Kosa la Bib i di su bann tatouaj ?
Sak la Bib i di
Dan la Bib, néna rienk in landroi i koz su tatouaj, dann Lévitik 19:28 : « Zot i doi pa fé tatouaj dési zot po. » Bondié la done komandman la bann Zisraélit, pou ké banna i rosanm pa bann pèp otour d’zot, ké té fé la mark lo non ou bien lo désin zot bann bondié, dési zot po (Détéronom 14:2). Mèm si bann krétien lé pa oblijé suiv bann loi Bondié la done bann Zisraélit, lé bien réfléchi kan mèm su lo prinsip ké néna dan la loi su tatouaj.
Èské in krétien i pé fé tatoué ali ?
Bann vèrsé la Bib la i pé èd anou pou réfléchi ladsi :
« Bann madam i doi abiy [...] in fason sinp » (1 Timoté 2:9). Prinsip la lé vré, tan pou bann bonom ké pou bann madam. Nou doi fé atansion bann santiman lé zot é pa tro fé romark anou.
Désèrtin i tatoué azot pou fé oir kisa zot i lé oubien pou démark azot ; néna dot, sé pou di, zot i fé sak zot i vé èk zot kor. Mé ala kosa la Bib i konsèy bann krétien : « Prézant zot kor kom in sakrifis ké lé vivan, sin é ké Bondié i pé aksèpté : in sèrvis sakré ké zot i of èk zot kapasité rézoné » (Romin 12:1). Ansèrv zot « kapasité rézoné » é domand azot poukosa zot i vé fé in tatouaj. Èské sé pou suiv la mod ? Pou fé mont ké zot i fé parti in group ? Mèt bien dan zot tèt ké zot tatouaj va dur pli lontan ké zot zidé. Si zot i réfléchi poukosa zot i fé sa, zot va gingn pran in désizion rézonab (Provèrb 4:7).
« Tout sak lé présé dann sak li fé, va vni pov » (Provèrb 21:5). Souvandéfoi, sak i désid fé tatoué azot « lé présé dann sak [zot i] fé ». Zot i pran pa lo tan réfléchi bann konsékans ké sa nora plitar su zot frékantasion é zot travay. An plis ké sa, bann tatouaj i kout chèr, é pou tiré, sa i fé mal. Nou romark néna plizanpli zantropriz pou artir tatouaj, é bann zankèt i amont bien ké in ta an parmi sak i fé tatouaj su zot, i rogrèt an fin d’kont.