Neʼe Lototoʼa Ia Te ʼIlamutu ʼa Paulo

Ta vakaʼi ʼihi faʼahi ʼo ʼuhiga mo te tupulaga ʼae neʼe ina haofaki te maʼuli ʼo tana faʼe tagata. Ko te faʼe tagata ʼa te tupulaga ʼaia neʼe ko te apositolo ko Paulo. ʼE mole tou iloʼi tona higoa kaʼe ʼe tou iloʼi neʼe ina fai he meʼa neʼe ha ai tona lototoʼa. ʼE ke fia iloʼi koa la pe kotea ʼae neʼe ina fai?—

Neʼe pilisoni ia Paulo ʼi Selusalemi. Neʼe puke ia ia he neʼe palalau ʼo ʼuhiga mo Sesu. Ko ʼihi tagata agakovi, neʼe natou fehihiʼa ia Paulo, ʼo natou fai ai te fakatuʼutuʼu kovi. Neʼe natou ui fenei: ‘Tou kole ki te tagata pule ʼo te kau solia ke ʼave Paulo ki te fakamauʼaga. ʼE tou fenonoʼi anai ʼi te ala pea ka fakalaka ia Paulo mo te kau solia, pea ʼe tou matehi anai ia ia.’

Neʼe logo ia te ʼilamutu ʼa Paulo ki te fakatuʼutuʼu ʼaia. Kotea ʼae neʼe ina fai? Neʼe alu ki te fale pilisoni ʼo fakaha age kia Paulo te faʼahi ʼaia. Neʼe ui age e Paulo ke alu ʼo fakaha te fakatuʼutuʼu kovi ʼaia. ʼI tau manatu la, neʼe faigafua koa ki te ʼilamutu ʼa Paulo ia tana palalau ki te tagata pule?— Kailoa, he neʼe ko te tagata maʼuhiga. Kaʼe neʼe lototoʼa te ʼilamutu ʼa Paulo pea neʼe palalau ia ki te tagata pule.

Neʼe iloʼi e te tagata pule te meʼa ʼae neʼe tonu ke ina fai. Neʼe ina toʼo ia tagata solia ʼe teitei toko 500 moʼo puipui ʼo Paulo. Neʼe ina fakatotonu kia natou ke natou ʼave ia Paulo ki Sesalea ʼi te po pe ʼaia. Neʼe tau lelei atu koa ia Paulo?— ʼEi, neʼe mole ʼohofi ia ia e te ʼu tagata agakovi. Neʼe to noa tanatou fakatuʼutuʼu.

Kotea te ako ʼe feala ke ke maʼu mai te hisitolia ʼaeni?— ʼE feala ke ke toe lototoʼa mo koe ohage ko te ʼilamutu ʼa Paulo. ʼE tonu ke tou lototoʼa moka tou palalau ki te hahaʼi ʼo ʼuhiga mo Sehova. ʼE ke lototoʼa pea mo ke haga palalau anai koa ʼo ʼuhiga mo Sehova?— Kapau ʼe ke fai feia pea ʼe lagi ke haofaki anai he tahi.