AIA TITIRAKI ROORO N RIKIRAKE
na Kangaa te Baibara ni Buokai?—Mwakoro 1: Ukeuke n Reirei n Am Baibara
“I kataia ni wawareka te Baibara ma e a tei nangin ananauna!”—Briana, 15.
Ko namakina naba anne? E kona ni buokiko te kaongora aei!
E aera ngkai e riai ni warekaki te Baibara?
E kabotu iaiangoani warekan te Baibara? Ngkana eng, e bon ota te aba iai. Ko bae n iangoa te Baibara bwa te boki ae rangi ni matenten, e uarereke manna ao akea taamneina. E aki rangi n anainano n aron taiani birim ao taamnei!
Ma iangoia n aron aei: Ngkana ko kunea te ati ae bubura ae bwain rimoa ae onrake ni kaubwai aika kakawaki, tiaki bwa ko na rangi ni kan ataa kanoana?
Te Baibara bon ai aron te ati ae onrake ni kaubwai aika kakawaki. E bati i nanona baika rangi ni kakawaki aika kawanawanako ni buokiko bwa
Ko na karaoi motinnano aika raoiroi
E na nakoraoi am reitaki ma am karo
Ko na karekeia raoraom aika raraoi
Ko na tokanikai i aon rawawatam
E kangaa te boki nikawai aei ni manena n ara bong aikai? Ibukina bwa “e kairaki korean te Koroboki ae Tabu ni kabane iroun te Atua.” (2 Timoteo 3:16) E nanonaki n anne bwa taeka n reirei aika n te Baibara a boni kona n onimakinaki.
Te Baibara bon te ati ae iai i nanona kaubwai aika kakawaki aika kawanawana te aba
Tera arou ni wareka te Baibara?
Te anga teuana boni warekana mai moana ni karokoa banena. Ko kona n ataa iai te rongorongo ae bwanin ae n te Baibara. A bati aanga ibukini warekan te Baibara. Iangoi katoto aika uoua:
Ko kona ni wareki bokin te Baibara aika 66 mai moana ni karokoa banena, ni moa mani Karikani Bwaai nakon Te Kaotioti.
Ko kona ni wareka te Baibara ni kaineti ma tain rikini bwaai n te rongorongo.
Te Bwai n Ibuobuoki: N te Bukinibaa A7 n te Rairai ae te Aonnaba ae Boou ao a karinanaki iai baika kakawaki aika riki ni maiun Iesu i aon te aba ni kaineti ma tain rikia.
Te anga ae te kauoua ibukini warekan te Baibara, bon rinean te rongorongo teuana ae kaineti ma am kangaanga. N te katoto:
Ko kani kakaaeia raoraom aika kona n onimakinaki? Wareka rongorongon Ionatan ao Tawita. (1 Tamuera, mwakoro 18-20) Imwina ao kamanena te beeba ibukin te reirei ae “How to Find Loyal Friends” n nori iai reirei aika manena man te rongorongo anne.
Ko kani kakorakorako n rarawa nakon te kariri? Wareka rongorongon Ioteba n rarawa nakon te kariri. (Karikani Bwaai, mwakoro 39) Imwina ao kamanena te beeba ibukin te reirei ae “How to Resist Temptation . . . Joseph—Part 1” ao “Falsely Accused! Joseph—Part 2” n nori iai reirei aika manena man te rongorongo anne.
Ko kan reiakina aron te tataro ni kona ni buokiko? Wareka rongorongon Neemia. (Neemia, mwakoro 2) Imwina ao kamanena te beeba ibukin te reirei ae “God Answered His Prayer” n nori iai reirei aika manena man te rongorongo anne.
Te Bwai n Ibuobuoki: Ngkana ko wareka te Baibara, taraia raoi bwa e na rau am tabo ae ko mena iai bwa ko aonga n iaiangoa raoi te baere ko warekia.
Te anga ae te katenua ibukini warekan te Baibara, bon rinean te rongorongo teuana, ke te areru. Warekia ao imwina iaiangoa aron irekerekena ma ngkoe. Imwin am wareware, titirakiniko i bon iroum ni kangai:
E aera ngkai e karina aei Iehova n te Baibara?
Tera ae oti iai ni kaineti ma aroaron Iehova ke arona ni karaoi bwaai?
N na kangaa ni maiuakina te rongorongo aei?
Te Bwai n Ibuobuoki: Katea tiam. Korea te bong ae ko kani moana iai wawarekan te Baibara.