¿Úsïnksï iámindu relijionicha eskachi Tata Diosïni andarhieraaka?

Ambe enga Biblia uandajka

Nómbe, jimbokaksï no májkueniska iámindu relijionicha. Biblia uandasïndi máru ejempluecha engaksï xarhatajka eska Tata Diosï no jaiapanhentasïnga na engaksï máru kʼuiripuecha kómarhijka imani. Ju je exeni tsimani ambe engaksï relijionicha újka ka enga Tata Diosï no jaiapanhentajka.

Relijionicha engaksï kómarhiajka diosï no jurhimbitichani

Biblia uandasïndi eska para no ma ambe marhuasïnga kómarhiani diosïchani engaksï no jurhimbitika (Jeremías 10:3-5; 16:19, 20). Tata Diosï Jeobaa arhispti ireta Israelini ióntki anapuni: “Nóri jatsiska para máteru diosïchani kómarhiani, solu jíndeni” (Éxodo 20:3, 23; 23:24). Tata Diosï Jeoba kánikua ikiaspti engaksï israelitecha máteru diosïchani kómarhiapka (Números 25:3; Levítico 20:2; Jueces 2:13, 14).

Útasï Tata Diosï májkueni no sési exesïndi engaksï kʼuiripuecha kómarhiajka imeechani engaksï diosï arhikateeka (1 Korintu 8:5, 6; Galasia 4:8). Tata Diosï arhiasïndi imeechani engaksï uéjka imani marhuakuni eskaksï nóteru kúnguarhiakia imeechani jingoni engaksï relijionirhu no jurhimbitirhu jaka. Bibliarhu uandasïndi: “Késtakukua je no jakajkutichani ka jarhariantsï” (2 Korintu 6:14-17). Tata Diosï no ini ambe uandapirindi engaksï iámindu relijionicha májkuenipiringa ka engajtsïni iáminduecha andarhiterapiringa imani.

Relijionicha engaksï kómarhijka Tata Diosïni peru no ísï eska ima na jaiapanhentajka

Jiáni engaksï israelitecha uékapka Tata Diosï Jeobani kómarhini májkueni eskaksï na ueenga máteru relijionicha engaksï diosï no jurhimbitichani kómarhiauenga, Tata Diosï Jeoba méntku no sáni jaiapanhentaspti (Éxodo 32:8; Deuteronomio 12:2-4). Jesúsi uandaspti eska kánikua no sési jarhaspka na engaksï jiáni anapu relijioniri orhejtsïkuticha kómarhienga Tata Diosïni, jimbokaksï uékasïreenga ísï xarharani enajkiksï sési marhuakuenga Tata Diosïni, peru no ísïispti jimbokaksï no úsïreenga ambe enga sánderu jukaparhakuepka Leirhu, enga jindeepka “jurhimbikua jingoni jámani, pʼamojpini ka mintsinharhikueni” (Mateo 23:23, Traducción del Nuevo Mundo).

Ka májkuenisti iásï, relijioni engajtsïni andarhiterajka Tata Diosïni, jindeesti ima enga iámindu ambe újka eska Biblia na uandajka (Juanu 4:24; 17:17; 2 Timoteo 3:16, 17). Jimboka ima relijionicha engaksï no jorhentpijka ísï eska Biblia na uandajka, úsïndiksï eskaksï kʼuiripuecha no uaaka andarhieraaka Tata Diosïni. Uánikuaksï eratsesïndi eska Biblia meru jorhentpisïnga Trinidadiri ambe, eska alma no uarhisïnga ka eska Tata Diosï kastigariuasïnga kʼuiripuechani infiernurhu. Peru imeecha engaksï diosï no jurhimbitichani kómarhiauenga, imeechaksïsï ueenapti ini ambe jakajkuni. Ísï jimbo, imeecha engaksï uandajka eska kómarhisïnga Tata Diosïni peruksï ini ambe jakajkuni, nóksï úsïndi andarhierani Tata Diosïni jimbokaksï orheta peerasïnga kʼuiripuecheri pʼindekuecha ka imeecheri jakajkukuecha ka no ambe enga Tata Diosï uéjka (Markusʌ 7:7, 8).

Ístu, Tata Diosï kurhunhiasïndi imani relijionichani engaksï Biblieri ambe jorhentpijka peruksï no jánguarhintani ísï úni (Titu 1:16). Jurhimbiti relijionijtsïni jarhuatasïndi parachi Tata Diosïni andarhierani ka parachi imani ambe úni enga sési jaka ka no solu jindeesti para kʼuínchikua ambe úni jámani o máteru járhati pʼindekuechani. Pori ejemplu, Biblia uandasïndi: “Enga ma kʼuiripu exekuarhijka eska Diosïni janhanharhisïnga, ka no pʼímukukuarhini, jandiajku kʼarhakuarhixati, ka ískuesti enga uandajka eska janhanharhisïnga Diosïni. Para sésimindu janhanharhini Diosï Taatini nómbe kʼamanharhintskua jingoni, jindeesti para jarhuataani uerandi jupindichani, ka ístu tsïndichani engaksï no sési úkuarhinchani jarhajka, ka ístu para kuájpikuarhini para nómbe kʼamanharhintskua jatsini parhakpini anapu ambe jimbo” (Santiagu 1:26, 27).