Kumbi Chiuta Waliku Nadi?

Vo Bayibolu limuka

Hinya, Bayibolu lipereka ukaboni wauneneska wakulongo kuti Chiuta waliku nadi. Ilu lititichiska kuti tijengi ndi chivwanu mwaku Chiuta, mwakugomezga visambizu vaboza cha vo visopa visambiza kweni mwakugwiriskiya ntchitu ‘lusu lidu lakuŵanaŵana’ kweniso “kuwamu.” (Aroma 12:1; 1 Yohane 5:20, mazu ngamumphata) Wonani maukaboni nganyaki ngo Bayibolu likamba:

• Vinthu va muchilengedu vikupangika mwandondomeku ukongwa ndipu vilongo kuti kwe Mlengi. Bayibolu likamba kuti: “Mbuneneska kuti nyumba yeyosi ye ndi yo wakuyizenga, kweni Chiuta ndiyu wakuzenga vinthu vosi.” (Aheberi 3:4) Chinanga kuti fundu ya pa lemba ili njipusu kweni ŵanthu anandi wo akusambira ukongwa awona kuti njanthazi.a

• Mwakawi, taŵanthu tikhumbisiska kuziŵa chilatu cha umoyu widu. Mtima wenuwu utitichitiska kujivwa nge kuti te ndi nja, kweni nja yakukhumba chakurya chayichu cha. Bayibolu likamba kuti nja yeniyi ndi nja ‘yakukhumba kuziŵa Chiuta’ kweniso kumusopa. (Mateyu 5:3; Chivumbuzi 4:11) Mtima wakukhumba kuziŵa Chiuta wenuwu, mbukaboni wakuti Chiuta waliku nadi kweniso kuti iyu ndi Mlengi wachanju yo wakhumba kuti timuziŵi.—Mateyu 4:4.

• Mu Bayibolu mwe mauchimi ngo ngakulembeka kali ukongwa kweni ngafiskika pa nyengu yaki. Mauchimi ngenanga ngatitipaska ukaboni wanthazi wakulongo kuti ngakutuliya ku munthu munyaki yo we ndi nthazi ukongwa kuluska ŵanthu.—2 Peturo 1:21.

• 

  Ŵanthu wo alembanga Bayibolu aziŵanga vinyaki vakukwaskana ndi sayansi kuluska ŵanthu wo ŵengaku mu nyengu yawu. Mwakuyeruzgiyapu, ŵanthu anandi mu nyengu yakali, agomezganga kuti vinyama nge njovu, nguluŵi pamwenga ng’ombi ndivu vitovya kuti charu chapasi chikho. Mwakupambana ndi venivi, Bayibolu likamba kuti Chiuta ‘wakuning’ina charu chapasi mude.’ (Yobu 26:7) Bayibolu likamba so kuti charu chapasi ‘ntchakuzunguliya.’ (Yesaya 40:22) Ŵanthu anandi agomezga kuti ŵanthu wo angulemba Bayibolu aziŵanga fundu zenizi chifukwa chakuti Chiuta ndiyu waŵakambiyanga.

• Bayibolu limuka mafumbu nganandi ngakusuzga, mafumbu ngakuti asani munthu wangaleka kusaniya kwamuka kwakukhorweska, vingamuchitiska kuti wagomezgengi kuti kulivi Chiuta. Mwakuyeruzgiyapu, Bayibolu limuka mafumbu yanga: Asani Chiuta ngwachanju kweniso we ndi nthazi kuphara munthu weyosi, ntchifukwa wuli pacharu pachitika masuzgu kweniso vinthu viheni? Ntchifukwa wuli kanandi visopa vichitiska vinthu viheni mumalu mwa vinthu vamampha?—Tito 1:16.