Ruhanga Aroho?

Ekyokugarukamu kuruga omu Baibuli

Ego, Baibuli etuha obwakaiso oburukwolekera kimu ngu Ruhanga aroho. Etwekambisa kwombeka okwikiriza kwaitu omuli Ruhanga hatali omu kwikiririza omu ntekereza z’amadiini baitu kurabira omu kukozesa ‘obusobozi bwaitu obw’okuteekereza.’ (Abarumi 12:1; 1 Yohana 5:20) Wetegereze ensonga zinu ezirukusigikirra ha Baibuli:

• Okubaho kw’ensi n’iguru ebinyakutekaniziibwe kurungi, nikwoleka ngu haroho omuhangi. Baibuli egamba eti: “Baitu enju yona eyombekwa omuntu; baitu ayayombekere byona nuwe Ruhanga.” (Abaheburaniya 3:4) N’obukiraaba ngu ekintu kinu kyanguhire kwetegereza, abantu baingi abasomere muno kibagumira kukyetegereza.a

• Nk’abantu, tuzaarwa twine ekyetaago ky’okugonza kwetegereza ekigendererwa ky’obwomeezi kandi ebyetaago by’omubiri tibisobora kumaraho ekyetaago kinu. Kinu nikyo Baibuli eyeta ‘kuseega omu by’omwoyo,’ kandi nikitwarramu kugonza kumanya Ruhanga n’okumuramya. (Matayo 5:3; Okusuku’rwa 4:11) Ekyetaago kinu eky’eby’omwoyo tikituha obwakaiso ngu Ruhanga aroho kwonka, baitu kyoleka ngu ali Omuhangi waitu ow’okugonza kandi n’agonza tuhikiirize ekyetaago eki.​—Matayo 4:4.

• Omu Baibuli harumu obunabbi bwingi obwarangirwe ebyasa bingi enyuma kandi hanyuma bwahikirizibwa nk’oku bwali burangirwe. Okuhikirizibwa kw’obunabbi obu omu mulingo gw’onyini bwarangirwemu, nikyoleka ngu bukaruga hali omuntu ow’arukukirayo amaani.​—2 Petero 1:​21.

• 

  Abahandiiki ba Baibuli baali bamanyire ebirukukwata ha sayansi kukira abantu abandi abaali baroho omu kasumi nuko kamu. Ekyokurorraho, omu busumi obwa kara, abantu baikirizaaga ngu ensi ekaba ikaliire ha Kisoro nk’enjojo, empunu ey’omu kisaka, rundi ente ey’erukulima. Kwahukanaho, Baibuli egamba ngu Ruhanga “ahanika ensi nambere hataroho kantu.” (Yobu 26:7) Ekindi, Baibuli eyongera esoborra kurungi ngu ensi “eyekulingiriire.” (Isaya 40:22, obugambo obuli hansi omu Douay Version) Abantu baingi behurra ngu abahandiiki ba Baibuli baine kuba baatungire obutumwa kuruga hali Ruhanga kusobora kwetegereza kurungi ekintu kinu.

• Baibuli egarukamu ebikaguzo bingi ebigumire, kandi kakuba bitagarukwamu kurungi, nibisobora kuleetera omuntu kutandika kwikiriza ngu Ruhanga taroho. Ekyokurorraho: Ruhanga obw’araaba aine engonzi n’amaani agarukukirayo, habwaki haroho okubonabona n’obubi omu nsi? Habwaki obwire oburukukira obwingi amadiini galeetereza ebintu ebibi kubaho omu kiikaro ky’ebirungi?​—Tito 1:​16.