Tokolahi ʼe mole kei natou olo ki te ʼu fakatahi fakalotu koteʼuhi ʼe mole maʼu ai he takitaki pea mo he fimalie ʼi te faʼahi fakalaumalie. Kaʼe, he koʼe leva ʼe tonu ke ke kau ki te ʼu fono Fakakilisitiano ʼa te kau Fakamoʼoni ʼa Sehova? Kotea ʼae ka ke maʼu ai anai?

Te fiafia ʼi te fakatahi mo ni hahaʼi ʼe fetokagaʼaki pea mo feʼofaʼaki. Neʼe fakatuʼutuʼu fakakokelekasio ia te kau ʼuluaki Kilisitiano, pea mo fai he ʼu fono ʼe natou tauhi ai ki te ʼAtua, mo natou ako ai ia te Tohi-Tapu pea mo natou fefakalotomalohiʼaki ai. (Hepeleo 10:​24, 25) ʼI tanatou fakatahi ʼaia ʼi te ʼofa, neʼe natou logoʼi ai ia he maʼuli fakatautehina moʼoni mo ʼonatou tehina mo tuagaʼane fakalaumalie. (2 Tesalonika 1:3; 3 Soane 14) ʼE matou mulimuli ki te faʼifaʼitaki ʼaia pea ʼe matou toe logoʼi ia te fiafia ʼaia.

ʼE ke akoʼi ai anai ia te maʼuliʼi ʼo te ʼu pelesepeto ʼo te Tohi-Tapu. Ohage ko tona fakamatala ʼi te Tohi-Tapu, ʼe fakatahitahi ia te hahaʼi fuli, tagata mo fafine pea mo fanau. ʼE fakaʼaogaʼi e te ʼu tagata faiakonaki faiva ia te Tohi-Tapu moʼo tokoni mai ke tou maʼuliʼi ia te ʼu pelesepeto Fakaʼatua ʼi te ʼaho fuli. (Tetelonome 31:12; Neemia 8:⁠8) Pea ʼe kau fuli te nofoʼaki ki he faipalalau Fakatohi-tapu pea mo hiva katiko, ʼo fakafealagia ai ke tou fakaha ia tatatou ʼamanaki Fakakilisitiano.​—Hepeleo 10:⁠23.

ʼE fakamalohiʼi anai tau tui ki te ʼAtua. Neʼe ui fenei age e te apositolo ko Paulo ki he kokelekasio ʼo tona temi: “ ʼE au fakaʼamu ke au sio kia koutou, . . . ke feala ke tou fefakalotomalohiʼaki ʼaki takotou tui pea mo taku tui.” (Loma 1:​11, 12) Ko te fakatahitahi tuʼumaʼu mo ʼotatou tehina mo tuagaʼane ʼi te ʼu fono ʼe ina fakamalohiʼi ai tatatou tui pea mo tou haga taupau totatou ʼuhiga Kilisitiano.

ʼE lagi lelei anai ke ke kau ki hamatou fono pea mo ke sio tonu ki te ʼu aluʼaga ʼaia. ʼE matou fiafia anai mo kapau ʼe ke lava mai. ʼE mole fakatotogi ia te ʼu fono pea ʼe mole fai ai he tae falā.

• ʼE ko te faʼifaʼitaki fea ʼae ʼe mulimuli ki ai ia te ʼu fono ʼo tamatou kokelekasio?

• ʼE fua lelei feafeaʼi kia tatou ia tatatou kau ki te ʼu fono Fakakilisitiano?

ʼE matou olo tuʼumaʼu ki ʼamatou fono Fakakilisitiano tatau aipe pe ʼe maʼua ke matou fakalaka ʼi te vao matuʼa peʼe ʼua lalahi. Logo la ia te ʼu faigataʼaʼia ʼo te maʼuli peʼe ko te gaʼegaʼe ʼi te ʼosi gaue, he koʼe ʼe faiga malohi ia te kau Fakamoʼoni ʼa Sehova ke natou fakatahitahi mo ʼonatou tehina mo tuagaʼane fakalaumalie?

ʼE fua lelei kia tatou. Neʼe tohi fenei e Paulo ʼo ʼuhiga mo natou ʼae ʼe fakatahitahi mo tatou ʼi te kokelekasio: “Tou fetokagaʼaki.” (Hepeleo 10:24) Ko te kupusiga palalau ʼaia ʼe fakaʼuhiga ke tou “tokaga lelei ki ai,” ke tou feiloʼiʼaki. Koia, ʼe fakalotomalohiʼi tatou e te ʼu palalau ʼa te apositolo ke tou tokakaga lelei kia natou. ʼAki tatatou faiga ʼae ke tou iloʼi lelei ia natou ʼo te kokelekasio, ʼe tou maʼu anai ʼihi neʼe natou lava tauʼi ia he ʼu faigataʼaʼia ʼe tatau mo ʼa tatou pea ʼe feala hanatou tokoni mai ke tou lava tauʼi ʼotatou faigataʼaʼia.

ʼE fakamalohiʼi ai ia te ʼu felogoʼi. ʼI ʼamatou fono, ʼe matou fakatahitahi mo ʼomatou kaumeʼa lelei. ʼI te tahi ʼu lakaga, ʼe matou fakafiafia fakatahi. Kotea te lelei ʼe tou maʼu mai te taʼi ʼu fakatahitahi ʼaia? ʼE matou akoʼi ai te fetokagaʼaki pea mo fakamalohiʼi ia tamatou feʼofaʼaki. Koia, kapau ʼe tau ʼomatou kaumeʼa mo he ʼu fihifihia, pea ʼe faigafua hamatou foaki age ia he tokoni ʼuhi ko te malohi ʼo ʼamatou felogoʼi. (Taaga Lea 17:17) ʼAki tatatou fakatahitahi mo natou ʼo te kokelekasio, ʼe tou fakaha ai tatatou “fetokagaʼaki.”​—1 Kolonito 12:​25, 26.

ʼE matou fakalotomalohiʼi koe ke ke filifili ʼou kaumeʼa ia natou ʼae ʼe natou fai ia te finegalo ʼo te ʼAtua. ʼE ke maʼu anai te taʼi ʼu kaumeʼa ʼaia ʼi te kau Fakamoʼoni ʼa Sehova. ʼAua naʼa ke tuku he aluʼaga ke ina fakagata tau fakatahi mo matou.

• He koʼe ʼe ʼaoga kia tatou ke tou fakatahitahi ʼi te ʼu fono?

• Ko te ʼaho fea ʼae ʼe ke lotolelei ke ke fakatahi ai mo matou ʼi he fono?

ʼI te ʼu ʼuluaki fono Fakakilisitiano neʼe fakatuʼutuʼu tafito ke hiva ai he ʼu katiko, mo fai ai ni faikole, mo lau pea mo faipalalau ai ki te Tohi-Tapu. (1 Kolonito 14:26) ʼE feala ke kotou ʼamanaki ʼe toe feia mo ʼamatou fono.

Ko he ako ʼe fakatafito ki te Tohi-Tapu ʼe ʼaoga. ʼI te fakaʼosi vahaʼa, ʼe fakatahitahi ia te ʼu kokelekasio takitahi ke natou fakalogo ki he akonaki Fakatohi-tapu ia minuta ʼe 30, ʼe fakamahino ai ia te ʼu meʼa ʼae ʼe ʼaoga ki ʼotatou maʼuli pea mo te temi ʼae ʼe tou maʼuʼuli ai. ʼE fakalotomalohiʼi tatou fuli ke tou tahi muliʼi ʼaki tana Tohi-Tapu. ʼI te hili ʼo te akonaki ʼaia, pea ʼe fai te Ako ʼo “Te Tule Leʼo” lolotoga te hola katoa, pea ʼe fakafealagia ki te nofoʼaki ke natou kau ki te faipalalau ʼe fakatafito ki he alatike ako ʼo Te Tule Leʼo. Ko te faipalalau ʼaia ʼe tokoni mai anai ke tou fakaʼaogaʼi ia te takitaki ʼa te Tohi-Tapu ʼi ʼotatou maʼuli. Pea ʼe tatau ia te alatike ʼae ʼe akoʼi e te ʼu kokelekasio ʼe 110 000 tupu ʼi te malamanei katoa.

ʼE tokoni mai ke hikihiki ai ʼomatou fealagia ki te faiako. ʼE matou toe fakatahitahi tuʼa tahi ʼi te afiafi lolotoga te vahaʼa ki he fono ʼe koga tolu ʼae ko Te Maʼuli Fakakilisitiano Mo Te Faifakamafola. ʼE fakatafito ki te ʼu manatu ʼe maʼu ʼi te Kaupepa Ako Te Maʼuli Fakakilisitiano Mo Te Faifakamafola ʼe ha ʼi te mahina fuli. Ko te ʼuluaki koga ʼo te fono ʼae ko Te ʼu Koloa ʼo Te Tohi-Tapu, ʼe tokoni mai ke matou iloʼi lelei he ʼu kapite ʼo te Tohi-Tapu neʼe fakatuʼutuʼu ke lau fakatomuʼa e te kokelekasio. ʼOsi ʼaia, pea ʼe hoko atu ʼaki ia te koga Ke Ke Faiva ʼi Te Faifakamafola, ʼae ʼe fai ai he ʼu faʼifaʼitaki ʼo ʼuhiga mo te faipalalau ki te Tohi-Tapu mo te hahaʼi. Pea ko te tehina faitokoni ʼe ina foaki ia he ʼu tokoni moʼo hikihiki ʼomatou fealagia ʼi te lautohi pea mo te faiako. (1 Timoteo 4:13) ʼI te koga fakaʼosi ʼae ko Te Maʼuli Fakakilisitiano, ʼe matou vakaʼi pe ʼe lava feafeaʼi hamatou maʼuliʼi te ʼu pelesepeto Fakatohi-tapu ʼi te ʼaho fuli. ʼE kau ki ai mo he faipalalau ʼaki he ʼu fehuʼi pea mo he ʼu tali ʼe ina fakaloloto tamatou mahino ki te Tohi-Tapu.

Kapau ʼe ke kau ki ʼamatou fono, ʼe mahino ia ʼe ke punamaʼuli anai ʼi te lelei ʼo te ako Fakatohi-tapu ʼae ka ke maʼu ai anai.​—Esaia 54:⁠13.

• Kotea ʼae ʼe ke ʼamanaki ke ke maʼu ʼi te ʼu fono ʼa te kau Fakamoʼoni ʼa Sehova?

• ʼI ʼamatou fono ʼae ʼi te vahaʼa fuli, ko te fono fea ʼae ʼe ke loto anai ke ke kau ki ai?

Neʼe ke fakatokagaʼi koa la ʼi te ʼu pāki ʼo te kaupepa lahi ʼaeni ia te teu lelei ʼa te kau Fakamoʼoni ʼa Sehova moka natou olo ki te ʼu fono ʼi ʼanatou kokelekasio? He koʼe ʼe matou faiga ke matou teu lelei tuʼumaʼu?

ʼE ha ai tamatou fakaʼapaʼapa ki te ʼAtua. ʼE moʼoni, ko te ʼAtua ʼe mole ina tokagaʼi ia te meʼa ʼae ʼe ha ki tuʼa ʼi te tagata. (1 Samuele 16:⁠7) Kaʼe, ka matou fakatahitahi ke matou tauhi ai kia Sehova, ʼe matou loto ke matou fakaha ia he fakaʼapaʼapa kia te ia pea mo ʼomatou tehina mo tuagaʼane. Kapau ʼe tonu ke matou tutuʼu ia muʼa ʼo he tuʼi fakamau ʼi he telepinale, ʼe matou faigaʼi anai ke lelei tamatou faʼahiga teu ʼuhi ko tona tuʼulaga. ʼO toe feia aipe, ʼe maʼuhiga ke matou teu lelei ʼi ʼamatou fakatahi he ʼe ko te fakaha ʼaia ʼo tamatou fakaʼapaʼapa ʼae kia Sehova ʼAtua “ae e ina fakamaaui te kele katoa,” pea mo te koga meʼa ʼae ʼe matou fai ai tamatou tauhi kia te ia.​—Senesi 18:⁠25.

ʼE ha ai ia te ʼu lekula ʼae ʼe matou maʼuliʼi. ʼE fakalotomalohiʼi ʼi te Tohi-Tapu ia te kau Kilisitiano ke “fakapoipoi pea mo fakapotopoto” ʼonatou teu. (1 Timoteo 2:​9, 10) Ko te “fakapoipoi” ʼo he teu ko tona fakaʼuhiga ko he teu ʼe mole maina, ʼe mole pipiki peʼe mole mumutu fau. Pea ko te “fakapotopoto” ʼe tokoni mai anai ke ʼaua naʼa tou filifili he teu ʼe heʼe tau peʼe heʼe fakaʼapaʼapa. Kaʼe ʼe mole fakaʼuhiga leva ʼi te ʼu pelesepeto ʼaia ʼe mole kei feala hatatou filifili ia te faʼahiga teu ʼae ʼe tou loto ki ai. Kaʼe ko tatatou teu lelei ʼe ina “vikiʼi ai te akonaki ʼa te ʼAtua, totatou Fakamaʼuli” pea mo “fakakololiaʼi te ʼAtua.” (Tito 2:10; 1 Petelo 2:12) ʼAki tamatou teu lelei ki ʼamatou fono, ʼe matou tuku ai he faʼifaʼitaki lelei ʼo ʼuhiga mo te tauhi ʼae kia Sehova.

Tatau aipe pe ʼe mole alu tahi mo tau faʼahiga teu, kaʼe ʼe mole ko he takuʼaki ke ʼaua naʼa ke haʼu ki tamatou Fale Fono. ʼE feala ke tou tui he ʼu teu ʼe lelei, mo tau pea mo maʼa, kaʼe ʼe mole fakamaʼua ke totogi kovi peʼe gigila fau.

• ʼE maʼuhiga feafeaʼi kia matou ia tamatou faʼahiga teu moka matou olo ʼo tauhi ki te ʼAtua?

• Ko te ʼu pelesepeto fea ʼae ʼe ina takitaki anai ia te filifili ʼo tatatou faʼahiga teu?

Kapau ʼe ke lolotoga ako ia te Tohi-Tapu pea mo he Fakamoʼoni ʼa Sehova, ʼe mahino ia ʼe ke teuteuʼi fakatomuʼa anai ia tau ako. Ke fua lelei age kia koe, ʼe ʼaoga foki ke ke toe fai feia ʼi muʼa ʼo tau alu ki he fono ʼo te kokelekasio. ʼE fua lelei anai kia koe mo kapau ʼe liliu ko he agamahani.

Vakaʼi ia te temi pea mo te koga meʼa ʼae ʼe tonu ke ke teuteuʼi ai te ʼu fono. Ko te temi fea ʼae ʼe lelei ai kia koe? ʼI te uhu ʼi muʼa ʼo tau alu ʼo gaue, peʼe ʼi te afiafi moka kua momoe ia te kau toe? Tatau aipe pe ʼe mole feala hau ako ʼi he ʼu temi loaloaga, kaʼe ʼe tonu ke ke fakatuʼutuʼu ia te temi ʼae ka ke fakaʼaogaʼi pea mo faiga ke ʼaua naʼa fakaleluʼi koe e he meʼa. ʼE ʼaoga ke ke kumi he koga meʼa ʼe mole logoaʼa, pea mo matehi ia meʼa fuli ʼe feala ke ina fakaleluʼi tau ako, ia te latio, te televisio pea mo te telefoni. Ko te faikole ʼi muʼa ʼo te ako ʼe tokoni atu ke ʼaua naʼa ke tuʼania fau ʼo ʼuhiga mo te maʼuli ke feala ai hau ako ia te Folafola ʼa te ʼAtua.​—Filipe 4:​6, 7.

Fakailoga ia te ʼu manatu pea mo teuteu ke fai hau tali. Faigaʼi muʼa ke ke mahino ki te manatu tafito ʼo te alatike. Fakakaukauʼi ia te kupu tafito ʼo te alatike peʼe ʼo te kapite, kumi ia te pikipikiga ʼo te ʼu manatu tafito pea mo te kupu taki, vakaʼi ia te ʼu pāki pea mo te ʼu fehuʼi fakamanatu ʼae ʼe ina fakatokagaʼi atu ia te ʼu puani tafito. Hili ia, pea ke lau ia te palakalafe ʼo ke kumi tona tali pea mo ke fai feia ki te ʼu palakalafe ʼae ʼe hoa mai. ʼE lelei hau kumi pea mo lau ia te ʼu vaega Tohi-Tapu ʼae ʼe tuʼu ʼi te ʼu palakalafe, pea mo vakaʼi pe ʼe natou lagolago feafeaʼi ki te manatu ʼae ʼe ako. (Gaue 17:11) Ka kua ke maʼu ia te tali, fakailoga he ʼu kupu ʼi te palakalafe ke feala hau toe manatuʼi. Pea ʼi te fono, kapau ʼe ke lotolelei ki ai ʼe feala hau hiki tou nima pea mo fai hau tali ʼaki ʼau palalau.

ʼAki tau vakavakaʼi ia te ʼu manatu kehekehe ʼae neʼe talanoa ki ai ʼi te ʼu fono ʼo te vahaʼa fuli, ʼe ke hilifaki anai ia he ʼu manatu foʼou ki tou “koloa” ʼo ʼuhiga mo tau mahino ki te Tohi-Tapu.​—Mateo 13:​51, 52.

• Kotea ia te fakatuʼutuʼu ʼae ʼe feala ke ke fai moʼo teuteuʼi ia te ʼu fono?

• Kotea ʼae ʼe feala ke ke fai ke feala ai hau fai tali ʼi te fono?

Talu mai te temi muʼa, neʼe loto e Sehova ke fakatahitahi ia te ʼu famili fuli ke natou fakamalohiʼi ʼonatou maʼuli fakafamili pea mo fakalaumalie. (Tetelonome 6:​6, 7) Ko te tupuʼaga la ʼaia ʼo te fakatuʼutuʼu e te kau Fakamoʼoni ʼa Sehova ia he temi ʼi te vahaʼa fuli ke natou tauhi fakafamili ki te ʼAtua, ʼo natou faipalalau ki te ʼu manatu fakalaumalie ʼe ʼaoga ki ʼonatou maʼuli. Tatau aipe pe ʼe ke maʼuli tokotahi, kaʼe ʼe feala ke ke fakaʼaogaʼi te temi ʼaia ke ke fakaovi ai ki te ʼAtua ʼaki ia he fai ʼo hau ako ʼo fakatafito ki he manatu Fakatohi-tapu neʼe ke filifili.

ʼE ko he temi ke kita fakaovi ai kia Sehova. “Kotou fakaovi ki te ʼAtua, pea ʼe fakaovi atu anai kia koutou.” (Sakopo 4:⁠8) ʼE tou iloʼi lelei age ia Sehova mo kapau ʼe tou ako ia te ʼu fakamatala ʼae ʼe tuʼu ʼi tana Folafola, te Tohi-Tapu, ʼo ʼuhiga mo tona ʼulugaaga pea mo ʼana gaue. Ko he puleʼaki faigafua moʼo kamata ʼaki ia he ako fakafamili ʼe ko te lau leʼo lahi ia te Tohi-Tapu ʼo lagi mulimuli ki te fakatuʼutuʼu ʼo te Fono Te Maʼuli Fakakilisitiano Mo Te Faifakamafola. ʼE feala ke ke tuku age kia natou takitahi ʼo te famili ke natou lau ia he ʼu vaega, pea ʼe feala leva ke kotou faipalalau ʼo ʼuhiga mo te ʼu manatu foʼou ʼae neʼe ako ʼi te Tohi-Tapu.

ʼE ko he temi ke fakamalohiʼi ai te ʼu felogoʼi ʼo tokita kiʼi famili. ʼE malohi ia te ʼu felogoʼi fakataumatuʼa ʼo toe feia mo te ʼu felogoʼi ʼo he kiʼi famili mo kapau ʼe natou fai hanatou ako Tohi-Tapu. ʼE tonu ko he lakaga fakafiafia ʼo te vahaʼa pea ʼe fakamaʼuhigaʼi e te famili. ʼO mulimuli ki te ʼu taʼu ʼo ʼanatou fanau, ʼe feala ke filifili e te ʼu matuʼā ia he ʼu manatu ʼaoga ke natou faipalalau ki ai, ʼe toʼo mai he alatike ʼo Te Tule Leʼo, peʼe mai he tohi Fakatohi-tapu, peʼe mai tomatou tuʼasila ʼi te Neti, jw.org. ʼE feala ke ke talanoa ki he ʼu fihifihia neʼe tau mo tau fanau ʼi te fale ako, pea mo te ʼu puleʼaki ʼae moʼona fakatokatoka. ʼE toe feala ke kotou sioʼi ia he ʼata ʼi te JW Télédiffusion (tv.jw.org) pea ʼosi pea kotou faipalalau ki ai. ʼE kotou maʼu anai te fiafia mo kapau ʼe kotou akoako ia te ʼu katiko ʼae ka hivaʼi anai ʼi te ʼu fono pea mo fai he kiʼi inu ti ʼi te hili ʼo te ako fakafamili.

Ko te temi maʼuhiga ʼaia neʼe fakatuʼutuʼu ʼi te vahaʼa fuli ki te tauhi fakafamili ʼae kia Sehova, ʼe tokoni anai ki te famili katoa ke natou maʼu te fiafia ʼi te ako ʼo te Folafola ʼa te ʼAtua pea ʼe ina tapuakina lahi anai ʼakotou faiga.​—Pesalemo 1:​1-3.

• He koʼe ʼe tonu ke tou fakatuʼutuʼu ia he temi ki te ako fakafamili?

• Kotea ʼae ʼe feala ke fai e te ʼu matuʼā ke fiafia ai te famili katoa ʼi te ako ʼaia?

He koʼe ʼe matafiafia feia te hahaʼi? He neʼe natou kau ki hamatou fakatahi lahi. Ohage ko te ʼu kaugana ʼa te ʼAtua ʼi te temi muʼa, ʼae neʼe natou fakatuʼutuʼu ke fai ia fakatahi ʼe tolu ʼi te taʼu, ʼe matou fakaatalitali ki ʼamatou fakatahi lalahi. (Tetelonome 16:16) ʼI te taʼu fuli, ʼe fai ai ʼamatou fakatahi lalahi ʼe tolu: Te ʼu fakatahi fakasiliko ʼaho tahi ʼe lua pea mo te fakatahi fakafenua. ʼE fua lelei feafeaʼi anai kia matou ia te ʼu fakatahi lalahi ʼaia?

ʼE ina fakamalohiʼi ʼamatou felogoʼi fakatautehina. Ohage pe ko te fiafia ʼa te kau Iselaele ʼi tanatou fakavikiviki ia Sehova “i te u fakatahiaga,” ʼe matou toe fiafia ʼi tamatou tauhi fakatahi kia te ia ʼi te ʼu fakatahi makehe. (Pesalemo 26:12; 111:⁠1) ʼE fakafealagia e te ʼu fakatahi lalahi ʼaia ke matou feiloʼiʼaki pea mo fakatahi ai mo ni tehina mo tuagaʼane ʼo he tahi age ʼu kokelekasio peʼe mai he tahi age ʼu fenua. ʼI te temi kai, ʼe matou fiafia ʼi tamatou kakai fakatahi ʼi te koga meʼa ʼae ʼe fai ai ia te fakatahi. (Gaue 2:42) ʼI te ʼu fakatahi lalahi ʼaia, ʼe matou sisio ai ki te ʼofa ʼae ʼe maʼu e “te fale tau tehina katoa” ʼi te malamanei.​—1 Petelo 2:⁠17.

ʼE tokoni mai ke matou tuputupu ʼi te faʼahi fakalaumalie. Neʼe toe fua lelei ki te kau Iselaele ia tanatou “mahihino leva ki te uhiga o te folafola” ʼae neʼe fakamahino age. (Neemia 8:​8, 12) ʼE matou toe leleiʼia mo te ʼu meʼa ʼe akoʼi mai ʼi te Tohi-Tapu, ʼae ʼe matou maʼu mai ʼamatou fakatahi lalahi. ʼE fakatafito ia te ʼu fakatahi lalahi ʼaia ki he manatu Fakatohi-tapu. ʼAki te ʼu akonaki, mo te ʼu akonaki ʼe fai kogakoga pea mo te ʼu faʼifaʼitaki ʼo te ʼu meʼa neʼe hoko, ʼe akoʼi ai matou pe ʼe feafeaʼi ia hamatou fakahoko ia te finegalo ʼo te ʼAtua ʼi ʼomatou maʼuli. ʼE fakalotomalohi kia matou moka matou logo ki te ʼu fakafehuʼi ʼo ʼihi neʼe natou tauʼi ʼonatou fihifihia ʼi te ʼu temi faigataʼa ʼaeni. ʼI te ʼu fakatahi fakafenua, ʼe fai ai ia te ʼu ʼata Fakatohi-tapu pea ʼe foaki mai ai ia he ʼu tokoni ʼaoga. ʼI ʼamatou fakatahi lalahi fuli, ʼe papitema ai ia natou ʼae ʼe natou fia fakaha kua natou foaki ʼonatou maʼuli ki te ʼAtua.

• He koʼe ko te ʼu fakatahi lalahi ʼe ko he ʼu aluʼaga fakafiafia kia matou?

• ʼE fua lelei feafeaʼi anai kia koe hau kau ki he fakatahi lahi?

ʼI muʼa pe ʼo tona mate, neʼe fakaha fenei e Sesu: “Ko te logo lelei ʼaeni ʼo te Puleʼaga ʼe fakamafola anai ʼi te kele katoa ko he fakamoʼoni ki te ʼatu puleʼaga, pea hoki hoko mai anai ia te fakaʼosi.” (Mateo 24:14) Kaʼe ʼe fakahoko feafeaʼi anai ia te gaue faifakamafola ʼaia ʼi te malamanei katoa? ʼAki te mulimuli ki te faʼifaʼitaki ʼa Sesu ʼi te temi ʼae neʼe kei maʼuli ai ʼi te kele.​—Luka 8:⁠1.

ʼE matou faigaʼi ke matou maʼu ia te hahaʼi ʼi ʼonatou ʼapi. Neʼe akoako e Sesu ki tana kau tisipulo ia te fakamafola ʼo te logo lelei ʼi te ʼu ʼapi. (Mateo 10:​11-13; Gaue 5:42; 20:20) Neʼe foaki age ki te kau ʼuluaki faifakamafola ʼaia ia te ʼu telituale ke natou gaueʼi. (Mateo 10:​5, 6) ʼO toe feia aipe ia ʼaho nei, ʼe toe fakatuʼutuʼu lelei ia tamatou gaue faifakamafola, pea ʼe foaki ki te kokelekasio takitahi ia tana telituale ke ina gaueʼi. ʼAki te fakatuʼutuʼu ʼaia, ʼe feala ai leva ke matou fakahoko ia te fakatotonu ʼae neʼe foaki mai e Sesu ʼae ke matou “faifakamafola ki te hahaʼi pea mo fai he fakamoʼoni katoa.”​—Gaue 10:⁠42.

ʼE matou faigaʼi ke matou olo ki te ʼu koga meʼa ʼae ʼe maʼu ai ia te hahaʼi. Neʼe toe fakaha mai e Sesu ia te faʼifaʼitaki ʼaki tana faifakamafola ʼi te ʼu koga meʼa ʼae ʼe maʼu ai te hahaʼi, ohage la ko te matatai peʼe ko te vai keli ʼo te kolo. (Maleko 4:1; Soane 4:​5-15) ʼE matou toe faipalalau mo te hahaʼi ʼo ʼuhiga mo te Tohi-Tapu ʼi te ʼu ala, ʼi te ʼu matani gaue, ʼi te ʼu maloloʼaga peʼe ʼi te telefoni. ʼI te ʼu temi ʼae ʼe feala ai, ʼe matou toe faifakamafola ki ʼomatou vahaʼa fale, mo ʼomatou kaugā gaue, mo ʼomatou kaugā ako, pea mo ʼomatou famili. Ko te ʼu faiga fuli ʼaia ʼe ina fakafealagia ki te toko lauʼi miliona hahaʼi ʼi te kele katoa ke natou logo ki te logo lelei ʼo te fakamaʼuli.​—Pesalemo 96:⁠2.

ʼE ke iloʼi koa he tahi ʼe feala ke ke fakamahino age ki ai ia te logo lelei ʼo te Puleʼaga ʼo te ʼAtua pea mo te fakaʼuhiga ʼo te logo ʼaia ki tona ka haʼu? ʼAua naʼa ke taupau maʼa koe ia te ʼamanaki ʼaia kaʼe ke ke foimo fakaha ki te hahaʼi.

• Ko te “logo lelei” fea ʼae ʼe tonu ke fakamafola?

• ʼE faʼifaʼitakiʼi feafeaʼi e te kau Fakamoʼoni ʼa Sehova ia te faʼahiga faifakamafola ʼa Sesu?

ʼI te agamahani, ko te kupu “pionie” ʼe fakaʼuhiga kia natou ʼae ʼe olo ʼo vakaʼi pea mo teuteuʼi ia he ʼu telituale foʼou maʼa natou ʼae ka mumuli mai. Neʼe hage pe ia te maʼuli ʼo Sesu neʼe pionie, neʼe fekauʼi mai ki te kele ke haʼu ʼo fakahoko tana minisitelio pea mo foaki ki te hahaʼi ia te fealagia ʼae ke haofaki natou. (Mateo 20:28) Ia ʼaho nei, ʼe faʼifaʼitakiʼi ia Sesu e tana kau tisipulo ʼaki tanatou fakaʼaogaʼi ia he toe temi moʼo “fai ni tisipulo.” (Mateo 28:​19, 20) Ko ʼihi ia matou ʼae ʼe fealagia, ʼe kau ki te selevisi pionie.

Ko he tahi ʼe faifakamafola tuʼumaʼu. Ko te kau Fakamoʼoni ʼa Sehova ʼe ko te kau faifakamafola fuli ʼo te logo lelei. Kaʼe, ko ʼihi neʼe natou fakatuʼutuʼu ke natou pionie katoa, ʼo natou fai ia hola ʼe 70 ʼi te mahina fuli ʼi te gaue faifakamafola. Moʼo fai ia te faʼahi ʼaia, tokolahi ʼe natou gaue vaeluaʼi temi ʼi ʼanatou gaue fakamalama. ʼE hinoʼi ʼihi ke natou pionie makehe ʼi te ʼu koga meʼa ʼae ʼe ʼaoga lahi ki ai he kau faifakamafola ʼo te Puleʼaga, ʼo natou fai ia hola ʼe 130 peʼe laka atu ʼi te mahina fuli ʼi tanatou minisitelio. ʼE maʼuli fakafeʼauga ia te kau pionie, ʼo natou falala ʼe foaki age anai e Sehova ia te ʼu meʼa ʼae ʼe ʼaoga ki ʼonatou maʼuli. (Mateo 6:​31-33; 1 Timoteo 6:​6-8) Ko natou ʼae ʼe mole feala ke natou pionie katoa, ʼe feala ke natou pionie vaeluaʼi temi, ʼo natou faifakamafola ia hola ʼe 30 peʼe 50 ʼi te mahina.

Ko he tahi ʼe ʼofa ki te ʼAtua pea mo te hahaʼi. Ohage ko Sesu, ʼe matou fakatokagaʼi ʼe tokolahi ia natou ʼe ʼaoga ke natou iloʼi ia te ʼAtua pea mo ʼana fakatuʼutuʼu. (Maleko 6:34) Kaʼe ʼe matou maʼu te ʼatamai malama ʼae ʼe feala ke tokoni kia natou ʼi te temi nei, pea mo foaki age kia natou ia he ʼamanaki ki te ka haʼu. Ko te ʼofa ʼae ki te hahaʼi ʼae ʼe ina uga ia he pionie ke ina foaki ʼaki he lotolelei ia tona temi pea mo tona malohi moʼo tokoni ki ʼihi ʼi te faʼahi fakalaumalie. (Mateo 22:39; 1 Tesalonika 2:⁠8) ʼI tana fai ia te faʼahi ʼaia, ʼe malohi anai tana tui, ʼe fakaovi anai ki te ʼAtua, pea ʼe fiafia lahi ai anai.​—Gaue 20:⁠35.

Talu mai fualoa neʼe fakatuʼutuʼu e te kau Fakamoʼoni ʼa Sehova he ʼu ako fakateokalatike. ʼE foaki he ako makehe kia natou ʼae ʼe faifakamafola temi katoa ke feala ai ke natou ‘fakahoko katoa tanatou minisitelio.’​​—2 Timoteo 4:⁠5.

Te Ako ʼo Te Kau Pionie. ʼI te fakaʼosi ʼo tana ʼuluaki taʼu pionie, ʼe kau te pionie katoa ki he ako ʼe ʼaho ono pea ʼi te agamahani ʼe fai te ako ʼaia ʼi he Fale Fono ʼe ovi age kio ia. Ko te ako ʼaia ʼe tokoni ki te pionie ke fakaovi kia Sehova, mo faiva ʼi te ʼu aluʼaga fuli ʼo te minisitelio pea mo hoko atu tana pionie.

Te Ako ʼo Te Kau Faifakamafola ʼo Te Puleʼaga. ʼE mahina lua te ako ʼaia pea ʼe fakatuʼutuʼu ki te kau pionie faiva ʼae ʼe natou lotolelei ke natou mavae ʼi ʼonatou potu fenua ʼo olo ki he ʼu koga meʼa ʼae ka fekauʼi ki ai natou. ʼE hage pe ko hanatou ui fenei: “Koeni au, ke ke fekau au,” ʼo natou faʼifaʼitakiʼi ai te Tagata Faifakamafola lahi tokotahi neʼe maʼuli ʼi te kele, ia Sesu Kilisito. (Esaia 6:8; Soane 7:29) ʼE lagi tonu anai ke natou maʼuli fakafeʼauga pea mo fakamamahani mo te agaʼi fenua, mo te faʼahiga ʼaele pea mo te meʼa kai ʼo te fenua. ʼE lagi maʼua anai ke natou ako ia he lea foʼou. ʼE feala ke kau ki te ako ʼaia te ʼu tehina mo tuagaʼane selipatea pea mo te ʼu taumatuʼa ʼe taʼu 23 ki te taʼu 65. ʼE tokoni age ke natou maʼu te ʼu kalitate fakalaumalie pea mo te ʼu fealagia ʼae ʼe ʼaoga anai kia natou ʼi tanatou gaue ʼo feala ai ke natou fakahoko katoa tanatou selevisi maʼa Sehova pea mo tana kautahi.

Te Ako Tohi-Tapu ʼo Kileate ʼa Te Watchtower. ʼI te lea Fakahepeleo, ʼe alu tahi ia te fakaʼuhiga ʼo te kupu “Kileate” pea mo te kupu “Fakamoʼoni.” Talu mai te kamata ʼo te ako ʼaia ʼi te taʼu 1943, neʼe fua lelei ia te toe fakamoʼoni ʼae neʼe foaki e te toko 8 000 tupu kau misionea neʼe kau ki te ako ʼaia ʼaki tanatou faifakamafola “ ʼo kaku ki te ʼu potu taupotu ʼo te kele.” (Gaue 13:47) Ohage la, ʼi muʼa ʼo te tau atu ʼa te kau misionea ki Pérou, neʼe mole ʼi ai he kokelekasio. ʼI te temi nei ko kokelekasio ʼe 1 000 tupu. ʼI te temi ʼae neʼe kamata gaue ai ia te kau misionea ʼi Saponia, neʼe mole toko hogofulu te kau Fakamoʼoni ʼa Sehova ʼi ai, ʼi te temi nei kua natou toko 200 000 tupu. ʼE mahina nima te Ako ʼo Kileate pea ʼe fai ai he ako fakamalotoloto ʼo te Folafola ʼa te ʼAtua. ʼE fakaafe ki te ako ʼaia he kau pionie makehe, mo he kau misionea, mo he kau Petelite, mo he kau tagata taupau ʼo te siliko mo ʼonatou ʼohoana mo kapau kua ʼohoana. ʼAki te ako lelei ʼaia, ʼe feala ai hanatou fakamalohiʼi tamatou gaue fakamalamanei pea mo lagolago ki ai.

• Kotea te fakatuʼutuʼu ʼo te Ako ʼo Te Kau Pionie?

• Ko ai ʼe feala ke kau ki te Ako ʼo Te Kau Faifakamafola ʼo Te Puleʼaga?