Kua Kotou Iloʼi Koa?
He koʼe neʼe fakagafua e Sehova ki te kau Iselaele ke natou sakilifisioʼi he ʼu kulukulu peʼe ko he ʼu lupe?
ʼI TE Lao, neʼe feala ke momoli ia te ʼu kulukulu pea mo te ʼu lupe ko he sakilifisio kia Sehova. ʼI te agamahani, ʼe hoa tahi tuʼumaʼu te ʼu manulele ʼaeni moka tou palalau ki te ʼu lao ʼo ʼuhiga mo te ʼu sakilifisio, ʼo feala ke kita momoli he manulele ʼi te ʼu manulele ʼaeni ʼe lua. (Lev. 1:14; 12:8; 14:30) He koʼe ʼe lelei ia te fakatuʼutuʼu ʼaia? Koteʼuhi, neʼe mole faigafua ia te maʼu ʼo te ʼu kulukulu. Kotea tona tupuʼaga?
Kulukulu
Ko te ʼu kulukulu ʼe ko he ʼu manulele ʼe feoloʼaki pea ʼe maʼu ʼi te ʼu telituale fuli ʼo Iselaele ʼi te ʼu mahina ʼe vevela ai. ʼI te ʼu mahina ʼo Oketopeli fuli, ʼe natou hiki ki te potu saute, ki te ʼu fenua vevela pea hoki natou toe liliu mai ki Iselaele ʼi te ʼuluaki fasiga taʼu. (Hiva 2:11, 12; Sel. 8:7) ʼI te temi muʼa, neʼe mole faigafua ki te kau Iselaele hanatou sakilifisioʼi he ʼu kulukulu ʼi te temi momoko.
He lupe ʼi te popoko
ʼO kehekehe ia mo te ʼu lupe, ʼe mole mahani ia ʼi te feoloʼaki, neʼe faigafua tona maʼu ʼi Iselaele lolotoga te taʼu katoa. Pea tahi, neʼe fakalalata te ʼu lupe. (Vakaʼi ia Soane 2:14, 16.) ʼE ui fenei ʼi te tohi Bible Plants and Animals: “Neʼe fakalalata ʼi te ʼu kolo liliki mo te ʼu kolo lalahi ʼo Palesitina ia te ʼu lupe. Neʼe takitahi pe te loto fale mo tona fale lupe peʼe ko he ʼu lupe ʼe maʼuʼuli ʼi te ʼu pokoʼi kaupa.”—Vakaʼi ia Esaia 60:8.
He lupe ʼi he ʼa
ʼE fakaha mai e Sehova, ʼe ko ia ko he ʼAtua fonu ʼi te ʼofa pea mo fakapotopoto. ʼE ina tali ke sakilifisioʼi age e te kau Iselaele ia he ʼu manulele ʼe maʼu gafua lolotoga te taʼu katoa.