ʼE Logo Te Kau Solia ʼo Te Hau Loma Ki Te Logo Lelei

ʼI te taʼu 59 H.T.S.,a neʼe fakahu te kau pilisoni ki Loma ʼi te La Porte Capène e te kau solia neʼe kua gaʼegagaʼe ʼi tanatou faifagona. Neʼe tuʼu te fale hau ʼo te Hau ko Néron ʼi te Moʼuga ʼo Palatin, ʼae neʼe leʼohi e te kau tagata solia ʼo te Hau mo ʼanatou heleta neʼe fufu ʼi ʼonatou teu.b Ko te kamutoa ko Suliusi neʼe fakalaka mo ʼana kau pilisoni ʼi te Forum romain, neʼe ko te fakatahiʼaga mahani ʼaia ʼo te kau Loma moʼo palalau ki te politike, te ekonomi pe ko te lotu, pea natou hake ai ʼi te Moʼuga ʼo Viminal. Neʼe natou fakalaka ʼi te ʼoloto neʼe lahi ai te ʼu ʼaletale ki te ʼu ʼatua Loma pea mo te koga meʼa neʼe ako tau ai te kau solia.

Neʼe kau te apositolo ko Paulo ʼi te kau pilisoni ʼaia. ʼI ni mahina ki muʼa atu, neʼe nofo ia ʼi te vaka neʼe fueʼi e te tuʼani matagi. Kaʼe neʼe ui fenei e te ʼaselo ʼa te ʼAtua kia Paulo: “E tonu ke ke tuu ia mua o Sesale.” (Gaue 27:24) Neʼe kua tokalelei koa Paulo moʼo tauʼi te ʼu faʼahi ka hoko anai kia ia? ʼI tana maliu ʼo sio ki te kolo muʼa ko Loma, ʼe mahino ia neʼe ina manatuʼi ia te ʼu folafola ʼaeni neʼe fai age e te ʼAliki ko Sesu ʼi Selusalemi, ʼi te Tule ʼo Atonia: “Lotomalohi; koteuhi, o hage ko tau fakamooni kia au i Selusalemi, e tonu foki ke ke toe fakamooni kia au i Loma.”—Gaue 23:10, 11.

Neʼe lagi sioʼi e Paulo te koga meʼa ʼae neʼe higoa ko te Castra Praetoria, neʼe ko he potu neʼe ʼatakai e te ʼu kaupa lalahi ohage ko he ʼu tule, neʼe laga ʼaki te ʼu piliki kula. Neʼe ko te nofoʼaga ʼa te kau Solia ʼo te Hau, ʼae neʼe natou leʼohi te Hau, pea mo te kau polisi ʼo te kolo. Neʼe nonofo ai te ʼu kutuga solia ʼe 12c ʼo te Hau pea mo te ʼatu kutuga solia ʼo te kolo. Koia, neʼe feala ke maʼuʼuli ʼi te nofoʼaga ʼaia te toko lau ʼi afe kau solia, ʼo kau ai mo te kau solia heka hosi. Ko te koga meʼa ʼaia ʼe ina fakamanatuʼi ia te malohi ʼaupito ʼo te ʼu Hau ʼo Loma. Neʼe ko te kau Solia ʼo te Hau ʼae neʼe tokakaga ki te hahaʼi pilisoni ʼae neʼe ʼomai mai te tahi ʼu kolo. Ko ia la ʼae neʼe taki ai e Suliusi tana kutuga pilisoni ki te nofoʼaga ʼaia, ʼo fakalaka ʼi te tahi ʼo te ʼu matapa tafitō ʼe fa. Hili tanatou fagona faigataʼa ʼi ni mahina, neʼe ina ʼave ai tana kau pilisoni ki te potu ʼae neʼe tonu ke natou kaku ki ai.—Gaue 27:1-3, 43, 44.

ʼE FAIFAKAMAFOLA FAʼITALIHA TE APOSITOLO

Lolotoga tanatou faifagona, neʼe sio Paulo ki he ʼaselo ʼa te ʼAtua neʼe ina fakaha age ʼe hao anai te kauvaka katoa ʼi te tuʼutamaki. Neʼe mole mate Paulo ʼi tona ʼuʼusi e te gata kafokona. Neʼe ina fakamalolo te hahaʼi mahahaki ʼi te motu ko Malete, pea neʼe natou kamata ui ai ko ia ko te ʼatua. Neʼe lagi mafola te ʼu fakamatala ʼaia ʼi te kau Solia ʼo te Hau ʼae neʼe natou tui ki te ʼu meʼa fakamanamana.

Neʼe kua felaveʼi Paulo mo te ʼu tehina ʼo Loma ʼae neʼe ʼomai ʼo fakafetaulaki mo ia ʼi te Fakatauʼaga Meʼa ʼo Apiu pea mo Te ʼu Fale Tali Fagona ʼe Tolu. (Gaue 28:15) Kaʼe feafeaʼi leva hana fakahoko tana fia fakamafola ia te logo lelei ʼi Loma kaʼe pilisoni? (Loma 1:14, 15) ʼE manatu e ʼihi neʼe tuku te kau pilisoni ki te pule ʼo te kau tagata solia. Kapau koia, pea neʼe lagi tuku Paulo ki te tagata maʼuhiga ʼo te fale hau ko Afranius Burrus, ʼae neʼe lagi hoa ki te Hau.d Ko te meʼa ʼae ʼe tou iloʼi neʼe mole kei leʼohi Paulo e he kamutoa, kaʼe neʼe ko te Solia ʼo te Hau. Neʼe fakagafua kia Paulo ke maʼu hona ʼapi pea mo ina fakatalitali ai he hahaʼi neʼe ʼomai ʼo fakasiosio ia ia pea mo faifakamafola faʼitaliha kia natou.—Gaue 28:16, 30, 31.

ʼE FAIFAKAMAFOLA PAULO KI TE KAU LILIKI MO TE KAU LALAHI

ʼI ʼana faifakamau, neʼe lagi fakafehuʼi e Burrus ia te apositolo ko Paulo, ʼi te fale hau pe ʼi te nofoʼaga ʼo te kau Solia ʼo te Hau, ʼi muʼa ʼo tana ʼave kia Néron. Neʼe fakaʼaoga e Paulo te faigamalie pe ʼaia ʼe tahi moʼo fai he “fakamooni ia mua o te kau liliki mo te kau lalahi.” (Gaue 26:19-23) Tatau aipe pe neʼe kotea te tonu ʼa Burrus, kaʼe neʼe mole pilisoniʼi Paulo ʼi te loto nofoʼaga ʼa te kau Solia ʼo te Hau.e

Ko te fale ʼae neʼe lue e Paulo neʼe feʼauga moʼo fakatalitali ai “te kau lalahi o te kau Sutea” pea mo faifakamafola kia natou, ʼo toe feia mo te kauga malie ʼae neʼe ʼomai ki tona loto fale. Neʼe toe fagono foki mo te kau solia ʼo te Hau ki “tana fakamooni” pe faifakamafola ki te kau Sutea ʼo ʼuhiga mo te Puleʼaga pea mo Sesu, “mai te uhu o kaku ki te afiafi.”—Gaue 28:17, 23.

Neʼe fetogi te kau solia ʼae neʼe natou leʼohi te fale ʼo te Hau ʼi te ʼaho fuli ʼi te hola lua hili hoʼata. Neʼe toe tautau fetogi mo te tagata ʼae neʼe ina leʼohi Paulo. ʼI te ʼu taʼu ʼe lua ʼae neʼe pilisoni ai te apositolo, ko te kau solia neʼe natou logo ki tana laulau age kaʼe tohi e he tahi te ʼu tohi maʼa te kau Kilisitiano ʼi Efeso, mo Filipe, mo Kolose pea mo Hepeleo. Neʼe natou toe sio foki ki tana fai e ia totonu te tohi ki he Kilisitiano neʼe higoa ko Filemo. ʼI tona temi pilisoni, neʼe ʼofa ia Paulo ki te sinifu ko Onesime, ʼae neʼe hola mai tona pule. Neʼe hage Paulo kia ia ko hana tamai ʼi te temi ʼaia, pea neʼe ina toe fakaliliu ia ia ki tona pule. (Film. 10) ʼE mahino ia neʼe toe ʼofa Paulo ki te ʼu tagata ʼae neʼe natou leʼohi ia ia. (1 Ko. 9:22) ʼE feala pe hatatou fakakaukau ki te haga ʼae ʼa Paulo ʼo fakafehuʼi he tagata solia ʼo ʼuhiga mo te ʼu koga kehekehe ʼo tona teu tau, pea mo tana fakaʼaogaʼi leva te ʼu faʼahi ʼaia moʼo fai he lea fakata ʼe lelei.—Efe. 6:13-17.

NEʼE MOLE KEI NATOU MATATAKU ʼI TE FAKAHA ʼO TE EVASELIO

Ko te pilisoni ʼo Paulo neʼe lagolago ki “te fakalakalaka ki mua o te Evaselio” ʼi te lotolotoga ʼo te kau Solia fuli ʼo te Hau pea mo ʼihi atu. (Filp. 1:12, 13) Ko te kau solia ʼae neʼe maʼuʼuli ʼi te nofoʼaga Castra Praetoria, neʼe ʼi ai ʼonatou feʼilo ʼi te Puleʼaga katoa ʼo Loma. Neʼe natou toe felogoʼi mo te hau pea mo tona loto fale ʼae neʼe kauga malie. Neʼe kau ki te loto fale ʼaia te famili ʼo te hau, ʼana kaugana, mo te ʼu sinifu, pea neʼe liliu ʼihi ko he ʼu Kilisitiano. (Filp. 4:22) ʼAki te faifakamafola lototoʼa ʼa Paulo, neʼe maʼu e te ʼu tehina ʼo Loma te lotomalohi ʼae ke natou “fakaha . . . te Evaselio, [ʼo] mole kei natou mataku.”—Filp. 1:14.

Ko te faifakamafola ʼa Paulo ʼi Loma ʼe ina toe fakalotomalohi tatou moka tou faifakamafola ʼi te ʼu temi faigamalie pe faigataʼa. (2 Tim. 4:2) Ko ʼihi ia tatou ʼe nonofo ʼi te ʼu fale taupau ki te hahaʼi matutuʼa, pe ʼi te lopitali. Pea kua pilisoni pe la ʼihi ʼuhi ko tanatou tui. ʼI te ʼu aluʼaga ʼaia, ʼe lagi feala pe ke tou palalau kia natou ʼae ʼe lagi ʼomai ʼo fakasiosio mai pe fai mai he ʼu faitoʼo. Ka tou lototoʼa ʼo faifakamafola ʼi te ʼu aluʼaga fuli pe, pea ʼe tou sio mata ai ki te mole feala ʼae ke mataʼofi te folafola ʼa te ʼAtua.—2 Tim. 2:8, 9.