Te ʼu Fehuʼi ʼA Te Kau Lautohi

Kotea neʼe maʼu e te kau alekeolosia ʼe ha ai neʼe mole talitali fualoa te kau Iselaele ki te ʼohofi ʼo Seliko?

ʼE ui ia Sosue 6:10-15, 20, neʼe foliʼi e te kau tagata solia Iselaele te kolo ko Seliko tuʼa tahi ʼi te ʼaho lolotoga ʼaho ʼe ono. ʼI te fitu ʼaho, neʼe natou foliʼi tuʼa fitu te kolo. Pea neʼe holoʼi e te ʼAtua te ʼu kaupa ʼo Seliko ʼo maumauʼi ai e te kau Iselaele. Neʼe maʼu koa e te kau alekeolosia he meʼa ʼe ha ai neʼe ʼohofi ia Seliko ʼi he kiʼi temi nounou, ohage ko tona fakaha ʼi te Tohi-Tapu?

ʼI te temi muʼa, ka ʼamanaki ʼohofi he kolo, ʼe ʼa takatakai e he foʼi tau ia te kolo. Kapau neʼe loaloaga te ʼohofi ʼaia, ko te hahaʼi ʼo te kolo ʼe natou kai anai te ʼu meʼa kai ʼae neʼe tanaki. Pea ka maumauʼi e te kau solia te kolo, ʼe feala ke natou toʼo te ʼu meʼa fuli ʼae neʼe natou loto ki ai, ʼo kau ai mo te ʼu meʼa kai ʼae neʼe tuku ai. Koia ʼae neʼe maʼu ai e te kau alekeolosia ia he meʼa kai ʼe mole lahi ʼi te ʼu toega ʼo te ʼu kolo fuli ʼo Palesitina, ʼae neʼe ʼohofi ʼi hona aluʼaga ʼe tatau. Kaʼe ʼe kehekehe ia mo te ʼu toega ʼo te kolo ko Seliko. ʼE ui fenei ʼi te tohi (Biblical Archaeology Review): “Ko te ʼu meʼa ʼae neʼe lahi tona maʼu hili te maumau, neʼe mole ko te ʼu ipu kele pe kaʼe neʼe toe maʼu ai mo te meʼa kai.” ʼE toe hoko atu fenei: “Neʼe ko he meʼa fakapunamaʼuli te lahi ʼo te meʼa kai ʼae neʼe maʼu ai.”

ʼE ui ʼi te Tohi-Tapu neʼe mole toʼo e te kau Iselaele he meʼa kai ʼi te kolo ko Seliko. Koteʼuhi neʼe fakatotonu e Sehova kia natou ke ʼaua tanatou fai te faʼahi ʼaia. (Sosue 6:17, 18) ʼE toe fakaha ai neʼe ʼohofi e te kau Iselaele ia Seliko ʼi te temi matala ʼo te ʼu fisiʼi ʼakau, hili pe te taʼukai. Ko tona fakaʼuhiga ʼi te temi ʼae neʼe lahi ai te meʼa kai ʼae neʼe tanaki ʼi te kolo. (Sosue 3:15-17; 5:10) Koia, ʼi te kei lahi ʼo te meʼa kai ʼi Seliko hili pe tona ʼohofi, ʼe fakamoʼoni ai neʼe ko he kiʼi temi nounou pe ʼae neʼe ʼohofi ai, ohage pe ko tona fakaha ʼi te Tohi-Tapu.