ʼE fakapaʼaga feafeaʼi tanatou gaue faifakamafola?

ʼI te taʼu fuli, ʼe natou ta mo tufa ia te ʼu Tohi-Tapu pea mo te ʼu tohi Fakatohi-tapu ʼe lauʼi teau miliona. ʼE natou fakatuʼu mo takitaki ia te ʼu filiale pea mo te ʼu fale ta tohi ʼi te malamanei katoa. ʼE fakatahitahi ia te toko lauʼi hogofulu afe kokelekasio ʼi te ʼu fale matalelei ʼae ʼe fai ai te tauhi, ʼe higoa ko te Fale Fono. Ko ai ʼae ʼe ina totogi ia te ʼu faʼahi fuli ʼaia?

ʼE fakapaʼaga katoa tanatou gaue ʼaki te ʼu meʼa ʼofa ʼe foaki ʼaki he lotolelei. (2 Kolinito 9:7) ʼI te taʼu 1879, ʼi te lua nusipepa ʼo Te Tule Leʼo, ʼi te kupu tafitō “ʼE Kotou Fia Lau Koa ‘Te Tule Leʼo ʼo Sione’?”, neʼe kamata fenei: “ʼE matou tui [ko te nusipepa ʼaeni] ʼe lagolago ki ai ia SEHOVA, pea kapau ʼe haga hoko atu tana lagolago ki ai, ʼe mole kolekole anai pea mo fakaui anai he lagolago fakatagata ʼo ʼuhiga mo te nusipepa ʼaeni.” Koia, ʼe mole heʼeki natou fetogi ia te faʼahiga fai ʼaia.

ʼE ʼave fakahagatonu te ʼu meʼa ʼofa ki ʼonatou filiale peʼe ki he puha meʼa ʼofa ʼe tuʼu ʼi te ʼu Fale Fono takitahi. Kaʼe, ʼe mole natou fai he tae falā, peʼe fakatotogi ʼanatou gaue peʼe ko ʼanatou tohi. ʼE mole totogi tanatou olo ʼo faifakamafola, mo te faiakonaki ʼi te kokelekasio peʼe ko te tokoni ki te laga ʼo te ʼu fale ʼae ʼe fai ai te tauhi. Koteʼuhi neʼe ui fenei e Sesu: “Nee kotou mau hala totogi, pea kotou foaki hala totogi.” (Mateo 10:8) Ko natou fuli ʼae ʼe gaue ʼi ʼonatou filiale pea mo ʼonatou pilo lalahi ʼo kau ki ai mo te Kolesi Pule ʼo te kau Fakamoʼoni ʼa Sehova, ʼe natou gaue ʼaki he lotolelei kaʼe ʼe mole totogi natou. Pea ʼe natou kau ki te kautahi fakalotu.

ʼE toe fakaʼaogaʼi te ʼu meʼa ʼofa ki te ʼu tuʼutamaki fakanatula. Neʼe fiafia ia te ʼu ʼuluaki Kilisitiano ʼi tanatou vaevae ʼonatou koloa mo natou ʼae neʼe tau mo ni faigataʼaia. (Loma 15:26) ʼO toe feia pe mo natou, ʼe natou tokoni kia natou ʼe tau mo te mamahi ʼaki tanatou faʼu ʼonatou ʼapi pea mo te ʼu fale ʼae ʼe fai ai te tauhi. Pea mo foaki ia te meʼa kai, mo te mutuʼi meʼa pea mo te ʼu faitoʼo.