafeā tonatou temi mo tonatou malohi ki tanatou gaue fakamalama pea mo tanatou tokakaga ki te ʼu meʼa ʼae ʼe ʼaoga ki ʼonatou kiʼi famili. ʼE tuha mo te ʼu tehina faʼafai ʼaia ke matou fakaʼapaʼapaʼi.​​—1 Tesalonika 5:12, 13.

• Kotea te gaue ʼa te kau tagata ʼafeā ʼi te kokelekasio?

• ʼE fakaha feafeaʼi e te kau tagata ʼafeā ia tanatou tokakaga kia matou?

ʼE talanoa ʼi te Tohi-Tapu ki te ʼu kutuga ʼe lua neʼe foaki age kia natou te ʼu maʼua ʼi te kokelekasio, pea ʼe fakahigoaʼi natou e te kau Fakamoʼoni ʼa Sehova ko “te kau taupau pea mo te kau faifekau fakaminisitelio.” (Filipe 1:⁠1) ʼI te agamahani, ʼe maʼu ia te ʼu tehina ʼaia ʼi te ʼu kokelekasio takitahi. Kotea te gaue ʼae ʼe fai e te kau faifekau fakaminisitelio maʼa matou?

ʼE natou tokoni ki te kolesi ʼo te kau tagata ʼafeā. Ko te kau faifekau fakaminisitelio ʼe ko he ʼu tagata ʼe natou leleiʼia ia te ʼu koloa fakalaumalie, ʼe natou tuha mo te falala pea mo gaue fakamalotoloto, ko ʼihi ʼe kei natou tupulaga pea mo ʼihi kua natou matutuʼa. ʼE natou tokakaga ki te ʼu gaue maʼuhiga pea mo ʼaoga ki te kokelekasio. ʼE natou fakafealagia ai ki te kau tagata ʼafeā ke natou tokakaga ki ʼonatou maʼua ʼi te faiakonaki pea mo te gaue fakatauhi ovi.

ʼE natou fakahoko ia te ʼu gaue ʼaoga. ʼE fakaʼaogaʼi ʼihi kau faifekau fakaminisitelio ki te fakatalitali ʼo te hahaʼi ʼae ʼe ʼomai ki te ʼu fono. Ko ʼihi ki te fakatagi, mo te tufa ʼo te ʼu tohi, mo te tokaga ki te ʼu meʼa ʼofa pea mo te tufa ʼo te ʼu telituale ki te kokelekasio. ʼE natou toe tokakaga ki te taupau ʼo tomatou Fale Fono. ʼE feala ke kole age e te kau tagata ʼafeā ke natou tokakaga kia natou ʼae kua matutuʼa. ʼE natou tali lelei ia te ʼu gaue fuli ʼae ʼe foaki age, pea ʼe fakaʼapaʼapa ia te kokelekasio kia natou ʼuhi ko tanatou gaue kinakina pea mo tanatou lotolelei.​—1 Timoteo 3:​13.

ʼE natou tuku he faʼifaʼitaki lelei. Neʼe filifili ia te kau faifekau fakaminisitelio ʼuhi ko ʼonatou kalitate fakalaumalie. Ka natou fakahoko hanatou akonaki pea ʼe natou fakamalohiʼi tamatou tui. ʼAki tanatou faʼafai ʼi te gaue faifakamafola ʼe natou ʼekenaki ai matou ke matou faʼafai ʼi te gaue ʼaia. ʼAki tanatou lagolago lelei ki te kolesi ʼo te ʼu tagata ʼafeā, ʼe natou lagolago ai ki te fiafia pea mo te logo tahi ʼi te kokelekasio. (Efeso 4:16) Pea ʼaki te temi, ʼe feala leva hanatou liliu ko he ʼu tagata ʼafeā.

• Ko te faʼahiga hahaʼi feafeaʼi ia te kau faifekau fakaminisitelio?

• ʼE tokoni feafeaʼi ia te kau faifekau fakaminisitelio ki te haʼele lelei ʼo te kokelekasio?

ʼE lahi te talanoa ʼi te Koga Tohi-Tapu Fakakeleka Fakakilisitiano kia Palenapa pea mo te apositolo ko Paulo. ʼI tonā ʼuhiga taupau feoloʼaki, neʼe ʼaʼahi e te ʼu tagata ʼaia ia te ʼu ʼuluaki kokelekasio. Kotea tona tupuʼaga? Koteʼuhi neʼe nā tokakaga moʼoni ki te maʼuli fakalaumalie ʼo te ʼu tehina. Neʼe ui e Paulo neʼe loto ia ke “toe liliu pea mo ʼaʼahi te ʼu tehina” moʼo vakaʼi ʼonatou aluʼaga. Neʼe lotolelei ia ke faifolau ia kilometa ʼe lauʼi teau moʼo fakalotomalohiʼi natou. (Gaue 15:36) Pea ʼe ko te taʼi manatu ʼaia ʼae ʼe maʼu e ʼamatou taupau feoloʼaki ia ʼaho nei.

ʼE natou ʼomai ʼo fakalotomalohiʼi matou. Ko te taupau ʼo te siliko ʼe ina ʼaʼahi kokelekasio ʼe 20 ʼape, ʼo natou gaue mo te kokelekasio takitahi lolotoga ia he vahaʼa katoa, tuʼa lua ʼi te taʼu. ʼE feala hamatou maʼu mai te ʼu tehina ʼaia pea mo ʼonatou ʼohoana mo kapau kua ʼohoana, ia he ʼu tokoni ʼaoga ki ʼomatou maʼuli. ʼE natou faiga fakamalotoloto ke natou iloʼi ia natou lalahi mo natou liliki, pea ʼe natou fia kau mo matou ʼi te minisitelio pea mo te ʼu ako. Ko te ʼu taupau ʼaia ʼe natou fakahoko ia te ʼu gaue fakatauhi ovi pea mo te ʼu tagata ʼafeā, mo fakalotomalohiʼi matou ʼaki ʼanatou akonaki ʼi te ʼu fono pea mo te ʼu fakatahi lalahi.​​—Gaue 15:⁠35.

ʼE natou fakaha he lototokaga kia matou fuli. ʼE tokakaga fakamalotoloto ia te ʼu taupau ʼo te siliko ki te maʼuli fakalaumalie ʼo te ʼu kokelekasio. ʼE natou fono mo te kau tagata ʼafeā pea mo te kau faifekau fakaminisitelio ke natou vakavakaʼi ia te tuputupu ʼo te kokelekasio pea mo foaki kia natou ia he tokoni ʼaoga ʼo ʼuhiga mo te fakahoko ʼo ʼonatou maʼua. ʼE natou tokoni ki te kau pionie ke lelei tanatou minisitelio, pea mo natou fiafia ʼi te felaveʼi mo natou ʼae ʼe foʼofoʼou mai ki te ʼu fono pea mo te logo ʼae ki ʼanatou tuputupu ʼi te faʼahi fakalaumalie. Ko te ʼu tehina takitahi ʼaia ʼe natou foaki ʼonatou maʼuli ke natou ‘kaugā gaue mo matou ke fua lelei kia matou.’ (2 Kolonito 8:​23) ʼE tonu ke matou faʼifaʼitakiʼi tanatou tui pea mo tanatou tauhi ki te ʼAtua.​​—Hepeleo 13:⁠7.

• He koʼe ʼe ʼaʼahi e te ʼu taupau ʼo te siliko ia te ʼu kokelekasio?

• Kotea te lelei ʼe ke maʼu anai ʼi ʼanatou ʼaʼahi?

Ka hoko he tuʼutamaki, ʼe fakatuʼutuʼu e te kau Fakamoʼoni ʼa Sehova ʼi te moʼi temi pe ʼaia ke natou tokoni ki ʼonatou tehina ʼae neʼe tau mo te aluʼaga ʼaia. Ko te ʼu faiga ʼaia, ʼe fakaha ai tomatou ʼofa moʼoni ki te hahaʼi. (Soane 13:​34, 35; 1 Soane 3:​17, 18) ʼE feafeaʼi tamatou fakahoko ia te tokoni ʼaia?

ʼE matou foaki he ʼu meʼa ʼofa. ʼI te temi ʼae neʼe hoko ai ia te toe hoge ʼi Sutea, neʼe momoli e te kau ʼuluaki Kilisitiano ʼo Atiokia he ʼu meʼa ʼofa ki ʼonatou tehina fakalaumalie. (Gaue 11:​27-30) ʼO toe feia, ʼi te temi ʼae ʼe matou iloʼi ai ʼe tau ʼomatou tehina ʼi he potu pe ʼo te kele mo he mamahi, pea ʼe matou tanaki ia te ʼu meʼa ʼofa ki tomatou Fale Fono pea hoki momoli leva kia natou ʼae ʼe ʼaoga tafito ki ai.​​—2 Kolonito 8:​13-15.

ʼE matou foaki ia he tokoni ʼaoga. Ko te ʼu tagata ʼafeā ʼae ʼe maʼuʼuli ʼi te koga meʼa ʼae neʼe hoko ai ia te tuʼutamaki, ʼe natou faiga ke natou maʼu logo mai ia natou fuli ʼo te kokelekasio. ʼE ʼi ai te komite ʼe tokaga ki te tufa ʼo te meʼa kai, mo te ʼu foʼi vai, mo te ʼu mutuʼi meʼa, mo te ʼu faitoʼo pea mo te laga ʼo te ʼu ʼapi. Tokolahi te kau Fakamoʼoni ʼa Sehova ʼe faiva ʼi te gaue ʼe natou tahi totogi tanatou olo ʼo tokoni ki te laga peʼe ko te toe faʼu ʼo te ʼu ʼapi pea mo ʼomatou Fale Fono ʼae neʼe maumau. Ko te logo tahi ʼae ʼe maʼu ʼi tamatou kautahi pea mo tamatou kua mahani ʼae ʼi te gaue fakatahi tuʼumaʼu, ʼe ina fakafealagia mai ke matou fakatahitahi fakavilivili ʼi te ʼu temi ʼae ʼe ʼaoga ai. Logo la ʼe matou tokoni tafito ki ʼomatou “kaiga ʼae ʼi te tui,” kaʼe ʼe feala pe hamatou toe tokoni ki ʼihi atu, tatau aipe pe ʼe mole matou lotu tahi.​​—Kalate 6:​10.

ʼE matou foaki he fakalotofimalie fakalaumalie. ʼE ʼaoga tafito ia te fakalotofimalie kia natou ʼae neʼe tau mo he tuʼutamaki. ʼI te ʼu taʼi lakaga ʼaia, ʼe matou kumi tokoni kia Sehova, “te ʼAtua ʼae ʼe ina fakafimalieʼi te hahaʼi ʼi te ʼu faʼahiga aluʼaga kehekehe.” (2 Kolonito 1:​3, 4) ʼE matou fiafia ʼi te fakaha ʼo te ʼu fakapapau Fakatohi-tapu kia natou ʼaia ʼe lotomamahi, ʼo foaki age kia natou te ʼamanaki ʼae kua vave fakagata e te Puleʼaga ʼo te ʼAtua ia te ʼu aluʼaga fuli ʼae ʼe fakatupu mamahi.​​—Fakaha 21:​4.

• He koʼe ʼe feala ki te kau Fakamoʼoni ʼa Sehova ke natou foaki fakavilivili he tokoni moka hoko he tuʼutamaki?

• Kotea te fakalotofimalie fakalaumalie ʼae ʼe feala ke matou foaki kia natou neʼe hao mai he tuʼutamaki?

ʼI muʼa ʼo tona mate, neʼe felogoʼi ʼateaina ia Sesu mo te toko fa ʼo tana kau tisipulo, ia Petelo, mo Sakopo, mo Soane pea mo Atelea. ʼI tana talanoa ʼo ʼuhiga mo te fakailoga ʼo tana toe liliu mai ʼi te ʼu ʼaho fakamuli, neʼe lagaʼi e Sesu ia te fehuʼi maʼuhiga ʼaeni: “Ko ai moʼoni koa ia te tagata faifekau agatonu mo poto ʼae neʼe fakanofo e tona pule ki ʼana hahaʼi gaue, ke ina foaki age kia natou tanatou meʼa kai ʼi tona temi totonu?” (Mateo 24:​3, 45; Maleko 13:​3, 4) Neʼe fakapapauʼi e Sesu ki tana kau tisipulo, ʼi tona ʼuhiga “pule” ʼe ina fakanofo anai natou ’ae ka natou haga foaki ia te meʼa kai fakalaumalie ki tana kau tisipulo lolotoga te temi fakamuli. Ko ai ʼape koa ia te tagata faifekau ʼaia?

Ko he kiʼi kutuga pea ʼe ko he ʼu tisipulo fakanofo ʼa Sesu. Ko te “tagata faifekau” ʼe ko te Kolesi Pule ʼa Te Kau Fakamoʼoni ʼa Sehova. ʼE ina tufa te meʼa kai fakalaumalie ʼi tona temi totonu ki te hahaʼi ʼa Sehova. ʼE matou fakalogo ki te foaki mai e te tagata faifekau agatonu ʼaia ia tamatou “vaega meʼa kai ʼi tona temi totonu.”​​—Luka 12:⁠42.

ʼE ina takitaki ia te kokelekasio ʼa te ʼAtua. (1 Timoteo 3:15) Neʼe foaki e Sesu ki te tagata faifekau ia he toe maʼua ʼae ko te takitaki ʼo te gaue ʼa te kautahi ʼa Sehova ʼi te kele, ko te tokaga ki ʼona koloa, mo te takitaki ʼo te gaue faifakamafola pea mo te akoʼi ʼo tana hahaʼi ʼaki te ʼu kokelekasio. Ke feala hana foaki mai ia te meʼa ʼae ʼe ʼaoga ʼi tona temi totonu, koia la ʼae ʼe foaki ai e “te tagata faifekau agatonu mo poto” ia te meʼa kai fakalaumalie ʼaki te ʼu tohi ʼae ʼe matou fakaʼaogaʼi ʼi te minisitelio, ʼo toe feia mo te ʼu akonaki ʼae ʼe fai ʼi ʼamatou fono pea mo ʼamatou fakatahi.

Ko te tagata faifekau ʼaia, ʼe agatonu ki te ʼu moʼoni Fakatohi-tapu pea mo tona maʼua ʼae ko te fakamafola ʼo te logo lelei, pea ʼe ina maʼu te poto ʼo ʼuhiga mo tana tokaga fakalelei ki te ʼu koloa fuli ʼo Kilisito ʼi te kele. (Gaue 10:42) ʼE tapuakinaʼi e Sehova tana gaue ʼaki te mahu ʼo te meʼa kai fakalaumalie ʼae ʼe ina foaki pea mo te tuputupu ʼo te kaugā malie ʼo tana hahaʼi.​​—Esaia 60:22; 65:⁠13.

• Ko ai ʼae neʼe fakanofo e Sesu ke ina fafaga tana kau tisipulo ʼi te faʼahi fakalaumalie?

• Ko te ʼu aluʼaga fea ʼae ʼe agatonu mo poto ai te tagata faifekau?

ʼI te temi ʼo te kau ʼuluaki Kilisitiano, neʼe fai e te kiʼi kutuga, “te kau apositolo mo te kau tagata ʼafeā ʼi Selusalemi,” ʼi tonatou ʼuhiga kolesi pule, ia te ʼu tonu maʼuhiga ʼi te higoa ʼo te kokelekasio Fakakilisitiano kua fakanofo. (Gaue 15:⁠2) Neʼe natou fai he tonu ʼe tahi, koteʼuhi neʼe natou vakavakaʼi ia te manatu ʼa te Tohi-Tapu pea mo tuku ke takitaki natou e te laumalie ʼo te ʼAtua. (Gaue 15:25) Pea ʼe kei matou mulimuli nei ki te faʼahiga fai ʼaia.

ʼE fakaʼaogaʼi e te ʼAtua te Kolesi Pule moʼo fai ʼo tona finegalo. Ko te ʼu tehina fakanofo ʼae ʼe natou kau ki te Kolesi Pule ia ʼaho nei, ʼe natou tokagaʼi tafito ia te Folafola ʼa te ʼAtua pea mo fakapotopoto ʼo ʼuhiga mo te fakahoko ʼo tamatou gaue pea mo te tali ki te ʼu fehuʼi ʼo ʼuhiga mo te tauhi. ʼE natou fakatahitahi ʼi te vahaʼa fuli ʼo talanoa ki te ʼu meʼa ʼae ʼe ʼaoga ki te ʼu kokelekasio ʼi te malamanei katoa. Ohage ko tona fai ʼi te temi ʼo te kau ʼuluaki Kilisitiano, ʼe natou foaki ia he ʼu fakatuʼutuʼu ʼe fakatafito ki te Tohi-Tapu ʼaki he ʼu tohi peʼe ʼaki te ʼu taupau feoloʼaki pea mo ʼihi atu. Ko te fakatuʼutuʼu ʼaia ʼe ina taupau te logo tahi ʼi te faʼahiga manatu, mo te aga pea mo te ʼu gaue ʼa te hahaʼi ʼa te ʼAtua. (Gaue 16:​4, 5) ʼE takitaki e te Kolesi Pule ia te teuteuʼi ʼo te meʼa kai fakalaumalie, mo ina fakalotomalohiʼi matou ke matou fakamuʼamuʼa ia te gaue faifakamafola, pea mo tokaga ki te fakanofo ʼo te ʼu tehina ki he ʼu maʼua Fakakilisitiano.

ʼE natou tali te takitaki ʼa te laumalie ʼo te ʼAtua. ʼE kumi e te Kolesi Pule ʼo te temi nei ia te takitaki ʼo te Tuʼi ʼo Te ʼAtulaulau, ʼae ko Sehova, pea mo te Pule ʼo te kokelekasio, ia Sesu. (1 Kolonito 11:3; Efeso 5:​23) Pea ko te kiʼi kutuga ʼaia, ʼe mole natou fakaʼuhiga ia natou totonu ko he kau takitaki ʼo te hahaʼi ʼa te ʼAtua. Kaʼe ohage ko te kau Kilisitiano fakanofo fuli, “ ʼe natou mulimuli ʼi te Akeno [ia Sesu] ʼi te ʼu potu fuli ʼae ʼe alu ki ai.” (Fakaha 14:⁠4) ʼE lotofakafetaʼi ia te Kolesi Pule moka ʼe matou hufakiʼi natou pea mo ʼanatou gaue.

• Ko ai ʼae neʼe ina faʼufaʼu ia te ʼuluaki kolesi pule?

• ʼE kumi feafeaʼi e te Kolesi Pule ia te takitaki ʼa te ʼAtua ia ʼaho nei?

Ko te fakaʼuhiga ʼo te higoa Fakahepeleo Petele, ʼe ko te “Fale ʼo Te ʼAtua.” (Senesi 28:​17, 19) Ko te higoa ʼaia ʼo te ʼu fale neʼe laga e te kau Fakamoʼoni ʼa Sehova ʼi te malamanei katoa moʼo takitaki pea mo lagolago ki te gaue faifakamafola. ʼE gaue ia te Kolesi Pule ʼi te ʼu pilo lalahi ʼae ʼe tuʼu ʼi New York, ʼi Amelika, pea ʼe natou takitaki mai ai te gaue ʼo te ʼu pilo ʼo te ʼu filiale ʼi te ʼatu fenua. ʼE fakahigoaʼi ia natou ʼae ʼe gaue ʼi te ʼu fale ʼaia, ko te foʼi famili ʼo te Petele. Ohage ko he famili, ʼe natou nonofo mo gaue fakatahi, mo kakai pea mo ako fakatahi ia te Tohi-Tapu ʼi te logo tahi.​—Pesalemo 133:⁠1.

ʼE maʼu ai ia he foʼi famili ʼe gaue ʼaki he lotolelei. ʼI te ʼu Petele fuli, ʼe maʼu ai te ʼu tagata mo te ʼu fafine neʼe natou foaki katoa tonatou maʼuli moʼo fakahoko ia te finegalo ʼo te ʼAtua pea mo lagolago ki te ʼu gaue ʼo te Puleʼaga ʼo te ʼAtua. (Mateo 6:33) ʼE mole natou li totogi, kaʼe ʼe foaki age kia natou fuli ʼonatou nofoʼaga, mo te meʼa kai pea mo te kiʼi tokoni fakapaʼaga moʼo toʼo ʼaki te ʼu meʼa ʼae ʼe ʼaoga kia natou. ʼI te Petele, ʼe natou tahi tuʼu ki tana gaue, ʼi te ʼu pilo, peʼe ko te fale kuka, peʼe ko te fale kai. Ko ʼihi ʼe gaue ʼi te fale ta tohi, peʼe ko te fale fakapipiki tohi, peʼe faimenasi, peʼe faifo, peʼe ko te taupau ʼo te fale peʼe ko ʼihi atu ʼu gaue.

ʼE foaki ai ia he toe lagolago ki te gaue faifakamafola. Ko te fakatuʼutuʼu tafito ʼo te ʼu Petele fuli, ʼe ko te fakafealagia ki te hahaʼi fuli ke natou maʼu ia te moʼoni Fakatohi-tapu. Pea ʼe fakafealagia e te kaupepa lahi ʼaeni ia te faʼahi ʼaia. Neʼe tohi ʼaki te maluʼi e te Kolesi Pule, pea neʼe momoli ʼi te Neti kia kutuga faifakaliliu ʼe lauʼi teau ʼi te malamanei katoa, neʼe ta e te ʼu masini ta tohi vave ʼi ʼihi Petele ʼe fai ai te ta tohi, pea mo ʼave kia kokelekasio ʼe 110 000 tupu. ʼI te ʼu aluʼaga fuli ʼaia, ʼe fakahoko e te ʼu famili ʼo te ʼu Petele ia he toe lagolago ki te gaue maʼuhiga ʼaupito ʼae ko te fakamafola ʼo te logo lelei.​​—Maleko 13:⁠10.

• Ko ai ʼae ʼe gaue ʼi te Petele, pea kotea te ʼu fakatuʼutuʼu ʼae ʼe fai maʼa natou ʼaia?

• Ko te gaue maʼuhiga fea ʼae ʼe lagolago ki ai ia te ʼu Petele fuli?

ʼE gaue ia natou ʼae ʼe kau ki te foʼi famili ʼo te Petele ʼi te ʼu selevisi kehekehe, ʼo tokakaga ki te gaue faifakamafola ʼo he fenua ʼe tahi peʼe laka atu. ʼE natou kau ki he ʼu kutuga faifakaliliu, peʼe ko te ta, peʼe ko te fakapipiki pea mo te tufa ʼo te ʼu tohi, peʼe ko te puke ʼo he ʼu ʼata peʼe ko he ʼu fakamatala, peʼe ko te tokaga ki ʼihi atu ʼu meʼa ʼe ʼaoga ki te fenua.

ʼE takitaki ia te gaue e he Komite ʼo Te Filiale. ʼE tuku ia te falala ʼa te Kolesi Pule ki te Komite ʼo Te Filiale ʼe faʼufaʼu e he toko tolu peʼe laka atu kau tagata ʼafeā ʼe fakapotopoto ʼo ʼuhiga mo te takitaki ʼo te gaue ʼe fai ʼi te pilo ʼo he filiale. ʼE natou fakaha tuʼumaʼu ki te Kolesi Pule ia te tuputupu ʼo te gaue ʼi te ʼu fenua takitahi ʼae ʼe maluʼi e te Komite ʼaia pea mo ʼihi faigataʼaʼia neʼe feala ke hoko. Ko te ʼu faʼahi ʼaia ʼe tokoni ki te Kolesi Pule ke natou filifili te ʼu manatu ʼae ka talanoaʼi anai ʼi te ʼu tohi, mo te ʼu fono pea mo te ʼu fakatahi lalahi ʼae ka hoa mai. ʼE fekauʼi liuliuga ia te kau fakafofoga ʼo te Kolesi Pule, ke natou olo ʼo ʼaʼahi ia te ʼu filiale pea mo foaki ia he tokoni ki te ʼu Komite ʼo Te ʼu Filiale ʼo ʼuhiga mo te fakahoko ʼo ʼonatou maʼua. (Taaga Lea 11:14) ʼE fakatuʼutuʼu ai he polokalama makehe, ʼe faiakonaki ai ia te fakafofoga ʼo te pilo fakamalamanei ʼo ina fakalotomalohiʼi ai ia natou ʼae ʼe nonofo ʼi te telituale ʼo te filiale.

ʼE lagolago te filiale ki te ʼu kokelekasio ʼae ʼe ina maluʼi. ʼE foaki e te ʼu tehina fakapotopoto ʼo te pilo ʼo te filiale ia he fakagafua ke fakatuʼu he ʼu kokelekasio foʼou. ʼE toe takitaki e te ʼu tehina ʼaia ia te gaue ʼa te kau pionie, mo te kau misionea, mo te ʼu taupau ʼo te siliko ʼae ʼe gaue ʼi te telituale ʼo te filiale. ʼE natou fakatuʼutuʼu ia te ʼu fakatahi fakasiliko pea mo fakafenua, mo takitaki ia te laga ʼo ʼomatou Fale Fono foʼou, pea mo vakaʼi pe ʼe maʼu e te ʼu kokelekasio ia te ʼu tohi ʼae ʼe ʼaoga kia natou. Ko te ʼu gaue ʼaia ʼae ʼe fai ʼi te filiale ʼe natou tokoni ki te fakahoko ʼo te gaue faifakamafola ʼi te fakatokatoka.​​—1 Kolonito 14:​33, 40.

• ʼE tokoni feafeaʼi ia te ʼu Komite ʼo Te ʼu Filiale ki te Kolesi Pule?

• Ko te ʼu maʼua fea ʼae ʼe tokaga ki ai te pilo ʼo he filiale?

ʼI tamatou faiga ʼae ke matou tala ia te “logo lelei” ki “te ʼu puleʼaga fuli, mo te ʼu telepi fuli, mo te ʼu lea fuli, pea mo te hahaʼi fuli,” koia ʼe matou ta ai he ʼu tohi ia lea ʼe 750 tupu. (Fakaha 14:⁠6) ʼE matou fakahoko feafeaʼi ia te toe gaue ʼaia? ʼE matou fakahoko ʼaki te tokoni ʼo te kau faitohi mai te ʼu fenua kehekehe pea mo te kau faifakaliliu faʼafai, ko he kau Fakamoʼoni ʼa Sehova.

ʼE ʼuluaki tohi te ʼu alatike ʼi te lea Fakapilitania. ʼE takitaki e te Kolesi Pule ia te gaue ʼo te Selevisi Faitohi ʼi ʼomatou pilo lalahi ʼae ʼe tuʼu ʼi New York. ʼE fakatuʼutuʼu e te selevisi ʼaia ia te ʼu gaue maʼa te kau faitohi ʼae ʼe gaue ʼi ai pea ʼi ʼihi atu pilo ʼo te ʼu filiale. Ko te maʼu ʼo he kau faitohi kehekehe ʼe ina fakafealagia mai ke matou talanoa ki he ʼu manatu ʼe malave ki ni hahaʼi mai te ʼu fenua kehekehe, ʼo feala ai ke leleiʼia ʼamatou tohi e te ʼu hahaʼi kehekehe ʼi te malamanei katoa.

ʼE momoli te ʼu alatike ki te kau faifakaliliu. Kapau kua tokalelei ia te ʼu alatike pea ʼe momoli ʼi te Neti ki te ʼu kutuga faifakaliliu ʼi te malamanei katoa ke natou fakaliliu. ʼE natou faiga ke natou filifili “ni palalau o te mooni” ke feala hanatou fakaliliu katoa ia te manatu mai te lea Fakapilitania ki te lea ʼae ʼe fakaliliu ki ai.​—Ekelesiasi 12:⁠12.

ʼE fakafaigafua e te ʼu olotinatea ia te gaue. ʼE mole feala ki he olotinatea ke ina fai tokotahi ia te gaue ʼa te kau faitohi pea mo te kau faifakaliliu, kaʼe ʼe tokoni ia ki te vave ʼo tanatou gaue. Neʼe fai e te kau Fakamoʼoni ʼa Sehova ia te polokalama MEPS (système électronique dʼédition multilingue). ʼE ina fakafealagia kia natou ke natou ta ia te ʼu alatike ia lea ʼe lauʼi teau, mo fakatahiʼi ia te ʼu alatike pea mo he ʼu pāki, pea mo teuteuʼi ki tona toho ʼi te ʼu fale ta tohi.

He koʼe ʼe matou fakahoko ia te ʼu faiga malohi ʼaia, maʼiape la ki te ʼu lea ʼae ʼe palalauʼi pe e he toko lauʼi afe hahaʼi? Koteʼuhi ʼe ko te finegalo ʼo Sehova “ke haofaki te faʼahiga tagata fuli pe pea ke natou maʼu te ʼatamai malama totonu ʼo te moʼoni.”​—1 Timoteo 2:​3, 4.

• ʼE teuteuʼi feafeaʼi ʼamatou tohi?

• He koʼe ʼe matou fakaliliu ʼamatou tohi ki te ʼatu lea?

ʼE ta pea mo tufa e tamatou kautahi ia Tohi-Tapu pea mo te tahi ʼu tohi ʼe lauʼi teau miliona ʼi te taʼu fuli kaʼe mole fakatotogi. ʼE matou laga pea mo taupau ʼomatou Fale Fono pea mo te ʼu pilo ʼo ʼomatou filiale. ʼE matou lagolago ki te toko lauʼi afe kau Petelite pea mo misionea, pea mo foaki he tokoni ʼi te ʼu temi ʼae ʼe hoko ai ia te ʼu tuʼutamaki. ʼE lagi ʼe ke ui anai pe ʼe fakapaʼaga feafeaʼi ia te ʼu aluʼaga fuli ʼaia?

ʼE mole fakamaʼua he tae falā. Logo la ʼe ʼaoga mai ia he toe falā lahi ki tamatou gaue faifakamafola kaʼe ʼe mole matou fakamaʼua he tae falā. Kua hili ki ai taʼu ʼe teau tupu, neʼe fakaha ʼi te lua numelo ʼo Te Tule Leʼo (Fakapilitania) ia tamatou falala ʼae ko Sehova tokotahi pe ʼae ka lagolago mai anai pea ʼe mole matou kolekole anai he tokoni ʼa he tagata. Pea neʼe matou mulimuli ki ai!​​—Mateo 10:⁠8.

ʼE fakapaʼaga ʼamatou gaue ʼaki te ʼu meʼa ʼofa. Tokolahi te hahaʼi ʼe natou leleiʼia ia tamatou gaue ʼae ko te akoʼi ia te hahaʼi ʼaki te Tohi-Tapu pea ʼe natou foaki he ʼu meʼa ʼofa ʼo ʼuhiga mo te faʼahi ʼaia. ʼE foaki fakafiafia e te kau Fakamoʼoni ʼa Sehova ia tonatou temi, mo tonatou malohi, mo tanatou falā pea mo te tahi age ʼu meʼa ʼofa moʼo fakahoko ʼaki ia te finegalo ʼo te ʼAtua ʼi te kele katoa. (1 Koloniko 29:⁠9) ʼI ʼomatou Fale Fono, pea mo ʼamatou fakatahi fakasiliko mo fakafenua, ʼe maʼu ai ia te ʼu kiʼi kesi ʼe feala ke ʼai ki ai te ʼu meʼa ʼofa ʼa natou ʼae ʼe natou lotolelei ki ai. Pea ʼe feala ke toe foaki te ʼu meʼa ʼofa ʼaia ʼi tamatou tuʼasila ʼi te Neti, jw.org. ʼE maʼu tafito te falā mai ia natou ʼae ʼe mole falāʼia, ohage ko te fafine vitua masiva ʼae neʼe talanoa ki ai ia Sesu, ʼae neʼe ina ʼai ki te puha tanaki paʼaga ʼo te fale lotu ia te ʼu kiʼi foʼi piesi ʼe lua. (Luka 21:​1-4) Koia, ʼe feala pe ki he tahi ke ina “tuku keheʼi” tuʼumaʼu ia he meʼa ke ina foaki “ ʼo mulimuli ki te meʼa ʼae kua ina fakatotonu ʼi tona loto.”​​—1 Kolonito 16:2; 2 Kolonito 9:⁠7.

ʼE matou tui papau ʼe hoko atu anai ia te ʼekenaki e Sehova ia te loto ʼo natou ʼae ʼe natou fia fakamaʼuhigaʼi ia ia ʼaki ʼanatou meʼa lelei moʼo lagolago ki te gaue ʼo te Puleʼaga, ke feala ke fakahoko tona finegalo.​​—Taaga Lea 3:⁠9.

• Kotea ʼae ʼe kehekehe ai tamatou kautahi mo te ʼu lotu ʼae?

• ʼE fakaʼaogaʼi feafeaʼi ia te ʼu meʼa ʼofa?

ʼI ʼomatou Fale Fono, ʼe fakatafito ia te ʼu faipalalau Fakatohi-tapu ʼae ʼe fai ai ki te Puleʼaga ʼo te ʼAtua, te kupu tafito ʼo te minisitelio ʼa Sesu.​​—Luka 8:⁠1.

ʼE ko he ʼu koga meʼa ʼe fai ai te tauhi moʼoni. ʼE fakatuʼutuʼu ai e te kau Fakamoʼoni ʼa Sehova ia tanatou gaue faifakamafola. (Mateo 24:14) ʼE tahi alu pe mo tona faʼahiga lahi pea mo tona faʼahiga pāki, kaʼe ʼe mole ko he ʼu toe fale fakamataku, pea neʼe fakatuʼutuʼu ʼihi fale ke feala ke fakatahi ki ai he kokelekasio ʼe tahi peʼe laka atu. ʼI te ʼu taʼu ʼaeni kua hili atu, neʼe matou laga ia Fale Fono foʼou ʼe lauʼi hogofulu afe (ko tona fakafuafua ko fale ʼe nima ʼi te ʼaho) ʼuhi ko te tuputupu ʼo ʼamatou kokelekasio. Kotea ʼae ʼe ina fakafealagia ia te faʼahi ʼaia?​​—Mateo 19:⁠26.

ʼE laga ʼaki te ʼu meʼa ʼofa neʼe foaki moʼo fai ia te gaue ʼaia. ʼE momoli ia te ʼu meʼa ʼofa ʼaia ki te pilo ʼo te filiale ke feala ke fakaʼaogaʼi ia te falā ʼaia moʼo tokoni ki te laga peʼe ko te fakafoʼou ʼo he Fale Fono ʼo he kokelekasio.

ʼE laga e he ʼu faʼahiga hahaʼi lotolelei kehekehe ʼe mole totogi. ʼE lahi te ʼu fenua ʼe fakatuʼutuʼu ai te ʼu Kutuga Laga Fale Fono. ʼI te kau gaue lotolelei ʼaia, ʼe ʼi ai ʼihi ʼe gaue tuʼumaʼu pea ko ʼihi ʼe gaue fakatemi. ʼE natou olo ki te ʼu kokelekasio ʼo tonatou fenua, maʼiape la ki he ʼu koga meʼa mamaʼo, ʼo tokoni ki te laga ʼo ʼonatou Fale Fono. ʼI te tahi ʼu fenua, ʼe ko he kau Fakamoʼoni faiva ʼae neʼe hinoʼi ke natou takitaki ia te laga pea mo te fakafoʼou ʼo ʼomatou Fale Fono ʼi he potu fenua. Logo la ʼe ko ʼihi kau Fakamoʼoni faiva ʼae ʼe ʼomai ʼo tokoni ki te laga fale, kaʼe ʼe ko te kokelekasio tafito ʼae ʼe lagolago ki te gaue. ʼE fakafealagia e te laumalie ʼo Sehova pea mo te ʼu faiga fakamalotoloto ʼa tana hahaʼi ke fakahoko ia te ʼu fakatuʼutuʼu fuli ʼaia.​​—Pesalemo 127:1; Kolose 3:​23.

• He koʼe ʼe laga ʼomatou Fale Fono?

• Kotea ʼae ʼe ina fakafealagia ke laga ʼomatou Fale Fono ʼi te malamanei katoa?

Ko te ʼu Fale Fono ʼa Te Kau Fakamoʼoni ʼa Sehova ʼe ko te ʼu koga meʼa ʼae ʼe natou tauhi ai kia Sehova. Koia, ʼe ko he gaue maʼuhiga kia matou ia tamatou taupau ke maʼa mo lelei ia te fale ʼaia, pea ʼe kau ki te ʼu koga maʼuhiga ʼo tamatou tauhi. ʼE feala ke matou kau fuli ki ai.

ʼE matou lotolelei ʼo fakamaʼa ia tomatou Fale Fono ʼi te hili ʼo te fono. ʼI te hili ʼo te ʼu fono fuli, ʼe fiafia ia te ʼu tehina mo tuagaʼane ʼi te fakamaʼa ke tokalelei ia tomatou Fale Fono. Tuʼa tahi ʼi te vahaʼa, ʼe fai ai te fakamaʼa lahi. ʼI te agamahani, ʼe takitaki e he tagata ʼafeā peʼe ko he tagata faifekau fakaminisitelio ia te gaue ʼo mulimuli ki te lisi ʼo te ʼu meʼa ʼae ʼe tonu ke fai. Mo kapau ʼe ʼaoga, ko ʼihi ʼe fia tokoni anai ki te hiko, mo te holo fale peʼe ko te holo ʼo te efu, mo te fakatoka ʼo te ʼu hekaʼaga, mo te fakamaʼa ʼo te ʼu fale mamaʼo, mo te holo sioʼata, mo te laku ʼo te ʼu ʼotaʼota, mo te fakamaʼa ʼo tuʼa pea mo te tokaga ki te malaʼe. Pea tuʼa tahi ʼi te taʼu, ʼe fakatuʼutuʼu he ʼaho ke fai ai he toe fakamaʼa lahi. ʼI tamatou fakakau ʼamatou fanau ki ʼihi ʼu gaue, ʼe matou akoʼi age ai kia natou ia te fakaʼapaʼapa ki te fale ʼae ʼe fai ai tamatou tauhi.​​—Ekelesiasi 4:⁠17.

ʼE matou fetokoniʼaki ki te toe faʼu ʼo te ʼu meʼa ʼae kua maumau. ʼI te taʼu fuli, ʼe vakavakaʼi fakalelei tomatou loto Fale Fono pea mo tuʼa. Pea ʼo mulimuli ki te vakavakaʼi ʼaia, ʼe toe faʼu anai ia te ʼu meʼa ʼae kua maumau moʼo taupau ia te lelei ʼo tomatou Fale Fono pea ke ʼaua naʼa lahi fau ia te falā ʼae ʼe puli ki ai. (2 Koloniko 24:13; 34:10) Ko he Fale Fono ʼe maʼa pea mo taupau lelei, ʼe ko he koga meʼa ʼe tuha mo tamatou tauhi ʼae ki tomatou ʼAtua. ʼAki tamatou lagolago ki te gaue ʼaia, ʼe matou fakaha ai tomatou ʼofa kia Sehova pea mo te maʼuhiga kia matou ʼo te koga meʼa ʼae ʼe fai ai tamatou tauhi. (Pesalemo 122:⁠1) Pea ʼe ko he faʼahi ʼe tokagaʼi anai e te hahaʼi.​—2 Kolonito 6:⁠3.

• He koʼe ʼe tonu ke matou taupau lelei ia te fale ʼae ʼe fai ai tamatou tauhi?

• Ko te ʼu fakatuʼutuʼu fea ʼae ʼe fai moʼo taupau ia te maʼa ʼo ʼomatou Fale Fono?

ʼE ke fia fai koa hau fekumi ke tuputupu ai hau mahino ki te Tohi-Tapu? ʼE ke fia mahino koa ʼo ʼuhiga mo he vaega Tohi-Tapu, peʼe ki he tahi, peʼe ki he koga meʼa, peʼe ko he meʼa ʼe talanoa ki ai te Tohi-Tapu? Peʼe ke loto koa ke tokoni atu te Folafola ʼa te ʼAtua ʼo ʼuhiga mo he fihifihia ʼe ke tau mo ia? Koia, ʼe feala hau fakaʼaogaʼi ia te tanakiʼaga tohi ʼo tomatou Fale Fono.

ʼE maʼu ai he ʼu meʼa gaue ʼe ʼaoga moʼo fai ʼo he ʼu fekumi. ʼE mahino ia, ʼe mole ke maʼu ia te ʼu tohi Fakatohi-tapu fuli ʼa te kau Fakamoʼoni ʼa Sehova ʼi tau lea. Kaʼe ʼe teitei maʼu ʼi te tanakiʼaga tohi ʼo te Fale Fono ia te ʼu tohi foʼou fuli. ʼE ke toe maʼu ai he tahi ʼu fakaliliu ʼo te Tohi-Tapu mo he tikisionalio, pea mo ʼihi tohi ʼe ʼaoga. ʼE feala hau fakaʼaogaʼi ia te tanakiʼaga tohi ʼaia ʼi muʼa ʼo te kamata peʼe ʼi te hili ʼo te fono. Kapau ʼe ʼi ai he olotinatea, pea ʼe ke maʼu anai ʼi ai ia te Watchtower Library. ʼE ko he meʼa gaue ʼe teitei maʼu fuli ai ʼamatou tohi pea mo he kumiʼaga ʼe feala ke ke ta ki ai he manatu, peʼe ko he kupu peʼe ko he vaega ʼe ke fia mahino ki ai.

ʼE ʼaoga ki te kau ako ʼo te Fono Te Maʼuli Fakakilisitiano Mo Te Faifakamafola. ʼE feala anai hau fakaʼaogaʼi lelei ia te tanakiʼaga tohi ʼo te Fale Fono moʼo teuteuʼi ʼo tau kiʼi akonaki. ʼE ko te taupau ʼo te Fono Te Maʼuli Fakakilisitiano Mo Te Faifakamafola ʼae ʼe tokaga ki te tanakiʼaga tohi. ʼE tokaga anai ke maʼu fuli ia te ʼu tohi foʼou pea mo vakaʼi pe ʼe kua fakatoka lelei. ʼE feala ke fakaha atu e te taupau, peʼe ko ia ʼae ʼe ina fai tau ako peʼe feafeaʼi ia tau kumi he manatu ʼe ʼaoga atu. Kaʼe ʼe mole tonu ke mavae te ʼu tohi ʼaia ʼi te Fale Fono. Pea ʼe mahino ia, ʼe matou loto ke fakaʼaogaʼi fakalelei ia te ʼu tohi pea ke ʼaua naʼa tohi.

ʼE fakamahino fenei ʼi te Tohi-Tapu, ke feala hatatou maʼu ia “te iloilo o te Atua,” ʼe tonu ke tou kumi “o hage ko he koloa fakafufu.” (Taaga Lea 2:​1-5) ʼE ʼaoga anai ia te tanakiʼaga tohi ʼo te Fale Fono moʼo kamata fai ʼau fekumi.

• Kotea ia te ʼu meʼa gaue moʼo fai ʼo he ʼu fekumi ʼe maʼu ʼi te tanakiʼaga tohi ʼo te Fale Fono?

• Ko ai ʼae ʼe feala ke tokoni atu ke ke fakaʼaogaʼi lelei ia te tanakiʼaga tohi?

Neʼe ui fenei e Sesu Kilisito ki tana kau tisipulo: “Ke mu tokotou malama ia muʼa ʼo te hahaʼi, ke natou sisio ai ki ʼakotou gaue lelei pea mo natou fakakololiaʼi ai takotou Tamai ʼae ʼe ʼi selo.” (Mateo 5:​16) ʼO mulimuli ki te manatu ʼaia, ʼe matou fakaʼaogaʼi lelei ai te ʼu meʼa gaue foʼou fuli, ʼo kau ai te Neti. ʼE maʼu ʼi tamatou tuʼasila ʼi te Neti jw.org ia he ʼu logo moʼoni ʼo ʼuhiga mo te ʼu meʼa ʼae ʼe tui ki ai ia te kau Fakamoʼoni ʼa Sehova pea mo ʼanatou gaue. Kotea ia tana fakatuʼutuʼu?

Te ʼu tali Fakatohi-tapu ki te ʼu fehuʼi mahani ʼa te hahaʼi. ʼE feala ke ke maʼu ni tali ki te ʼu fehuʼi maʼuhiga ʼae ʼe tautau fai e te hahaʼi. Ohage la ko te kiʼi pepa lotu ʼE Gata Anai Koa Te Mamahi? mo te kiʼi pepa lotu ʼE Feala Moʼoni Koa Ke Toe Maʼuli Ake He Mate?, kua maʼu ʼi te Neti ia lea ʼe 600 tupu. ʼE feala ke ke maʼu ai ia te Tohi-Tapu Fakaliliu ʼo Te Malama Foʼou ia lea ʼe 130 tupu, pea mo te ʼu tohi ako Tohi-Tapu, ʼe kau ki ai te tohi Koteā ʼAē ʼe Akoʼi Moʼoni Mai ʼi Te Tohi-Tapu? pea mo te ʼu nusipepa fakamuli ʼo Te Tule Leʼo pea mo te Réveillez-vous ! ʼE feala hau lau mo fakalogo ia te ʼu tohi ʼaia ʼi te Neti, peʼe ko tona toʼo mai ai ʼi te format MP3, PDF, peʼe ko te EPUB. ʼE feala pe hau toho ni pasina moʼo fakaha age ki he tahi ʼe ina fia lau ʼi tana lea! ʼE maʼu ai ni ʼata maʼa te kau tuli ʼi he ʼu tuʼuga lea. ʼE feala hau toʼo mai ai ni fakamatala Fakatohi-tapu, mo ni ʼata Fakatohi-tapu pea mo he ʼu musika maliē.

Te ʼu logo moʼoni ʼo ʼuhiga mo te kau Fakamoʼoni ʼa Sehova. ʼE toe ʼai ki ai te ʼu logo mo te ʼu ʼata fakamuli ʼo ʼuhiga mo tamatou gaue fakamalamanei, mo te ʼu aluʼaga ʼae ʼe tau mo te kau Fakamoʼoni ʼa Sehova pea mo ʼamatou tokoni ki te ʼu gaue haofaki maʼuli. ʼE feala ke ke maʼu ai ni logo ʼo ʼuhiga mo te ʼu fakatahi lalahi ʼae ka hoa mai pea mo te ʼu tuʼasila ʼo te ʼu pilo ʼo ʼomatou filiale.

ʼAki te ʼu meʼa fuli ʼaia, ʼe matou fakamu ai ia te malama ʼo te moʼoni ʼo kaku ki te ʼu potu taupotu ʼo te kele. ʼE maʼu tapuakina ai ia te ʼu hahaʼi mai te ʼu fenua kehekehe ʼo kau ki ai ia te ʼu fenua taupotu ʼae ʼe momoko ʼaupito ohage ko te Antarctique. ʼE matou faikole ke “mafola vave te folafola ʼa Sehova” ki te kele katoa, moʼo fakakololiaʼi te ʼAtua.​​—2 Tesalonika 3:⁠1.

• ʼE tokoni feafeaʼi ia te jw.org ke lahi age ia te hahaʼi ʼae ʼe natou ako ia te moʼoni Fakatohi-tapu?

• Kotea ʼae ka ke fia vakaʼi anai ʼi tamatou tuʼasila ʼi te Neti?