Faʼifaʼitakiʼi Te Agavaivai ʼa Sehova

1. He koʼe ʼe malave kia koe ia te agavaivai ʼa Sehova?

KIA KOE la ʼe agavaivai koa te kau taki ia ʼaho nei? Kailoa ia. Kae ʼe agavaivai ia Sehova logo foki la ʼe mafimafi. (Pes. 113:​5-8) ʼE iloga tana agavaivai ʼi te ʼu meʼa ʼae ʼe ina fai. Pea ʼe mole he temi ʼe fiameʼalahi ai. ʼI te alatike ʼaeni, ʼe tou vakaʼi anai aluʼaga ʼe fa ʼo tona ʼuluagaaga ʼae ʼe ha ai ia tana agavaivai. ʼE tou toe vakaʼi anai pe neʼe faʼifaʼitakiʼi feafeaʼi e Sesu ia te agavaivai ʼo tana Tamai. Pea ka tou vakavakaʼi te ʼu aluʼaga ʼaia ʼe fa, ʼe tokoni mai anai ke tou fakaovi kia Sehova, pea mo faʼifaʼitakiʼi lelei age ia tana agavaivai.

ʼE FAIGAFUA HATATOU FAKAOVI KIA SEHOVA

2. Kotea ʼae ʼe tou ako ia Pesalemo 62:8 ʼo ʼuhiga mo Sehova? (Vakaʼi mo te pāki.)

² ʼI te agamahani ʼe mole faigafua hakita fakaovi ki ni hahaʼi fiameʼalahi. Ko te kau fiameʼalahi ʼe mole natou agalelei ki te hahaʼi heʼe natou manatu ʼe natou lelei age. Koia la ʼae ʼe mole fia fakaovi age he tahi kia natou. Kae ʼe mole feia Sehova ia. ʼE agavaivai, pea ʼe ina fakaafe tatou ke tou fakaovi age kia te ia mo tou fakaha age ʼotatou tuʼania fuli. (Lau ia Pesalemo 62:8.) ʼE hage tatatou Tamai ʼae ʼi selo ko he tamai ʼofa ʼe fagono ki ʼana fanau moka natou fakaha age ʼanatou tuʼania. ʼE mahino ia, ʼe fiafia Sehova ʼi te fagono ki te faikole ʼo ʼana kaugana. Pea neʼe lahi te ʼu faikole ʼo ʼana kaugana neʼe ina loto ke tohi ʼi te Tohi-Tapu. ʼE ha ai ʼe faigafua te fakaovi kia Sehova. (Sos. 10:​12-14; 1 Sam. 1:​10-18) Kae feafeaʼi mo kapau ʼe tou manatu ʼi ʼihi temi ʼe mole tou tuha ke tou fakaovi kia Sehova?

3. He koʼe ʼe ke tui papau ʼe loto e Sehova ke ke fakaovi tuʼumaʼu kia te ia ʼi te faikole?

³ ʼE feala ke tou fakaovi kia Sehova ʼi te faikole maʼia pe ʼe tou manatu ʼe mole kei tou tuha mo tona ʼofa. ʼE tou iloʼi feafeaʼi te faʼahi ʼaia? ʼI te lea fakatata ʼa Sesu ʼo ʼuhiga mo te foha ʼae neʼe puli, neʼe ina fakatatau ai ia Sehova ki he tamai agalelei. Neʼe fakahemala te foha ʼo te tamai ʼaia kae neʼe manatu ia ʼe mole kei tuha ke toe kau ki te famili. ʼI tana toe liliu kio ia, kotea ʼae neʼe fai e tana tamai? Neʼe ui e Sesu, ʼi te sio pe ʼa te tamai ki ai “neʼe lele ʼo faʼufua mo ʼuma mamahi ki ai.” (Luka 15:​17-20) Pea ʼe toe feia pe tatatou Tamai ko Sehova. Ka faikole age he tahi ʼe lotomamahi he neʼe ina fai he lakahala peʼe hoha, ʼe agavaivai ia Sehova ʼo ina foimo tokagaʼi atu aipe tana kole. (Tgl. 3:​19, 20) ʼE hage pe ʼe lele ki ai ʼuhi ko tona manavaʼofa he ʼe ina fia fakalotofimalie ia ia pea ke ina iloʼi ʼe ʼofa mamahi ia ia. (Esa. 57:15) ʼE fakahoko feafeaʼi e Sehova te faʼahi ʼaia? ʼE ina tau fakaʼaogaʼi he ʼu tagata ʼafea, peʼe ko he tahi ʼi totatou famili ʼe tauhi kia te ia, peʼe ko te ʼu tehina mo tuagaʼane moʼo fakafimalieʼi tatou. (Sakp. 5:​14, 15) ʼE tokoni feia mai kia tatou koteʼuhi ʼe ina loto ke tou nonofo ovi kia te ia.

4. Kotea ʼae ʼe ha ai neʼe faigafua te fakaovi ʼa te hahaʼi kia Sesu?

⁴ ʼE faʼifaʼitakiʼi e Sesu tana Tamai. ʼE agavaivai pe Sesu ohage ko tana Tamai. Koia ʼi tana ʼi te kele neʼe mole tuʼania te hahaʼi ʼi te olo ʼo palalau ki ai. Neʼe natou faifehuʼi faʼifaʼitaliha ki ai. (Mko. 4:​10, 11) Ka neʼe ina kole age pe kotea tanatou manatu ʼo ʼuhiga mo he koga, neʼe natou fakaha lelei age tanatou manatu. (Mat. 16:​13-16) Pea ka neʼe natou fai ni lakahala neʼe mole matataku naʼa ita Sesu kia natou. Neʼe natou iloʼi ʼe agalelei, mo manavaʼofa pea mo kataki fualoa. (Mat. 17:​24-27) Neʼe faʼifaʼitakiʼi lelei e Sesu ia tana Tamai. Koia neʼe tokoni ai ki ʼana tisipulo ke natou iloʼi lelei age ia Sehova. (Soa. 14:9) Neʼe natou mahino ai neʼe kehekehe ʼosi ia Sehova mo te kau takitaki lotu ʼo tonatou temi. Neʼe mole agafefeka mo fiameʼalahi ohage ko natou ʼaia. Kae neʼe agavaivai pea mo faigafua te fakaovi kia te ia.

5. He koʼe ʼe faigafua anai te fakaovi mai ʼa ʼihi moka ʼe tou agavaivai?

⁵ ʼE feafeaʼi hatatou faʼifaʼitakiʼi ia Sehova? ʼE faigafua anai te fakaovi mai ʼa he tahi moka ʼe tou agavaivai. Ka mole tou agavaivai, ʼe tou liliu ʼo maheka, mo fiameʼalahi pea ʼe mole tou lotofakamolemole. Kae ka tou agavaivai, ʼe tou agalelei anai, mo kataki fualoa pea mo loto fakamolemole. ʼE faigafua anai te fakaovi mai ʼa ʼihi kia tatou. (Kol. 3:​12-14) ʼE faigaʼi tafito anai e te kau tagata ʼafea ke faigafua te fakaovi age ʼa te ʼu tehina mo tuagaʼane kia natou. ʼE tonu ai ke fakatahi te kau tagata ʼafea mo natou. ʼE natou faiga anai ke lahi age tanatou olo ʼae ki te ʼu fono ʼi te Fale Fono ʼi hanatou muliʼi ʼi te Neti. Pea kapau ko he meʼa ʼe feala, ʼe natou faifakamafola anai mo ʼonatou tehina mo tuagaʼane. ʼE natou iloʼi lelei age ai te ʼu tagata ʼafea pea ʼe mole natou matataku anai ʼi te olo ʼo palalau faʼitaliha age kia natou.

ʼE FAKAPOTOPOTO IA SEHOVA

6-7. Kotea ʼae ʼe ha ai ʼe lotolelei ia Sehova ʼo mulimuli ki te ʼu kole ʼo ʼana kaugana? Tuku mai he ʼu faʼifaʼitaki.

⁶ Tokolahi ia natou ʼae ʼe fiameʼalahi ʼe mole fakapotopoto. ʼE natou loto ke tuʼu ʼanatou manatu moka natou felogoi mo ʼihi. Kae ko Sehova ʼe agavaivai ia. Pea ʼe aga fakapotopoto logo foki la ʼe ina iloʼi te ʼu aluʼaga fuli. Tou vakaʼi pe kotea ʼae neʼe ina fai kia Miliamu te tokolua ʼo Moisese. Neʼe nā muhumuhu mo Alone kia Moisese, ʼae neʼe ina fakafofoga ia Sehova. Kae ʼi tona fakahagatonu, neʼe mole fakaʼapaʼapa ia Miliamu kia Sehova. Neʼe kovi ʼosi te ita ʼo Sehova ki ai, ʼo ina fakatupu ai ia ia te kilia. Kae kotea leva ʼae neʼe fai e Sehova ʼi te kole mamahi ʼa Alone kia Moisese ke tokoni ki tonā tokolua, pea mo te kole mamahi age ʼa Moisese ke ina fakamalolo ia Miliamu? Neʼe mole fiameʼalahi ia Sehova ʼo mole ina fetogi te tonu ʼae neʼe ina fai. Kae ʼe agavaivai ia Sehova. Koia neʼe ina tali te kole ʼa Moisese pea neʼe ina fakamalolo ia Miliamu.​—Num. 12:​1-15.

⁷ Neʼe toe agavaivai ia Sehova ʼi te temi ʼae neʼe fagono ai ki te Hau ko Esekiasi. Neʼe ina fekauʼi he polofeta ke alu ʼo fakaha ki te hau ʼe mate anai. Neʼe tagi ia Esekiasi ʼo ina kole mamahi kia te ia ke ina fakamalolo. Kotea ʼae neʼe fai e Sehova? Neʼe manavaʼofa ia Sehova ʼo ina fakatologa tona maʼuli ia taʼu ʼe 15. (2 Hau 20:​1, 5, 6) ʼE ha mai ai ʼe manavaʼofa ʼosi ia Sehova ki te tagata pea ʼe agavaivai. Koia ʼe lotolelei ai ʼo mulimuli ki ʼanatou manatu.

8. Kotea ʼae ʼe ha ai ʼe aga fakapotopoto ia Sesu? (Maleko 3:​1-6)

⁸ ʼE faʼifaʼitakiʼi e Sesu tana Tamai. ʼI te maʼuli ʼa Sesu ʼi te kele, neʼe aga fakapotopoto pea mo tokoni ki te hahaʼi ʼi te lakaga fuli pe ʼae neʼe ʼaoga ai kia natou. Ohage la neʼe ina fakamalolo ʼihi ʼi te ʼaho ʼo te Sapato logo la te iita ʼo ʼona fili ʼae neʼe loto fefeka. (Lau ia Maleko 3:​1-6.) Ia ʼaho nei, ʼe toe aga fakapotopoto ia Sesu ʼi tana faʼahiga takitaki ia te kokelekasio. Ohage la ka fai e he tahi ʼi te kokelekasio he agahala mamafa ʼe kataki fualoa ki ai, ke tupu ai hana fetogi.​—Fkha. 2:​2-5.

9. ʼE feafeaʼi hatatou fakaha ʼe tou fakapotopoto? (Vakaʼi mo te ʼu pāki.)

⁹ ʼE feafeaʼi hatatou faʼifaʼitakiʼi ia Sehova? Tou faiga ʼaki he agavaivai ke tou faʼifaʼitakiʼi te faʼahiga manatu mo aga ʼa Sehova ʼae ʼe fakapotopoto. (Sakp. 3:17) Ohage la ko te ʼu matuʼā ʼae ʼe fakapotopoto ʼe mole natou fakamaʼua ki ʼanatou fanau ke natou fai he ʼu meʼa ʼe mole natou lavaʼi. ʼE tuku e Sakopo he faʼifaʼitaki lelei kia natou, ohage ko tona ui mai ia Senesi 33:​12-14. Pea ko te ʼu matuʼā ʼae ʼe agavaivai mo fakapotopoto ʼe mole natou fakatatau anai ʼanatou fanau ʼae mo ʼanatou tahi fanau. ʼE tonu foki ki te kau tagata ʼafea ke natou aga fakapotopoto. Ohage la ʼe mole faiga anai he tagata ʼafea ke tuʼu ia tana tonu. Kae ʼe lagolago pe anai ki te tonu ʼae kua toʼo e te ʼu tagata ʼafea fuli, mo kapau ʼe alu tahi te tonu ʼaia mo te ʼu pelesepeto ʼo te Tohi-Tapu. (1 Tim. 3:​2, 3) Pea ʼe feala kia tatou fuli ke tou mahino ki te manatu ʼa ʼihi maʼia pe ʼe mole tatau tatatou faʼahiga sio. (Loma 14:1) Koia ʼe ko tatou fuli ʼae ʼe tonu ke tou faiga “ke iloʼi e te tagata fuli [tatatou] aga fakapotopoto.”—Flp. 4:5.

ʼE KATAKI FUALOA IA SEHOVA

10. Neʼe fakaha feafeaʼi e Sehova ia tana kataki fualoa?

¹⁰ ʼE lagi neʼe ke tokagaʼi, ko ʼae ʼe fiameʼalahi ʼe mole fia atali fualoa ki he tahi. ʼE mole kataki fualoa. ʼI kehekehe leva mo Sehova ʼae ʼe kataki fualoa! Ohage la ʼi te temi ʼo Noe neʼe ui e Sehova ʼe talitali anai kia taʼu ʼe 120, pea hoki ina pulihi te kau agakovi. (Sen. 6:3) Neʼe maʼu ai e Noe he temi moʼo tokaga ki ʼana fanau pea mo faʼu te aleka ʼaki te tokoni ʼo tona famili. Ki muli age, neʼe kataki fualoa ia Sehova kia Apalahamo, ʼi tana faifehuʼi age kia te ia ʼo ʼuhiga mo te maumauʼi ʼo Sotoma mo Komola. Neʼe feala pe ki he tahi ʼe fiameʼalahi ke ina ui age kia Apalahamo: “Ko ai koe ke ke faifehuʼi mai?” Kae ʼe agavaivai ia Sehova. Koia neʼe kataki fualoa ai kia Apalahamo.​—Sen. 18:​20-33.

11. Ia 2 Petelo 3:​9, he koʼe ʼe kataki fualoa ia Sehova ia ʼaho nei?

¹¹ ʼE kataki fualoa ia Sehova ia ʼaho nei. ʼE atalitali ki te temi ʼae kua ina fakatuʼutuʼu ke ina pulihi ai te malama ʼaeni. He koʼe ʼe kataki fualoa? “He ʼe mole loto ia ke fakaʼauha he tahi, kae ʼe loto ia ke kaku te hahaʼi fuli ki te fakahemala.” (Lau ia 2 Petelo 3:9.) ʼE ʼaoga koa te kataki fualoa ʼa Sehova? ʼEi. Neʼe feala ai ke fakaovi te toko lauʼi miliona hahaʼi fakamalotoloto kia te ia. Pea ʼe tou fakaʼamu fuli ke fai feia te tokolahi. Kae ʼe ʼi ai pe te tuʼakoi ʼo te kataki fualoa ʼo Sehova. ʼE ʼofa Sehova ki te hahaʼi, kae ʼe mole ina tuku anai ke hoko atu tanatou agakovi. ʼE ina pulihi anai natou.​—Hap. 2:3.

12. ʼE faʼifaʼitakiʼi feafeaʼi e Sesu te kataki fualoa ʼo Sehova?

¹² ʼE faʼifaʼitakiʼi e Sesu tana Tamai. ʼE faʼifaʼitakiʼi e Sesu te kataki fualoa ʼo Sehova talu mai ni lauʼi taʼu. Koia ʼe logo pe ki te ʼu fasituʼu ʼae ʼe fakamafola e Satana ʼo ʼuhiga mo Sehova pea mo ʼana kaugana agatonu. (Sen. 3:​4, 5; Sopo 1:11; Fkha. 12:10) Pea ʼe toe sio ki te ʼu mamahi ʼe tau mo te tokolahi. ʼE mahino ia kua ina ʼamusia age “ke ina maumauʼi te ʼu gaue ʼa te Tevolo.” (1 Soa. 3:8) He koʼe ʼe kataki fualoa ia Sesu ke hoki fakagafua age e Sehova ke ina maumauʼi te ʼu gaue ʼa Satana? Heʼe agavaivai pea ʼe ina iloʼi ko Sehova ʼae ʼe tonu ke ina fakatuʼutuʼu te temi ʼae ka hoko ai te fakaʼosi.​—Gaue 1:7.

13. Neʼe kataki fualoa feafeaʼi ia Sesu ki ʼana apositolo, pea kotea tona tupuʼaga?

¹³ ʼI te kei nofo ʼa Sesu ʼi te kele, neʼe toe kataki fualoa ki ʼana apositolo. Neʼe natou fihi tuʼumaʼu pe ko ai ʼae ʼe lahi age ia natou. Kae neʼe mole lotovaivai ia Sesu. Neʼe hoko atu pe tana kataki fualoa. (Luka 9:46; 22:​24-27) Neʼe tui papau ʼe natou fai anai ni fetogi pea mo natou liliu ʼo agavaivai. ʼE ke to tuʼumaʼu pe koa ki hou vaivaiʼaga? ʼE mahino ia ʼe ke fiafia lahi ʼi tau fakalogo ki he Hau ʼe agavaivai mo kataki fualoa.

14. ʼE feafeaʼi hatatou kataki fualoa?

¹⁴ ʼE feafeaʼi hatatou faʼifaʼitakiʼi ia Sehova? Kapau ʼe tou maʼu “te manatu ʼa Kilisito,” ʼe tou manatu anai ohage ko Sehova pea mo faʼifaʼitakiʼi tana aga. (1 Ko. 2:16) ʼE feafeaʼi hatatou mahino lelei age ki te manatu ʼa Kilisito? ʼE tonu ke tou lau tuʼumaʼu te ʼu hisitolia ʼo te maʼuli ʼo Sesu ʼae ʼe tuʼu ʼi te Tohi-Tapu. Pea ka tou ʼosi lau he fakamatala, tou toʼo he temi ke tou fakakaukauʼi pe kotea ʼae neʼe fai e Sesu pea kotea tona tupuʼaga. Pea ʼe tonu ke tou kole kia Sehova ke tokoni mai ke tou agavaivai mo kataki fualoa ohage ko Sesu. Koia, ka tou maʼu te manatu ʼa Kilisito, pea ʼe feala ʼaki te temi ke tou faʼifaʼitakiʼi lelei age ia totatou ʼAtua, ʼo tou kataki fualoa ki ʼotatou tehina mo tuagaʼane pea mo tatou totonu.​—Mat. 18:​26-30, 35.

ʼE FAKAMAʼUHIGAʼI E SEHOVA TE KAU AGAVAIVAI

15. Neʼe fakaha feafeaʼi e Sehova ʼe ʼofa ʼi te kau agavaivai? (Pesalemo 138:6)

¹⁵ Lau ia Pesalemo 138:6. Ko he pilivilesio maʼa te kau agavaivai moka tokagaʼi natou e te Tuʼi ʼAliki ʼo te ʼatulaulau. ʼI te temi muʼa, tokolahi natou neʼe mole faʼa tokagaʼi kae neʼe fakamaʼuhigaʼi natou e Sehova. ʼE mole tou iloʼi ʼihi ia natou ʼaia kae neʼe fakatuʼu e Sehova ʼonatou higoa ʼi te Tohi-Tapu. Ohage la, neʼe takitaki e Sehova ia Moisese ke ina tohi te higoa ʼo he fafine taupau, ko Tepola, ʼae neʼe maʼuli ʼi te temi ʼo te ʼu pule famili ko Isaake mo Sakopo. Neʼe gaue agatonu maʼa te ʼu famili ʼaia lolotoga taʼu ʼe 125. Mole lahi te ʼu meʼa ʼe tou iloʼi ʼo ʼuhiga mo te fafine agatonu ʼaia, kae neʼe loto e Sehova ke fakaha ʼi te Tohi-Tapu neʼe ʼofainaʼi ʼaupito ia ia. (Sen. 24:59; 35:​8, kiʼi nota) Hili ki ai ni taʼu, neʼe filifili e Sehova ia te tupulaga ko Tavite, ʼae neʼe tauhi manu, ke liliu ko he hau ʼo Iselaele. (2 Sam. 22:​1, 36) Hili pe te tupu ʼa Sesu, neʼe fakamaʼuhigaʼi e Sehova ia he ʼu tagata tauhi ovi. Neʼe ina fekauʼi ifo he ʼaselo ke ina ʼuluaki fakaha kia natou kua tupu te Mesia ʼi Petelehemi. (Luka 2:​8-11) Pea ʼi te ʼave ʼo Sosefo mo Malia ia Sesu ki te fale lotu, neʼe fakamaʼuhigaʼi e Sehova ia Simeone mo Ana, ʼae neʼe kua matutuʼa, ke nā sisio ki siʼona ʼAlo. (Luka 2:​25-30, 36-38) ʼEi “ ʼe tokagaʼi e Sehova te kau agavaivai, logo la tona maʼoluga.”

16. ʼE faʼifaʼitakiʼi feafeaʼi e Sesu te faʼahiga tokaga ʼa tana Tamai ki te hahaʼi?

¹⁶ ʼE faʼifaʼitakiʼi e Sesu tana Tamai. ʼE hage pe ia Sesu ko tana Tamai, he neʼe ina fakamaʼuhigaʼi ia natou ʼae neʼe mole tokagaʼi. Neʼe ina akoʼi te ʼu moʼoni ʼo ʼuhiga mo te Puleʼaga ʼo te ʼAtua ki ni hahaʼi neʼe ‘mole ako pea neʼe mole maʼuhiga.’ (Gaue 4:13; Mat. 11:25) Neʼe toe fakamalolo e Sesu te kau mahaki. Kae neʼe ina toe faigaʼi ke logoʼi e natou ʼaia honatou ʼofainaʼi mo honatou fakaʼapaʼapaʼi. (Luka 5:13) ʼI te po ʼi muʼa ʼo tona mate, neʼe ina fufulu te ʼu vaʼe ʼo ʼana apositolo. Neʼe ko he gaue neʼe tonu ke fai e he tagata faifekau. (Soa. 13:5) Pea ʼi muʼa ʼo te hake ʼa Sesu ki selo, neʼe ina fakamaʼuhigaʼi ʼana tisipulo fuli, ʼo kau ai mo tatou, he neʼe ina tuku age he gaue maʼuhiga ke natou fai, ʼae ko te tokoni ki te hahaʼi ke natou maʼu ia te maʼuli heʼe gata.​—Mat. 28:​19, 20.

17. ʼE feafeaʼi hatatou fakamaʼuhigaʼi ʼihi? (Vakaʼi mo te pāki.)

¹⁷ ʼE feafeaʼi hatatou faʼifaʼitakiʼi ia Sehova? ʼE tou fakamaʼuhigaʼi te hahaʼi ʼo tou fakamafola kia natou fuli te logo lelei, tatau aipe tonatou haʼuʼaga, tanatou gaue, tonatou lanu, pe neʼe natou ako. Pea ʼe tou fakamaʼuhigaʼi ʼotatou tehina mo tuagaʼane ʼo tou fakaʼuhiga natou ʼe natou maʼoluga age ia tatou, tatau aipe pe kotea ʼotatou fealagia peʼe ko tatatou gaue ʼi te kokelekasio. (Flp. 2:3) ʼE fiafia ia Sehova moka sio mai ʼe tou agavaivai pea mo tou ʼuluaki fakamaʼuhigaʼi ʼihi ʼaki tatatou fai te ʼu faʼahi ʼaia pea mo ʼihi atu aluʼaga.—Loma 12:10; Sofo. 3:12.

18. He koʼe ʼe ke fia faʼifaʼitakiʼi te agavaivai ʼa Sehova?

¹⁸ Kapau ʼe tou faiga ʼo faʼifaʼitakiʼi te agavaivai ʼo tatatou Tamai ʼofa ʼae ʼi selo, ʼe faigafua age anai te fakaovi mai ʼa ʼihi, pea ʼe toe lahi age anai tatatou fakapotopoto mo tatatou kataki fualoa. Pea ʼe tou fakamaʼuhigaʼi anai ʼihi ohage ko tona fai e Sehova. Koia tou manatuʼi, ka tou faiga malohi ke tou faʼifaʼitakiʼi totatou ʼAtua agavaivai, ʼe tou liliu anai ʼo ‘maʼuhiga ʼi ʼona mata.’​—Esa. 43:4.