Te mwaane ae te roro n rikirake ae matakuakinia aomata aika tabe n rin n te Tabo n Taromauri

AIA TITIRAKI ROORO N RIKIRAKE

E Aera Ngkai Ti Riai ni Kaea te Taromauri n te Tabo n Taromauri?

A tataromauri Ana Tia Kakoaua Iehova uatai n te wiki n aia Tabo n Taromauri. Tera ae riki ikanne, ao ko na kangaa ni kakabwaiaaki ngkana ko kaea?

Tera ae riki n te Tabo n Taromauri?

Te Tabo n Taromauri boni ngaia nnera n reiakini baika boto i aon te Baibara. Ko kona ni buokaki iai:

n reiakina te koaua ibukin te Atua.
n ota n ae nanonaki ni baika riiriki ngkai.
n riki bwa te aomata ae raoiroi riki.
ni kuneia raoraom ni koaua.

Ko ataia? E mamaroroakinaki riki Ana Tautaeka n Uea te Atua n Aia Tabo n Taromauri Ana Tia Kakoaua Iehova.—Mataio 6:9, 10; 24:14; Ruka 4:43.

E aera ngkai ko riai ni kaea?

Ko na buokaki n rongorongo ake iai. Booto n reirei man te Baibara ake a maroroakinaki n aia taromauri Ana Tia Kakoaua Iehova, a na buokiko ni “karekea te wanawana.” (Taeka N Rabakau 4:5) Nanon anne, e boni kona te Baibara ni buokiko ni karaoi motinnano aika raraoi ni maium. E kona naba ni buokiko ni kaekai titiraki aika kakawaki aika irekereke ma te maiu, n aron:

Aika tabeua atuni kabwarabwara aika kakaraoaki n ara taromauri n te wikeen:

E Aera Bwa Ti Riai ni Kariaia Kairakira n te Baibara?
Ko na Karekea Mai ia Buokam n Tain te Karawawataaki?
Te Bwai ae Karaoia Ngkai Ibukira Ana Tautaeka n Uea te Atua.

“E kaea ara taromauri raou n reirei temanna. E tekateka i rarikiu ma au utu ao ti ibuobuoki ara boki ma ngaia. E tuangai imwina bwa e rangi n anaaki nanona n aia kaeka aomata ake a anga. E taku naba bwa akea booki n reirei n aron aikai n ana taromauri.”—Brenda.

Ko ataia? E aki kanrin te roko n aia tabo n taromauri Ana Tia Kakoaua Iehova, ao akea te karemwangko iai.

Ko na kaungaaki iai. E taekinaki n te Baibara teuana bukina ngkai a ikoikotaki Kristian bwa a na ‘kaungaia i marenaia.’ (Ebera 10:24, 25) E kabebetenano te ikoikotaki ma aomata aika moanibwaia te Atua ao tabemwaang, n te aonnaba ae a tii tatabeakinia i bon irouia kaaina.

“Ngkana e rangi ni kakua au bong teuana, I kona n nanokawaki ao n rawawata nanou, ma a manga kabebeteai naake n te Tabo n Taromauri. Ngkana I oki man te taromauri, I a kukurei riki ao ni manga tauraoi nakon te bong are imwina.”—Elisa.

Ko ataia? E raka i aon 120,000 aia ekaretia Ana Tia Kakoaua Iehova ni katobibia te aonnaba, ao a ikotaki n taabo aika raka i aon 60,000. E katautauaki ni katoa ririki bwa tao 1,500 Taabo n Taromauri aika kateaki, ni kaitaraa rikirakeni mwaitiia aomata aika kaea te taromauri.a

Aia taeka tabonrorom

“Ngke I kauarinan, ao iai raou n reirei ae irirai nakon ara taromauri tabeua, ao e anaaki nanona n noraia aomata aika kakaokoro aia ririki ni maiu, aika kaai n ikotaki n reiakina te Baibara. N taai aika tibwa nako, ao e kaea naba te taromauri au bwaoti, ao e rangi ni mimi ngkai e rangi ni korakora kabonganaan iai te Baibara. Noran ana kakaitau ibukin te taromauri e a karikirakea riki au kakaitau!”—Jessica.

“I noria bwa e totoki tabeaiangau ma raraomau ni katoabong, n taiani bobotaki n taromauri. Ti reiakinaki iai arora ni karekea te maiu ae manena, n riki bwa te aomata ae raoiroi riki, ao a bati riki. I aki toki ni kitana te Tabo n Taromauri ma te ungannano ao te kabebeteaki.”—Timothy.

“E taku te mwaane temanna imwina riki, ae I kaoia nakon te taromauri: ‘I bon tii roko bwa N na nora kairuan ami koaua. Ma n tokin te tai, bon au koaua aika kairua!’ E anaaki naba nanona n aia akoi Ana Tia Kakoaua Iehova. E taku: ‘E ngae ngke I a tibwa kaitiboo ma ngkami, ma kam karikai bwa temanna ae kam a kamani kinaa i nanon ririki aika bati!’”—Jacob.

“Iai taai ake I tataku iai, ‘E bwara ao I a boni boonako naba.’ Ma ngke e boo te taromauri, ao e a bua naba te namakin anne. Imwin te taromauri, I a kakaraki ma aomata ao I a aki uringnga bwa e aera ngke I a namakina arei. Ngke arona bwa I aki roroko n te taromauri, ao a na bon aki reke raoraou ni koaua aika ngkai.”—Madison.

a Ibukini kakaaean te tabo, nakon “Aia Bobotaki n Taromauri n te Ekaretia Ana Tia Kakoaua Iehova” ao kotea “Kakaaea te Tabo ae Kaan ma Ngkoe.”