Kuti Muyezgi Yesu, Mukhumbika. . .

KUJA ALISUNGU

Chifukwa chakuti Yesu wenga wakufikapu wakumananga ndi masuzgu ngo ŵanthu akumananga nangu cha. Chinanga kuti venga viyo, iyu waŵachitiyanga lisungu ŵanthu. Yesu wazomerezanga kuleka kuchita vo iyu wachitanga kuti wawovyi ŵanthu ndipu nyengu zinyaki wachitanga vinandi kuluska vo wakhumbikanga kuchita. Iyu wachitanga vosi ivi, chifukwa chakuti wachitiyanga ŵanthu lisungu. Kuti muwoni mo Yesu wangulongore jalidu lenili, ŵerengani Mutu 32, 37, 57, 99.

KUJA AKUCHEZEKA

Munthu weyosi kaya waje mwana pamwenga mura, wasuzgikanga cha kucheza ndi Yesu chifukwa chakuti iyu wenga wambula kunyada kweniso wajiwonanga kuti ngwapachanya cha. Ŵanthu awonanga kuti Yesu wayanjanga kucheza nawu ndipu venivi vaŵachitiskanga kuti nawu afwatukengi asani ŵe limoza ndi Yesu. Kuti muziŵi mo Yesu wachitiyanga vinthu ndi ŵanthu, wonani Mutu 25, 27, 95.

KWANJA KUPEMPHERA

Nyengu zosi Yesu wapempheranga kwa Awisi ndi mtima wosi we kwaku yija kweniso asani we ndi akusambira ŵaki. Iyu wapempheranga pa nyengu yachakurya pe cha kweni wapempheranga so pa vakuchitika vakupambanapambana. Yesu wapempheranga kuti wawongi Awisi ndipuso kuti waŵathamiki. Iyu wapempheranga so wechendasankhi vinthu vakukhumbika ukongwa kuti Chiuta wamulongozgi. Wonani vakuyeruzgiyapu mu Mutu 24, 34, 91, 122, 123.

KULEKA KUJA AKUJIYANJA

Nyengu zinyaki, Yesu watondekanga kupumuwa kweniso kuchita vinthu vo iyu wakhumbanga kuti wawovyi ŵanthu anyaki. Iyu wenga wambula kujiyanja. Pa vo iyu wachitanga, wakutilongo chakuwoniyapu chamampha ukongwa cho isi titenere kuyezga. Kuti muwoni mo Yesu wangulongore jalidu lenili, ŵerengani Mutu 19, 41, 52.

KUGOWOKE ANYINU

Yesu wasambizanga ŵanthu kuti akhumbika kugowoke anyawu. Iyu wasambizanga ŵaka ŵanthu cha, kweni nayu walongonga jalidu lenili asani wachita vinthu ndi akusambira ŵaki kweniso ŵanthu anyaki. Kuti muwoni mo Yesu wachitiyanga vinthu ndi ŵanthu kweniso kuti muziŵi vo mungachita kuti mumuyezgi, ŵerengani Mutu 26, 40, 64, 85, 131.

KUJA AKUJIPEREKA

Malemba ngangukambiya limu kuti Ayuda anandi azakumukana Mesiya ndipuso kuti arwani ŵaki azakumubaya. Venivi vatingi vichitiskengi Yesu kuti wachiti vinthu vimanavi pakuwovya ŵanthu. Kweni Yesu wangujipereka ukongwa kuti wawovyi ŵanthu kuti asopengi Chiuta munthowa yo iyu wazomereza. Yesu wakupereka chakuwoniyapu chamampha ukongwa kwa akusambira ŵaki wosi kuti atenere kuja akujipereka chinanga kuti akumana ndi masuzgu pamwenga ŵanthu atiŵasuska. Kuti muwoni mo Yesu wangulongore kuti ngwakujipereka, ŵerengani Mutu 16, 72, 103.

KUJA AKUJIYUYUWA

Yesu wenga wapachanya ukongwa kuyeruzgiya ndi ŵanthu munthowa zinandi. Mwakuyeruzgiyapu, iyu waziŵanga vinthu vinandi kweniso wenga ndi zeru kuphara munthu weyosi. Chifukwa chakuti iyu wenga wakufikapu, waŵanaŵananga ndipuso wachitanga vinthu kuphara munthu weyosi. Chinanga kuti venga viyo, iyu wenga wakujiyuyuwa ndipu wateŵetiyanga ŵanthu anyaki. Kuti muwoni mo Yesu wangulongore jalidu lenili, ŵerengani Mutu 10, 62, 66, 94, 116.

KUJA AKUZIZIPIZGA

Nyengu zosi Yesu walongonga kuti ngwakuzizipizga pakuchita vinthu ndi akusambira ŵaki kweniso ŵanthu anyaki asani atondeka kuyezga vo iyu wachitanga pamwenga kuchita vo wakambanga. Iyu wazizipizganga ndipu wawerezanga kuŵakambiya vo waŵasambiza kuti waŵawovyi kuja pa ubwezi ndi Yehova. Kuti muwoni mo Yesu wangulongore kuti ngwakuzizipizga, ŵerengani Mutu 74, 98, 118, 135.