KAPITE HOGOFULU MA TAHI
He Koʼe ʼe Lahi Te Mamahi?
1, 2. Kotea te fehuʼi ʼe fai e te tokolahi?
ʼI TE ʼaho fuli ʼe tou logo ai ki te ʼu aluʼaga fakamataku ʼe hoko ʼi te malamanei. Ohage la, ʼe tou logo ko he foʼi peau fakamataku neʼe hake ʼo ina maumauʼi ai he kolo. Peʼe ko he tagata neʼe ina fana te hahaʼi ʼi he ʼekelesia ʼo lavevea mo mamate ai te tokolahi. Peʼe ko he faʼe neʼe mate ʼuhi ko te mahaki ʼae ko te kosea, kaʼe ina tuku ʼana kiʼi fanau ʼe toko nima.
2 Ka hoko he ʼu tuʼutamaki fakanatula peʼe ko he ʼu aluʼaga fakalotomamahi, tokolahi ʼe natou feuiʼaki fenei: “He koʼe koa ʼe fonu te malamanei ʼi te mamahi mo te fehiʼa?” Neʼe kua ke fai la te fehuʼi ʼaia?
3, 4. (1) Kotea te ʼu fehuʼi neʼe fai e Hapakuke? (2) Kotea te tali neʼe fai age e Sehova?
3 ʼI te Tohi-Tapu, neʼe ʼi ai he ʼu tagata neʼe natou tui malohi ki te ʼAtua pea neʼe natou fai te fehuʼi ʼaia. Ohage la, ko te polofeta ko Hapakuke neʼe ina fehuʼi fenei kia Sehova: “He koʼe ʼe ke fakamamata mai kia au te meʼa ʼae ʼe kovi pea mo ke haga sioʼi te maveuveu? Pea he koʼe ʼe tuʼu ’i ʼoku muʼa ia te kaihaʼa ʼo te ’u koloa pea mo te agamalohi, pea he koʼe ʼe ’i ai te ’u ke, pea he koʼe ʼe malo te ke?”—Hapakuke 1:3, MN.
4 Ia Hapakuke 2:2, 3, ʼe tou maʼu ai te tali ʼa Sehova kia Hapakuke, ʼo ina fakapapauʼi age, ʼe ina fakatokatoka anai te aluʼaga ʼaia. Kotea tona tupuʼaga? Koteʼuhi ʼe ʼofa mamahi ia Sehova ki te hahaʼi. Pea ʼe ui fenei ʼi te Tohi-Tapu: “ ʼE tokaga ia kia koutou.” (1 Petelo 5:7) ʼEi, ʼe laka age te fehiʼa ʼa te ʼAtua ki te mamahi ia tatou. (Esaia 55:8, 9) Kaʼe he koʼe koa ʼe lahi te mamahi ʼi te malamanei?
HE KOʼE ʼE LAHI TE MAMAHI?
5. Kotea ʼae ʼe ui e te kau takitaki lotu ʼo ʼuhiga mo te ʼu mamahi? Kaʼe kotea ʼae ʼe akoʼi mai ʼi te Tohi-Tapu?
5 ʼI ʼihi temi, ka lotomamahi he tahi, ʼe ui fenei e te kau patele pea mo ʼihi takitaki lotu: ʼE ko te finegalo ia ʼo te ʼAtua. Pea ʼe toe ui e ʼihi kua fakatuʼutuʼu fakatomuʼa e te ʼAtua te aluʼaga ʼae ka hoko anai ki he tahi, maʼia mo ʼona malaʼia. Pea ʼe mole feala ke tou iloʼi tona tupuʼaga. Pea tahi, ka mate he tahi kua lahi peʼe kei tamasiʼi, ʼe natou ui ʼe loto e te ʼAtua ke hake ki selo ʼo nofo mo ia. Kaʼe ko te ʼu manatu fuli ʼaia ʼe hala. ʼE mole ko Sehova te tupuʼaga ʼo te ʼu aluʼaga fakalotomamahi ʼae ʼe hoko. He ʼe ui fenei ʼi te Tohi-Tapu: “E mamao osi i te Atua te mea ae e hala , e mamao osi i te Mafimafi te agakovi!”—Sopo 34:10.
6. He koʼe ʼe ui e te tokolahi ko te ʼAtua te tupuʼaga ʼo te ʼu mamahi fuli ʼi te malamanei?
6 Tokolahi ʼe natou ui ko te ʼAtua te tupuʼaga ʼo te ʼu mamahi ʼi te malamanei. Kotea tona tupuʼaga? Koteʼuhi ʼe ui e natou ko te ʼAtua te pule ʼo te malamanei. Kaʼe, neʼe tou ako ʼi te Kapite 3 ko te pule ʼo te malamanei, ʼe ko Satana te Tevolo.
7, 8. He koʼe ʼe lahi te mamahi ʼi te malamanei?
7 ʼE ui fenei mai ʼi te Tohi-Tapu: “ ʼE nofo te malamanei katoa ʼi te malohi ʼo Satana.” (1 Soane 5:19) ʼEi, ko Satana te pule ʼo te malama ʼaeni pea ʼe agakovi. “ ʼE ina fakaheʼi te kele katoa.” (Fakaha 12:9) Pea tokolahi ʼe natou faʼifaʼitakiʼi ia ia. ʼE ko te tupuʼaga la ʼaia ʼo te lahi ʼo te ʼu aga fakakaka, mo te fehiʼa pea mo te agakovi ʼi te malamanei.
8 Kaʼe ʼe ʼi ai te tahi ʼu tupuʼaga ʼo te lahi ʼo te mamahi ʼi te malamanei. Hili te agatuʼu ʼa Atama mo Eva, neʼe nā tuku holo mai te agahala ki tonā hologa. ʼO tupu ai te fakamamahiʼi e te tagata ʼihi tagata ʼuhi ko te agahala. ʼI ʼihi temi, ʼe fia puleʼi e te tagata ʼihi tagata. Pea ʼe natou fekeʼaki, mo fefakamamahiʼaki ia natou pea mo fetauʼaki. (Ekelesiasi 4:1; 8:9) ʼI ʼihi temi, ʼe maʼuli mamahi te hahaʼi koteʼuhi “ko te ʼu temi pea mo te ʼu aluʼaga ʼae ʼe hoko fakafokifa.” (Tagata Tanaki 9:11, MN ) ʼEi, ʼe feala ke fai fakaʼi he tahi peʼe hoko ki ai he aluʼaga fakalotomamahi, koteʼuhi ʼe nofo ʼi he koga meʼa peʼe ko he temi ʼe hoko fakapunamaʼuli ai he tuʼutamaki.
9. He koʼe ʼe tou tui papau ʼe ʼ i ai te tupuʼaga ʼo te fakagafua e Sehova te ʼu mamahi?
9 ʼE mole ko Sehova te tupuʼaga ʼo te ʼu mamahi. ʼE mole ko ia te tupuʼaga ʼo te ʼu tau, mo te ʼu faifakapo pea mo te agamalohi. Pea ʼe mole ko ia te tupuʼaga ʼo te ʼu tuʼutamaki fakanatula, ohage ko te ʼu mafuike, te ʼu afā pea mo te hake ʼo te vai. Kaʼe, ʼe lagi ke feuiʼaki fenei: “Kapau ko Sehova ʼae ʼe malohi tokotahi ʼi te ʼatulaulau, he koʼe ʼe ina fakagafua ke hoko te ʼu mamahi ʼaia?” ʼE tou iloʼi ʼe ʼofa mamahi ia Sehova ia tatou. Koia ʼe mahino papau ia, ʼe ʼi ai te tupuʼaga ʼo tana fakagafua ke hoko te ʼu mamahi ʼaia.—1 Soane 4:8.
HE KOʼE ʼE FAKAGAFUA E TE ʼATUA TE MAMAHI?
10. Kotea te tukugakovi neʼe fai e Satana kia Sehova?
10 ʼI te ʼoloto ʼo Eteni, neʼe fakahalaʼi e Satana te Tevolo ia Atama mo Eva. Neʼe ina tukugakoviʼi ia te ʼAtua ʼo ui ʼe ko he Pule agakovi. Pea neʼe ina ui kia Atama mo Eva ko te ʼAtua ʼe mole ina fia foaki he meʼa lelei kia naua. Neʼe loto e Satana ke nā manatu ʼe lelei age tana pule ia Sehova. Pea ʼe mole ʼaoga age kia naua ia Sehova.—Senesi 3:2-5; vakaʼi te Fakamahino 27.
11. Kotea te fehuʼi ka tou tali anai ki ai?
11 Neʼe talagataʼa ia Atama mo Eva kia Sehova pea neʼe nā agatuʼu kia te ia. ʼI tanā manatu ʼe tonu ke nā filifili tonu pe te meʼa ʼae ʼe lelei mo ʼae ʼe kovi. Kaʼe neʼe nā faihala. He ʼe iloʼi e Sehova te meʼa ʼae ʼe lelei tukupau maʼa tatou. Koia, ʼe fakamoʼoni feafeaʼi anai ia Sehova ki te faʼahi ʼaia?
12, 13. (1) He koʼe neʼe mole matehi atu aipe e Sehova ia Atama mo Eva? (2) He koʼe neʼe tuku e Sehova ia Satana ke pule ʼi te malama ʼaeni pea ke takitaki e te tagata ia ia totonu?
12 Neʼe mole matehi atu aipe e Sehova ia Atama mo Eva. Kaʼe, neʼe ina tuku ke nā maʼu fanau. Pea neʼe ina tuku ki te hologa ʼo Atama mo Eva ke natou filifili pe ko ai ʼae ka liliu ko honatou pule. Neʼe ko te fakatuʼutuʼu ʼa te ʼAtua ke nofoʼi te kele e he hahaʼi haohaoa. Pea ko te aluʼaga ʼaia ʼe hoko anai logo la te fakafeagai ʼa te Tevolo.—Senesi 1:28; Esaia 55:10, 11.
13 Neʼe tukugakoviʼi e Satana ia Sehova ia muʼa ʼo te toko lauʼi miliona ʼaselo. (Sopo 38:7; Taniela 7:10) Ko te tupuʼaga la ʼaia ʼo te tuku e Sehova he temi kia Satana ke ina fakaha pe ʼe moʼoni ʼana tukugakovi. Neʼe ina toe tuku he temi ki te tagata ke ina fakaha pe ʼe ina lava takitaki ia ia totonu, kaʼe mole tokoni age te ʼAtua. Koia, neʼe ina tuku ai ke fakatuʼu he ʼu puleʼaga fakatagata ʼe puleʼi e Satana.
14. Kotea ʼae neʼe fakamoʼoni ʼaki te alu ʼo te temi?
14 Talu mai ni taʼu ʼe lauʼi afe, neʼe faiga te tagata ke ina takitaki ia ia totonu. Kaʼe neʼe mole ina lavaʼi te faʼahi ʼaia. ʼE fakamoʼoni ai te gutuloi ʼa Satana. ʼEi, ʼe ʼaoga ki te tagata ia te tokoni ʼa te ʼAtua. Koia neʼe tonu pe te ui fenei ʼa te polofeta ko Selemia: “E au iloi, oi [Sehova]! E mole pule te tagata ki tona ala; e mole ko te tagata ae e ina taki ona lakaaga moka haele.”—Selemia 10:23.
HE KOʼE ʼE FAKAATALITALI FUALOA IA SEHOVA?
15, 16. (1) He koʼe ʼe fakagafua e Sehova te ʼu mamahi talu mai fualoa? (2) He koʼe neʼe mole fakatokatoka e Sehova te ʼu fihifihia ʼae neʼe tupu mai ia Satana?
15 He koʼe ʼe fakagafua e Sehova te ʼu mamahi talu mai fualoa? He koʼe ʼe ina tuku ke hoko te ʼu mamahi? Neʼe ʼaoga he temi ke fakamoʼoni ai ko te pule ʼa Satana ʼe mole lelei. Neʼe ʼahiʼahi e te tagata te ʼu puleʼaga kehekehe moʼo takitaki ʼo ia totonu kaʼe neʼe mole ʼi ai hona fua. Logo la te lakalaka ki muʼa ʼo te poto fakatagata pea mo te tekenolosia, kaʼe lahi pe te aga heʼe faitotonu, mo te maʼuli masiva, mo te faifakapo pea mo te ʼu tau. Koia ʼe mole feala ki te tagata ke ina takitaki ia ia totonu mo kapau ʼe mole tokoni age te ʼAtua.
16 Neʼe mole fakatokatoka e Sehova te ʼu fihifihia ʼae neʼe tupu mai ia Satana. Kotea tona tupuʼaga? Koteʼuhi kapau neʼe ina fai te faʼahi ʼaia, ʼe lagolago anai ki te takitaki ʼa Satana. Kaʼe ʼe mole ina fai anai ia ʼi he temi. Pea tahi, neʼe feala pe ke manatu te tagata ʼe ina lava takitaki ia ia totonu. Kaʼe, ko te loi ʼaia pea ʼe mole fai anai e Sehova he meʼa ke feala ki te tagata hana tui ki te loi ʼaia. ʼEi, ʼe mole feala ia Sehova ke loi ʼi he temi.—Hepeleo 6:18.
17, 18. Kotea ka fai anai e Sehova ʼo ʼuhiga mo te ʼu mamahi fuli ʼae ʼe tupu mai ia Satana?
17 ʼE feala koa ke fakatokatoka e Sehova te ʼu mamahi ʼae ʼe tupu mai te agatuʼu ʼa Satana mo te tagata? ʼEi. Ko meʼa fuli ia ʼe fealagia e te ʼAtua. ʼE iloʼi e Sehova te temi ʼae ka tali ai anai ki tona tukugakoviʼi hala e Satana. Pea ʼe ina fakaliliu anai te kele ko he palatiso, ohage pe ko tana fakatuʼutuʼu ki ai. ʼE fakatuʼuake anai ia natou fuli ʼae ʼi “te ʼu fale maka fakamanatu.” (Soane 5:28, 29) Ko te tagata ʼe mole toe mahaki anai pea mo mate. ʼE fakatokatoka anai e Sesu te ʼu mamahi fuli pea ʼe fakaʼaogaʼi anai e Sehova ia Sesu moʼo “maumauʼi te ʼu gaue ʼa te Tevolo.” (1 Soane 3:8) Kaʼe ʼi tatatou fakaatalitali ke hoko te ʼu aluʼaga ʼaia, ʼe tou fiafia koteʼuhi ʼe faʼa kataki ia Sehova ʼo ʼuhiga mo tatou. Pea ʼe ina foaki mai te faigamalie ʼae ke tou ako ke tou iloʼi ia ia pea ke tou filifili ia ia ke liliu ko totatou Pule. (Lau ia 2 Petelo 3:9, 10.) Maʼia pe la moka tou lotomamahi, ʼe tokoni mai anai ke tou faʼa kataki.—Soane 4:23; lau ia 1 Kolonito 10:13.
18 ʼE mole fakakinauʼi tatou e Sehova ke tou filifili ke liliu ko totatou Pule. Kotea tona tupuʼaga? Koteʼuhi neʼe ina foaki ki te tagata te meʼa ʼofa ʼaeni: Ko te loto faʼitaliha. Tou vakaʼi pe ʼe feafeaʼi hatatou fakaʼaogaʼi te meʼa ʼofa ʼaia.
ʼE KE FAKAʼAOGAʼI FEAFEAʼI ANAI TOU LOTO FAʼITALIHA?
19. Kotea te meʼa ʼofa ʼae neʼe foaki mai e Sehova? He koʼe ʼe tonu ke tou lotofakafetaʼi ki te meʼa ʼofa ʼaia?
19 Ko te loto faʼitaliha ʼe ko he meʼa ʼofa maʼuhiga mai ia Sehova. ʼE tou kehekehe ʼaupito ai mo te ʼu manu. Ko te ʼu manu ʼe natou mulimuli pe ki ʼonatou fealagia. ʼE mole feala ke natou filifili te meʼa ʼae ʼe lelei mo ʼae ʼe kovi. Kaʼe, ʼe feala ia ki te tagata ke ina filifili pe ʼe ko te faʼahiga maʼuli fea ʼae ʼe loto ki ai pea mo fakafiafiaʼi te loto ʼo Sehova. (Taaga Lea 30:24) Pea tahi, ʼe tou toe kehekehe mai te ʼu masini. ʼE ʼi ai te ʼu polokalama kua fakatuʼutuʼu ke mulimuli ki ai te ʼu masini. Kaʼe, ʼe tou ʼateaina ʼi te filifili pe ʼe feafeaʼi anai totatou ʼulugaaga, peʼe ko ai ʼotatou kaumeʼa peʼe kotea ʼe tou fai anai ʼi totatou maʼuli. ʼEi, ʼe loto e Sehova ke tou maʼuli fiafia.
20, 21. Kotea te tonu ʼae ʼe lelei age ke ke toʼo ia ʼaho nei?
20 ʼE loto e Sehova ke tou ʼoʼofa ia te ia. (Mateo 22:37, 38) ʼE hage ia Sehova ko he tamai ʼe fiafia moka ui age e hana fanau ʼaki tona loto katoa “ ʼE au ʼofa mamahi ia koe.” Kaʼe ʼe mole ina fai ʼuhi he neʼe fakakinauʼi ia ia. ʼE foaki mai e Sehova te loto faʼitaliha ke tou filifili pe ʼe tou tauhi age kia te ia peʼe kailoa. Neʼe filifili e Satana, mo Atama pea mo Eva ke mole natou tauhi kia Sehova. ʼE ke fakaʼaogaʼi feafeaʼi anai tou loto faʼitaliha?
21 Ko te toko lauʼi miliona hahaʼi neʼe natou filifili ke natou fakalogo kia Sehova kaʼe mole kia Satana. ʼO toe feia pe mo koe, ʼe feala ke ke fakaʼaogaʼi tou loto faʼitaliha ke ke tauhi kia Sehova. (Taaga Lea 27:11) ʼI te malama foʼou, ʼe pulihi anai te ʼu mamahi fuli. Kotea ʼae ʼe tonu ke ke fai ke feala hau maʼuli ʼi te malama foʼou? ʼI te kapite ka hoa mai, ʼe tou tali anai ki te fehuʼi ʼaia?