Ko He Ako Maʼuhiga ʼe Tou Maʼu Mai Te Kiʼi Mataʼi Tohi Fakahepeleo

ʼE tou tui papau koa ʼe hoko moʼoni anai te ʼu fakapapau ʼa te ʼAtua? Neʼe tui papau ia Sesu ki te faʼahi ʼaia. Pea neʼe ina fakamalohiʼi te tui ʼo ʼana tisipulo ʼaki ʼana akonaki. Tou vakaʼi te faʼifaʼitaki neʼe talanoa ki ai ʼi tana Akonaki ’i Te Moʼuga. Pea ʼe ui fenei ia Mateo 5:18: “ ʼE au tala moʼoni atu kia koutou: ʼE feala ke molehi te lagi mo te kele. Kaʼe ʼe mole feala ke molehi he kiʼi mataʼi tohi ʼo te Lao, he ʼe fakahoko fuli anai.”

Ko te kiʼi mataʼi tohi ʼo te alefapeti Fakahepeleo ʼe ko te י (yod). ʼE ko te ʼuluaki mataʼi tohi ʼaia ʼo te Tetalakalame, ʼae ko te huafa taputapu ʼo te ʼAtua, ko Sehova.a ʼO hilifaki ki te ʼu kupu mo te ʼu mataʼi tohi ʼo te Lao ʼa te ʼAtua, neʼe manatu te kau sekelipa mo te kau Faliseo ko te ʼu “kiʼi mataʼi tohi” takitahi ʼaia ʼe maʼuhiga ʼaupito.

Neʼe ui e Sesu ʼe feala ke molehi te lagi mo te kele kaʼe ʼe mole feala ke molehi he kiʼi mataʼi tohi ʼo te Lao. ʼE fakaha lelei mai ʼi te Tohi-Tapu ʼe tuʼu maʼu anai te lagi mo te kele ʼo talu ai. (Pesalemo 78:69) Koia, ʼe ha mai ʼi te ʼu palalau ʼa Sesu maʼia mo te ʼu kiʼi mataʼi tohi ʼo te Lao ʼe mole feala anai ke molehi.

ʼE tokaga koa ia Sehova ʼAtua ki te ʼu kiʼi meʼa liliki? ʼEi. Ohage la, tou vakaʼi muʼa te aluʼaga ʼaeni: Neʼe fakatotonu ki te kau Iselaele ke mole natou fasiʼi he hui ʼe tahi ʼo te akeno ʼo te Pasikate. (Ekesote 12:46) Neʼe ko he manatu neʼe mole lagi faʼa maʼuhiga. Kaʼe, neʼe natou mahino koa pe koʼe neʼe mole tonu ke natou fasiʼi he hui ʼe tahi? Kailoa ia. Neʼe iloʼi e Sehova ʼAtua ko te manatu ʼaia neʼe ko he lea fakapolofeta ʼo ʼuhiga mo te Mesia. ʼE mole fasiʼi anai hona hui ʼe tahi ʼi tana mate ʼi te pou.​​​—Pesalemo 34:21; Soane 19:​31-33, 36.

Kotea ʼe tou ako mai te ʼu palalau ʼa Sesu? ʼE toe feala ke tou tui papau ʼe hoko moʼoni anai te ʼu fakapapau fuli ʼa Sehova ʼAtua, maʼia mo te ʼu kiʼi meʼa liliki. ʼE fakalotomalohi te ako ʼae ʼe tou maʼu mai te kiʼi mataʼi tohi Fakahepeleo ʼaia.